Nisy mosary ta Israely tan̈y ke nisy Israelita araiky, Naomy an̈arany, nifindra tamy tany Moaba. Izy ndreky vadiny, baka io zanany aroe lahy nifindra tan̈y. Koa fa elaela, naty vadiny Naomy. Zanany lelahy aby in̈y nanambady man̈angy Moabita. Rota ndreky Orpa an̈arandro. Tafara tatỳ, naty koa zanaka Naomy aroe lahy in̈y.

Naomy koa fa naharen̈y fa efa tsisy mosary eky ta Israely tan̈y, izy nanapakevitry himpody tan̈y. Rota ndreky Orpa niaraka taminany. Ke iro koa fa tamy lalan̈a, Naomy nivolan̈a tamindro: ‘Anaro aroe vavy ten̈a tsara fan̈ahy tamindry zanako ndreky taminaka. Anaro tiako mbala hahita vady ndraiky. Ke modia a Moaba an̈y fo anaro.’ Iro nivolan̈a taminany: ‘Tianay anao! Zahay tsy hiala anao.’ Naomy mbala nan̈iraka iro himpody fo. Farany amy zay Orpa nody, fa Rota tsy nandeha. Naomy nivolan̈a taminany: ‘Orpa kony efa loso nimpody aminy olonany ndreky amindro zan̈aharinany aby io. Mindao man̈araka izy, mindao mody amy antran̈ony mamanaro an̈y.’ Rota ndraiky nivolan̈a: ‘Zaho tsy hiala anao. Firenenanao firenenanaka, ndreky Zan̈aharinao hanjary Zan̈aharinaka.’ Akory eky nataony Naomy koa fa naharen̈y raha nivolan̈iny Rota zen̈y?

Rota ndreky Naomy navy ta Israely tan̈y, ke tamy zen̈y lera fandidian̈a vary. Tandraraiky Rota nandeha niasa tamy tanimbariny Boaza. Zanaka Rahaba Boaza io. Ren̈iny fa Rota io man̈angy moabita, ndreky tia mare Naomy. Ke izy nivolan̈a tamy piasanany aby io han̈ambela vary halainy Rota.

 Koa fa nody Rota harivanizio, nan̈ontany izy Naomy: ‘Taia ma anao niany niasa?’ Rota nivolan̈a: ‘Tamy tanimbariny lelahy zay, Boaza an̈arany.’ Naomy nivolan̈a taminany: ‘Boaza in̈y mbala havany vadiko. Miasà amy tanimbarinany an̈y fo miaraka amindro tsaiky man̈angy aby io, baka tsisy olo hikotran̈a anao.’

Niasa tamy tanimbariny Boaza fo Rota firaka asa didy vary vita. Hitany Boaza fa nazoto niasa ndreky ten̈a tsara toetry Rota. Tamy zen̈y, izikoa nisy lelahy araiky naty, iro ndreky vadiny koa tsy niteraka lelahy, havany mila manambady man̈angy io. Ke Boaza nanambady Rota. Iro niteraka lelahy, Obeda an̈arany. Izy nanjary dadilahiny Davida Panjaka. Ravoravo mare namany Naomy tamy zen̈y. Iro nivolan̈a: ‘Jehovah nan̈amia anao Rota, ke izy ten̈a nikarakara anao. Izioty koa anao mbala nahazo zafy. Ten̈a tsara fan̈ahy Jehovah e!