Olo koa fa manambady, loso fianakavian̈a vaovao. Ndray tiany mare babany ndreky reniny, tsy tokony hadin̈any fa vadiny tokony mbala ho tiany mandilatra iro io. Mety ho sarotro aminy havanaro sasany han̈eky zen̈y. Anao koa man̈araka toro lalan̈a amy Baiboly ao, ho hainao tsarabe mihavan̈a aminy havanao ndreky havany vadinao. Ho sambatra fo tokantran̈onaro.

KORAN̈INY BAIBOLY: “Hajà babanao ndreky reninao.” (Efesianina 6:2) Anao ndray efa be, anao mbala mila man̈aja raimandreninao fo. Vadinao koa karaha zen̈y. Izy mbala mila mikarakara raimandreninany. “Fitiavan̈a io tsy mialon̈o”, ke izikoa vadinao mifandray amy rafozan̈anao, aza mieritreritry fa rafozan̈anao tiatiany vadinao mandilatra anao.—1 Korintianina 13:4; Galatianina 5:26.

AKORY AN̈ANOVAN̈A ZEN̈Y?

• Tsy mety mivolan̈a karaha ty: “Ry havanao tsy man̈isy fotiny zaho foeky!”, na koa: “Mamanao tsiary tia raha ataoko!”

• Zahava lafy tsarany fitondrasany vadinao raimandreninany

KORAN̈INY BAIBOLY: “Zen̈y mahavy lelahy hiala babany ndreky reniny, baka io hitambatra amy vadiny, ke iroroe hanjary nofotro araiky.” (Genesisy 2:24) Anao ndray efa manambady, raimandreninao mety mbala mieritreritry anao io mbala tsaiky fo. Zen̈y mahavy iro mety hiditry lalin̈y amy raha momba tokantran̈onaro.

Anjaranaro fivadiany manapakevitry firaka aia anaro han̈araka volan̈a raimandreninaro, ke mila ambaranaro iro raha zen̈y. Anaro koa man̈ano zen̈y, tokony ho tsara fan̈ahy ndreky man̈aja iro fo, ndray anaro mentitry. (Ohabolana 15:1) Izikoa anao tsy man̈ambony ten̈a, tsara fan̈ahy, baka io mahalefidraha, anao hihavan̈a tsarabe aminy havanao ndreky havany vadinao.—Efesianina 4:2.

AKORY AN̈ANOVAN̈A ZEN̈Y?

• Izikoa hitanao fa havany vadinao miditry lalin̈y loatra amy vadian̈anaro, mizahava fotoan̈a mety hikoran̈ana zen̈y amy vadinao

• Anaro mila mitovy hevitry izikoa fa mandamin̈y raha manahiran̈a karaha zen̈y