FIANARAN̈A 9
Akory Hampasambatra Tokantran̈onao?
1. Nan̈ino ma vadian̈a vita soratra arapanjakan̈a mampasambatra tokantran̈o?
Jehovah nan̈amia vaovao tsara io Zan̈ahary sambatra, ke tokantran̈o jiaby koa tiany ho sambatra. (1 Timoty 1:11) Izy namoron̈o vadian̈a io. Mampasambatra tokantran̈o vadian̈a vita soratra arapanjakan̈a, fotony tsara tsaiky ankilany raimandreniny.
Zan̈ahary koa fa nan̈ano vadian̈a, izio tiany haharitry ela. Zen̈y mahavy vadian̈any Kristianin̈y tsy maintsy misoratra arapanjakan̈a. (Lioka 2:1, 4, 5) Olo koa fa manambady, tsy mila miaraka aminolo hafa eky. (Hebreo 13:4) Jehovah koa tsy tia olo misarabady amy raha tsisy dikany. (Malakia 2:16) Fijangajangan̈a zaraiky fo raha mety hisarahan̈a, baka io mahazo manambady olo hafa koa.—Vakia Matio 19:3-6, 9.
2. Akory ma hampifan̈araka olo fivadiany?
Jehovah koa fa niasa lelahy ndreky man̈angy, iro nataony hifan̈ampy. (Genesisy 2:18) Lelahy nataony hitariky an̈aty tokantran̈o. Dikanizen̈y, izy mamelon̈o ndreky mampianatra vadiny ndreky zanany raha momba Zan̈ahary. Izy mila ten̈a tia vadiny. Olo fivadiany tokony hifan̈aja ndreky hifankatia tsarabe. Iro io samy mety diso, ke mila mifandefitry fo, amy zen̈y tokantran̈ondro tsy ho ravan̈a.—Vakia Efesianina 4:31, 32; 5:22-25, 33; 1 Petera 3:7.
3. Mety ma misaraka hely izikoa misy raha manahiran̈a amy tokantran̈o?
Izikoa misy raha manahiran̈a amy tokantran̈o, tsara olo fivadiany miaraka mamaha izy ndreky mifanohan̈a. (1 Korintianina 13:4, 5) Baiboly tsy mandrisiky olo fivadiany hisaraka, izikoa fa misy raha manahiran̈a amy tokantran̈o.—Vakia 1 Korintianina 7:10-13.
4. Ino ma raha tiany Zan̈ahary ataony tsaiky?
Tsaiky jiaby tiany Zan̈ahary ho ravoravo. Ambarany iro raha tokony hatao, baka iro sambatra. Tiany iro han̈aja babandro ndreky mamandro, ndreky han̈araka jery tsarandro. (Kolosianina 3:20) Tiany Zan̈ahary koa iro ho ravoravo manompo izy ndreky man̈araka raha nataony Jesosy.—Vakia Mpitoriteny 11:9–12:1; Matio 19:13-15; 21:15-16.
5. Anaro raimandreny, akory ataonaro hampasambatra zanakanaro?
Anjaranaro raimandreny miantoko tran̈o, hanin̈y ndreky lambany zanakanaro. (1 Timoty 5:8) Baka zanakanaro ho sambatra tsarabe, anaro koa mila mampianatra iro raha momba Zan̈ahary. (Efesianina 6:4) Anaro mila tia Zan̈ahary, baka zanakanaro tia Zan̈ahary. Izikoa anaro fa man̈anatra zanakanaro, tokony hataonaro baka amy Baiboly, fotony zen̈y ten̈a mampisy jery iro.—Vakia Deoteronomia 6:4-7; Ohabolana 22:6.
Tsara koa anaro raimandreny mankasitraka raha tsara ataony zanakanaro. Tsaiky koa fa maditry, mila anarin̈y. (Ohabolana 22:15) Ndray izy man̈ano zen̈y, anaro tsy tokony hasiaka loatra na hamono zanakanaro, izikoa fa man̈anatra.—Vakia Kolosianina 3:21.
Vavolombelon̈o Jehovah nan̈ano boky maro man̈ampy raimandreny ndreky zanaka. Mifototro amy Baiboly fan̈azavan̈a jiaby amy boky aby io.—Vakia Salamo 19:7, 11.
Mety ho Tianao Koa
AKORY HANAN̈ANAO TOKANTRAN̈O SAMBATRA?
Areha Volan̈a Zan̈ahary Baka Tokantran̈onao Sambatra
Fan̈ontanian̈a aroe hampatsara tokantran̈onao.
AKORY HANAN̈ANAO TOKANTRAN̈O SAMBATRA?
Karakory Atao Izikoa Misy Raha Manahiran̈a?
Baka amy fomba fandaminanolo fivadiany raha manahiran̈a mety hahavy vadian̈andro tsy ho ravan̈a ndreky ho sambatra, na ho mora ravan̈a ndreky hampijaly.
