10. Fanambadian̈a io Fan̈amezan̈a Baka amy Zan̈ahary!
1 HATSARAN̈A BAKA AMY JEHOVAH VADIAN̈A IO
“Tady telo oson̈o tsy mora tapahin̈y.” —Mpitoriteny 4:12
Ino ma nahavy olo manambady?
-
Genesisy 2:18; Salamo 127:3; Ohabolana 5:18; Mpitoriteny 4:9, 10
Baka amy vadian̈a io azahoan̈a naman̈a mankahery ndreky toeran̈a tsara ikarakaran̈a tsaiky.
2 MAHAIZA MIFIDY VADY
“Hambarako anao lalan̈a tokony himboanao.” —Salamo 32:8
Ino raha mila dinihinao izikoa anao mitady vady?
-
1 Korintianina 7:39; 2 Korintianina 6:14
Hendry olo araiky izikoa mifidy olo mifantoko amy fanompoan̈a Jehovah.
-
1 Korintianina 7:36
Tsy tokony fan̈irian̈a han̈ano firaisan̈a mahavy olo araiky han̈iry hanambady, fa izy tokony efa mahavoafehy tsarabe fan̈irian̈anany.
-
1 Korintianina 7:28
Misy raha manahiran̈a aby amy fanambadian̈a jiaby io, ke aza man̈inofy.
3 LELAHY NDREKY MAN̈ANGY MANAMBADY SAMY AMINY ANDRAIKITRINANY
“Tsy tsara izikoa lelahy io tsisy naman̈a. Handeha han̈amboarako pitahitahy mifan̈araka aminany izy, hameno izy.”—Genesisy 2:18
Ino andraikitry namezany Jehovah amy lelahy ndreky man̈angy manambady?
-
Efesianina 5:23; 1 Timoty 3:1-7; 5:8
Lelahy manambady tokony hitariky fotoampivavahan̈any fianakavian̈a baka io hikarakara vadiny ndreky zanany aminy aranofo ndreky fihetsehampo. Izy koa mitariky fampianaran̈a ndreky man̈apetraka fitsipiky amy zanany.
-
Ohabolana 31:10-31; Romanina 7:2
Tokony hifandray tsarabe olo fivadiany. Man̈angy manambady tokony hanohan̈a hevitry vadiny ndreky hikarakara tokantran̈o. Tokony han̈ampy vadiny koa izy amy fampianaran̈a zanakandro.
-
Efesianina 5:33; Filipianina 2:4
Olo fivadiany samy tokony han̈ano raha hampasambatra tokantran̈ondro fa tsy samy man̈ano raha tiany hatao.
4 JEHOVAH AFAKA MAMPAHARITRY VADIAN̈ANAO
“Iroroe hanjary nofotro araiky fo.”—Genesisy 2:24
Ino raha mety hampaharitry vadian̈a io?
-
Ohabolana 3:5, 6; Matio 19:6
Tiany Jehovah haharitry vadian̈a io. Amiany torohevitry tsara momba izio atsika.
-
Salamo 130:3; Kolosianina 3:13
Olo fivadiany samy tokony handefitry amy fahalemen̈any tsiaraikiaraiky. Iro koa samy tokony han̈ambela adisovan̈a ndreky hizaha toetry tsarany vadiny fo.