RAHA VOLAN̈INOLO

Maro olo mieritreritry fa tsara man̈ano loka io, baka io tsisy maharatsy izio izikoa tsy sakanany fanjakana. Misy karazan̈a loterie sasany, fanjakana foeky nan̈amia fan̈ampian̈a arabola iro. Lan̈iany benefisy azo amy zay natao han̈ampian̈a vahoaka.

RAHA KORAN̈INY BAIBOLY

Baiboly tsy ten̈a mikoran̈a mivantan̈a momba loka. Kanefa misy toro lalan̈a maromaro ao ahitantsika akory hevitry Zan̈ahary momba izio.

Tanjon̈onolo man̈ano loka io matetiky hahazo volanolo hafa man̈ano loka. Kanefa mampitandrin̈y atsika karaha ty Baiboly: “Ke mitandrema amy raha jiaby mety hahavy anaro tsy ho afapo amy raha anan̈anaro.” (Lioka 12:15) Loka io mahaimahavy olo tsy ho afapo fo. Ny ten̈a marin̈y aminany, olo tsy afapo amy raha anan̈any mahavy olo man̈ano loka. Man̈ano piblisite iro tany fan̈anovan̈a loka aby io fa anao koa miloka amindro ao, anao hahazo volabe. Haindro tsarabe baka fa maro olo tiho pan̈arivo tampoko, ke mahasaky mandany vola be han̈anovan̈a loka. Kanefa tsy volan̈indro fa olo araiky man̈ano loka zen̈y tsy voatery hahazo fo. Mandrisiky olo hahazo volabe iro kanefa tsy mila mandany angovo.

Olo pan̈ano loka zen̈y, olo tia ten̈a baka io hahazo vola fo raha an̈aty jerinany. Kanefa Baiboly mandrisiky atsika ‘samy hizaha raha mahatsara namantsika, fa tsy raha mahatsara atsika tompiny fo.’ (1 Korintianina 10:24) Araiky amindro didy folo koa mivolan̈a: ‘Aza man̈iry fanan̈ananolo.’ (Eksodosy 20:17) Piloka araiky koa man̈anten̈a be fa izy tsy maintsy hahazo. Zen̈y mivolan̈a fa tiany ho matiantoko piloka hafa, amy zen̈y izy mahazo benefisy.

Baiboly mampitandrin̈y atsika koa fa tsy mety mino resaka vintan̈a zen̈y. Nisy Israelita sasany tsy ten̈a natoky Zan̈ahary ke iro ‘nan̈amboatra latabatra hivavahan̈a amy Zan̈ahariny Vintan̈a.’ Akory fahitany Zan̈ahary raha zen̈y? Ho izy: ‘Nan̈ano ny ratsy nan̈oloan̈a zaho fo iro, baka io raha tsy tiako fo nataondro.’—Isaia 65:11, 12.

Marin̈y ndraiky fa volany loka io mety hampiasainy fanjakana hampandrosoan̈a toekarena ndreky fampianaran̈a baka io han̈ampian̈a vahoaka. Ndray tsara tanjon̈o amy volany loka, ratsy fomba nazahoan̈a izio. Mandrisiky olo tsy ho afapo amy raha anan̈any ndreky ho tia ten̈a loka io, salakady hahavy izy tsy hazoto hiasa fa han̈inofy ho pan̈arivo fo.

‘Aza man̈iry fanan̈ananolo.’—Eksodosy 20:17.

RAHA KORAN̈INY BAIBOLY

Baiboly mampitandrin̈y fa “zay olo tapakevitry hanjary pan̈arivo, izy latsaka amy fandriky ndreky fan̈irian̈a tsisy antony sady mandrobaka. Izio man̈adeky olo amy fandripahan̈a ndreky fandrobatan̈a ten̈a.” (1 Timoty 6:9) Matetiky olo man̈ano loka io tsy mety afapo. Ten̈a toetry ratsy izio matoa Baiboly mivolan̈a fa mbala an̈isany fahotan̈a ‘fan̈irian̈a tsy mety afapo’ io.—Efesianina 5:3.

Tiho pan̈arivo malaky olo man̈ano loka io. Loso ten̈a tia vola olo piloka kanefa Baiboly mivolan̈a fa fitiavambola an̈isany “fototro karazan̈a raha ratsy jiaby.” Mety tsy azonolo io onon̈o fa loso karaha zen̈y izy. Izikoa hahazo vola fo raha an̈aty jerinany, hiasaloha mare fo izy, baka io han̈adin̈a Zan̈ahary. Baiboly mivolan̈a fa mira latsaka an̈aty fandriky in̈y olo araiky koa tia vola loatra, ke “nitrebiky ain̈inany tamy raha maro mampanehotehoko.”—1 Timoty 6:10.

Olo tsy mety afapo zen̈y tsy hahatsiaro ho sambatra foeky, fotony hitany tsy mety ampy izy vola azony. “Lan̈iany tia volafotsy, tsy mety ho afapo amy volafotsy anan̈any. Baka io lan̈iany tia fanan̈ana koa tsy mety ho afapo amy fanan̈ana azony.”—Mpitoriteny 5:10.

Maro olo izioty man̈erantany man̈ano loka, raha zisty mba fangalan̈a diandian̈a fo. A Etazonỳ, loso antapitrisany olo nanjary piloka be eraka fan̈adihadian̈a natao.

Karaha ty koran̈iny ohabolan̈a araiky: “Izikoa fitiavankarian̈a nazahoan̈a lova tamy voanalohany, tsy hitondra hatsaran̈a raha zen̈y amy farany an̈y.” (Ohabolana 20:21) Zen̈y man̈ambara fa tsy mitondra hasambaran̈a foeky vola azo baka amy loka. Piloka maro iziô loso dobontrosa na fahity foeky. Misy koa afakasa na misarabady foeky. Ten̈a ratsy ankitin̈y vokatrany loka io. Anao tsy voatery ho takatra raha karaha zen̈y, izikoa man̈araka toro lalan̈any Baiboly.

“Fa zay olo tapakevitry hanjary pan̈arivo, izy latsaka amy fandriky ndreky fan̈irian̈a tsisy antony sady mandrobaka. Izio man̈adeky olo amy fandripahan̈a ndreky fandrobatan̈a ten̈a.”—1 Timoty 6:9.