TANORA
9: Aza Mivadibadiky
KARAKORY MA ZEN̈Y?
Tsy an̈aranao ndreky sanjinao zaraiky fo mampiavaka anao fa fitsipiky arehanao, raha inoanao ndreky toetrinao koa. Olo efa vory jery anao izikoa tsy miovaova hevitry ke tsy mety avadibadiky.
NAN̈INO RAHA ZEN̈Y TEN̈A ILAIN̈A?
Tsy han̈aradrorony fo anao fa hahavita hitsangana aminy hevitrinao izikoa anao ampy jery.
“Maro olo man̈ano karaha papoety, olo fo mikomandy raha ataony. Olo mifidy lamba sikininy fa tsy izy tompiny.”—Adrien.
“Zaho tsy man̈eky hitahominy tsaiky han̈ano adalan̈a, ndray tsy mora raha zen̈y ndraikindraiky. Aminaka, olo ataoko kamarady olo tsy avozoako miaraka aminany, fotony izy tsy hiforse zaho han̈ano raha ratsy.”—Cathy.
TOROHEVITRINY BAIBOLY: “Aza man̈eky hibolibolainy donia ty eky, fa man̈ovoà ke avaoza sain̈inaro.”—Romanina 12:2.
INO HEVITRY?
Diniha ino raha hainao, toetry tsaranao, toetry ratsinao, avio ino raha inoanao. Anao koa man̈ano zen̈y, ho hitanao asa olo karakory anao izioty, avio tihanjary olo karakory anao afara an̈y.
Raha haiko ndreky toetry tsaranaka: Ino aby ma talentanaka? Ino aby ma raha haiko? Ino aby ma toetry tsaranaka? (Ohatra: Zaho ma zatra man̈aja lera? Mba mahafen̈y ten̈a edy zaho? Mazoto miasa ma zaho? Tsy matity ma zaho?) Ino aby ma raha tsara efa ataoko?
SOSOKEVITRY: Izikoa tsy azonao onon̈o ino aby raha hainao ndreky toetry tsaranao, an̈ontania ry olobenao na namanao araiky atokisanao.
TOROHEVITRINY BAIBOLY: “Irarian̈a olo tsiaraikiaraiky samby handiniky raha ataony, fa tsy ampiran̈a ain̈inany aminolo, amy zen̈y izy ho ravoravo aminy ain̈inany tompiny.”—Galatianina 6:4.
Toetry ratsinaka: Ino aby ma toetry tokony hialako? Lera karakory zaho ten̈a malaky voantsory han̈ano ny ratsy? Lera karakory zaho ten̈a mila mifehy ten̈a?
TOROHEVITRINY BAIBOLY: “Atsika koa mivolan̈a fa “atsika tsisy fahotan̈a”, atsika mamitaka ten̈a, sady tsy an̈atintsika foeky fahamarin̈ana.”—1 Jaona 1:8.
Raha inoako: Ino raha hitako mety ndreky tsy mety? Nan̈ino? Zaho ma mino Zan̈ahary? Nan̈ino zaho man̈eky fa misy ankitin̈y izy? Ino raha tsy rariny hitako ataonolo, avio nan̈ino iro man̈ano zen̈y? Ino raha inoako fa hiboaka aminy amaray an̈y?
TOROHEVITRINY BAIBOLY: “Ke fahaizan̈a misain̈y io hiambin̈y anao, avio fahaizan̈a man̈avaka hiaro anao.”—Ohabolana 2:11.
Mety ho Tianao Koa
FAN̈ONTANIAN̈A 10 MANAHIRAN̈A TANORA
Olo Karakory ma Zaho Ty?
Izikoa hainao fitsipiky tianao harehan̈a, toetry tsara ndreky toetry ratsinao, baka io raha mety tsy ho vitanao ndreky tanjon̈onao, ho vitanao fo han̈ano safidy tsara ndray misy olo manery anao han̈ano hadalan̈a.
