TANORA
12: Manàn̈a Tanjon̈o
KARAKORY MA ZEN̈Y?
Tanjon̈o zen̈y tsy nofy fa raha tsy maintsy atao. Mila alamin̈inao tsialohaloha akory hataonao hahatatra izio, avio efa mila zahavanao akory hataonao izikoa misy problemo alohaloha an̈y. Mila mifen̈y mare anao baka ho tatra tanjon̈onao.
Misy an̈atiny andra araiky fo anao manakatra tanjon̈o araiky. Misy ndraiky semainy maromaro na fanjava foeky. Misy koa mety taon̈o araiky na mandilatra. Tsara izikoa alaminao tsarabe ino aby tanjon̈onao avio akory fomba hanakaranao izy.
NAN̈INO RAHA ZEN̈Y TEN̈A ILAIN̈A?
Anao koa fa mahatakatra tanjon̈onao, anao hahaihatoky ten̈a fo, hahazo naman̈a, avio anao ho ravoravo.
Hatoky ten̈a: Izikoa anao nahavita nanakatra tanjon̈o madinidiniky, anao hasaky hanakatra tanjon̈o maventy. Hanjary hatoky ten̈a anao koa man̈ano zen̈y ke ho vitanao hiatriky problemo fohita andavanandra, karaha ataony namanao mitaon̈o anao haditry.
Hahazo naman̈a: Ho tianolo miaraka aminao izikoa anao manan̈a tanjon̈o, fotony anao mahay raha tianao hatao ndreky von̈ono koa hankefa izio. Hahaikamarady fo anao ndreky namanao izikoa miaraka manakatra tanjon̈o.
Ho ravoravo: Anao koa nanan̈a tanjon̈o ke tatranao izio, anao ravoravo.
“Tiako zaho manan̈a tanjon̈o, fotony zaho mifen̈y manakatra izio. Zaho baka io ravoravo mare koa fa tatrako tanjon̈onaka. Vitako baka raha tiako hatao.”—Christophe.
TOROHEVITRINY BAIBOLY: “Izikoa anao miambin̈y tsiko voly ndreky miambin̈y andra tsara fo, anao tsy mety hamafy ndreky tsy mety hahazo vokatra.”—Mpitoriteny 11:4.
INO HEVITRY?
Ataova raha aby ty izikoa tianao hanan̈a tanjon̈o ndreky hahavita hanakatra izio:
Ino tanjon̈onao io? Sorata lan̈iany tanjon̈o avy an̈aty jerinao. Alahara amy zay aia amindro io hitakarinao voanalohany, faharoe, fahatelo, ndreky mitohy fo.
Man̈anova programo. Ataova ty isaka anao misy tanjon̈o araiky:
Sorata daty tokony hahavitanao izy.
Zahava ino aby dingana mila arehanao.
Diniha ino aby problemo mety hisy avio karakory hamahanao izio.
Tantiraha amy zay. Ndray mbala tsy milamin̈y raha sasany, efa ataova edy raha mila ataonao voanalohany. Sorata amy taratasy lan̈iany dingana vitanao.
TOROHEVITRINY BAIBOLY: “Olo mazoto mahazo tombony, fotony mandamin̈y tsialohaloha raha hataony.”—Ohabolana 21:5.
Mety ho Tianao Koa
HEVITRINY TANORA KARAHA ANAO
Fomba Fiain̈ana Tsara Tsisy Ambaka Izy
Asa mba tianao izikoa anao afapô amy fiain̈ana? Tandrin̈esa Cameron hikoran̈a akory nahitany fomba fiain̈ana tsara ndreky mahafapô zen̈y.
