1-2. Ino ma vidipan̈avotan̈a zen̈y, avio nan̈ino izio ten̈a ilain̈a?

LAVORARY i Adama. Fa izy koa fa nanota, nanjary tsy afaka niain̈y mandrakizay eky izy ndreky tarakananany. Tsisy raha mety nataony fan̈odian̈a, fotony izy kinia nanota. Rariny i Adama izikoa naty. (Rom. 5:12, 14) Akory fo basy atsika taranakanany? Fotony atsika tsendriky teraka taminy Adama nanota. Posibla mbala ho avotro fo ma atsika? Zen̈y ke! Tafara heliny Adama nanota in̈y, nambarany Jehovah tsihelihely fomba han̈avotany atsika ho afaka amy fahotan̈a ndreky fahafatesan̈a. (Gen. 3:15) Izikoa fa navy fotoan̈a nifidiny Jehovah, nalefany tambony tany tatỳ Zanany, “han̈ano soron̈o ain̈inany han̈avotan̈a” olombelon̈o.​—Mar. 10:45; Jaona 6:51.

² Jesosy koa fa nan̈ano soron̈o ain̈inany, izy miran̈a nivanga ndraiky raha efa nariany Adama. (1 Kor. 15:22) Vidipan̈avotan̈a ivolan̈ana soron̈o nataony Jesosy zen̈y, amy Soratra Grika Kristianin̈y ao. Nan̈ino ma izio ten̈a ilain̈a? Fotony, izikoa dinihin̈y fomba fihevitriny Jehovah momba ny rariny, tsy maintsy fahin̈ana fo tokony hatao solony fahin̈ana. (Eks. 21:23, 24) Adama koa fa nanota, very fahin̈ana lavorary nanan̈any in̈y. Nan̈ano soron̈o ain̈inany lavorary i Jesosy, mifan̈araka amy fitsipikiny Jehovah momba ny rariny io. (Rom. 5:17) Ke vokatranizen̈y, Jesosy manjary “Baba Mandrakizay” aminolo jiaby mino soron̈o nataony in̈y.​—Isaia 9:6; Rom. 3:23, 24.

3. Koa zahan̈a Jaona 14:31 ndreky 15:13, ino nahavy Jesosy nahafoe ain̈inany lavorary?

³ Nan̈ino Jesosy nahafoe ain̈inany? Fotony izy ten̈a tia Jehovah avio tiany mare koa atsika. (Vakia Jaona 14:31; 15:13.) Baka amy fitiavan̈a io nahavy izy tapakevitry nan̈ano sitrapony Babany fo ndreky tsy nivadiky ziska izy naty. Ino  vokatranizen̈y? Ho tanteraka fikasan̈any Zan̈ahary tamy voanalohany momba tany ndreky olombelon̈o. Hikoran̈intsika amy lahatsoratra ty antony nahavy Jehovah nan̈ambela i Jesosy hijaly mare talohanizy hofoaty. Hikoran̈a hely momba apostoly Jaona koa atsika, fotony izy koa mba ten̈a nankasitraka vidipan̈avotan̈a io. Hidinihintsika ato koa, akory an̈aboahantsika fa mankasitraka kadô io atsika, avio ino raha han̈ampy atsika hampitombo fankasitrahantsika soron̈o nataony Jehovah ndreky Jesosy io.

4. Karakory fomba nifatesany Jesosy?

⁴ Miniminia hely baka raha nandalo taminy andra farany niain̈any Jesosy tambony tany. Iro maramila romanin̈y aby io koa fa navy hanambotro izy, izy tsy nilefa foeky. Izy koa fa nikaravasìndro, izy tsy namaly foeky. Kanefa vitany tsarabe nikaiky anjely marobe hiaro izy. (Mat. 26:52-54; Jaona 18:3; 19:1) Mafy raha niaretany! Karavasy nampiasaindro namopoan̈a izy io nampatriatriaka ain̈inany. Tahaizan̈anany nandeha lio mare, kanefa izy mbala nirahindro nibaby kakazo mavesatra be, hindesin̈y amy tany hamonoan̈a izy an̈y. Fa baka tio, nisy lelahy araiky niforsendro maramila aby io nitondra kakazo io. (Mat. 27:32) Jesosy koa fa tody tamy tany namonoan̈a izy tan̈y, nifantsihindro tamy kakazo in̈y vitinany ndreky tan̈ananany. Natsanganandro hazofijalian̈anany, ke nahainatriaka fo tany namipian̈a kolò in̈y fotony nitambesatra ain̈inany. Nalahelo mare kamaradiny Jesosy aby io, avio nitomoan̈y i Maria, reniny Jesosy. Fa iro sefosefo tamindro Jiosy aby io ndraiky nan̈adroadro izy. (Lioka 23:32-38; Jaona 19:25) Nahatsiaro nijaly marin̈y i Jesosy sady naharen̈y manehoko; izy amy zen̈y tan̈atiny lera maro tio fo! Tsy maintsy niasa mare fonany ndreky havokavokonany taminio, ke tsy nahavita niain̈y tsarabe izy. Taloha helinizy naty, izy nivavaka. Io vavaka farany nataony Jesosy. Natoky baka izy fa nahavita tsy nivadiky. Izy baka tio niondriky, avio izy naty. (Mar. 15:37; Lioka 23:46; Jaona 10:17, 18; 19:30) Nahadin̈y ela i Jesosy vo naty, sady amy zen̈y nijaly mare sady nalain̈a baràka.

5. Ino ma raha ten̈a nampijaly i Jesosy mandilatra fomba namonoan̈a izy?

⁵ Tamy Jesosy, tsy fomba namonoan̈a izy ny ten̈a mafy taminany fa antony namonoan̈a izy. Niasaloha mare izy, fotony izy nataondro tsy nan̈isy fotiny Zan̈ahary ndreky an̈aran̈any Zan̈ahary. (Mat. 26:64-66) Ndray nandiniky zen̈y fo efa nampijaly i Jesosy mare. Ke nan̈anten̈a izy fa tsy maintsy han̈ano raha fo Babany baka izy tsy ho avoa baràka karaha zen̈y. (Mat. 26:38, 39, 42) Nan̈ino ma Jehovah nan̈ambela Zanany ten̈a tiany io hijaly ndreky hofoaty? Alô atsika handiniky antony telo.

6. Nan̈ino ma Jesosy tsy maintsy nivonen̈a taminy hazofijalian̈a?

⁶ Voanalohany, tsy maintsy nivonen̈a taminy hazofijalian̈a i Jesosy baka iro Jiosy aby io afaka taminy ozon̈o. (Gal. 3:10, 13) Voaheloko hofoaty iro Jiosy aby io fotony iro taranakany Adama. (Rom. 5:12) Mbala nisôsoko koa ozon̈o io, fotony iro nampan̈anten̈a han̈araka lalàn̈any Zan̈ahary kanefa iro tsy nitana vava nataondro. Izikoa Lalàn̈a namezany Jehovah iro Israelita aby io zahan̈a, tokony hivonen̈a lan̈iany olo nan̈ano fahotan̈a mahafaty, baka io fatinany mety nahanton̈o tamy kakazo. Zen̈y nahaizan̈a fa nozon̈iny Zan̈ahary i olo io. * (Deot. 21:22, 23; 27:26) Ke nankafaka iro Jiosy aby io taminy ozon̈o io i Jesosy taminizy nan̈eky nivonen̈a tamy kakazo. Nanjary nahazo hatsaran̈a baka tamy soron̈o nataony Jesosy io iro, ndray tsy nikendro raha zen̈y.

7. Ino antony faharoe nahavy Jehovah nan̈ambela i Jesosy hijaly mare?

 ⁷ Faharoe: Hanjary Pisoron̈obe i Jesosy. Ke nampiofan̈iny Jehovah izy baka ho vitany tsara andraikitry miambin̈y izy zen̈y. Tsapany Jesosy fa tsy mora man̈araka Volan̈any Zan̈ahary, intsaka eky taminizy niaritry fitsapan̈a farany mare. Nisy fotoan̈a izy niasaloha mare, ke ‘nitarain̈y sady nitomoan̈y’ koa fa niangavy Jehovah han̈ampy izy. Ravoravo atsika manan̈a Pisoron̈o be mamindra fô sady ‘mitepô atsika amy fahalimian̈antsika.’ Efa niaritry ny mafy baka i Jesosy, ke hainy tsarabe raha ilaintsika, izikoa atsika fa ‘miaritry fitsapan̈a.’ Sady izy lastio afaka man̈ampy atsika.​—Heb. 2:17, 18; 4:14-16; 5:7-10.

8. Ino antony fahatelo nahavy Jehovah nan̈ambela i Jesosy hijaly mare?

⁸ Fahatelo, nambelany Jehovah hijaly mare i Jesosy baka ho voavaly fan̈ontanian̈a maventy ty: Mety ho vitanolombelon̈o ma tsy hivadiky amy Zan̈ahary, izikoa fa miatriky fitsapan̈a farany mare? Nivolan̈a Satana fa tsisy olo hahavita zen̈y. Fitiavanten̈a fo ho izy mahavy olo manompo Zan̈ahary. Nivolan̈a koa izy fa karaha nataony Adama in̈y, tsisy olombelon̈o ten̈a tia Jehovah zen̈y. (Joba 1:9-11; 2:4, 5) Jehovah ndraiky natoky fa Zanany io tsy hivadiky aminany foeky, ndray miatriky fitsapan̈a farany mare. Nahavita tsy nivadiky firaka amy farany i Jesosy, ke niporofoeny fa Satana io pavandy.

9. Ino modely tsara nambelany apostoly Jaona ke tokony harehantsika?

⁹ Maro Kristianin̈y niatriky fan̈injehan̈a ndreky fitsapan̈a isankarazany. Kanefa iro tsy voly nitory sady niaritry fo. Nanjary fatatra finoan̈andro, fotony iro nino vidipan̈avotan̈a. Araiky amindro zen̈y apostoly Jaona. Izy tsy voly nan̈ambara ny marin̈y momba Kristy ndreky vidipan̈avotan̈a io, tan̈atiny 60 taon̈o manan̈ambiny. Apostoly Jaona koa fa ho 100 taon̈o, nigadraindro Romanin̈y aby io tamy nosy Patmo tan̈y izy, fotony iro nihevitry fa izy olondratsy. Kanefa izy tsy nan̈ano raha ratsy fa nikoran̈a taminolo raha momba Zan̈ahary ndreky Jesosy fo! (Apok. 1:9) Ten̈a modely tsara arehantsika i apostoly Jaona, fotony izy nanan̈a finoan̈a matanjaka avio nahavita niaritry.

10. Akory ahitan̈a fa nankasitraka vidipan̈avotan̈a io apostoly Jaona?

¹⁰ Izikoa dinihin̈y boky nisoratiny apostoly Jaona amy Baiboly ao, hita fa ten̈a tia Jesosy ndreky nankasitraka vidipan̈avotan̈a izy. Efa mandilatra anjatony izy nikoran̈a momba vidipan̈avotan̈a io ndreky hatsaran̈a azo baka amizio. Karaha ty ho izy: ‘Izikoa misy olo tafanota, atsika misy olo piaro man̈oloan̈a Baba, tsy azovy zen̈y fa Jesosy, araiky marin̈y in̈y.’ (1 Jaona 2:1, 2) Namafisiny tsarabe fa ‘fitorian̈a vaovao tsara momba Jesosy’ ny raha ten̈a maventy. (Apok. 19:10) Ten̈a nankasitraka vidipan̈avotan̈a io i Jaona! Anao ke? Asa anao mba mankasitraka izio koa? Akory han̈aboahanao zen̈y?

11. Ino ma raha han̈ampy atsika hanohitry fakampan̈ahy?

¹¹ Iariva raha mety hahavy anao hanota. Izikoa atsika ten̈a mankasitraka vidipan̈avotan̈a io, atsika tsy hieritreritry karaha ty: ‘Anten̈a tsy raha voatery hifen̈y mare hiady amy fakampan̈ahy. Anten̈a koa fa man̈ano raha tsy mety, somary mibebaka hely efa pare edy.’ Mifanohitry amy zen̈y raha tokony dinihintsika. Atsika tokony hivolan̈a: ‘San̈atria! Hamarozany raha vitany Jehovah ndreky Jesosy taminaka zay! Zaho tsy han̈ano zen̈y.’ Afaka mangataka angovo amy Jehovah koa atsika, ke iangavy izy karaha ty: ‘Aza ambela ho resiny fakampan̈ahy kony zaho Jehovah e!’​—Mat. 6:13.

12. Akory mety han̈arehantsika torohevitry amy 1 Jaona 3:16-18?

 ¹² Tiava rahalahinao ndreky ranabavinao. Ho hita fa mankasitraka vidipan̈avotan̈a anao, izikoa anao tia piaramanompo. Nan̈ino? Fotony Jesosy tsy raha nahafoe ain̈inany han̈avotan̈a anao fo fa, han̈avotan̈a iro koa. Matoa izy nahafoe ain̈inany han̈avotan̈a iro, dikanizen̈y tiany mare iro. (Vakia 1 Jaona 3:16-18.) Hita amy fomba itondrasantsika iro piaramanompo aby io fa atsika tia iro. (Efes. 4:29, 31–5:2) Miezaka atsika man̈ampy iro lera iro marary, na miatriky raha sarotro, na lera tany misy iro handalovany sikilaony na horohorontany. Akory fo basy tokony hataontsika izikoa nisy piaramanompo tamintsika nivolan̈a na nan̈ano raha nampameloko atsika?

13. Nan̈ino ma atsika tokony han̈ambela hadisovan̈a?

¹³ Mety ho sarotro ndraikindraiky man̈ambela hadisovan̈a. Asa anao mba karaha zen̈y? (Lev. 19:18) Izikoa zen̈y, areha torohevitry ty: “Izikoa misy raha mampameloko ataony naman̈a, samy mahaiza mandefitry ndreky man̈ambela hadisovan̈a fo. Karaha ataony Jehovah namafa hadisovan̈anaro koa tokony hataonaro han̈ambela hadisovan̈a namanaro.” (Kol. 3:13) Isaka atsika man̈ambela hadisovan̈andro rahalahy ndreky ranabavintsika aby io, mira man̈aboaka amy Jehovah, Babantsika andan̈itry an̈y io, fa ten̈a mankasitraka vidipan̈avotan̈a io atsika. Ino raha mety hataontsika baka hitombo fo fankasitrahantsika kadô baka amy Jehovah io?

14. Ino raha tokony hataontsika izikoa atsika tihankasitraka vidipan̈avotan̈a io mare?

¹⁴ Ataova mersy Jehovah nan̈amia vidipan̈avotan̈a io. Zen̈y raha nataony Joanna, ranabavy 83 taon̈o, mipetraka an Inde. Ho izy: “Tsapako fa ten̈a ilain̈a mikoran̈a momba vidipan̈avotan̈a io isanandra lera anten̈a mivavaka, avio man̈ano mersy Jehovah nan̈amia kadô io.” Ke lera anao mikoran̈a mitokan̈a amy Jehovah, diniha ino hadisovan̈a vitanao taminy andra io, avio iangavia izy han̈ambela hadisovan̈a aby zen̈y. Izikoa anao nan̈ano fahotan̈a maventy, tsara anao mangataka fan̈ampian̈a amindro antipan̈ahy aby io. Iro hitandren̈y anao, avio han̈amia torohevitry feno fitiavan̈a baka amy Soratra Masin̈y. Hivavaka miaraka aminao koa iro sady hiangavy Jehovah han̈ambela hadisovan̈anao, amy zen̈y anao ho tsara fihavanan̈a aminany ndraiky.​—Jak. 5:14-16.

15. Nan̈ino ma anao tokony hanokan̈a fotoan̈a hianaran̈a ndreky hisaintsain̈ana momba vidipan̈avotan̈a io?

¹⁵ Saintsain̈a vidipan̈avotan̈a io. Karaha ty nambarany Rajamani, ranabavy araiky 73 taon̈o:  “Isaka zaho mamaky momba raha niaretany Jesosy, miran̈aran̈a oe ranomasonaka.” Mety halahelo mare koa anao izikoa fa mieritreritry jaly niaretany Zanaka Zan̈ahary io. Kanefa, izikoa anao tsy voly misaintsain̈y momba soron̈o nataony Jesosy io, hahaihitombo fo fitiavanao iro roeny Babany. Ke lera anao mianatra manokan̈a, man̈anaova fikarohan̈a momba izio. Han̈ampy anao hisaintsain̈y momba vidipan̈avotan̈a raha zen̈y.

16. Nan̈ino mahatsara atsika mampianatra momba vidipan̈avotan̈a? (Zahava sary amy fon̈ony gazety ty.)

¹⁶ Ampianara momba vidipan̈avotan̈a olo. Isaka atsika mikoran̈a aminolo momba vidipan̈avotan̈a io, hahaihankasitraka izio fo atsika. Manan̈a fitaovan̈a maro tsara atsika han̈azavan̈a aminolo nan̈ino Jesosy tsy maintsy naty baka han̈avotan̈a atsika. Mety ampiasainao bokikely Vaovao Tsara Baka amy Zan̈ahary!, fianaran̈a faha-​4 “Azovy ma Jesosy Kristy Zen̈y?” Anao koa mety mampiasa toko faha-​5 amy boky Ino Raha Mety Ampianariny Baiboly Atsika? Titranany io ao: “Vidipan̈avotan̈a Kado Farany Tsara Baka Amy Zan̈ahary.” Man̈ampy atsika koa Fahatsiarovan̈a nifatesany Jesosy, fataontsika isaka taon̈o. Isaka atsika man̈aton̈o izio ndreky mitaon̈o olo ho avy han̈aton̈o izio, hahaihitombo fo fankasitrahantsika vidipan̈avotan̈a io. Ambelany Jehovah hampianatra olo momba Zanany atsika, ke tsisy tombontsoa maventy mandilatra zen̈y eky!

17. Nan̈ino vidipan̈avotan̈a io kado farany tsara namezany Jehovah atsika?

¹⁷ Hitantsika baka amy raha jiaby zen̈y fa tokony hiverintsika ho raha maventy vidipan̈avotan̈a io, avio tokony hifen̈y koa atsika hankasitraka izio fo. Ino antony? Fotony baka amizio mahavy atsika ho afaka hanjary kamaradiny Jehovah, ndray atsika tsy lavorary. Baka amizio koa hahavy asany Devoly ho ravan̈a. (1 Jaona 3:8) Baka amy vidipan̈avotan̈a io koa hahavy tany ty hanjary paradisa, erakany fikasan̈any Jehovah tamy voanalohany tan̈y. Amy leranizen̈y, tia Jehovah aby sady manompo izy zay olo ho hitanao. Ke irarian̈a atsika hitady fomba fo han̈aboahan̈a fankasitrahan̈a vidipan̈avotan̈a io, isanandra. Izio kadô farany tsara namezany Zan̈ahary atsika olombelon̈o!