1-2. Mampirisiky atsika han̈ino ma 1 Petera 2:21? Ino ohatra man̈ampy atsika hahazo tsara raha tianizio koran̈iny?

MINIMINIA hely baka anao iziô miaraka aminolo vitsivitsy, anaro samby vahiny. Mandeha amy lalan̈a mampavozo mare sady feno jia anaro. Misy olo efa zatra lalan̈a ndraiky mitariky anaro. Kanefa anaro mbala rikirikian̈a in̈y, efa tsy hitanaro izy, fotony izy efa rôso aloha! Diambitinany ndraiky mbala hita tsarabe, ke anaro tsy mavozo foeky. Diambitinany in̈y fo arehanaro.

² Miran̈a olo mandeha amy lalan̈a mampavozo nikoran̈intsika tio in̈y atsika avahizo, fotony efa ratsy mare donia iain̈antsika ty. Nakiry izy, Jehovah nan̈amia atsika pitaridalan̈a lavorary, tsy azovy zen̈y fa Jesosy Kristy Zanany. Ke atsika afaka man̈araka dianany tsarabe. (1 Pet. 2:21) Misy boky araiky momba Baiboly mivolan̈a fa ampitovisiny apostoly Petera amy pitaridalan̈a i Jesosy. Efa tsy afaka mahita Jesosy atsika amy zioty, kanefa mira man̈araka diambitinany atsika izikoa fa man̈araka modely nambelany. Atsika iziô hizaha valiny fan̈ontanian̈a telo aby ty: Karakory ma man̈araka marikitry diany Jesosy zen̈y? Nan̈ino atsika mila man̈ano zen̈y? Akory mety han̈arahantsika dianany?

3. Ino ma dikany man̈araka diambitinolo araiky zen̈y?

³ Baiboly koa fa mampiasa volan̈a “mandeha” na “vity”, matetiky fomba fiain̈ana raha tiany koran̈iny. (Gen. 6:9; Ohab. 4:26) Ino ma dikany man̈araka diambitinolo araiky zen̈y? Olo araiky koa fa mandeha amy jia, matetiky misy diambity tavela afaranany. Mety koran̈iny, man̈araka diambinolo io anao, izikoa mangala tahaka modely nambelany.

4. Ino ma dikany man̈araka diany Jesosy zen̈y?

⁴ Ino amy zay dikany man̈araka diany Jesosy zen̈y? Tsotra fo dikanizen̈y: Mangala tahaka modelinany na fomba fiain̈ananany.  Aminy andininteny ioren̈any fianaran̈antsika ty, apostoly Petera nikoran̈a mikasiky modely nambelany Jesosy taminizy niaritry raha isankarazany. Ndray izy man̈ano zen̈y, mbala maro fomba mety han̈arehantsika modeliny Jesosy, na tamy raha nivolan̈iny zen̈y na tamy raha nataony.​—1 Pet. 2:18-25.

5. Nan̈ino ma atsika mivolan̈a fa ho vitantsika fo han̈araka diany Jesosy, ndray atsika tsy lavorary?

⁵ Izio ma olombelon̈o tsy lavorary mahavita man̈araka diany Jesosy ankitin̈y? Ia valiny. Alaiva onon̈o fa Petera tsy nan̈iraka atsika han̈araka diany Jesosy amy fomba lavorary. Nampirisiky atsika izy ‘han̈araka marikitry diany Jesosy.’ Dikanizen̈y, ho vitantsika fo han̈araka diany Jesosy izikoa atsika mifen̈y mare erakany farany tsara mety ho vitantsika olombelon̈o tsy lavorary. Zen̈y koa ahitan̈a fa man̈araka raha nivolan̈iny apostoly Jaona ty atsika: ‘Manàn̈a fomba fiain̈ana miran̈a amy niny Jesosy.’​—1 Jaona 2:6.

6-7. Nan̈ino ma atsika mivolan̈a fa ho tsara fihavanan̈a amy Jehovah atsika izikoa man̈araka diany Jesosy?

⁶ Ho tsara fihavanan̈a amy Jehovah atsika izikoa man̈araka diany Jesosy. Nan̈ino? Voanalohany, fotony namparavoravo Zan̈ahary fomba fiain̈anany Jesosy, ke modely tsara arehantsika izy. (Jaona 8:29) Ho ravoravo amintsika koa i Jehovah, izikoa atsika man̈araka diany Jesosy. Matoky atsika fa ho tsara fihavanan̈a amy Jehovah, Babantsika andan̈itry an̈y io koa, lan̈iany olo mifen̈y mare hikamarady aminany.​—Jak. 4:8.

⁷ Faharoe, Jesosy nahavita nangala tahaka toetriny Babany tsarabe. Zen̈y nahavy Jesosy nivolan̈a: “Lan̈iany olo nahita zaho nahita Baba koa.” (Jaona 14:9) Atsika mety mangala tahaka toetriny Jesosy ndreky fomba nifandraisany taminolo. Ohatra iziô, nahinakinaka mare izy koa fa nahita olo boka, avio  man̈angy narary fatatra tan̈atiny taon̈otaon̈o. Nalahelo koa izy nahita olo naty havan̈a. Izy tsy vitany nahinakinaka fo fa nan̈ampy iro koa. Ke atsika koa fa mangala tahaka toetriny Jesosy, miran̈a mangala tahaka toetriny Jehovah fo. (Mar. 1:40, 41; 5:25-34; Jaona 11:33-35) Arakaraka ny angalantsika tahaka toetriny Jehovah, hahavy atsika ho tsara fihavanan̈a aminany.

8. Nan̈ino atsika mivolan̈a fa hahavita ‘handresy’ donia ty atsika izikoa man̈araka tsarabe diany Jesosy?

⁸ Atsika koa man̈araka diany Jesosy, atsika tsy ho rikian̈a amy donia ratsy ty, fa hifantoko amy fanompoan̈a fo. Karaha ty raha nivolan̈iny Jesosy, taminy alin̈y talohany nifatesany: “Zaho efa nandresy donia ty.” (Jaona 16:33) Tihivolan̈a Jesosy tio fa tsy nambelany hamolavola izy foeky toetsain̈inolo amy donia ty, ndreky tanjon̈ondro baka io raha nataondro. Tsy nadosony Jesosy tan̈atiny jerinany foeky antony naviany tambony tany teto: Ankamasin̈y an̈aran̈any Jehovah. Akory fo atsika? Maro raha mety handrikian̈a atsika amy donia ty. Fa atsika koa mifen̈y fo hifantoko amy fan̈anaovan̈a sitrapony Jehovah, karaha nataony Jesosy in̈y, ho vitantsika koa tsy hivadiky ndreky ‘handresy’ donia ty.​—1 Jaona 5:5.

9. Ino raha mila ataontsika izikoa atsika tsy tihiala amy lalan̈a mengo amy fiain̈ana mandrakizay?

⁹ Afaka hiain̈y mandrakizay atsika izikoa man̈araka diany Jesosy. Indraiky andra, nisy lelahy pan̈arivo nan̈ontany Jesosy raha tokony hataony baka izy hahazo fiain̈ana mandrakizay. Karaha ty nambarany Jesosy: ‘Areha dianaka.’ (Mat. 19:16-21) Naro Jiosy tsy nino fa Jesosy ankitin̈y Kristy, ke ho izy tamindro: ‘Ondrikondrikinaka aby io man̈araka zaho. Iro amezako fiain̈ana tsisy farany.’ (Jaona 10:24-29) Karaha ty koa nivolan̈iny Jesosy tamy Nikodemosy: ‘Hahazo fiain̈ana tsisy farany lan̈iany olo man̈aboaka fa izy mino zaho.’ (Jaona 3:16) Nikodemosy io an̈isany Fitsaran̈a Avo Jiosy fa izy baka tio nanjary tia nitandren̈y fampianaran̈any Jesosy. Ho hita fa mino Jesosy atsika izikoa man̈araka raha nampianariny ndreky mangala tahaka raha nataony. Hahazo fiain̈ana mandrakizay atsika izikoa man̈ano zen̈y fo.​—Mat. 7:14.

10. Ino raha mila ataontsika izikoa atsika tihahay Jesosy tsarabe? (Jaona 17:3)

¹⁰ Alohany atsika hahavita han̈araka marikitry diany Jesosy zen̈y, mila haintsika tsarabe antsendriky izy. (Vakia Jaona 17:3.) Mitaky ezaka mitohy raha zen̈y. Mila mifen̈y atsika mampitombo raha efa haintsika momba Jesosy, an̈isanizen̈y toetrinany, fomba fisain̈ananany, ndreky fitsipiky narehany. Ke na vo betibetiky nahitantsika fahamarin̈ana na efa ela, tsy maintsy miezaka fo atsika “mianatra momba” Jehovah ndreky Zanany io.

11. Ino raha koran̈iny Filazantsara efatra aby io?

¹¹ Jehovah ten̈a tia atsika, ke zen̈y nahavy izy nampanoratra Filazantsara efatra aby io,  amy Baiboly ao. Man̈ampy atsika hahay tsarabe Jesosy iro io, fotony an̈atinizio ao ahitan̈a raha niain̈any Jesosy ndreky fanompoan̈anany. Tantarain̈a ao koa raha nivolan̈iny Jesosy, ndreky raha nataony, avio fihetsehampônany. Tsy zen̈y fo fa, han̈ampy atsika ‘handiniky tsarabe’ modely nambelany Jesosy koa boky aby io. (Heb. 12:3) Namandraha, napetraka tan̈aty tao diambitiny Jesosy. Izikoa atsika mianatra Filazantsara aby io, hahaihitombo fo raha haintsika momba izy, ke ho vitantsika han̈araka tsarabe dianany.

12. Akory hazahoantsika hatsaran̈a maro baka amy bokiny Filazantsara aby io?

¹² Ilain̈a mamaky bokiny Filazantsara. Kanefa, tsy ampy zen̈y. Izikoa anao tihahazo hatsaran̈a maro baka amindro io, anao mila manokan̈a fotoan̈a hianaran̈a ndreky hisaintsain̈ana iro io tsarabe. (Ampiràn̈a amy Josoa 1:8.) Atsika iziô handiniky sosokevitry aroe han̈ampy atsika hisaintsain̈y Filazantsara aby io, ndreky fomba hampiharan̈a raha nivakiantsika tao.

13. Ino raha mety hataonao izikoa tianao karaha efa anao in̈y olo tantarainy Filazantsara ao?

¹³ Voanalohany, ataova karaha fa anao in̈y olo tantarainizio ao. Alaiva sary antsain̈y ino raha hitanolo, ndreky raha ren̈inolo, avio raha tsapanolo koran̈inizio ao. Ino raha han̈ampy anao han̈ano zen̈y? Man̈anaova fikarohan̈a amy fitaovan̈a naboakany fandaminan̈any Jehovah. Diniha koa ino raha nandalo taloha na tafarany raha tantarainy io. Izikoa mikoran̈a momba olo na tanàna izio, tadiava fan̈azavan̈a mifandray amizio, baka io ampiràn̈a amy raha tantarainy Filazantsara hafa raha zen̈y. Ny raha misy baka ndraikindraiky, misy Filazantsara man̈amia tsipiriany momba raha araiky, kanefa tsipiriany io tsy hitanao amy Filazantsara hafa.

14-15. Akory mety han̈arehanao raha nianaranao tamy bokiny Filazantsara?

¹⁴ Faharoe, diniha ino ifandraisany tantara amy Filazantsara io amy fiain̈ananao. (Jaona 13:17) Anao koa fa baka mandalin̈y tantara amy Filazantsara ao, man̈ontania ten̈a  karaha ty: ‘Ino ma raha mety hianarako baka amizio? Akory mety hampiasako tantara io han̈ampiako olo?’ Diniha azovy olo mety hikoran̈anao raha nianaranao io, baka io amy fotoan̈a karakory hikoran̈anao izy. Kanefa mifen̈a fo ho tsara fan̈ahy ndreky be fitiavan̈a izikoa fa man̈ano zen̈y.

¹⁵ Atsika iziô hizaha tantarany man̈angy masikiny salakady maty vady, hitany Jesosy tamy tempoly in̈y. Hidinihintsika akory mety hampiharantsika sosokevitry aroe tio in̈y.

16. Ino ma raha nandalo koran̈iny Marka 12:41?

¹⁶ Ataova karaha fa anao in̈y olo tantarainizio ao. (Vakia Marka 12:41.) Alaiva sary antsain̈y raha nandalo taminy 11 Nisana taon̈o 33. Efa tsy ampy herin̈iandra araiky i Jesosy hofoaty. Ankamaraozany fotoan̈anany taminy andra io laniny nampianaran̈a olo tamy tempoly tao. Kanefa iro pitondra fivavahan̈a aby io nanohitry izy mare. Taloha helinizio koa, nisy tamindro io nan̈ontany azovy nan̈amia izy fahifan̈a han̈ano raha nataony aby io. Sasany ndraiky nan̈apetraka fan̈ontan̈ian̈a niritriretindro fa tsy ho voavaliny Jesosy foeky. (Mar. 11:27-33; 12:13-34) Izy baka tio nandeha nifindra tamy faritry hafa tamy tempoly tao. Lakorony Man̈angy nikahian̈a faritry io. Nangala fipitrahan̈a tio Jesosy, fotony tio izy nahatazan̈a raha fandatsahan̈a vola ndreky olo nandatsaka fan̈amezan̈a. Hitany iro pan̈arivo aby io nandatsaka vola marobe. Evandraha narikitry plasiny boaty aby io donko tany nipitrahany Jesosy io, ke ren̈iny iro vola aby io nikirintsan̈a koa fa nalatsaka tao.

17. Ino raha nataony man̈angy maty vady, koran̈iny Marka 12:42?

¹⁷ Vakia Marka 12:42. Tsy ela, Jesosy nahita man̈angy araiky nandatsaka vola. Man̈angy io masikìny, avio efa ‘maty vady.’ (Lioka 21:2) Tsy mora raha niain̈any man̈angy io, fotony mety sarotro taminany foeky nahita vola nivangan̈a raha ten̈a nilain̈y isanandra. Kanefa, izy mbala navy fo nandatsaka vola tamy boaty io. Nalatsany moramora volanany. Vola madiniky aroe farany hely valera izio. Raha io koa fa nalatsany tao, tsy ren̈y aby vola aroe io nikin̈y. Direkty hainy Jesosy fa leptona aroe izio. Leptona zen̈y vola farany hely valera tamy zen̈y. Ndray fody araiky tsy nazo tamy vola io, kanefa fody zen̈y an̈isany voron̈o fataonolo kabaka sady farany mora vanga.

18. Koa Marka 12:43, 44 zahan̈a, ino raha nambarany Jesosy momba vola namezany man̈angy maty vady io?

¹⁸ Vakia Marka 12:43, 44. Rikian̈a i Jesosy nahita raha nataony man̈angy io. Ke nikahiany pianatranany, avio ho izy: ‘Taminolo jiaby nandatsaka vola tamy boaty io, niny man̈angy io ny ten̈a be.’ Ino ma nahavy Jesosy nivolan̈a zen̈y? Ho izy: ‘Iro jiaby io [an̈isanizen̈y iro pan̈arivo aby io] nandatsaka lambilambiny raha nanan̈andro fo, fa man̈angy io ndraiky nandatsaka raha jiaby nanan̈any, velonten̈anany jiaby.’ Man̈angy tsy mivadiky io nandatsaka vola jiaby nanan̈any. Ke namandraha nankin̈iny tamy Jehovah fiain̈anany taminio. Natoky izy fa Jehovah hikarakara izy.—Sal. 26:3.

19. Ino ma raha maventy ianarantsika baka amy raha nivolan̈iny Jesosy momba man̈angy maty vady in̈y?

¹⁹ Diniha ino ifandraisany tantara amy Filazantsara io amy fiain̈ananao. Man̈ontania ten̈a karaha ty: ‘Ino ma raha ianarako baka amy raha volan̈iny Jesosy momba man̈angy masikìny salakady maty vady io?’ Hay be fa man̈angy io tihan̈amia raha bebenio tamy Jehovah. Kanefa, nan̈ano zay vitany izy, ke lay farany tsara taminany izy namiany Jehovah in̈y. Hainy Jesosy fa ten̈a valera amy Jehovah fan̈amezan̈a nataony man̈angy io. Ino raha ianarantsika baka amy zen̈y? Ravoravo Jehovah izikoa  atsika manompo izy amy fontsika jiaby ndreky ain̈intsika jiaby. (Mat. 22:37; Kol. 3:23) Tiany Jehovah izikoa zay farany tsara amy fotoan̈antsika ndreky angovontsika amezantsika izy, na lera manompo zen̈y na lera atsika mivory.

20. Akory mety hampiasanao tantarany man̈angy maty vady io han̈ampian̈a olo hafa? Man̈ameza ohatra.

²⁰ Tantarany man̈angy maty vady io mety hindesinao han̈ampian̈a olo. Akory han̈anaovanao zen̈y? Diniha azovy olo mila amezan̈a toky fa Jehovah mankasitraka ezaka ataony. Mety efa matoe donko ranabavy araiky ke man̈enjiky izy mare eritreritrinany, fotony izy efa tsy mahavita be eky amy fanompoan̈a. Na mety mahatsiaro ten̈a tsisy dikany foeky izy, fotony izy marary na efa tsy fatatra karaha taloha eky. Misy koa rahalahy marary mare. Mampijaly izy mare aretin̈inany. Mampakivy izy raha zen̈y fotony matetiky izy tsy afaka mivory amy Tran̈o Fivorian̈a. Tsara izikoa atsika mitady fomba han̈ampian̈a iro, avio man̈ano “volan̈a tsara sady mankahery.” (Efes. 4:29) Koràn̈a aminany raha nianaranao momba man̈angy maty vady in̈y. Ameza toky izy fa ravoravo Jehovah izikoa atsika man̈amia ny farany tsara baka amintsika. (Ohab. 15:23; 1 Tes. 5:11) Deray fo iro ndray karaha hely raha vitandro, fotony iro efa miezaka man̈amia ny farany tsara baka amindro niny Jehovah. Man̈araka marikitry diany Jesosy atsika izikoa man̈ano zen̈y.

21. Tapakevitry han̈ino ma anao?

²¹ Ten̈a ravoravo atsika fotony Filazantsara aby io mikoran̈a tsipiriany marobe momba raha niain̈any Jesosy, sady man̈ampy atsika han̈araka dianany na hangala tahaka izy. Lera anao mianatra manokan̈a na lera anaro man̈ano Fotoampivavahan̈any Fianakavian̈a, nan̈ino izikoa mba mandiniky Filazantsara? Asa mbala azonao onon̈o raha tokony hataonao baka anao hahazo hatsaran̈a maro lera mianatra izio? Ataova karaha anao in̈y miain̈y raha tantarainizio, avio ampihara raha nianaranao tao. Ndray zen̈y, tsy ampy man̈araka raha nataony Jesosy. Mila mitandren̈y raha nivolan̈iny koa atsika. Ho maro raha ho haintsika izikoa atsika mandiniky raha faramparany nivolan̈iny Jesosy talohanizy naty. Zen̈y raha hidinihintsika amy lahatsoratra man̈araka.