1. Ino raha hitany Jehovah koa fa mandiniky panomponany?

FARANDRAHA tiany Jehovah eky vahoakanany. (2 Tan. 2:11) Ten̈a mamparavoravo atsika raha zen̈y! Jehovah tsy vitany mahita toetry tsarantsika ndreky mahay raha mety ho vitantsika fo fa, ampiany koa atsika baka hanjary kamaradiny. Ke izikoa atsika tsy mivadiky aminany, ho kamaradiny fo atsika mandrakizay!—Jaona 6:44.

2. Nan̈ino tsy mora aminolo sasany hatoky fa iro ten̈a tiany Jehovah?

² Mety hisy amintsika hieritreritry karaha ty: ‘Haiko fa Jehovah tia vahoakanany amy fitambarany, fa zaho tsy matoky izy tia zaho ay?’ Ino ma mety hahavy olo araiky hieritreritry zen̈y? Nandalo raha sarotro mare i Oksana taminizy mbala hely, * ke karaha ty ho izy: “Ravoravo mare zaho koa fa natao batisa ndreky nanomboko nan̈ano pisava lalan̈a. Fa 15 taon̈o tafara tatỳ, nimpody tan̈atiny jerinaka ndraiky raha ratsy jiaby niain̈ako tamy zaho mbala hely, ke nijaly mare eritreritrinaka. Ho dinikinaka, ‘zaho ty donko efa tsy ankasitrahiny Jehovah sady efa tsy vain̈y hitiaviny foeky!’ ” Miramira amy zen̈y koa raha niain̈any Ranabavy Yua, taminizy mbala hely. Ho izy: “Nanokanten̈a tamy Jehovah zaho, fotony zaho tihamparavoravo izy. Kanefa zaho mbala nieritreritry fo fa Jehovah tsy mety ho tia zaho.”

3. Ino raha hidinihintsika ato?

³ Ranabavy aroe tio in̈y samby tia Jehovah, fa iro tsy mety resy lahatra fa Jehovah ten̈a tia iro. Asa anao mba karaha zen̈y koa? Nan̈ino ma anao tokony ho resy lahatra fa anao tiany Jehovah sady karakarainy? Izikoa anao misalasala momba raha zen̈y, ino raha mety han̈ampy anao? Hivaliantsika fan̈ontanian̈a aby zen̈y.

4. Nan̈ino ma atsika ten̈a mila resy lahatra fa Jehovah tia atsika?

⁴ Fitiavan̈a raha mahery, ke izio angovo mandrisiky atsika han̈ano raha. Ino mahatsara anao resy lahatra fa Jehovah ten̈a  tia anao sady man̈ampy anao? Manjary tihanompo Jehovah amy fonao jiaby anao, ndray ino ndray ino raha mahazo anao. Kanefa anao koa mieritreritry fa Zan̈ahary tsy mijery anao, hihen̈y angovonao. (Ohab. 24:10) Ho moramora amy Satana koa hampivadiky anao, izikoa anao kivy ndreky misalasala momba fitiavany Jehovah anao.​—Efes. 6:16.

5. Nan̈ano akory olo sasany izikoa fa nisalasala momba fitiavany Jehovah iro?

⁵ Nanjary nihen̈y finoan̈any Kristianin̈y sasany, iro koa fa nisalasala. Karaha ty ho James, antipan̈ahy izio: “Ravoravo zaho manompo amy Betela ndreky man̈ampy amy fiangonan̈a miteny vahiny. Kanefa, efa navy nisy fotoan̈a zaho loso diniky: ‘Asa raha mba ankasitrahany Jehovah edy raha hataoko amy fanompoan̈a izy aby io?’ Ndraiky farany zaho tafieritreritry: ‘Asa raha mba tandrin̈esany Jehovah edy vavakanaka?’ ” Manompo amy Betela koa i Eva. Karaha ty ho izy: “Nanjary haiko fa ten̈a ratsy ankitin̈y misalasala momba fitiavany Jehovah atsika, fotony misy vokany amy fanompoan̈antsika raha zen̈y. Izikoa anao misalasala, manjary kamo anao han̈ano raha arapan̈ahy, baka io hihen̈y mare haravoan̈anao izikoa fa manompo izy.” I Michael ndraiky pisava lalan̈a maharitry sady antipan̈ahy. Ho izy: “Izikoa anao tsy mino fa Zan̈ahary ten̈a mijery anao ankitin̈y, anao manjary ho voataon̈o hiala Jehovah.”

6. Ino raha mila ataonao izikoa anao komansy misalasala tsao anao tsy tiany Jehovah?

⁶ Hitantsika tamy fitantaran̈a aby in̈y fa atsika koa misalasala momba fitiavany Jehovah atsika, mety ho robaka fifandraisan̈antsika aminany. Ino basy raha tokony hataonao izikoa anao efa komansy misalasala? Mila adosonao an̈atiny jerinao malaky fisalasalan̈a zen̈y! Iangavia Jehovah han̈amia anao ‘fiadanan̈anany’, fotony izio han̈ampy anao han̈adoso “raha mampiasaloha” anao aby zen̈y, ndreky ‘hiambin̈y fonao ndreky sain̈inao.’ (Sal. 139:23; Fil. 4:6, 7.) Aza adin̈a fa tsy anao zaraiky manan̈a eritreritry karaha zen̈y! Maro koa panompony Jehovah tsy mivadiky miady mare baka tsy hisalasala momba fitiavany Jehovah atsika, na taloha tan̈y zen̈y na amy zioty, an̈isanizen̈y apostoly Paoly.

7. Ino aby raha nanahiran̈a i Paoly?

⁷ Misy lera ma anao mahatsapa fa maro loatra andraikitrinao ke sarotro aminao mankefa iro jiaby? Izikoa zen̈y edy, mety ho  tsapanao raha nahazo i Paoly. Niasaloha momba fiangonan̈a izy, sady amy zen̈y tsy fiangonan̈a araiky fa ‘fiangonan̈a jiaby!’ (2 Kor. 11:23-28) Sa anao misy aretin̈y mitaiza ke nanjary nihen̈y haravoan̈anao? Mbala nahazo i Paoly fo koa raha zen̈y. Koran̈iny Baiboly fa mety nisy aretin̈y nampijaly izy mare. ‘Fatsiky amy nofotro’ ivolan̈any izio ao, ary izy ten̈a tiho janga mare. (2 Kor. 12:7-10) Va misy fotoan̈a anao kivy fotony anao tsy lavorary? Nisy fotoan̈a i Paoly mba nahatsapa raha karaha zen̈y. Ho izy: ‘Mampahinakinaka eky zaho zen̈y ay!’ Nan̈ino ma? Fotony izy niady mare baka hahavita han̈ano raha tsara.​—Rom. 7:21-24.

8. Ino raha nan̈ampy i Paoly hiatriky problemonany?

⁸ Ndray tio raha jiaby niaretany Paoly zen̈y, izy tsy voly nanompo Jehovah. Akory nahavitany Paoly niatriky raha aby zen̈y? Marin̈y fa nalainy onon̈o oe izy tsy lavorary, fa izy koa ten̈a nino vidipan̈avotan̈a. Hainy tsara koa raha nampan̈antin̈ainy Jesosy mivolan̈a fa ‘lan̈iany olo man̈aboaka finoan̈a izy [Jesosy], tsy hofoaty fa hahazo fiain̈ana tsisy farany.’ (Jaona 3:16; Rom. 6:23) Ninoany Paoly raha zen̈y. Natoky izy fa ndray be karakory fahotan̈a vitanolo araiky, Jehovah von̈ono han̈ambela hadisovan̈anany fo izikoa izy mibebaka ankitin̈y.—Sal. 86:5.

9. Ino raha ianarantsika baka amy raha nivolan̈iny Paoly amy Galatianina 2:20 ao?

⁹ Resy lahatra i Paoly fa matoa Zan̈ahary nandefa Jesosy hofoaty han̈avotan̈a izy, dikanizen̈y tiany Jehovah mare izy. (Vakia Galatianina 2:20.) Ten̈a mankahery volan̈anany amy farany andininy io. Ho izy: ‘Farandraha tiany Zanaka Zan̈ahary eky zaho ke foeny ain̈inany han̈avotan̈a zaho.’ Izy tsy nihevitry fa ratsy loatra raha vitany, ke Zan̈ahary efa tsy ho tia izy eky. Izy koa tsy nivolan̈a: ‘Haiko ndraiky i Jehovah tia iro rahalahiko aby io, fa zaho tsy matoky izy mbala ho tia zaho!’ Nampatsiarôviny Paoly iro Romanin̈y aby io fa ‘rango atsika mbala panota, Kristy efa naty han̈avotan̈a atsika.’ (Rom. 5:8) Tsisy raha mahasakana Jehovah tsy ho tia atsika!

10. Ino raha ianarantsika baka amy Romanina 8:38, 39?

¹⁰ Vakia Romanina 8:38, 39. Resy lahatra mare i Paoly fa ten̈a be ankitin̈y fitiavan̈any Zan̈ahary. Karaha ty raha nisoratiny: ‘Tsisy raha hahavita hampisaraka atsika amy fitiavan̈any Zan̈ahary.’ Hainy Paoly fa Jehovah ten̈a naharidraha tamy firenenany Israely. Hainy koa fa namindra fô taminany mare i Jehovah. Ke mety tihivolan̈a i Paoly fa ‘Jehovah efa nandefa Zanany hofoaty han̈avotan̈a zaho, ke tsisy raha tokony mbala hampisalasala zaho momba fitiavany zaho eky!’​—Rom. 8:32.

11. Koa zahan̈a 1 Timoty 1:12-15, maro fahotan̈a vitany Paoly taloha. Kanefa nan̈ino izy natoky fa izy tiany Zan̈ahary?

 ¹¹ Vakia 1 Timoty 1:12-15. Hay be fa nampialamboetry i Paoly mare nandiniky raha ratsy nataony taloha. Nivolan̈a foeky izy fa tsisy olo panota mandilatra izy! Tsy mahagaga izy koa nivolan̈a zen̈y, fotony nan̈enjiky Kristianin̈y mare izy talohany nahitany fahamarin̈ana. Nitety tanàna foeky izy nan̈ano zen̈y, ke nisy tamindro io nigadrainy. Izikoa fa nisy Kristianin̈y hivonen̈a, izy mba an̈isany nandatsabato nan̈eky raha zen̈y. (Asa. 26:10, 11) Miniminia hely baka fihetsehampôny Paoly izikoa fa nitraotro tamy tanora kristianin̈y araiky, kanefa i Paoly an̈isany nan̈eky hamonoan̈a iry olobenany! Nanen̈iny mare izy, kanefa hainy fa fahotan̈a vitany aby in̈y efa tsy mety hivoan̈a eky. Nan̈eky Paoly fa i Kristy efa naty han̈avotan̈a izy, ke karaha ty raha nisoratiny: ‘Baka taminy hatsarampan̈ahy tsisy ambaka izy naboakany Zan̈ahary taminaka, nampa karaha ty zaho.’ (1 Kor. 15:3, 10) Ino raha ianarantsika baka amy zen̈y? Ikia fa i Kristy efa naty han̈avotan̈a anao, ke anao manan̈a fahafahan̈a hifandray marikitry amy Jehovah. (Asa. 3:19) Fehiny: Raha ataonao amy zioty ndreky aminy amaray an̈y ny raha ten̈a maventy amy Zan̈ahary, fa tsy hadisovan̈a efa vitanao taloha, na efa Vavolombelon̈o Jehovah anao tamy zen̈y na tsendriky.​—Isaia 1:18.

12. Nan̈ino 1 Jaona 3:19, 20 man̈ampy atsika, lera atsika tafiheritreritra fa atsika io tsisy dikany na tsy vain̈y hitiavin̈y?

¹² Anao koa fa mandiniky fa i Jesosy naty han̈adoso fahotan̈anao, anao mety hivolan̈a: ‘Hitako tsy vain̈y zaho foeky kadô tsarabe zen̈y!’ Fontsika tsy lavorary io baka mety hamikataka atsika, ke ataony raha hahavy atsika hahatsapaten̈a ho tsisy dikany ndreky tsy vain̈y hitiavin̈y foeky. (Vakia 1 Jaona 3:19, 20.) Lera atsika tafieritreritry karaha zen̈y,  mila alaintsika onon̈o fa “Zan̈ahary mbala bebeny fontsika.” Ke na man̈amia tsin̈y atsika mare fontsika, tsy tokony hadin̈antsika fa mbala tiany Babantsika andan̈itry an̈y fo atsika sady von̈ono izy han̈ambela hadisovan̈antsika. Zen̈y fiheverany Jehovah atsika, ke mila miezaka atsika baka ho resy lahatra momba zen̈y. Mila mianatra Soratra Masin̈y matetiky atsika izikoa tihahavita zen̈y, ke hazoto hivavaka, ndreky hiaraka amy vahoakanany fo. Nan̈ino ma raha aby zen̈y ten̈a mila atao?

13. Nan̈ino ma atsika mila mianatra Baiboly? (Zahava koa “ Fomba Nan̈ampiany Volan̈a Zan̈ahary Iro”)

¹³ Mianara Baiboly isanandra, baka ho hainao tsarabe fa Jehovah zen̈y ten̈a tsara toetry. Izikoa anao mangala fotoan̈a hisaintsain̈ana Volan̈a Zan̈ahary isanandra, hahay handiniky tsarabe anao, ke ho vitanao ‘han̈itsy’ raha an̈atiny fonao ndreky jerinao. (2 Tim. 3:16) Zen̈y tsarabe raha nataony Kevin. Antipan̈ahy izio. Nivolan̈a izy fa nahatsiaro ten̈a tsisy dikany foeky izy taloha. Ho izy: “Zaho koa fa namaky ndreky nisaintsain̈y Salamo faha-​103, nanjary vitako nan̈itsy fomba fisain̈ananaka. Nanjary haiko karakory marin̈y fiheverany Jehovah zaho.” Karaha ty koa nivolan̈iny Eva, araiky nivolan̈intsika taloha tio in̈y: “Koa fa tsôfotro andra, zaho manokan̈a fotoan̈a fo hisaintsain̈ana momba raha hevitriny Jehovah. Ke manjary kalma oe fonaka, avio mahaifatatra koa finoan̈anaka.”

14. Nan̈ino ma atsika ten̈a mila mivavaka?

¹⁴ Mivavaha matetiky. (1 Tes. 5:17) Izikoa anao tihinaman̈a aminolo araiky, anao mila mikoran̈a aminany matetiky avio koran̈inao aminany raha jiaby an̈atiny fonao. Karaha zen̈y koa tokony hataonao, izikoa anao tihinaman̈a amy Jehovah. Mila koran̈inao aminany raha tsapanao, eritreritrinao, avio raha mampiasaloha anao. Zen̈y fomba an̈aboahanao fa anao matoky Jehovah, avio hainao fa anao io tiany ankitin̈y. (Sal. 94:17-19; 1 Jaona 5:14, 15) Ho Yua, araiky nikoran̈intsika taloha in̈y: “Zaho koa fa mivavaka, tsy raha nandalo tan̈atiny andra in̈y fo koran̈iko, fa koran̈iko aminany koa raha jiaby an̈atiny fonaka ndreky raha tsapako. Izikoa fa nandeha fotoan̈a, niova tsihelihely fahitako Jehovah. Tsy karaha sefo araiky mibekobeko in̈y fahitako Izy fa Baba araiky ten̈a tia zanaka in̈y.”​—Zahava “ Anao ma Efa Namaky Izio?”

15. Akory an̈aboahany Jehovah fa ten̈a mitady raha mahatsara anao izy?

¹⁵ Miaraha amy piaramanompo. Ten̈a kadô baka amy Jehovah iro io. (Jak. 1:17) Ten̈a mitady raha mahatsara anao i Jehovah, Babanao andan̈itry an̈y io, ke namezany rahalahy ndreky ranabavy maro anao an̈ivony fiangonan̈a. Iro io ten̈a “von̈ono han̈ampy amy fotoan̈a jiaby.” (Ohab. 17:17) Paoly koa fa nanoratra tamindro Kristianin̈y ta Kolosia, izy nanon̈ono an̈aran̈any  Kristianin̈y sasany. Nivolan̈a izy fa iro io ‘nan̈ampy izy ndreky nankahery izy.’ (Kol. 4:10, 11) Firaka tamy Kristy Jesosy mba nila naman̈a nan̈ampy izy fo, na anjely zen̈y na olombelon̈o. Ary ten̈a nankasitrahiny raha nataondro zen̈y.​—Lioka 22:28, 43.

16. Nan̈ino atsika mivolan̈a fa afaka man̈ampy atsika hifandray tsara amy Jehovah iro namantsika aby io?

¹⁶ Anao ma mba mangataka fan̈ampian̈a amy naman̈a amy fiangonan̈a ndreky man̈eky hampiandro? Anao mety mikoran̈a raha mahazo anao amy naman̈a matotro. Zen̈y tsy mivolan̈a fa anao malemy finoan̈a. Mifanohitry amy zen̈y aby, raha zen̈y mety hiaro anao. Karaha ty ho James, araiky nikoran̈intsika in̈y: “Nakiry zaho nisy kamarady matotro. Izikoa fa misy raha mampakivy zaho, tandrin̈esandro tsara zaho avio ampatsiarovindro zaho fa iro ten̈a tia zaho. Tsapako baka tamy raha nataondro zen̈y fa Jehovah ten̈a tia zaho ankitin̈y sady mitady raha mahatsara zaho.” Hitantsika baka amy zen̈y fa ten̈a mila miezaka atsika hinaman̈a amindro rahalahy ndreky ranabavintsika aby io!

17-18. Azovy tsy maintsy tandrin̈esantsika? Nan̈ino?

¹⁷ Tiany Satana halemy trôko atsika, amy zen̈y atsika tsy ho hisy angovo han̈ano ny tsara eky. Tiany atsika hieritreritry fa atsika tsy tiany Jehovah, salakady tsy vain̈y havotan̈a. Kanefa hitantsika tiô in̈y fa vandy areriky raha zen̈y!

¹⁸ Anao farandraha tiany Jehovah eky! Valera aminany mare anao io. ‘Tsy hiala amy fitiavan̈anany’ foeky anao izikoa man̈araka volan̈anany, karaha nataony Jesosy. (Jaona 15:10) Ke aza mitandren̈y volan̈any Satana foeky, baka io aza matoky fonao, sirto eky lera izio mitady han̈amia tsin̈y anao. Jehovah fo tandrin̈esa. Izy mahita raha tsara an̈atintsika tsiaraikiaraiky. Matokisa fa tiany Jehovah mare vahoakanany, an̈isanizen̈y anao!