1. Nan̈ino Jesosy niangavy Jehovah hiaro pianatranany?

NIERITRERITRY momba problemo mety havoa iro pianatranany aby io i Jesosy, taminy alin̈y talohany nifatesany. Farandraha tiany eky iro io, ke zen̈y nahavy izy niangavy Babany “mba hiaro iro aminy araiky ratsy in̈y.” (Jaona 17:14, 15.) Hainy Jesosy fa lera izy tafimpody andan̈itry an̈y, Satana Devoly mbala hiady aminolo tihanompo Jehovah fo. Ke ten̈a mila arovan̈a vahoakany Jehovah.

2. Nan̈ino atsika matoky fa Jehovah hamaly vavakantsika?

² Nivaliany Jehovah ma vavakany Jesosy? Ia, fotony tiany mare Zanany io. Ho tiany Jehovah koa atsika, izikoa mifen̈y angovo jiaby han̈ano raha tiany. Lera atsika mila vonjy ndreky fiarovan̈a, izy hamaly vavakantsika. Baba be fitiavan̈a i Jehovah, ke izy tsy voly hikarakara atsika zanany. Nan̈ino? Fotony ho voabaràka baka izy izikoa tsy man̈ano zen̈y.

3. Nan̈ino atsika iziô ten̈a mila fiarovan̈a baka amy Jehovah?

³ Ten̈a mila fiarovan̈a baka amy Jehovah atsika, intsaka eky amy zioty. Satana baka efa natsipy baka tandan̈itry tan̈y, ke izy iziô “meloko mare.” (Apok. 12:12) Hataony Satana raha hahavy olo han̈enjiky atsika. Hataony koa raha hahavy iro hihevitry fa ‘man̈ano fanompoan̈a masin̈y niny Zan̈ahary’ iro izikoa fa man̈enjiky atsika. (Jaona 16:2) Misy ndraiky olo mieritreritry fa Zan̈ahary zen̈y tsisy foeky, ke iro man̈enjiky atsika fotony atsika tsy mitovy amindro. Ndray ino ndray ino antony mahavy iro han̈enjiky atsika, tsy mavozo foeky atsika. Ino antony? Fotony Baiboly efa mivolan̈a: ‘Tompo tsy mivadiky amy raha efa nivolan̈iny, ke izy hampahery anaro ndreky hiaro anaro baka anaro tsy ho azony araiky ratsy in̈y.’ (2 Tes. 3:3) Alô atsika handiniky fomba aroe hiarovany Jehovah atsika.

4. Izikoa Efesianina 6:13-17 zahan̈a, ino aby raha namezany Jehovah hiarovan̈a atsika?

⁴ Namezany Jehovah fitaovan̈a ndreky raha mety sikinin̈y atsika, baka atsika hahavita hanohitry Satana. (Vakia Efesianina 6:13-17.) Tsy arabakiten̈y iro fitaovan̈a ndreky raha mety sikinin̈y aby io fa arapan̈ahy. Baka fitaovan̈a aby io hahavita hiaro atsika tsarabe, mila sikinintsika fo ndreky ampiasaintsika fo iro jiaby. Alô hizahavantsika tsiaraikiaraiky iro io.

5. Ino ma saintiry koran̈iny Baiboly io, avio nan̈ino atsika tsy maintsy misikiny izio?

⁵ Saintiry. Fahamarin̈ana amy Volan̈a Zan̈ahary raha tiany Baiboly koran̈iny amy saintiry io. Tsy maintsy misikiny saintiry io atsika, fotony izio miaro atsika amy Satana, “babany vandy.” (Jaona 8:44) Izy “mamitaka tany jiaby misy olo”, ary efa andrivony taon̈o zay nan̈anaovany zen̈y. (Apok. 12:9) Fahamarin̈ana amy Baiboly ao ndraiky miaro atsika, baka atsika tsy ho voafitakany Satana. Misikiny saintiry io atsika, izikoa fa mianatra ny marin̈y momba Jehovah ndreky manompo izy amy fomba ankasitrahiny. Man̈ano zen̈y koa atsika izikoa fa mifen̈y man̈ano ny marin̈y amy raha jiaby.​—Jaona 4:24; Efes. 4:25; Heb. 13:18.

6. Ino ma fiarovantratra koran̈iny Baiboly io, avio nan̈ino atsika tsy maintsy misikiny izio?

⁶ Fiarovantratra. Fahitsian̈a na fitsipikiny Jehovah momba ny tsara ndreky ratsy raha tiany havian̈a amy fiarovantratra io. Nan̈ino ma atsika mila misikiny izio? Fiarovantratra arabakiteny zioty natao hiarovan̈a fôny maramila amy zanapaly alefany fahavalo. Karaha zen̈y koa, fiarovantratra baka amy Jehovah io miaro fontsika an̈ohatra, amy zen̈y atsika tsy ho voantsoriny donia ty han̈ano ratsy. (Ohab. 4:23) Ravoravo Jehovah izikoa atsika tia izy ndreky manompo izy amy fô jiaby. (Mat. 22:36, 37) Mitady fomba fo Satana baka atsika tsy hanompo Jehovah amy fô jiaby. Ataony raha hahavy atsika ho tia raha amy donia ty, kanefa raha aby zen̈y halany Jehovah. (Jak. 4:4; 1 Jaona 2:15, 16) Izikoa fa hitany tsy mahômby tetikinany zen̈y, mitady fomba koa izy hampavozoan̈a atsika amy zen̈y atsika mandika fitsipikiny Jehovah.

7. Akory han̈aboahantsika fa misikiny fiarovantratra io atsika?

⁷ Misikiny fiarovantratra io atsika izikoa man̈eky ndreky man̈araka fitsipikiny Jehovah momba ny tsara ndreky ratsy. (Sal. 97:10) Mety hisy olo mieritreritry fa mamehifehy loatra fitsipikiny Jehovah. Kanefa, han̈ano akory olo araiky izikoa tsy man̈araka toro lalan̈anany amy Baiboly foeky? Miniminia hely ty: Han̈ano akory maramila araiky izikoa tsy man̈eky han̈ano fiarovantratra, fotony izy mihevitry fa izio mavesatra loatra? Hadalan̈a baka zen̈y, fotony hofoaty izy. Izikoa atsika tia Jehovah, atsika tsy mety hieritreritry fa “mavesatra” fitsipikinany, fotony izio mamonjy ain̈y.​—1 Jaona 5:3.

8. Akory ahitan̈a fa misikiny kiraro koran̈iny Baiboly io atsika?

⁸ Kiraro. Fahavon̈aosan̈a hitory vaovao tsarany fihavanan̈a raha tiany havian̈a amizio. Misikiny kiraro io atsika, izikoa atsika von̈ono fo hitory vaovao tsara momba Fanjakan̈any Zan̈ahary. Hahaiho fatatra fo finoan̈antsika, izikoa atsika mazoto man̈ambara hafatra io aminolo. Mampahery fa mitady fomba hitorian̈a fo vahoakany Jehovah erantany, na amy tany fiasan̈a zen̈y na a lekoly, na amy tany maro olo, na lera mitory isaka tran̈o, na a bazary, na lera mamangy fianakavian̈a, na lera mikoran̈a aminolo fankazatra iro. Ary ndray iro tsy afaka miboaka tran̈o, iro mbala mitady hevitry fo hitorian̈a. Misy pitory tsy mitory eky fotony iro mavozo. Asa anao mba karaha zen̈y? Izikoa zen̈y, anao miran̈a maramila nandeha niady kanefa nadosony kiraronany. Hay be fa haradràtra vitanany. Ho sarotro aminany hiaro ten̈a ndreky han̈araka bekony sefonany.

9. Nan̈ino ma atsika mila mitondra ampinga maventy io?

 ⁹ Ampinga maventy. Izio finoan̈a na fatokisantsika Jehovah. Matoky atsika fa tsy maintsy han̈atanteraka fampan̈antinan̈anany i Jehovah. Finoan̈a io han̈ampy atsika “hamono zanapaly mirehitry alefany araiky ratsy” in̈y, tsy azovy zen̈y fa Satana. Mila mitondra ampinga io atsika, amy zen̈y atsika tsy ho voafitakany raha diso ampianarindro pivadipinoan̈a aby io. Izio koa man̈ampy atsika tsy ho kivy izikoa fa misy olo man̈adroadro atsika amy raha inoantsika. Akory fo basy izikoa misy olo mampirisiky atsika handika fitsipikiny Jehovah? Ho vitantsika fo hanohitry iro izikoa atsika manan̈a finoan̈a. Tsaraova fa, isaka atsika tahôminolo han̈ano raha halany Jehovah, na a lekoly zen̈y na ampiasan̈a, finoan̈a io miaro atsika. (1 Pet. 3:15) Miaro atsika koa finoan̈a io lera misy olo man̈amia atsika asa hazahoan̈a volabe, kanefa asa io mety han̈elingelin̈y fanompoan̈antsika. (Heb. 13:5, 6) Ary ndray misy olo man̈enjiky atsika fotony atsika manompo Jehovah, efa finoan̈antsika io edy hiaro atsika.​—1 Tes. 2:2.

10. Ino ma fiarovandoha koran̈iny Baiboly io, avio nan̈ino atsika tsy maintsy misikiny izio?

¹⁰ Fiarovandoha. Fan̈antinan̈a amezany Jehovah atsika izy tiany havian̈a amy fiarovandoha io. Man̈anten̈a atsika fa Jehovah han̈amia  rady lan̈iany olo man̈ano sitrapônany. Ary ndray san̈atria olo io maty, Jehovah mbala hamelon̈o izy ndraiky. (1 Tes. 5:8; 1 Tim. 4:10; Tit. 1:1, 2) Fiarovandoha natao hiarovan̈a lohany mamarila. Karaha zen̈y koa, fan̈antinan̈a famonjian̈a io hiaro fahaizantsika misain̈y. Izio man̈ampy atsika hifantoko amy raha ampan̈antin̈ainy Jehovah fa tsy amy problemo mahazo atsika. Misikiny fiarovandoha io atsika izikoa mifen̈y hanan̈a fomba fisain̈ana mitovy amy niny Jehovah. ‘Amy Jehovah Zan̈ahary’ fo han̈apitrahantsika fatokisan̈antsika fa tsy amy vola na fanan̈ana, fotony raha aby io tsisy azo antoko.​—Sal. 26:2; 104:34; 1 Tim. 6:17.

11. Ino ma sabatra koran̈iny Baiboly io, avio nan̈ino atsika mila mahay mampiasa izio tsarabe?

¹¹ Sabatra. Izio manondro Volan̈a Zan̈ahary amy Baiboly ao. Izio mahavita man̈aboely vandy jiaby, avio mankafaka olo amy fampianaran̈a diso ndreky raha ratsy nahazatra izy. (2 Kor. 10:4, 5; 2 Tim. 3:16, 17; Heb. 4:12) Mianatra mampiasa tsarabe sabatra io atsika, izikoa fa mianatra manokan̈a ndreky lera ampiofan̈iny fandaminan̈any Zan̈ahary. (2 Tim. 2:15) Ankoatranizen̈y koa, mbala misy fitaovan̈a hafa koa amezany Jehovah atsika. Ino aby ma zen̈y?

12. Ino koa raha ilaintsika? Nan̈ino?

¹² Hainy maramila araiky zadraharaha fa tsy ho vitany foeky handresy tafiky araiky maventibe, izikoa izy miady manokan̈a. Mila fan̈ampiany maramila hafa koa izy. Tsy ho vitantsika foeky koa hanohitry Satana ndreky olonany aby io, izikoa aminy angovontsika manokan̈a fo. Mila fan̈ampian̈andro rahalahy ndreky ranabavy aby io atsika. Namezany Jehovah maramila mandeha antapitrisany atsika han̈ampian̈a atsika, tsy azovy zen̈y fa iro “rahalahy jiaby amy finoan̈a.”​—1 Pet. 2:17.

13. Eraka raha koran̈iny Hebreo 10:24, 25, ino aby ma hatsaran̈a azontsika izikoa fa mivory?

¹³ An̈isany fomba araiky azahoantsika fan̈ampian̈a: Fivorian̈a. (Vakia Hebreo 10:24, 25.) Atsika jiaby io mety ho kivy aby ndraikindraiky. Fa lera atsika mivory, atsika mahazo fampahirezan̈a. Mampahery atsika iziô ohatra maharen̈y valinteny baka amy fô ataondro piaramanompo amintsika. Ten̈a mandrisiky atsika hanompo Jehovah fo koa iro kabaro ndreky fampisehoan̈a atao an̈y. Mampahery atsika koa koran̈a ataontsika miaraka amy piaramanompo, aloha ndreky afarany fivorian̈a. (1 Tes. 5:14) An̈y koa atsika afaka man̈ampy iro namantsika aby io. Ravoravo atsika man̈ano zen̈y. (Asa. 20:35; Rom. 1:11, 12) Man̈ampy atsika amy fomba hafa koa iro fivoriana ataontsika aby io. Izio man̈ampy atsika hahay hitory ndreky hampianatra, ke manjary miran̈a maramila zadraharaha in̈y atsika. Nan̈ino ma atsika mivolan̈a zen̈y? An̈y atsika mianatra mampiasa tsarabe iro Fitaovan̈a Fampianaran̈a anan̈antsika aby io. Ke omàn̈a tsarabe fivorian̈a, avio tandrin̈esa tsarabe raha hazavain̈y an̈y. Izikoa fa mandeha fotoan̈a, ampihara raha nianaranao tan̈y. Izikoa anao man̈ano zen̈y, hanjary “maramila tsarany Kristy Jesosy” edy anao.​—2 Tim. 2:3.

14. Ino koa fomba hafa han̈ampiany Jehovah atsika?

¹⁴ Man̈ampy atsika koa iro anjely maro matanjaka mandeha antapitrisany aby io. Miniminia hely baka raha vitany anjely araiky fo! (Isaia 37:36) Diniha amy zay raha mety ho vitany anjely marobe! Tsisy olo na demony hahavita handresy tafikiny Jehovah maro mahery aby io. Izikoa Jehovah miaraka amintsika, tsy ho vitandro fahavalontsika aby io foeky hanohitry atsika, ndray iro marobe karakory. (Mpits. 6:16) Mety han̈ano raha na hivolan̈a raha mampakivy anao olo miaraka miasa aminao na lekoly araiky aminao, na havanao tsy  vavolombelon̈o. Kanefa aza adin̈a fa, anao tsy miady manokan̈a. Jehovah han̈ampy anao, fa anao fo mila man̈araka taridalan̈anany.

15. Izikoa Isaia 54:15, 17 zahan̈a, ino mahavy atsika mivolan̈a fa tsisy olo hahavita hampangin̈y atsika vahoakany Jehovah?

¹⁵ Maro antony mahavy atsika halany donia ty. Atsika baka tsy man̈ano politiky ndreky tsy man̈eky handeha lagera. Mikoran̈a aminolo momba an̈aran̈any Zan̈ahary koa atsika, avio koran̈intsika amindro fa Fanjakan̈any Zan̈ahary zaraiky fo mahavita hampiadan̈a atsika. Arehantsika koa fitsipikiny Jehovah momba ny tsara ndreky ratsy. Koran̈intsika aminolo fa Satana mifehy donia ty, ary izy ten̈a ratsy fan̈ahy, pamono olo avio sefony vandy. (Jaona 8:44) Tsy vitanizen̈y fo fa, ambarantsika aminolo koa fa tsy ho ela, ho ravan̈a donia ty. Mitady hevitry i Satana ndreky olonany aby io hampangin̈y atsika, fa tsy ho vitandro raha zen̈y. Ino antony? Fotony atsika von̈ono hampiasa fomba jiaby hideran̈a Zan̈ahary. Marin̈y fa Satana mahery mandilatra atsika. Kanefa tsy ho vitany foeky hisakana olo erantany tsy haharen̈y vaovao tsara momba Fanjakan̈a io, fotony Jehovah miaro atsika.​—Vakia Isaia 54:15, 17.

16. Akory hataony Jehovah han̈avotro vahoakanany lera amy fahorian̈a be?

¹⁶ Ino ma raha hiboaka tsy ho ela? Handalo fahorian̈a be mbala tsisy ambaka izy atsika, ke amy leranio, Jehovah han̈avotro atsika vahoakanany. Misy fomba aroe han̈anaovany zen̈y. Voanalohany, izy hamonjy panomponany tsy mivadiky, lera izy man̈iraka iro panjakany tany aby io handravan̈a Babylony Be, na fivavahan̈a diso jiaby. (Apok. 17:16-18; 18:2, 4) Faharoe, izy han̈avotro vahoakanany lera izy handravan̈a raha hafa mbala tavela amy doniany Satana ty, aminy Aramagedona.​—Apok. 7:9, 10; 16:14, 16.

17. Ino aby hatsaran̈a ho azonao izikoa anao mifen̈y fo ho tsara fihavanan̈a amy Jehovah?

¹⁷ Izikoa atsika mifen̈y fo ho tsara fihavanan̈a amy Jehovah, tsy ho vitany Satana foeky hisakana atsika tsy hiain̈y mandrakizay. Ny marin̈y aminany, hofoaty mandrakizay i Satana. (Rom. 16:20) Ke sikìna avio alaiva aby iro fitaovan̈a namezany Jehovah hiarovan̈a atsika, baka io aza adoso aminao foeky! Aza man̈andran̈a miady manokan̈a foeky. Ampia koa iro piaramanompo aminao aby io, avio areha taridalan̈a amezany Jehovah. Izikoa anao man̈ano zen̈y, matokisa fa Jehovah, Babanao be fitiavan̈a andan̈itry an̈y io, hampahery ndreky hiaro anao.​—Isaia 41:10.