1-2. Azovy afaka man̈ampy pianatra Baiboly araiky handroso ke hatao batisa?

KARAHA ty ho Amỳ, ranabavy baka a Fidji zay: “Farandraha tiako eky raha nianarako tamy Baiboly tao. Haiko fa izio ny marin̈y, kanefa tamy zaho nikomansy nifanerasera tamy piaramanompo vo nahavita niova ndreky nandroso ke natao batisa.” Misy raha matomboko ianarantsika baka amy zen̈y. Malaky mandroso ndreky mahafeno fepetra hatao batisa pianatra Baiboly araiky, izikoa mahazo fan̈ampian̈a baka aminolo an̈ivony fiangonan̈a.

² Samby afaka man̈ampy olo vaovao handroso aby pitory tsiaraikiaraiky an̈ivony fiangonan̈a. (Efes. 4:16) Ho Leilani, pisava lalan̈a mipetraka a Vanuatu an̈y: “Misy fivolan̈ana zay mivolan̈a fa olo araiky zen̈y tsy mahabe tsaiky. Hitako marin̈y tsarabe raha zen̈y firaka amy fampianaran̈a Baiboly, fotony baka aminy ezaka ataonolo jiaby an̈ivony fiangonan̈a mahavy pianatra Baiboly araiky han̈eky fahamarin̈ana.” Ohatra, matoa tsaiky araiky mandroso, dikanizen̈y, samby nan̈ampy izy aby na iro tran̈o araiky aminany, na iry kamaradiny, na olo mampianatra izy Baiboly. Man̈ano zen̈y iro izikoa fa mampianatra izy lay raha ten̈a ilain̈a amy fiain̈ana. Karaha zen̈y koa, iro rahalahy ndreky ranabavy an̈ivony fiangonan̈a. Iro mety man̈amia torohevitry ndreky mampahery pianatra Baiboly io. Mifen̈y koa iro ho modely tsara arehany pianatra io. Han̈ampy izy handroso ndreky hatao batisa raha zen̈y.​—Ohab. 15:22.

3. Ino raha ianaranao baka amy raha nivolan̈iny Ana, ndreky Dorin, ndreky Leilani?

³ Tokony ho ravoravo mare anao, izikoa misy pitory hafa man̈ampy pianatranao handroso. Nan̈ino ma? Karaha ty raha nivolan̈iny Ana, pisava lalan̈a manokan̈a a Moldavie an̈y: “Pianatra Baiboly koa fa manomboko mandroso, maro fan̈ampian̈a ilainy, ke tsy  ho vitanten̈a zaraiky han̈ano raha jiaby zen̈y.” Pisava lalan̈a manokan̈a a Moldavie koa Rahalahy Dorin. Ho izy: “Matetiky, ny raha tsapako, raha volan̈iny pitory hafa ten̈a miditry amy fonolo ampianarinten̈a.” Fa atsika tokony ho ravoravo fo izikoa fa misy pitory hafa man̈ampy olo ampianarintsika. Ino antony? Ho Leilani: “Mila tsapanolo ampianarinten̈a fa tia izy sady mitady raha mahatsara izy iro piaramanompo aby io. Fa izikoa tsy zen̈y, izy tsy mety ho resy lahatra fa ten̈a vahoakany Jehovah ankitin̈y atsika.”​—Jaona 13:35.

4. Ino raha handeha hidinihintsika ato?

⁴ Anao mety ho rôso diniky: ‘Akory an̈ampiako pianatra Baiboly araiky handroso, nata tsy zaho mampianatra izy?’ Handiniky raha telo ty atsika, hamalian̈a zen̈y: 1) Ino aby raha mety atao izikoa anten̈a tahôminolo hiaraka hampianatra Baiboly aminany? 2) Ino raha mety ataonao izikoa pianatra Baiboly io efa komansy mivory? 3) Ino raha mety ataony antipan̈ahy han̈ampian̈a pianatra Baiboly io handroso ke hahafeno fepetra hatao batisa?

5. Izikoa anao tahôminolo hiaraka hampianatra aminany, ino ma andraikitrinao?

⁵ Marin̈y fa pitory tompiny fampianaran̈a io ny tompinandraikitry voanalohany amy fan̈ampian̈a pianatranany hahay raha koran̈iny Baiboly. Kanefa, anao koa tahôminy hiaraka hampianatra aminany, aza adin̈a fa hitatahy izy andraikitrinao. (Mpito. 4:9, 10) Ke ino raha mety hataonao baka ho vitanao han̈ampy izy lera anaro mampianatra?

6. Akory mety han̈arehanao toro lalan̈a aminy Ohabolana 20:18, izikoa fa misy mitaon̈o anao hiaraka hampianatra Baiboly aminany?

⁶ Man̈omàn̈a tsialohaloha. Voanalohany, an̈ontania papianatra io mombamomba olo ampianariny. (Vakia Ohabolana 20:18.) An̈isany raha mety han̈ontanianao izy, ohatra: “Karakory ma olo handeha hampianarintsika io? Ino fianaran̈a hidinihintsika miaraka aminany? Lera atsika hampianatra izy io ma, ino raha tianao ho hainy? Ino raha tokony hivolan̈iko na ino raha tsy tokony hivolan̈iko? Ino raha mety hataoko han̈ampian̈a pianatra io handroso?” Hay be fa papianatra Baiboly io tsy handeha hikoran̈a sekirenolo ampianariny io, kanefa mety han̈ampy anao raha koran̈iny. Karaha zen̈y iziô nataony Joy, ranabavy misionera zay. Isaka izy mitaon̈o pitory hiaraka hampianatra Baiboly aminany, koran̈iny amy namany io tsialohaloha mombamomba pianatra io. Ho izy: “Zaho koa fa mikoran̈a aminolo hiaraka hampianatra aminaka, iro manjary tihan̈ampy pianatra io koa. Manjary moramora amindro koa mahita raha koran̈iny koa fa mandeha fianaran̈a.”

7. Izikoa anao tahôminolo hiaraka hampianatra aminany, nan̈ino ma anao tokony han̈oman̈a?

⁷ Izikoa misy olo mitaon̈o anao hiaraka hampianatra aminany, omàn̈a tsialohaloha  lahatsoratra hianaran̈a. (Ezra 7:10) Ho Rahalahy Dorin, araiky nikoran̈intsika taloha tio in̈y: “Ravoravo zaho izikoa namako io mba nan̈oman̈a fianaran̈a. Hahavita han̈amia fan̈azavan̈a ten̈a ilain̈a izy, izikoa man̈ano zen̈y.” Tsy zen̈y fo fa, ho hitany pianatra io koa fa samby nan̈oman̈a anaro roe, ke manjary tihan̈ano karaha zen̈y koa izy. Ndray tsy ho vitanao han̈oman̈a fianaran̈a io rango amy voanalohany firaka amy farany, diniha tsialohaloha fo hevitry maventy an̈atinizio ao.

8. Ino raha mety hataonao baka ho hisy dikany ndreky hampahery vavakanao?

⁸ An̈isany tapany maventy amy fampianaran̈a Baiboly: Vavaka. Ke izikoa anao irahin̈y hisoloten̈a hivavaka, diniha tsialohaloha raha mety koran̈inao. Ho hisy dikany sady hampahery vavakanao izikoa anao man̈ano zen̈y. (Sal. 141:2) Karaha ty raha tsapany Ranabavy Hanae, mipetraka a Japon. Mbala azony onon̈o fo vavaka nataony ranabavy niaraka nampianatra tamy papianatranany zay. Ho izy: “Hitako baka tamy vavakanany fa ten̈a lalin̈y fifandraisany tamy Jehovah, ke mba tiako izikoa zaho mba karaha zen̈y koa. Nampidiriny tamy vavaka tao koa an̈aran̈anaka, ke tsapako fa ten̈a tia zaho izy.”

9. Izikoa zahan̈a Jakoba 1:19, ino raha mety hataonao han̈ampian̈a papianatra Baiboly io?

⁹ Ampia papianatra Baiboly io. Karaha ty nambarany Omamuyovbi, pisava lalan̈a manokan̈a a Nizeria: “Ten̈a man̈ampy papianatra io anao izikoa mitandren̈y tsara koa fa mandeha fianaran̈a, avio man̈amia fan̈azavan̈a voaoman̈a tsara izikoa ilain̈a zen̈y. Aza man̈azava raha maro loatra. Anjaranolo mampianatra izy man̈ano zen̈y, fotony izy mitariky fampianaran̈a io.” Mila hainao koa mifidy fotoan̈a ndreky fomba han̈anaovan̈a zen̈y. Akory ma zen̈y? (Ohab. 25:11) Alaiva onon̈o tsarabe raha koran̈iny papianatra io ndreky pianatra io. (Vakia Jakoba 1:19.) Izikoa papianatra Baiboly io man̈azava raha, aza tapahan̈a volan̈anany. Izikoa ndraiky anao tihan̈ampy fan̈azavan̈a, aza man̈azava raha maro loatra, na raha tsisy ifandraisany amy fianaran̈a io. Azonao atao koa mikoran̈a hevitry na mampiasa fan̈oharan̈a fohiky na man̈apetraka fan̈ontanian̈a, izikoa zen̈y hampazavazava fianaran̈a io. Ndraikindraiky, anao mety tsy hahita raha koran̈iny, kanefa aza adin̈a midera pianatra io. Aboaha fa anao ten̈a mitady raha mahatsara izy. Han̈ampy izy handroso edy anao izikoa man̈ano zen̈y.

10. Nan̈ino mety han̈ampy pianatra Baiboly fitantaranao aminany raha niain̈anao?

¹⁰ Tantarà raha niain̈anao. Lera anao tahôminolo hiaraka hampianatra Baiboly, anao mety mitantara hely amy pianatra io fomba nahitanao fahamarin̈ana, na fomba nahavitanao niatriky raha manahiran̈a, na koa fomba nan̈ampiany Jehovah anao. (Sal. 78:4, 7) Mety efa zen̈y edy raha ilainy pianatra io hampafatatra finoan̈anany, na handrisiky izy handroso fo ke hatao batisa. Mety ho zen̈y koa raha han̈ampy izy hahay hiatriky fitsapan̈a. (1 Pet. 5:9) Pisava lalan̈a a  Brezily i Gabriel. Ino raha nan̈ampy izy taminizy mbala pianatra Baiboly? Karaha ty ho izy: “Nitantaraindro piaramanompo aby io taminaka raha niain̈andro, ke tsapako fa hitany Jehovah aby problemo jiaby mavoa atsika io. Nan̈amia toky zaho raha nitantaraindro zen̈y fa ho vitako koa hiatriky raha sarotro mandalo amy fiain̈anaka.”

11-12. Nan̈ino ma iro pianatra Baiboly aby io mila raisintsika tsara koa fa avy mivory?

¹¹ Pianatra Baiboly koa tihandroso ndreky hatao batisa, izy mila mivory tsy tapaka. Ho maro hatsaran̈a ho azony, izy koa man̈ano zen̈y. (Heb. 10:24, 25) Marin̈y fa olo mampianatra izy nikaiky izy handeha hivory voanalohany. Kanefa, lera pianatra io avy mivory, atsika jiaby mety man̈ano raha hahavy pianatra io ho tamana ndreky hazoto hivory fo. Akory mety han̈anaovantsika zen̈y?

¹² Aboaha fa ravoravo mare anao naviany. (Rom. 15:7) Raìsa tsara izy koa fa avy mivory. Prezante aminolo hafa koa izy. Izikoa tsapany pianatra io fa niraisintsika tsara izy, hazoto hivory fo izy. Aza mieritreritry foeky fa olo mampianatra izy fo tokony hikarakara izy. Ndraikindraiky, olo mampianatra izy io mety mbala tsy avy, na mbala sahiran̈a aminy andraikitry hafa. Tandrin̈esa tsara koa raha volan̈iny, avio aboaha fa anao ten̈a mitady raha mahatsara izy. Han̈ano akory pianatra Baiboly io, izikoa anao man̈ano zen̈y? Ty raha tsaroany Dmitrii, taminizy somilany navy nivory: “Zaho taminio navozo mare niditry tamy Tran̈o Fivorian̈a. Nisy rahalahy zay nan̈aton̈o zaho, sady nampirisiky zaho niditry tao. Tsara fan̈ahy mare rahalahy io. Zaho koa fa navy tao, maro olo nan̈ano mbalatsara zaho. Lany fan̈ahy zaho, fotony zaho tsiary nahita raha karaha zen̈y. Tiako loatra fomba nandraisandro zaho tao, ke tiako nisy fivorian̈a fo isanandra.” Dmitrii iziô efa vita batisa, avio izy efa pan̈ampy amy fanompoan̈a.

13. Nan̈ino ma anao mila man̈amia ohatra tsara amy fitondranten̈a?

¹³ Man̈ameza ohatra tsara. Tsaraova fa baka amy fitondranten̈anao ndreky fihetsikinao koa mety hahavy pianatra io ho resy lahatra fa nahita ny marin̈y izy. (Mat. 5:16) Karaha ty nambarany Vitalii, rahalahy pisava lalan̈a a Moldavie an̈y: “Nidinihiko fomba fiain̈ananolo tamy fiangonan̈a tao. Nidinihiko koa toetsain̈indro ndreky fitondranten̈andro, ke resy lahatra zaho fa panompony Zan̈ahary ankitin̈y Vavolombelon̈o Jehovah.”

14. Amy karakory ma modely tsara ambelantsika mety han̈ampy pianatra Baiboly handroso?

¹⁴ Hahafeno fepetra amy batisa pianatra araiky izikoa izy miain̈y mifan̈araka amy raha ianarany. Tsy mora raha zen̈y! Kanefa, izikoa hitany amy raha ataonao fa ten̈a tsara marin̈y man̈araka toro lalan̈any Baiboly, mety hangala tahaka anao koa izy. (1 Kor. 11:1) Zen̈y iziô raha nataony Ranabavy Hanae, araiky  nikoran̈intsika tio in̈y. Ho izy: “Hitako fa iro piaramanompo aby io niain̈y nifan̈araka tamy raha nianarako tamy Baiboly tao. Ke modely tsarandro zen̈y nan̈ampy zaho hahay hampahery olo, han̈ambela hadisovan̈a, ndreky han̈aboaka fitiavan̈a. Nivolan̈a raha tsara momba olo hafa fo koa iro. Ke mba tihan̈ano karaha zen̈y koa zaho.”

15. Izikoa zahan̈a Ohabolana 27:17, nan̈ino ma iro pianatra Baiboly aby io mila ataontsika naman̈a?

¹⁵ Ataova naman̈a izy. Isaka anao mahita pianatra io avy mivory, ataova tsapany fa mitady raha mahatsara izy anao. (Fil. 2:4) Ke ataova raha ahaizanao izy tsarabe. Koràn̈a izy, avio an̈ontania izy karakory fandehany fianarany Baiboly, akory naniny fianakavian̈anany ndreky asanany. Ndray zen̈y, aza man̈ontany raha mety hampasanganehan̈a izy. Izikoa anao miezaka hinaman̈a aminany, mety han̈ampy izy handroso ndreky hatao batisa raha zen̈y. (Vakia Ohabolana 27:17.) Efa pisava lalan̈a maharitry i Hanae amy zioty. Mbala azony onon̈o fo taminizy somilany nandeha nivory. Ho izy: “Zaho koa fa nisy kamarady tan̈ivony fiangonan̈a, nanjary tiako nandeha nivory. Nifen̈y fo zaho nandeha nivory ndray zaho fa kajo. Ravoravo zaho niaraka tamy namako vaovao aby io, ke nanjary tsy sarotro taminaka niala iro kamaradiko tsy manompo Jehovah aby in̈y. Tiako marikitry Jehovah ndreky iro piaramanompo aby io baka zaho. Ke zen̈y nahavy zaho nanapakevitry hatao batisa.”

16. Akory koa mety hataonao baka pianatra Baiboly io mahatsapa fa ten̈a an̈isany fiangonan̈a izy?

¹⁶ Pianatra Baiboly io koa fa mifen̈y mare man̈ano fan̈ovoan̈a avio mandroso, ataova tsapany fa efa an̈isany fiangonan̈a izy. Akory han̈anaovanao zen̈y? Amy fahaizanao mandray vahiny. (Heb. 13:2) Zen̈y iziô raha nan̈ampy Rahalahy Denis, baka a Moldavie. Ho izy: “Matetiky zahay roeny vadiko tahômindro piaramanompo aby io antran̈ondro an̈y. Nikoran̈indro taminay fomba nan̈ampiany Jehovah iro. Ten̈a nampahery zahay raha zen̈y! Fiarahan̈a jiaby zen̈y nan̈ampy zahay ho tapakevitry hanompo Jehovah, ndreky ho resy lahatra fa ho tsara mare fiain̈ana miambin̈y zahay aminy hoavy.” Lera pianatra Baiboly io loso pitory, tahaoma hiaraka hanompo aminao izy. Karaha ty nivolan̈iny Diego, rahalahy mipetraka a Brezily: “Maro rahalahy nitaon̈o zaho hitory hiaraka amindro, ke nanjary haiko tsarabe iro. Maro koa raha nianarako baka tamindro, ke nanjary nahainarikitry Jehovah ndreky Jesosy fo zaho.”

17. Akory mety han̈ampiany antipan̈ahy iro pianatra Baiboly aby io?

¹⁷ Manokàn̈a fotoan̈a han̈ampian̈a pianatra Baiboly. Izikoa aboakandro antipan̈ahy aby io fa iro tia ndreky mitady raha mahatsara pianatra Baiboly, han̈ampy pianatra io handroso ndreky hatao batisa raha zen̈y. Azony antipan̈ahy atao iziô mikoran̈a matetiky amindro pianatra Baiboly  aby io. Alaiva onon̈o koa an̈arandro, intsaka eky iro koa fa mamaly teny. Ho tsapandro fa ten̈a tia iro ankitin̈y anao, izikoa man̈ano zen̈y. Diniha koa ty: ‘Impiry ma zaho mba niaraka taminolo mampianatra izy Baiboly, ke niaraka nampianatra izy tan̈y?’ Hahavita han̈ampy pianatra io anao izikoa man̈ano zen̈y; ary ndraikindraiky, mety tsy arakarakany iritriretanao izy foeky. Karaha ty nambarany Ranabavy Jackie, mipetraka a Nizeria: “Maro aminolo ampianariko aby io lany fan̈ahy, izikoa fa mahay fa antipan̈ahy ranadahy niaraka taminaka, tamy zaho nampianatra izy in̈y. Nisy olo nampianariko zay nivolan̈a:‘Tsy honohono pasteranay foeky han̈ano karaha nataony io, izikoa tsy raha olo pan̈arivo donko anten̈a, na nifain̈a vola izy ke navy!’ ” Amy zioty, efa mivory tsy tapaka pianatra io.

18. Ino andraikitriny antipan̈ahy, koran̈iny Asan’ny Apostoly 20:28? Akory mety han̈anaovandro zen̈y?

¹⁸ Ampiofàn̈a avio amia korazy iro papianatra Baiboly aby io. Manan̈a andraikitry maventy anaro antipan̈ahy, tsy ino zen̈y fa man̈ampy iro pitory aby io hankatsara fahaizandro mitory ndreky mampianatra. (Vakia Asan’ny Apostoly 20:28.) Misy pitory men̈atra sady mavozo hitariky fampianaran̈a Baiboly ankilany antipan̈ahy. Izikoa zen̈y, koràn̈a aminany fa afaka mitariky fampianaran̈anany io anao. Ho Jackie, ranabavy nikoran̈intsika tio in̈y: “Matetiky antipan̈ahy man̈ontany zaho akory nanindro olo ampianariko aby io. Zaho koa fa sahiran̈a mitariky fampianaran̈a Baiboly, amezandro torohevitry zaho indesiko mankatsara fahaizako mampianatra.” Mety hiatriky raha sarotro iro papianatra Baiboly aby io. Kanefa maro raha mety ataony antipan̈ahy baka iro io tsy ho kivy fa hanohy han̈ano asa io fo. (1 Tes. 5:11) Ho Jackie: “Ravoravo zaho izikoa fa mankasitraka raha tsara ataoko iro antipan̈ahy aby io. Mahatsiaro velombelon̈o zaho, karaha ataonolo araiky mahazo rano manintsinintsy aminandra mafana in̈y. Iro koa fa midera zaho, manjary ravoravo ndreky mahaimatoky ten̈a fo zaho koa fa mitariky fampianaran̈a Baiboly.”​—Ohab. 25:25.

19. Nan̈ino ma samby afaka ho ravoravo aby atsika jiaby?

¹⁹ Akory fo basy izikoa anao mbala tsisy pianatra Baiboly? Mbala afaka man̈ampy olo handroso ndreky hatao batisa fo anao. Izikoa anao miaraka mampianatra Baiboly aminolo, anao mety man̈ampy fan̈azavan̈a, fa aza atao lava fo. Han̈ampy namanao raha zen̈y. Izikoa fa manomboko mivory pianatra io, alaiva kamarady izy avio mifen̈a ho modely tsara mety harehany. Izikoa antipan̈ahy anao, manokàn̈a fotoan̈a hikoran̈ana amindro. Ampiofàn̈a koa iro pitory aby io baka iro hahay hampianatra, avio deray iro izikoa fa mahavita raha tsara. Ho ravoravo aby atsika jiaby izikoa samby miezaka man̈ano erakany mety ho vitantsika han̈ampian̈a pianatra io ho tia Jehovah ndreky hanompo izy.