Maro Vavolombelon̈o Jehovah mampiasa applications ifandraisan̈a aminy havan̈a ndreky piaramanompo. Kanefa Kristianin̈y matotro koa fa mampiasa raha aby zen̈y, mifen̈y fo izy man̈araka torohevitry ty: ‘Olo mahay mandiniky koa fa mahatazan̈a raha mety haviany antambo, direkty izy misitriky; fa olo tsy mahay mandiniky ndraiky rôso fo, ke farany izy avoa.’​—Ohab. 27:12.

Haintsika fa tiany Jehovah harovan̈a atsika. Ke zen̈y mahavy atsika tsy mifandray aminolo mampisy fisaratsarahan̈a, aminolo voaroaka, ndreky amy pivadipinoan̈a. (Rom. 16:17; 1 Kor. 5:11; 2 Jaona 10, 11) Mety tsy han̈araka raha koran̈iny Baiboly koa piaramanompo sasany na olo sasany mifandray amy fiangonan̈a. (2 Tim. 2:20, 21) Mila alaintsika onon̈o aby raha jiaby zen̈y, alohany atsika hifidy naman̈a. Kanefa mety ho sarotro amintsika hahay hifidy naman̈a izikoa baka aminy applications fandifasan̈a hafatra han̈anaovantsika zen̈y.

Ndraikindraiky, mety ho maro olo mifandray an̈atinizio, ke mamoron̈o groupe de discussion. Misy Kristianin̈y sasany nahita problemo, izikoa fa niditry tamy groupe misy olo marobe karaha zen̈y. Mila mitandrin̈y fo rahalahy na ranabavy araiky izikoa tihiditry amy groupe misy olo anjatony na andrivony, fotony tsy posibla ho hainy foeky olo karakory aby ifandraisany an̈atinizio ao, ary matetiky tsisy fomba ahaizan̈a arapan̈ahindro foeky. Salamo 26:4 mivolan̈a: “Zaho tsy minaman̈a aminolo pamitaka, baka io zaho tsy mifanerasera aminolo manitriky ny ten̈a maha izy izy.” Misy jery anao izikoa olo hainao tsarabe ifandraisanao amizio ao.

Akory fo basy izikoa vitsy hely olo an̈atiny groupe io ao? Tsy hamarozanolo amizio ao fo mila dinihiny Kristianin̈y, fa fotoan̈a mety ho laniny ndreky koran̈a ataonolo ao koa. Tokony halainy onon̈o koa fa tsy kila koran̈a jiaby ao zay mila valian̈a aby, na kelera na kelera. Apostoly Paoly nivolan̈a tamy Timoty fa izy tsy tokony hifandray ‘aminolo tia mitsiko olo ndreky olo tia mitsôfotro aminy aferanolo.’ (1 Tim. 5:13) Aminandra iziô, raha karaha zen̈y posibla misy tsarabe izikoa fa mampiasa applications fandifasan̈a hafatra aby io.

Tsisy Kristianin̈y matotro ke handeha hamaky, na hitandren̈y, na hanoratra raha mankaratsy piaramanompo na sekireny piaramanompo zen̈y foeky. (Sal. 15:3; Ohab. 20:19) Tsy tokony hitandren̈y na han̈aparitaka vaovao tsy azo antoko koa izy. (Efes. 4:25) Ampy tsara hanin̈y arapan̈ahy azontsika amy jw.org ao ndreky amy fandaharan̈a isaka fanjava amy Tele JW. Azo antoko koa tatitry azontsika amindro io ao.

Maro Vavolombelon̈o Jehovah mampiasa applications fandifasan̈a hafatra aby io handafaosan̈a na hivangan̈a raha, na han̈aboahan̈a aminolo maro entan̈a halafo, na koa itadiavan̈a asa. Raha momba asa ndreky varotro zen̈y, ke tsisy ifandraisany amy fanompoan̈a Jehovah foeky. Izikoa Kristianin̈y araiky tiho ‘afaka amy fitiavambola’, izy tsy mety han̈araraotro piaramanompo ke han̈ano iro ho fitaovan̈a azahoan̈a vola be.—Heb. 13:5.

Akory ndraiky basy izikoa atsika mampiasa applications fandifasan̈a hafatra aby io hangatahan̈a vola aminolo, han̈ampian̈a piaramanompo sahiran̈a na nandalaovany antambo? Farandraha tiantsika eky iro piaramanompo aby io, ke mitady fomba fo atsika han̈ampian̈a iro ndreky hampahirezan̈a iro. (Jak. 2:15, 16) Kanefa, efa misy fandaharan̈a alamin̈iny birôny sampan̈a na fiangonan̈a han̈ampian̈a iro io. Ke ho robaka lamin̈y zen̈y izikoa baka amy groupe feno olo marobe han̈anaovan̈a zen̈y. (1 Tim. 5:3, 4, 9, 10, 16) Tsisy amintsika foeky tihan̈ano raha hahavy olo hieritreritry fa nahazo fanendren̈a miavaka hikarakara ondrikondrikiny Zan̈ahary atsika.

Atsika tihan̈amia voninahitry Jehovah. (1 Kor. 10:31) Ke alohany anao hanapakevitry hampiasa applications fandifasan̈a hafatra na teknôlôzỳ hafa, diniha antsendriky ino aby mety ho vokatranizen̈y aminy arapan̈ahinao, baka io mitandrema fo.