1. Ino aby raha mety manahiran̈a panompony Jehovah?

MAHATSIARO mijaly ma anao fotony misy raha misedra anao mare? Mety nisy piaramanompo donko nan̈ano raha nampalaheho anao. (Jak. 3:2) Na misy olo miaraka miasa aminao na lekoly araiky aminao man̈adroadro anao fotony anao manompo Jehovah. (1 Pet. 4:3, 4) Na mety misy havanao tsy man̈aomba anao hivory na hikoran̈a raha inoanao aminolo. (Mat. 10:35, 36) Izikoa fa maresaka loatra problemonao, mety ho kivy mare anao ke anao mahatsiaro tsisy angovo hanohy fanompoan̈anao. Kanefa, matokisa fa na ino na ino raha sarotro andalovanao, Jehovah han̈amia anao fahendrena ndreky angovo hindesinao hiaritry.

2. Izikoa zahan̈a Romanina 15:4, ino mahatsara atsika mamaky Baiboly?

² Maro tantaranolo amy Baiboly ao ahitan̈a fa vitanolombelon̈o tsy lavorary miaritry raha sarotro. Nirahiny Jehovah nisoratin̈y tantara aby io, misy angalantsika tahaka raha nataondro. Mitovitovy amy zen̈y raha nisoratiny apostoly Paoly amy Romanina 15:4 ao. (Vakia.) Tantara aby zen̈y tsy vitany mankahery atsika fo fa, mahavy atsika han̈anten̈a raha tsara koa. Kanefa zen̈y tsy mivolan̈a fa atsika koa fa mamaky Baiboly, efa pare edy. Mila ambelantsika hiditry an̈aty fontsika ndreky hamolavola fomba fisain̈anantsika raha koran̈iny Soratra Masin̈y. Atsika koa fa miatriky raha manahiran̈a, atsika mila mitady taridalan̈any Jehovah. Akory han̈anaovantsika zen̈y? Misy fomba efatra ty: 1) Mivavaka, 2) mangala sary antsain̈y, 3) misaintsain̈y, ndreky 4) mampihatra. Alô zahantsika ino aby raha tafiditry amy zen̈y. * Hizahantsika koa akory mety han̈arehantsika tekniky efatra aby io izikoa fa mandiniky raha niain̈any Panjaka Davida ndreky apostoly Paoly.

3. Ino raha tokony hataonao, alohany anao han̈ano vaky Baiboly? Nan̈ino?

 ³ 1) Mivavaka. Alohany anao han̈ano vaky Baiboly, iangavia Jehovah han̈ampy anao hahita fomba mety han̈arehanao raha nivakianao tao. Ohatra, izikoa anao mitady torohevitry momba problemo araiky, mivavaha baka anao hahita toro lalan̈a han̈ampy anao hanapakevitry.​—Fil. 4:6, 7; Jak. 1:5.

4. Ino raha mety hataonao baka ho velombelon̈o vaky Baiboly ataonao?

⁴ 2) Mangala sary antsain̈y. Namezany Jehovah fahaizan̈a miavaka atsika, tsy ino zen̈y fa fahaizan̈a mangala sary antsain̈y raha. Baka ho velombelon̈o tantara vakianao amy Baiboly ao, alaiva sary antsain̈y raha vakianao, avio diniha azovy olo koran̈iny ao io ndreky raha nandalo tamy zen̈y. Miniminia koa ino raha mety hitany ndreky tsapany. Izikoa anao man̈ano zen̈y, ho maro hatsaran̈a ho azonao.

5. Karakory ma misaintsain̈y zen̈y, baka io ino raha han̈ampy anao han̈ano zen̈y?

⁵ 3) Misaintsain̈y. Olo misaintsain̈y zen̈y, mandiniky tsara momba raha vakiany, avio mangala onon̈o ino ifandraisanizio amy fiain̈ananany. Izikoa izy mamaky Baiboly fo fa tsy misaintsain̈y, izy miran̈a olo araiky mandoky kanefa tsy mampitraotro fangarony jiaby. Ino vokany? Tsy masiro foeky lokinany. Ke izikoa anao misaintsain̈y raha vakianao, anao miran̈a mampitraotro na mampifandray hevitry vaovao aminy hevitry hafa efa hainao, ke hazava aminao tsarabe raha nivakianao. Ino han̈ampy anao hisaintsain̈y? Man̈ontania ten̈a karaha ty: ‘Ino ma raha nataonolo koran̈iny eto ty namahan̈a problemonany? Akory fomba nan̈ampiany Jehovah izy? Akory mety han̈arehako raha nianarako tato, lera zaho tojy fitsapan̈a?’

6. Nan̈ino ma atsika mila mampihatra raha nianarantsika?

⁶ 4) Mampihatra. Jesosy nivolan̈a fa izikoa atsika tsy mampihatra raha nianarantsika, atsika miran̈a lelahy araiky nan̈ôrin̈y tran̈o tamy jia. Niasa mare ndraiky izy, fa very bôriny angovo niasany izio. Nan̈ino ma? Fotony izikoa fa misy andra ratsy mandalo ke tondraka rano, ho rongana tran̈o io. (Mat. 7:24-27) Karaha zen̈y koa, atsika ndray mivavaka, mangala sary antsain̈y, ndreky misaintsain̈y kanefa atsika tsy mampihatra raha nianarantsika, ho very bôriny koa ezakantsika. Halemy finoan̈antsika, ke tsy ho vitantsika hiatriky raha sarotro na fan̈injehan̈a. Fa izikoa ndraiky atsika mianatra ndreky mampihatra raha nianarantsika, ho tsara fanapahankevitry ataontsika, ke hilamin̈y jerintsika avio ho fatatra finoan̈antsika. Atsika iziô hizaha raha nahazo Panjaka Davida, ke hidinihintsika akory mety han̈arehantsika tekniky efatra aby tio in̈y koa fa mandiniky izio.

7. Tantaranjovy ma hidinihintsika iziô?

⁷ Nisy namanao na havanao ma nivadiky taminao? Izikoa zen̈y, ten̈a han̈ampy anao mandiniky tantarany Panjaka Davida. Nivadiky taminany i Absaloma zanany. Tiho panjaka i Absaloma ke nataony fomba han̈adosoan̈a Davida tamy fitondrasan̈a.​—2 Sam. 15:5-14, 31; 18:6-14.

8. Ino raha mila ataonao baka Jehovah han̈ampy anao?

⁸ 1) Mivavaka. Anao koa mieritreritry momba tantara io, koràn̈a amy Jehovah aminy antsipiriany raha jiaby tsapanao baka amy raha nataonolo io taminao. (Sal. 6:6-9) Iangavia Jehovah han̈ampy anao hahita toro lalan̈a ilainao. Han̈ampy anao hiatriky raha sarotro mahazo anao toro lalan̈a aby zen̈y.

9. Tantarà ino raha nandalo tamy Davida ndreky Absaloma.

⁹ 2) Mangala sary antsain̈y. Diniha ino raha nandalo tamy Panjaka Davida, baka io alaiva sary antsain̈y ino vokatranizen̈y taminany. Tan̈atiny taon̈o taon̈o, nifen̈y mare i Absaloma  zanany nan̈ano raha nitiavany vahoaka izy. (2 Sam. 15:7) Ke izikoa fa hitany Absaloma fa mety tsarabe fotoan̈a, izy nandefa pitsikilo nitety taniny Israely jiaby, sady nampirisiky olo han̈eky izy ho panjaka. Voataon̈ony Absaloma hanohitry Davida koa i Ahitofela panolotsain̈iny Davida sady kamaradiny Davida marikitry. Absaloma nan̈ano izy panjaka, avio izy nitetiky hanambotro ndreky hamono Davida foeky. Kanefa mety tamy fotoan̈a io i Davida narary be in̈y. (Sal. 41:1-9) Izikoa fa ren̈iny Davida tetikiny Absaloma io, loso izy nilefa niala Jerosalema. Nandeha fotoan̈a, maramilany Absaloma niady tamy Davida ndreky maramilanany. Resinery Davida iro, avio Absaloma nivonenolo.

10. Ino ma raha mety ho nataony Panjaka Davida?

¹⁰ Miniminia hely baka raha tsapany Davida tamy fotoan̈a jiaby zen̈y. Tiany mare zanany, avio natokisany mare koa Ahitofela. Kanefa iro olo tiany aby io edy nivadiky taminany ndreky nan̈ano raha nampalahelo izy mare. Efa tseky hamono izy foeky! Asa ino raha tan̈atiny jeriny Davida? Asa izy nanjary tsy natoky namany hafa, ke niahiahy tsao mba namany Absaloma koa iro io? Sa izy tia ten̈a ke izy zaraiky fo nilefa mangingin̈y niala tao? Sa izy nanjary kivy mare? Tsy zen̈y foeky. Vitany niaritry raha sarotro jiaby zen̈y. Alô zahavantsika raha nataony.

11. Akory nataony Davida niatriky problemonany?

¹¹ 3) Misaintsain̈y. Ino toro lalan̈a hitantsika baka amy tantara io? Valia fan̈ontanian̈a ty: “Akory ma nataony Davida namaha problemonany?” Izy tsy nialamboetry, ke nan̈ano raha mekimeky fo na nan̈anon̈ano raha fahatany. Izy koa tsy resiny tahotro. Fotony izikoa zen̈y, ndray raha sambôriny tsy ho hainy. Ino fo basy raha nataony? Nivavaka izy baka Jehovah han̈ampy izy. Nangataka fan̈ampian̈a tamindro kamaradiny aby io koa izy. Avio izy tsy nirekireky nan̈ano raha izikoa fa hainy raha tokony hataony. Marin̈y fa nampalahelo Davida raha nandalo in̈y, fa izy mbala natoky olo fo avio izy tsy nankahala olo. Izy natoky Jehovah ndreky iro namany aby io fo.

12. Akory nan̈ampiany Jehovah i Davida?

¹² Akory nan̈ampiany Jehovah i Davida? Izikoa anao man̈ano fikarohan̈a hely, ho hitanao fa namezany Jehovah angovo i Davida, ke zen̈y nahavitany niaritry fitsapan̈a jiaby zen̈y. (Sal. 3:1-8) Nitahiny Jehovah fanapahankevitriny Davida. Kamaradiny Davida aby io koa fa niady hiarovan̈a Panjaka Davida, Jehovah nan̈ampy iro.

13. Akory mety hangalanao tahaka Davida, izikoa nisy olo nampalahelo anao mare? (Matio 18:15-17)

¹³ 4) Mampihatra. Iritrireta baka ty: ‘Akory hangalako tahaka Davida?’ Mety mila man̈ano raha malaky koa donko anao handaminan̈a problemonao. Arakarakany raha misy, anao mety han̈araka torohevitriny Jesosy amy Matio toko 18, na hampihatra toro lalan̈a baka amizio ao. (Vakia Matio 18:15-17.) Kanefa aza mekimeky hanapakevitry izikoa anao mbala meloko. Mivavaha amy Jehovah baka izy han̈ampy anao ho kalma ndreky hahay raha tokony hatao. Aza mieritreritry fa, efa tsisy raha mety hatao eky han̈avotan̈a fikamaradiananaro. Izikoa misy olo tihan̈ampy anao, aza sarotiny fa ikia fan̈ampian̈a amian̈a anao. (Ohab. 17:17) Fa ny raha ten̈a maventy, areha torohevitriny Jehovah amy Baiboly ao.​—Ohab. 3:5, 6.

14. Amy lera karakory ma mety hampahery anao raha koran̈iny 2 Timoty 1:12-16; 4:6-11, 17-22?

¹⁴ Miaritry fan̈injehan̈a ma anao fotony halandry havanao anao manompo Jehovah? Sa anao mipetraka amy tany tsy han̈omboan̈a asa fitorian̈a ataontsika? Izikoa zen̈y, mety hampahery anao mamaky 2 Timoty 1:12-16; 4:6-11,  17-22. * Nanoratra andininy aby io i Paoly, taminizy nigadra.

15. Izikoa anao fa miatriky raha manahiran̈a, ino raha mety angatahinao amy Jehovah?

¹⁵ 1) Mivavaka. Alohany anao hamaky andininy aby io, koràn̈a amy Jehovah aminy antsipiriany antsendriky raha manahiran̈a anao ndreky raha tsapanao baka amizio. Baka io, iangavia Jehovah han̈ampy anao hahita toro lalan̈a mety tsarabe, baka amy raha niaretany Paoly. Ho hainao raha tokony hataonao izikoa anao man̈ano zen̈y.

16. Ino aby raha nandalo tamy Paoly?

¹⁶ 2) Mangala sary antsain̈y. Nigadra ta Roma i Paoly sady nifehy silisily tan̈ananany. Efa nigadra izy talohanio fa ndraikinity, handeha hivonen̈a izy. Namany sasany koa niala izy, kanefa izy taminio efa lonja mare. Akory eky izikoa anao tamy plasiny Paoly?​—2 Tim. 1:15.

17. Mety ho ino raha niritriretiny Paoly, izy koa fa niatriky raha sarotro?

¹⁷ Nifantoko tamy raha taloha ma i Paoly? Izy ma nieritreritry karaha ty: ‘Zaho zay koa tsy nafana fô be tamy fanompoan̈a, zaho ôtrizay tsy nigadra’? Neloko ma izy fotony piaramanompo sasany tamy faritry Asie tan̈y niala izy? Nanjary tsy natoky piaramanompo hafa eky ma izy? Ehe! Tsy nandalo tamy jerinany foeky zen̈y. Mbala natoky iro namany aby io fo izy, sady natoky fa Jehovah han̈amia hatsaran̈a izy.

18. Akory nataony Paoly taminizy niatriky fitsapan̈a?

¹⁸ 3) Misaintsain̈y. Valia fan̈ontanian̈a ty: “Ino raha nan̈ampy i Paoly?” Ndray efa hainy Paoly fa izy handeha hivonen̈a, tsy nadin̈any foeky fa man̈amia voninahitry Jehovah ny raha ten̈a maventy. Nitady fomba mety hankahirezan̈a piaramanompo fo koa izy. Nivavaka matetiky koa izy. Hita baka amy zen̈y fa izy ten̈a natoky Jehovah. (2 Tim. 1:3) Paoly tsy nifantoko be tamindro rahalahy niala izy aby in̈y, fa nifen̈y fo izy nifantoko tamindro kamaradiny tsy nivadiky aby io. Ary izy ten̈a nankasitraka raha nataondro taminany! Nazoto nianatra Soratra Masin̈y fo koa izy. (2 Tim. 3:16, 17; 4:13) Fa ny raha ten̈a maventy, natoky tamy fonany jiaby izy fa Jehovah ndreky Jesosy ten̈a tia izy. Iro tsy niala izy foeky. Natoky koa izy fa ho maro hatsaran̈a ho azony, izikoa izy tsy mivadiky.

19. Akory nan̈ampiany Jehovah i Paoly?

¹⁹ Jehovah efa nampitandrin̈y i Paoly fa hiaritry fan̈injehan̈a izy, izikoa fa manjary Kristianin̈y. (Asa. 21:11-13) Akory nan̈ampiany Jehovah i Paoly? Jehovah namaly vavakanany, avio tamy fotoan̈a sasany, namezany angovo i Paoly. (2 Tim. 4:17) Namezany toky koa i Paoly fa tsy very bôriny foeky ezakanany tamy fanompoan̈a. Nampiasa piaramanompo tsy mivadiky koa Jehovah han̈ampian̈a i Paoly.

20. Izikoa dinihin̈y Romanina 8:38, 39, akory mety hangalanao tahaka raha nataony Paoly?

²⁰ 4) Mampihatra. Iritrireta ty: ‘Akory hangalako tahaka Paoly?’ Karaha nataony Paoly in̈y, tokony ho efa ampoizintsika fa mety hiatriky fan̈injehan̈a atsika fotony atsika manompo Jehovah. (Mar. 10:29, 30) Kanefa, ho vitantsika fo tsy hivadiky ndray misy fitsapan̈a, izikoa atsika mivavaka ke mitavandra Jehovah. Mila mazoto mianatra Soratra Masin̈y koa atsika. Mila alaintsika onon̈o fo fa, man̈amia voninahitry i Jehovah ny raha ten̈a maventy. Matoky atsika fa Jehovah tsy han̈adin̈a atsika foeky, avio tsisy olo hahavita hisakana Jehovah tsy ho tia atsika.​—Vakia Romanina 8:38, 39; Heb. 13:5, 6.

21. Ino raha nan̈ampy Aya ndreky Hector handresy raha nanahiran̈a iro?

²¹ Na ino na ino raha sarotro diavintsika, hahazo angovo fo atsika izikoa mandiniky tantaranolo  amy Baiboly ao. Karaha zen̈y iziô tsapany Aya, pisava lalan̈a a Japon. Nivolan̈a izy fa tantarany Jona in̈y ten̈a nan̈ampy izy tsy havozo hitory amy tany maro olo. Mipetraka a Indonésie ndraiky tanora araiky, Hector an̈arany. Tsy Vavolombelon̈o Jehovah iry olobeny. Nivolan̈a izy fa tantarany Rota in̈y ten̈a nan̈ampy izy hazoto hianatra momba Jehovah ndreky hanompo izy.

22. Akory hahitanao hatsaran̈a baka amy tantara baka amy Baiboly ndreky lahatsoratra mifampitohy “Tahafo ny Finoan’izy Ireo”?

²² Maro tantara amy Baiboly ao; ary misy amindro io ten̈a hankahery anao. Aia tany mety hahitanao tantara aby zen̈y? Amy video ndreky tantara tandrin̈esan̈a baka amy Baiboly naboakany fandaminan̈a, avio lahatsoratra mifampitohy “Tahafo ny Finoan’izy Ireo.” * Nan̈anaovan̈a fikarohan̈a tsarabe iro tantara aby io, ke han̈ampy anao hangala sary antsain̈y tantara vakianao. Ke alohany anao hizaha, hitandren̈y, na hamaky tantara aby io, mivavaha amy Jehovah antsendriky. Iangavia izy han̈ampy anao hahita raha mety ampiharinao. Ataova karaha anao in̈y amy plasinolo amy tantara io. Diniha ino raha nataondro panompony Jehovah aby io, baka io akory nan̈ampiany Jehovah iro niatriky fitsapan̈a. Ampihara amy zay lan̈iany fianaran̈a nazonao baka tamizio. Ataova mersy i Jehovah nan̈ampy anao hahita fianaran̈a aby zen̈y. Aboaha fa ten̈a mankasitraka izy marin̈y anao, ke mitadiava hevitry hankahirezan̈a ndreky han̈ampian̈a olo hafa koa.

23. Izikoa Isaia 41:10, 13 zahan̈a, ino raha efa nampan̈antin̈ainy Jehovah atsika?

²³ Mety tsy ho mora miain̈y amy donia fiheziny Satana ty. Ke ndraikindraiky, tsy haintsika foeky raha sambôrin̈y. (2 Tim. 3:1) Kanefa, atsika tsy tokony hiasaloha be na havozo. Hainy Jehovah raha sarotro diavintsika io. Ary izy efa nampan̈anten̈a fa lera atsika mila fan̈ampian̈a, izy hitantan̈a atsika amy tan̈ananany mahery. (Vakia Isaia 41:10, 13.) Matoky atsika fa Jehovah han̈ampy atsika ankitin̈y. Han̈amia angovo atsika koa Volan̈a Zan̈ahary, intsaka eky lera atsika an̈atiny problemo.