1-2. Ino raha ifandraisany Mpitoriteny 11:6 aminy asa fitorian̈a ataontsika?

AMY tany sasany, miaraka olo maharen̈y hafatra toriantsika, iro efa man̈eky hianatra Baiboly edy. Efa izio fo raha nambesandro! Ankamarozanolo amy tany hafa ndraiky, tsy mino Zan̈ahary sady tsy tia raha momba Baiboly. Akory amy tany misy anao? Na tianolo amy tany misy anaro hafatra torintsika io na tsy tiandro, tiany Jehovah hitory fo atsika firaka izy mivolan̈a amintsika fa vita asa io.

² Amy fotoan̈a ivolan̈any Jehovah fa vita asa fitorian̈a, amy zen̈y tsarabe “vo avy ny farany.” (Mat. 24:14, 36) Ke tsy tokony ‘hampangala kajo tan̈anantsika foeky atsika, parpavianizen̈y.’ * (Vakia Mpitoriteny 11:6.) Akory hahavitantsika zen̈y?

3. Ino aby raha handeha hianarantsika ato?

³ Lahatsoratra taloha in̈y nikoran̈a raha efatra tsy maintsy ataontsika, izikoa tihahômby aminy asa ‘fan̈arataovan̈a olo.’ (Mat. 4:19) Iziô ndraiky atsika handiniky fomba telo hahavy atsika hahaiho tapakevitry hitory fo, ndray ino ndray ino problemo mandalo. Hianarantsika ato nan̈ino atsika ten̈a tokony 1) hitady hevitry hitorian̈a fo, ndreky 2) haharidraha fo, baka io 3) ho fatatra finoan̈a fo.

4. Nan̈ino ma atsika tokony hitady hevitry hitorian̈a fo?

⁴ Efa nambarany Jesosy tamy pianatranany han̈ano akory toetrinolo aminandra farany, avio ino aby raha handalo ke mety hahavy iro ho kamo hitory. Zen̈y nahavy izy nandrisiky iro ‘hiambin̈y fo.’ (Mat. 24:42) Rikian̈a loatra tamy fiain̈ana andavanandra olo taminandrany Noa, ke tsy nahoandro foeky hafatra fampitandreman̈a nambarany Noa. Mety ho rikian̈a  loatra amy fiain̈ana koa atsika avahizo, ke tsy hazoto hitory. (Mat. 24:37-39; 2 Pet. 2:5) Zen̈y mahavy atsika mila mifen̈y fo hitady hevitry hitorian̈a fo, fotony izio asa nan̈irahany Jehovah atsika.

5. Koa zahan̈a Asan’ny Apostoly 1:6-8, aia aby tany hitorian̈a?

⁵ Mila mifen̈y mare atsika mitady hevitry hitorian̈a vaovao tsara momba Fanjakan̈any Zan̈ahary. Jesosy efa nivolan̈a fa handroso mare asa fitorian̈a vaovao tsara io, ke hitorian̈a amy tany farany maro izio. (Jaona 14:12) Nimpody namintan̈a ndraiky sasany tamy pianatrany Jesosy, izy koa fa naty. Ke Jesosy koa fa nivilominy Jehovah, nan̈ano fahagagan̈a. Nataony raha nazahoandro pianatranany aby io laoko marobe, avio nararaotiny Jesosy raha zen̈y hampatsiarovan̈a iro fa asa fitorian̈a ndreky fampianaran̈a ny asa ten̈a maventy aminy asa jiaby. (Jaona 21:15-17) Taloha heliny izy nanonga tandan̈itry tan̈y, izy nivolan̈a fa iro pianatranany aby io hitory amy tany farany lavitry, fa tsy tan Israely tan̈y zaraiky fo. (Vakia Asan’ny Apostoly 1:6-8.) Taon̈o maro tafaranizen̈y, apostoly Jaona nampahitany Jesosy fahitan̈a mikasiky raha handalo aminy “andrany Tompo.” * Nisy raha mamparavoravo hitany Jaona taminio: Nisy anjely hitany nitondra “vaovao tsara mandrakizay” nitorian̈a taminolo jiaby tambony tany, tamy firenena ndreky foko ndreky fivolan̈ana jiaby. (Apok. 1:10; 14:6) Tiany Jehovah hitory fo atsika parpivitany asa fitorian̈a io.

6. Ino raha han̈ampy atsika hahaihazoto hitady hevitry hitorian̈a fo?

⁶ Mahaitihitady hevitry hitorian̈a fo atsika izikoa fa mandiniky fomba an̈ampiany Jehovah atsika. Ohatra iziô, amezany hanin̈y arapan̈ahy marobe atsika: Boky ndreky gazety vita pirinty na elektroniky, raha nalain̈a feo, baka io video marobe ndreky programo  isaka fanjava amy Tele JW. Miniminia hely baka! Efa misy amy volan̈a mandilatra 1 000 aby fan̈azavan̈a amy jw.org ao! (Mat. 24:45-47) Misaratsaraka mare olo amy donia ty, na amy resaka politiky zen̈y na amy resaka fivavahan̈a na amy resaka fanan̈ana. Akory ndraiky atsika? Mandilatra valo tapitrisa kontintsika erantany. Kanefa olo araiky fo atsika jiaby io, fotony an̈isany fianakaviambenolo manompo Jehovah ke miray hina mare! Mankamarin̈y zen̈y raha nandalo tamy joma 19 Avrily 2019. Taminio, Vavolombelon̈o Jehovah erantany niaraka nan̈ano teny vakina. Harivanizio, nisy olo kadiriny 20 919 041 nan̈aton̈o Fahatsiarovan̈a nifatesany Jesosy. Ndray anao tsy lany fan̈ahy? Karaha mahaitihitady hevitry hitorian̈a fo atsika, izikoa fa mandiniky zen̈y ndreky haravoan̈antsika man̈ano izio!

7. Nan̈ino fisaintsain̈ana modely nambelany Jesosy ten̈a han̈ampy atsika?

⁷ Fan̈arehan̈a modeliny Jesosy koa fomba hafa han̈aboahantsika fa tihan̈ano asa fitorian̈a io fo atsika. Jesosy tsy rikian̈a tamy raha hafa, fa nifen̈y fo izy nan̈ano voalohantoeran̈a asa fitorian̈a io. (Jaona 18:37) Satana koa fa nivolan̈a taminany fa han̈amia izy “fanjakan̈a ndreky voninahitry jiaby ambony tany”, izy tsy taitry foeky! (Mat. 4:8, 9) Jesosy koa tsy nan̈eky nataonolo panjaka. (Jaona 6:15) Tsy honohono ho izy foeky nan̈iry ho pan̈arivo, ary izy tsy nivadiky foeky ndray tojy fan̈injehan̈a farany mare. (Lioka 9:58; Jaona 8:59) Apostoly Paoly nampirisiky Kristianin̈y hangala tahaka Jesosy, ke ‘tsy ho kajo ndreky tsy ho rivan̈a foeky.’​—Heb. 12:3.

8. Karakory ma maharidraha zen̈y, baka io nan̈ino atsika ten̈a mila manan̈a toetry io?

⁸ Olo maharidraha zen̈y tsy taitaitry fa mahavita miambin̈y fo ndray miova fandehandraha. Atsika mila maharidraha, intsaka eky izikoa fa miaritry raha sarotro. Mety tsy ho din̈intsika baka fotoan̈a hialany raha sarotro aby zen̈y izikoa atsika tsy maharidraha! Mila maharidraha koa atsika izikoa fa misy raha irintsika mare, kanefa raha io mbala tsy tanteraka. Karaha ataony paminan̈y Habakoka, izy nan̈iry tsy hisianolo kafiry ta Joda tao. (Hab. 1:2) Iro pianatrany Jesosy aby io ndraiky nan̈anten̈a fa Fanjakan̈any Zan̈ahary io ‘direkty’ han̈adoso iro tamy fampijalian̈a nataony fanjakan̈a romanin̈y. (Lioka 19:11) Akory fo atsika? Efa tsy din̈intsika koa fotoan̈a han̈adosoany Fanjakan̈any Zan̈ahary raha ratsy jiaby ambony tany ty ndreky haviany donia vaovao, ke olo marin̈y fo hiain̈y ambony tany eto. (2 Pet. 3:13) Mila maharidraha atsika ke hiambin̈y fotoan̈a nifidiny Jehovah. Fa parpavianizen̈y, misy raha ataony Jehovah han̈ampian̈a atsika hanan̈a toetry io. Zen̈y raha hidinihintsika izioty.

9. Akory ahitan̈a fa Jehovah ten̈a maharidraha?

⁹ Jehovah farandraha maharidraha eky. Namiany fotoan̈a ampy tsarabe Noa niasa sambofiara ndreky nan̈ambara faviany safodrano. (2 Pet. 2:5; 1 Pet. 3:20) Impirimpiry Abrahama nan̈ontany Jehovah mikasiky fandravan̈ana tanànany Sodoma ndreky Gomora, fa Jehovah tsy neloko. Nitandrin̈esany fo Abrahama. (Gen. 18:20-33) Andrivony taon̈o maro firenenany Israely nivadiky tamy Jehovah, fa Jehovah naharidraha fo. (Neh. 9:30, 31) Mbala karaha zen̈y fo koa ataony amy zioty. Amezany Jehovah fotoan̈a ampy tsara olo baka mahavita mibebaka ke hanjary kamaradiny. (2 Pet. 3:9; Jaona 6:44; 1 Tim. 2:3, 4) Ndray Jehovah fo maharidraha karaha zen̈y, ke intsaka eky atsika! Tokony haharidraha atsika lera mitory ndreky mampianatra. Misy fan̈oharan̈a amy Baiboly ao ampiasainy Jehovah han̈ampian̈a atsika hanan̈a toetry io.

10. Ino raha ianarantsika baka amy pamboly koran̈iny Jakoba 5:7, 8?

 ¹⁰ Vakia Jakoba 5:7, 8. Fan̈oharan̈a momba pamboly io ten̈a mampianatra atsika haharidraha. Marin̈y ndraiky fa, misy ambeo tsy ela efa mitombo edy. Fa maro amindro io mahadin̈y ela vo mitombo, intsaka eky izikoa raha natsabo io man̈amia voany mety ihoanin̈y. Tamy faha Israelita taloha tan̈y, pamboly koa fa nitsabo raha, tsiota fanjava afaranizen̈y izio vo nitombo tsarabe. Nanomboko namafy ambeo iro izikoa fa latsaka “mahalen̈y voanalohany” tampisasahany fanjava Oktobra. Iro amy zay nijinja vokatra io tampisasahany fanjava Avrily, lera fararano. (Marka 4:28) Iro ten̈a nila naharidraha. Misy jery atsika izikoa man̈ano karaha zen̈y koa. Fa raha zen̈y tsy mora!

11. Nan̈ino ma mila maharidraha atsika izikoa fa manompo?

¹¹ Matetiky amintsika olombelon̈o tsy lavorary ty baka man̈ano “masikiny tsy mahadin̈y raha ela”, ke miaraka misy raha araiky tiantsika, iô ny iô raha in̈y efa tiantsika ho azo edy. Miaraka atsika mamboly hely, efa tsy din̈intsika aby ihinanan̈a voanizin̈y. Tsy tokony hadin̈antsika fa mitaky fotoan̈a ndreky fikarakaran̈a, resaka fambolian̈a zen̈y. Raha araiky natsabonao in̈y mila asian̈a zeziky, rozen̈a, kapain̈a ahitry aminany, baka io sosaohan̈a faotaka amy vahatranany. Ary tsy indraiky tsy indroe mila an̈anaovan̈a raha aby zen̈y. Tsisy ny hafa amy zen̈y koa raha mila ataontsika koa fa mampianatra Baiboly. Mila maharidraha atsika fotony mety ho elaela pianatrantsika aby io vo hanan̈a toetry tsara ndreky fahazaran̈a tsara. Ho hisy korazy fo atsika izikoa man̈ano zen̈y. Sady iro tsy raha mety forsen̈a hanan̈a finoan̈a! Miran̈a tamindro pianatrany Jesosy aby in̈y fo iro io, ke mila fotoan̈a elaela iro vo ten̈a hanan̈a finoan̈a matanjaka. (Jaona 14:9) Tsy mila adin̈antsika koa fa anjarantsika mamboly ndreky mandrôzy, fa anjarany Zan̈ahary ndraiky mampitombo.​—1 Kor. 3:6.

12. Nan̈ino mila maharidraha atsika izikoa fa mitory aminy havantsika?

 ¹² Farandraha sarotro eky matetiky mitory aminy havan̈a zen̈y, ke mety tsy haharidraha amindro loatra atsika. Kanefa han̈ampy atsika toro lalan̈a amy Mpitoriteny 3:1, 7 ty: “Misy lera angin̈ana, fa misy lera koa ivolan̈ana.” Mety handresy lahatra iro havantsika aby io fitondranten̈a tsara anan̈antsika. Ndray izy man̈ano zen̈y, mila von̈ono fo koa atsika hitory amindro. (1 Pet. 3:1, 2) Mila mafana fô tsarabe atsika koa fa mitory ndreky mampianatra. Fa izy fo, atsika mila maharidraha aminolo jiaby, an̈isanizen̈y amy lafamìntsika ndreky havantsika.

13-14. Azovy koa olo naharidraha ke mety halaintsika tahaka?

¹³ Man̈ampy atsika haharidraha koa modely nambelandro panompony Jehovah tsy nivadiky taloha tan̈y ndreky aminandra izioty. Efa tsy din̈iny Habakoka fotoan̈a han̈adosoany Jehovah raha ratsy, kanefa izy tsy maintsy nahadin̈y niambin̈y. Ho izy: “Zaho hitsangana amy tany fiambesako.” (Hab. 2:1) Modely tsara arehantsika koa apostoly Paoly. Ten̈a ‘tihankefa’ fanompoan̈anany izy. Kanefa, nifen̈y fo izy ‘hitory vaovao tsara tamy fomba feno.’​—Asa. 20:24.

¹⁴ Nisy olo fivadiany nahazo diplaomy tamy Sekoliny Gileada zay nifen̈y naharidraha. Iro baka navoatendry tamy firenena tsy dia misy Vavolombelon̈o Jehovah. Ankamarozanolo amy tany io tsy Kristianin̈y. Vitsy fo olo ten̈a tihianatra Baiboly zen̈y. Ny raha nisy ndraiky, olo niaraka nianatra tamindro tamy Sekoliny Gileada nitantara fa maro loatra olo tihianatra Baiboly amy tany nanendren̈a iro an̈y sady efa mandroso tsarabe pianatrandro an̈y. Ino raha nataondro fivadiany io? Nifen̈y fo iro nitory, ndray karaha tsy mandray olo amy faritanindro. Valo taon̈o tafara tatỳ, nisy araiky taminolo nampianarindro natao batisa. Haravoan̈a ma nindro tamy zen̈y! Ino raha ianarantsika baka amy zen̈y? Iro panompony Jehovah aby io ten̈a nazoto nan̈ano fanompoan̈a, ary iro koa naharidraha ke tsy nampangalandro kajo foeky tan̈andro. Nitahiany Jehovah ezakandro zen̈y. Irarian̈a koa atsika ‘hangala tahaka iro olo mandova fampan̈antinan̈a aby io, na amy fanan̈ana finoan̈a zen̈y na amy faharetan̈a.’​—Heb. 6:10-12.

15. Nan̈ino hahaiho tapakevitry hitory fo atsika izikoa manan̈a finoan̈a?

¹⁵ Hahaiho tapakevitry tsy hampangala kajo tan̈anantsika fo atsika izikoa manan̈a finoan̈a. Mankamarin̈y zen̈y raha aroe aby ty. Voanalohany, mazoto atsika mikoran̈a aminolo farany maro momba hafatra toriantsika io fotony atsika koa mba mino izio. Matoky atsika fa ho tanteraka aby zay raha nampan̈antin̈ainy Zan̈ahary amy Baiboly ao. (Sal. 119:42; Isaia 40:8) Hitantsika fa misy faminanian̈a sasany koran̈iny Baiboly ao efa tanteraka aminandrantsika iziô. Hitantsika koa fa olo araiky koa miain̈y mifan̈araka amy torohevitriny Baiboly, mahaitsara fo fiain̈ananany. Zen̈y mahavy atsika matoky mare fa ten̈a mila maharen̈y vaovao tsara momba Fanjakan̈a io ankitin̈y olo jiaby.

16. Eraka raha koran̈iny Salamo 46:1-3, nan̈ino hahaiho tapakevitry hitory fo atsika izikoa mino Jehovah ndreky Jesosy?

¹⁶ Faharoe, atsika mino Jehovah. Baka aminany hafatra toriantsika io. Mino Jesosy koa atsika. Izy nitindreny Jehovah hanjary Panjakany Fanjakan̈anany. (Jaona 14:1) Tsy maintsy hiaro atsika ndreky han̈amia angovo atsika fo Jehovah, na ino na ino raha sarotro iain̈antsika. (Vakia Salamo 46:1-3.) Andan̈itry an̈y Jesosy amy zioty, fa matoky atsika fa mbala mitariky asa fitorian̈a ataontsika io fo izy, ke mampiasa angovo ndreky fahifan̈a namezany Babany izy.​—Mat. 28:18-20.

17. Nan̈ino ma atsika tokony hitory fo? Man̈ameza ohatra.

 ¹⁷ Nohony atsika manan̈a finoan̈a mahavy atsika matoky tsarabe fa Jehovah hitahy ezakantsika. Tara hely, tsy ampoizintsika foeky fomba hitahiany atsika. (Mpito. 11:6) Miniminia hely baka fampirantian̈a ataontsika. Isanandra, mandeha andrivony olo mandalo mizaha izio. Ke izio ma ten̈a mahomby ankitin̈y? Zen̈y tsarabe! Tantarainy Fanompoantsika Ilay Fanjakana tamy Novambra 2004 fa nisy pianatrany iniversite zay tihanoratra lahatsoratra momba Vavolombelon̈o Jehovah. Tsy hitany tany nisy Tran̈o Fivorian̈a, fa marikitry faritriny iniversite ndraiky nisy pitory nan̈ano fampirantian̈a, ke tseky presky hitany tio aby ankamarozany fan̈azavan̈a nilainy. Koa fa nandeha fotoan̈a, natao batisa izy ke nanjary Vavolombelon̈o Jehovah. Nanjary pisava lalan̈a izy firaka izioty. Atsika koa fa mandiniky zen̈y, mahaimazoto mitory fo. Hita baka amy zen̈y fa mbala maro olo tokony haharen̈y hafatra momba Fanjakan̈a io.

18. Nan̈ino ma atsika matoky fa tsy ho tara foeky faviany andrany Jehovah?

¹⁸ Matoky atsika fa tsy maintsy ho vita fo asa fitorian̈a io, ary amy fotoan̈any koa. Aleva onon̈o baka raha nandalo taminandrany Noa. Kadiriny 120 taon̈o tsialohaloha, efa nivolan̈iny Jehovah fotoan̈a haviany Safodrano. (Gen. 6:3) Taon̈o maromaro talohanizen̈y, Noa nirahiny Jehovah niasa sambofiara. Tan̈atiny 40 na 50 taon̈o talohany Safodrano, Noa niasa angovo jiaby. Tsy vitanizen̈y fo koa fa, nifen̈y mare koa izy nitory taminolo, fa iro olo aby io tsy nan̈ahoa foeky. Zen̈y fo raha nataony firaka Jehovah nivolan̈a taminany fa tokony hampidirin̈y an̈atiny sambofiara amy zay biby aby io. Izikoa fa navy fotoan̈a, ‘nafodiny Jehovah amy zay varavaran̈a.’​—Gen. 6:3; 7:1, 2, 16.

19. Ino raha mety hantin̈aintsika izikoa atsika maharidraha?

¹⁹ Efa tsy ho ela Jehovah hivolan̈a amintsika fa erany iô fitorian̈a vaovao tsara momba Fanjakan̈a io! Hiravan̈iny amy zay donia tsy manjariny Satana ty, ke hisoloany donia vaovao feno olo man̈araka volan̈any Zan̈ahary. Fa parpavianizen̈y, mila mifen̈y atsika mangala tahaka Noa, ndreky Habakoka, ndreky panompony Jehovah hafa naharidraha. Irarian̈a atsika tsy voly hitady hevitry hitorian̈a, ndreky haharidraha, baka io hifen̈y fo hampitombo fatokisantsika Jehovah ndreky raha jiaby efa nampan̈antin̈ainy.