1-2. Izikoa dinihin̈y 1 Timoty 6:20, nampirisihin̈y han̈ano ino ma Timoty?

NDRAIKINDRAIKY atsika man̈ankin̈y raha valera aminolo. Ohatra iziô, volantsika mety hapetrakantsika amy banky. Man̈ano zen̈y atsika fotony izio tiantsika ho voaro ndreky tsy ho very, na baka izio tsy hangalarinolo.

² Vakia 1 Timoty 6:20. Paoly nampatsiaro Timoty fa valera mare raha nazony: Ny marin̈y momba programony Zan̈ahary aminolombelon̈o. Nan̈ankin̈ana tombontsoa maventy hafa koa Timoty: ‘Mitory vaovao tsara.’ (2 Tim. 4:2, 5) Ke Paoly nampirisiky izy karaha ty: “Aza avôsotro raha nankin̈iny taminao.” Maro koa raha valera nankin̈iny tamintsika. Ino aby ma zen̈y? Nan̈ino tsy maintsy arovantsika aby lan̈iany raha valera namezany Jehovah atsika?

3-4. Ino aby antony ivolan̈ana fa ten̈a valera ny marin̈y amy Baiboly ao?

³ Ten̈a tsara fan̈ahy Jehovah ke nataony raha ahaizantsika ny marin̈y amy Baiboly ao. Valera amintsika raha zen̈y fotony manjary haintsika raha tokony hatao baka ho sambatra ndreky ho tsara fihavanan̈a amy Jehovah. Manjary tsara fitondranten̈a koa atsika sady tsy voafitakany fampianaran̈a diso, fotony atsika mahay ny marin̈y.​—1 Kor. 6:9-11.

⁴ Ino koa mampavalera izio ? Fotony tsy kilakila olo an̈ambarany Jehovah izio, fa olo manetry ten̈a ndreky manan̈a “toetsain̈y tsara.” (Asa. 13:48) Olo manetry ten̈a fo baka man̈eky fa Jehovah mampiasa panompo atokisan̈a ndreky mahadiniky raha han̈ambara ny marin̈y io. (Mat. 11:25; 24:45) Izikoa atsika tompiny fo, atsika tsy nahay ny marin̈y zen̈y, ary tsisy raha valera mandilatra zen̈y.​—Ohab. 3:13, 15.

5. Ino koa raha ankin̈iny Jehovah amintsika?

 ⁵ Ino koa raha valera ankin̈iny Jehovah amintsika? Ambelany Jehovah hampianatra olo ny marin̈y momba izy ndreky fikasan̈anany atsika. (Mat. 24:14) Ten̈a valera hafatra torintsika io fotony izio man̈ampy olo hanjary an̈isany fianakavian̈any Jehovah. Zay olo man̈eky hafatra io ho afaka hiain̈y tsisy farany. (1 Tim. 4:16) Amy zioty, tsisy asa maventy mandilatra asa fitorian̈a. Ke na be na hely vitantsika aminy asa io, manohan̈a izio atsika. (1 Tim. 2:3, 4) Tombontsoa tsisy ambaka izy miaraka miasa amy Zan̈ahary zen̈y!​—1 Kor. 3:9.

6. Nan̈ano karakory olo sasany izikoa fa tsy nankasitraka tombontsoandro?

⁶ Nisy olo sasany taminandrany Timoty tsy nankasitraka tombontsoandro niaraka niasa tamy Zan̈ahary. Demasy nanjary tia donia ty, ke tsy niaraka nanompo tamy Paoly eky. (2 Tim. 4:10) Fygelo ndreky Hermogena ndraiky voly nanompo Jehovah fotony iro navozo tsao hinjehin̈y karaha Paoly. (2 Tim. 1:15) Iry Hymeneo, Aleksandra ndreky Fileto ndraiky nivadipinoan̈a, ke niala tamy fahamarin̈ana. (1 Tim. 1:19, 20; 2 Tim. 2:16-18) Samby tia Jehovah iro io taloha, kanefa nanjary tsy valera tamindro eky raha namezany Jehovah iro.

7. Ino aby raha ataony Satana baka atsika han̈ano raha tiany?

⁷ Ataony Satana raha hahavy atsika tsy han̈isy fotiny raha valera namezany Jehovah atsika. Amy fomba karakory? Izy mampiasa tele ndreky Internet, baka io raha isankarazany aboakany donia ty. Mampirisiky olo han̈ano raha tsy tiany Zan̈ahary ndreky han̈ana toetsain̈y tsy fan̈araka amy Jehovah iro raha aby io. Ten̈a kendriny Satana han̈ano raha hahavy atsika tsy ho tia Jehovah ndreky hiala tsihelihely amy fitsipikinany. Ataony raha hahavy olo han̈enjiky atsika na hahavy atsika hiasaloha mare amy raha volan̈inolo, amy zen̈y atsika mavozo ke voly hitory. Ataony koa raha hahavy atsika hitandren̈y ‘fampianaran̈andro pivadipinoan̈a aby io’, amy zen̈y atsika hiala amy fahamarin̈ana.​—1 Tim. 6:20, 21.

8. Ino raha ianaranao baka amy tantarany Daniel?

⁸ Izikoa atsika tsy mitandrin̈y, mety hiala tsihelihely amy fahamarin̈ana. Zen̈y raha nahazo Daniel. * Farandraha tia misaoma jeux vidéo eky izy. Ho izy: “Nanomboko nisaoma jeux vidéo zaho tamy zaho folo taon̈o. Tamy voanalohany, tsy ratsy jeux vidéo nataoko. Koa fa nandeha fotoan̈a, nanjary nisaoma jeux vidéo misy olo kafiry ndreky misy ifandraisany amy demony zaho.” Nisy lera izy nandany 15 lera isanandra nisoman̈a izio fo! Ho Daniel: “Nisy vokany tamy fifandraisako tamy Jehovah  karazan̈a jeux nataoko. Presky lany tamizio leranaka jiaby. Tan̈atiny jeriko tan̈y, zaho tsy raha voatery man̈araka raha koran̈iny Baiboly ao.” Hitantsika baka amy zen̈y fa atsika koa tsy mitandrin̈y, mety hiala tsihelihely amy fahamarin̈ana. Izikoa zen̈y ny raha misy, ho very raha valera namiany Jehovah atsika io.

9. Izikoa dinihin̈y 1 Timoty 1:18, 19, nampitovisiny Paoly taminino ma Timoty?

⁹ Vakia 1 Timoty 1:18, 19. Nampiran̈iny Paoly tamy maramila i Timoty, ke nampirisihiny izy baka ‘tsy ho voly han̈ano ady tsara.’ Izio tsy ady ankitikitin̈y fa ady arapan̈ahy. Ampitovisin̈y amy maramila mandeha lagera koa atsika Kristianin̈y. Fotony nan̈ino? Ino toetry tokony hanan̈antsika amy maha maramilany Kristy? Alohany hamaliantsika fan̈ontanian̈a aby io, handiniky raha dimy ianarantsika baka amy fan̈oharan̈any Paoly atsika. Han̈ampy atsika tsy hiala amy fahamarin̈ana raha zen̈y.

10. Karakory ma mahafoe ten̈a amy Zan̈ahary zen̈y? Nan̈ino ma atsika mila mahafoe ten̈a aminany?

¹⁰ Manàn̈a fahafoezanten̈a amy Zan̈ahary. Ten̈a maramila zen̈y tsy mivadiky foeky. Mifen̈y izy miady, amy zen̈y ho voaro aby olo tiany ndreky raha ten̈a valera aminany. Paoly nampirisiky Timoty hahafoe ten̈a amy Zan̈ahary. Mahafoe ten̈a amy Zan̈ahary zen̈y, tia Jehovah mare sady tsy mivadiky aminany. (1 Tim. 4:7) Hahaiho tapakevitry tsy hiala amy fahamarin̈ana fo atsika izikoa ampitombosintsika fitiavantsika Zan̈ahary.​—1 Tim. 4:8-10; 6:6.

11. Nan̈ino ma atsika mila man̈itsy ten̈a?

¹¹ Mizàra man̈ano raha tsara. Mila zatra man̈ano fan̈azaranten̈a maramila araiky vo ho von̈ono hiady lera misy lagera. Timoty nifen̈y fo ho zatra nan̈araka torohevitriny Paoly ke nanjary von̈ono fo izy nan̈ano ady arapan̈ahy. Paoly nandrisiky izy hilefa fan̈irian̈a ratsy ndreky hifen̈y fo hanan̈a toetry tsara avio hifandray amy piaramanompo. Tsy ho vitany raha jiaby zen̈y izikoa izy tsy nahabeko ain̈inany. (2 Tim. 2:22) Mila mahavita man̈itsy ten̈antsika koa atsika, izikoa tihandresy fan̈irian̈a ratsy amy vatan̈antsika ndreky han̈adoso toetry taloha ke hisikiny toetry vaovao. (Rom. 7:21-25; Efes. 4:22, 24) Mety tsy ho mora amintsika mandeha mivory lera atsika lonja mare in̈y. Fa izikoa atsika mahabeko ain̈intsika, tsy hambelantsika hanakan̈a atsika tsy hiaraka amy piaramanompo raha zen̈y.​—Heb. 10:24, 25.

12. Ino aby raha mety han̈ampy atsika hahay tsarabe mampiasa Baiboly?

¹² Maramila koa mila zatra mampiasa fitaovan̈a findesiny miady. Tokony han̈ano zen̈y matetiky izy baka ho hainy tsarabe mampiasa izio. Karaha zen̈y koa, mila haintsika mampiasa tsarabe Volan̈a Zan̈ahary. (2 Tim. 2:15) Man̈ampy atsika han̈ano zen̈y raha hatao amy fivorian̈a. Mila zatra mianatra manokan̈a Baiboly koa atsika, izikoa tiho resy lahatra fa valera ankitin̈y ny marin̈y ampianariny Baiboly. Mila haintsika koa mampiasa Baiboly io baka ho fatatra finoan̈antsika. Ke izio ma mamaky Baiboly efa ampy? Tsy zen̈y. Mila alaintsika onon̈o koa raha vakintsika amizio ao, baka io atsika mikaroko amy raha aboakany fandaminan̈a. Hazava amintsika raha vakintsika izikoa atsika man̈ano zen̈y, baka io ho haintsika hampifan̈araka fomba fiain̈anantsika amy raha nianarantsika. (1 Tim. 4:13-15) Izikoa atsika man̈ano zen̈y, ho haintsika hampiasa Baiboly lera mampianatra olo. Mety tsy ho ampy mamaky andininteny koa fa mampianatra. Mila ampiantsika koa olo ampianarintsika baka ho azony tsarabe raha ianarany avio hainy nan̈ino fianaran̈a io mahakasiky izy. Izikoa atsika zatra mianatra Baiboly tsy tapaka, ho haintsika hampiasa izio lera mampianatra.​—2 Tim. 3:16, 17.

13. Izikoa Hebreo 5:14 zahan̈a, nan̈ino ma atsika mila mahay man̈avaka?

 ¹³ Mahaiza man̈avaka. Maramila zen̈y tokony handiniky tsialohaloha raha mety avoazany raha, ke hiary. Karaha zen̈y koa, tsy maintsy zahantsika ino aby raha mety handrobaka finoan̈antsika, avio man̈ano raha tsy avoazantsika raha. (Ohab. 22:3; vakia Hebreo 5:14.) Atsika mila mahay mifidy fangalan̈a diandian̈a. Matetiky amy filma na programo amy tele ahitan̈a fitondranten̈a ratsy. Ke mety hihen̈y tsihelihely fitiavantsika Jehovah izikoa atsika mizaha raha aby zen̈y. Tsy basinizen̈y fa halany Jehovah fitondranten̈a ratsy. Olo araiky koa man̈ano izio, izy tsy vitany mandrobaten̈a fa man̈ano raha havoazanolo raha koa.​—Efes. 5:5, 6.

14. Ino ivolan̈ana fa nahazo onondraha i Daniel tafara tatỳ?

¹⁴ Tontohitry Daniel, araiky nikoran̈intsika in̈y, fa tsy pare ankitin̈y jeux vidéo misy olo kafiry ndreky misy ifandraisany amy demony. Nan̈ano fikarohan̈a tamy Watchtower Library izy, ke ten̈a nan̈ampy izy lahatsoratra hitany tao. Ino vokany? Tsy tihisaoma jeux vidéo karaha in̈y eky izy. Nivoneny koa kaontinany an̈isanolo pisaoma jeux vidéo taminy Internet tao, baka io izy voly nifandray tamindro. Volan̈iny Daniel: “Tsy jeux vidéo karaha in̈y eky mandany fotoan̈anaka fa raha hafa. Ôtry ataony misaoma bisikilety na miaraka matetiky amy kamaradiko aby amy fiangonan̈a ao.” Daniel zioty pisava lalan̈a sady antipan̈ahy.

15. Nan̈ino ma tsaho io mampidrikandra ankitin̈y?

¹⁵ Karaha nataony Timoty, mila mahay man̈avaka koa atsika ke tsy han̈adin̈a foeky fa mampidrikandra ankitin̈y fan̈azavan̈a tsy marin̈y aparitakandro pivadipinoan̈a aby io. (1 Tim. 4:1, 7; 2 Tim. 2:16) Mety han̈aparitaka tsaho momba piaramanompo na han̈ano raha hahavy atsika tsy hatoky fandaminan̈any Jehovah eky iro io. Ke mila mitandrin̈y fo atsika baka tsy hino vandy aby zen̈y. Nan̈ino ma? Fotony iro io olo ‘tsy manjary sady tsy honohono ho manan̈a fahamarin̈ana foeky’ nata pitiny! ‘Malo’ fo raha mahasetry iro io. (1 Tim. 6:4, 5) Tiandro atsika mino vandy aparitakandro zen̈y, karaha io atsika tsy hatoky iro rahalahy ndreky ranabavintsika aby io.

16. Ino ma raha tsy maintsy tandremantsika?

¹⁶ Mitandrema tsao anao rikian̈a. “Maramila tsarany Kristy Jesosy” i Timoty, ke nifen̈y fo izy nifantoko tamy fanompoan̈a fa tsy  rikian̈a tamy fitadiavambola na tanjon̈o hafa. (2 Tim. 2:3, 4) Karaha Timoty, atsika koa mila man̈ano raha baka tsy ho rikian̈a amy fitadiavambola. Izikoa tsy zen̈y, hihen̈y fitiavantsika Jehovah ndreky Volan̈anany. Hanjary tsy hazoto hikoran̈a raha momba Jehovah aminolo koa atsika. (Mat. 13:22) Mila mifen̈y fo atsika hanan̈a fiain̈ana tsotra ndreky hampiasa fotoan̈antsika ndreky angovontsika ‘han̈ano voalohantoeran̈a Fanjakan̈any Zan̈ahary.’​—Mat. 6:22-25, 33.

17-18. Ino aby raha mila ataontsika baka ho voaro fihavanan̈antsika amy Jehovah?

¹⁷ Mivon̈aosa han̈ano raha malaky. Maramila araiky koa tsy mioman̈a tsialohaloha, ho tampoko aminany faviany fahavalo ke tsy hahavita hiaro ten̈a izy. Izikoa atsika tihiaro raha nankin̈iny Jehovah tamintsika, atsika mila man̈ano raha malaky, intsaka eky izikoa misy raha mety avoazantsika raha. Ino raha han̈ampy atsika? Fiomanan̈a tsialohaloha. Mila haintsika ino raha hataontsika izikoa fa misy raha tampoko.

¹⁸ Ty misy ohatra: Amy tany sasany, olo koa fa man̈aton̈o galà, efa volan̈iny amindro tsialohaloha tany mety hiboahan̈a malaky, izikoa san̈atria misy antambo. Lera vita filazan̈a vo manomboko galà. Ino antony? Amy zen̈y ho hainolo raha tokony hatao. Karaha zen̈y koa tokony hataony Kristianin̈y. Mila haintsika tsialohaloha karakory tokony hatao izikoa tampoko iô mahita sary vetaveta na raha momba famonoan̈a olo ndreky olo kafiry na fan̈azavan̈a baka amy pivadipinoan̈a, aminy Internet na amy tele. Izikoa atsika mioman̈a tsialohaloha amy raha mety handalo, ho vitantsika han̈ano raha malaky, ke ho voaro fihavanan̈antsika amy Jehovah. Olo madio koa fahitany Jehovah atsika.​—Sal. 101:3; 1 Tim. 4:12.

19. Ino hatsaran̈a ho azontsika izikoa atsika mifen̈y hiaro iro raha maro valera nankin̈iny Jehovah tamintsika?

¹⁹ Tsy maintsy arovantsika raha valera namezany Jehovah atsika, an̈isanizen̈y ny marin̈y amy Baiboly ao ndreky tombontsoantsika hampianatra izio olo. Hilamin̈y jerintsika izikoa atsika man̈ano zen̈y, avio ho hisy dikany fiain̈anantsika. Ho ravoravo koa atsika fotony man̈ampy olo hahay Jehovah. Matokisa fa Jehovah hitahy ezakantsika, ke ho vitantsika fo hiaro lan̈iany raha nankin̈iny tamintsika.​—1 Tim. 6:12, 19.