Mampandiniky raha koran̈iny andininy io. Ho izy: “Izikoa anao mahita olo man̈ano raha tsy rariny ndreky tsy mahitsy sady mampijaly olo masikiny amy faritry misy anao, aza atao raha mampalany fan̈ahy anao raha zen̈y. Fotony mbala misy manampahifan̈a an̈abon̈abonazy man̈aramaso raha ataony zen̈y, avio mbala misy an̈abon̈abondro io koa an̈y.”​—Mpito. 5:8.

Izikoa zahan̈a mekimeky fo, andininy io karaha mikoran̈a momba manampahifan̈a amy fanjakan̈anolombelon̈o fo. Kanefa izio koa dinihin̈y tsarabe, izio mikoran̈a momba Jehovah koa. Ten̈a mankahery atsika ndreky man̈amia toky atsika raha zen̈y. Nan̈ino ma?

Mpitoriteny 5:8 io mikoran̈a momba pitondra araiky mitôron̈o tsibebe ndreky man̈ano raha tsy rariny aminolo masikiny. Fa ny raha tsara alainy manampahifan̈a io onon̈o, misy olo an̈abo na manan̈a fahifan̈a mandilatra izy amy fitondrasan̈a ao mandiniky raha ataony. Mety hisy olo hanan̈a fahifan̈a an̈abo mare mandilatra iro io foeky. Fa ny raha mampalahelo, iro manampahifan̈a aby io mety han̈ano raha ratsy aby, ke manjary vahoaka madiniky ndraiky mibaby vokatrany asa ratsindro.

Ndray karaha fa tsisy raha antinain̈y foeky, mampahery fa mandiniky na “man̈aramaso” iro manampahifan̈a aby io Jehovah. Atsika mety miangavy Jehovah baka izy han̈ampy atsika izikoa fa misy raha mavesatra amintsika. (Sal. 55:22; Fil. 4:6, 7) Haintsika baka fa “masony Jehovah mizaha raha jiaby ambony tany, misy han̈aboahany angovonany han̈avotan̈a olo tsy miala aminany amy fô jiaby.”​—2 Tan. 16:9.

Ke Mpitoriteny 5:8 io mampatsiaro atsika fa izikoa misy olo manan̈a fahifan̈a, na azovy izy na azovy, tsy maintsy misy fo koa olo manan̈a fahifan̈a an̈abon̈abony ninazy. Mampatsiaro atsika koa izio fa Jehovah farany an̈abo, ke izy Manampahifan̈a Farany An̈abo. Izy manjaka amy raha jiaby, fa izy iziô fo mampiasa Zanany, Jesosy Kristy, nataony Panjakany Fanjakan̈anany. Jehovah Zan̈ahary Farany Mahery io man̈ano raha amy rariny ndreky mahitsy fo, ary aminolo jiaby an̈anovany zen̈y. Karaha zen̈y koa Zanany.