1. Lera karakory ma mety ho sarotro amintsika manompo Jehovah?

ASA anao mba efa nahatsapa fa ndraikindraiky sarotro manompo Jehovah? Asa lera karakory anao mahatsapa zen̈y? Lera raha jiaby mandeha mahitsy sa amy fotoan̈any anao feno problemo in̈y? Matetiky atsika koa fa an̈atiny problemo zay, farandraha mora amintsika eky matoky Jehovah. Kanefa fiain̈anantsika koa fa milamin̈y, atsika rikian̈a amy raha hafa ke adin̈antsika foeky fa fanompoan̈a Jehovah ny raha ten̈a maventy. Karaha zen̈y raha navoa iro Israelita aby io ke nahavy Jehovah nampitandrin̈y iro mare.​—Deot. 6:10-12.

2. Nan̈ino ma Panjaka Asa ten̈a tsara alain̈a tahaka?

² Tsara alaintsika tahaka raha nataony Panjaka Asa, fotony izy nahay nandiniky ndreky natoky Jehovah. Nanompo Jehovah fo izy na tamy mora na tamy sarotro. Efa rango ela izy ‘natoky Jehovah tamy fonany jiaby.’ (1 Mpanj. 15:14) Akory ahaizantsika zen̈y? Ohatra iziô, nadosony fivavahan̈a diso jiaby ta Joda tao. Koran̈iny Baiboly fa ‘nadosony Panjaka Asa alitarandro hafa firenena aby io ndreky plasy an̈abo jiaby, niravan̈iny koa tsangambato masin̈y jiaby, baka io nironganiny koa kakazo masin̈y jiaby tao.’ (2 Tan. 14:3, 5) An̈isany olo ten̈a nanan̈a voninahitry tamy zen̈y koa Maka, dadiny Panjaka Asa. Kanefa dadiny io nandrisiky olo hanompo sampy, ke nadosony Asa taminany foeky voninahitrinany zen̈y.​—1 Mpanj. 15:11-13.

3. Ino aby raha hidinihintsika amy lahatsoratra ty ato?

³ Panjaka Asa tsy vitany nan̈adoso fivavahan̈a diso fo, fa nandrisiky olo ta Joda tao koa izy han̈araka fivavahan̈a marin̈y  ndreky himpody tamy Jehovah. Nitahiany Jehovah izy ndreky vahoakanany, ke nilamin̈y mare fiain̈anandro. Tan̈atiny folo taon̈o nanjakany Asa, “nilamin̈y tsarabe tany.” (2 Tan. 14:1, 4, 6) Hidinihintsika ato karakory nataony Asa ndreky iro Kristianin̈y tamy taonjato voanalohany tan̈y, nan̈araraotan̈a fotoan̈a nisiany filaminan̈a zen̈y. Farany, hivaliantsika fan̈ontanian̈a ty: Akory han̈aboahanao fa mahay man̈araraotro fotoan̈a anao, intsaka eky izikoa tsendriky voasakantsakana fanompoan̈a Jehovah amy tany misy anao?

4. Izikoa dinihin̈y 2 Tantara 14:2, 6, 7 io, akory nan̈aboahany Asa fa izy nahay nan̈araraotro fotoan̈a mbala nilamindamin̈y?

⁴ Vakia 2 Tantara 14:2, 6, 7. Nivolan̈a tamy vahoakanany i Asa, fa baka amy Jehovah nahavy ‘iro niain̈y nilamin̈y.’ Fa ndray nilamin̈y fiain̈ana, tsy tan̈atiny jerinany foeky hipetrapetraka zen̈y. Izy nan̈orin̈y tanàna maro fatatra nisy lakoro vato maventy, ndreky tilikambo avio barô. Ho izy tamy vahoaka: ‘Tanintsika ty mbala malalaka ke maro raha mety hampiasantsika izio.’ Ino ma raha tiany Asa hambara? Mbala afaka nivezivezy tamy tany namiany Jehovah iro io iro sady mbala nahavita nan̈orin̈y tran̈o ndreky raha hafa, fotony tsisy fahavalo nanafiky iro na nanakantsakana iro. Nilamin̈y mare fiain̈anandro, ke nampiany vahoakanany ho tontohitry fa tokony hahay han̈araraotro fotoan̈a iro.

5. Nan̈ino ma i Asa nankafatatra tafikinany?

⁵ Nan̈araraotro fotoan̈a nilamindamin̈y io koa i Asa ankafataran̈a tafikinany. (2 Tan. 14:8) Fa zen̈y ma mivolan̈a fa izy tsy natoky Jehovah? Aha. Hainy fa andraikitrinany amy maha panjaka izy mampioman̈a vahoakanany ho von̈ono hiatriky problemo. Hainy koa fa tsy hitohy tsisy farany filaminan̈any fiain̈anandro ta Joda tao, fotony mety hisy fahavalo hanafiky iro. Ary zen̈y ankitin̈y raha nisy.

6. Karakory nataondro Kristianin̈y tamy taonjato voanalohany nan̈araraotro fotoan̈a tsy nisiany fan̈injehan̈a?

⁶ Matetiky iro Kristianin̈y tamy taonjato voanalohany tan̈y ninjehin̈y. Fa ndray zen̈y, nisy fotoan̈a hely koa iro mba niain̈y nilamin̈y. Asa ino raha nataondro lelahy ndreky man̈angy tsy nivadiky aby io tamy fotoan̈a tsy nisiany fan̈injehan̈a zen̈y? Tantarainy bokiny Asan’ny Apostoly ao fa iro nan̈ano raha tiany Jehovah fo ke tsy voly nitory vaovao tsara. Nifantoko tamy fanompoan̈a fo iro ke tsy voly nitombo isakandro. Ten̈a nitahiany Jehovah iro fotony haindro tsarabe nan̈araraotro fotoan̈a tsy nisiany fan̈injehan̈a.​—Asa. 9:26-31.

7-8. Karakory nataony apostoly Paoly ndreky Kristianin̈y hafa nan̈araraotro fotoan̈a nisiany filaminan̈a? Hazavà.

⁷ Iro Kristianin̈y taloha tan̈y tsy voly nitady hevitry hitorian̈a vaovao tsara. Zen̈y iziô raha nataony apostoly Paoly taminizy ta Efesosy. Miran̈a nisy “varavaran̈a maventy nisokafin̈y” talohanany, ke nifen̈y izy nitory taminolo farany maro.​—1 Kor. 16:8, 9.

⁸ Nan̈araraotro nitory tamy fomba feno koa Paoly ndreky Kristianin̈y hafa, izikoa fa nilamin̈y problemo momba famosiran̈a. (Asa. 15:23-29) Izikoa fa nikoran̈iny tamy fiangonan̈a fanapahankevitrindro antipan̈ahy aby io momba famosiran̈a, nifen̈y mare koa iry apostoly Paoly nitory “vaovao tsara momba volan̈any Jehovah.” (Asa. 15:30-35) Ino amy zay vokany? Koran̈iny Baiboly fa “nahainatanjaka fo finoan̈andro fiangonan̈a aby io, baka io nahainaro fo iro tao isanandra.”​—Asa. 16:4, 5.

9. Man̈ano karakory ma asa fitorian̈a io amy tany maro? Ino raha tsara dinihintsika?

⁹ Amy zioty, tseky presky man̈aomba asa fitorian̈a ataontsika aby ankamarozany firenena. Izikoa karaha zen̈y amy tany misy anao, ty raha tsara dinihinao: ‘Zaho ma mahay man̈araraotro raha zen̈y?’ Endrakendraka mare panompony Jehovah aminandra farany iziô, fotony iro mandray anjara aminy asa fitorian̈a ndreky asa fampianaran̈a ten̈a miavaka amy tantaranolombelon̈o. (Mar. 13:10) Ary maro koa fomba mety han̈anaovantsika asa io.

10. Mandrisiky atsika han̈ino ma 2 Timoty 4:2?

¹⁰ Izikoa mbala milamindamin̈y fiain̈ana amy tany misy anao, araraota raha zen̈y. (Vakia 2 Timoty 4:2.) Diniha tsao fo anao na olo araiky amy fianakavian̈anao mety mampitombo fanompoan̈a, ohatra, man̈ano pisava lalan̈a. Izioty efa tsy fotoan̈a hamorian̈a fanan̈ana, fotony vola ndreky fanan̈ana zen̈y tsy hiaraka amintsika, lera atsika ho tafitsaka velon̈o amy fahorian̈a be.​—Ohab. 11:4; Mat. 6:31-33; 1 Jaona 2:15-17.

11. Ino raha ataony pitory sasany baka iro mahavita mitory aminolo farany maro?

¹¹ Maro pitory mianatra volan̈a hafa, fotony iro tihan̈ampy olo farany maro hahay Jehovah. Ten̈a man̈ampy iro amy zen̈y raha amy volan̈a isankarazany aboakany fandaminan̈a. Mifototro amy Baiboly aby raha aby zen̈y. Ohatra iziô tamy taon̈o 2010 in̈y fo, nadika tamy volan̈a kadiriny 500 raha naboakantsika. Amy zioty ndraiky raha aby zen̈y efa aboaka amy volan̈a mandilatra 1 000 aby!

12. Ino raha tsapanolo maro, iro koa fa maharen̈y vaovao tsara momba Fanjakan̈a io amy volan̈andro? Man̈ameza ohatra.

¹² Ino raha tsapanolo maro lera iro maharen̈y raha momba Jehovah amy volan̈andro? Nisy ranabavy araiky miteny Kinyarwanda zay, tandraraiky, nan̈aton̈o fivoriambeny vondroparitry ta Etazonỳ, fotony izio natao tamy volan̈a kinyarwanda, volan̈a fampiasainolo baka Rwanda ndreky Congo (Kinshasa) avio Ogandà. Izikoa fa tapitry fivoriambe io, ho izy:  “Efa 17 taon̈o nipitrahako ta Etazonỳ teto zay. Fa iziô vo mazava aminaka tsarabe raha jiaby nazavain̈y tamy fivoriambe.” Tafiditry lalin̈y tamy fonany fivoriambe io fotony raha io natao tamy volan̈anany. Ke tsao anao mety mianatra volan̈a hafa, amy zen̈y anao afaka mitory aminolo sasany amy faritaniny fiangonan̈anaro? Tsy olo jiaby amy faritaninaro ao zay tompintany aby, fa misy koa olo baka antany hafa. Mety han̈eky hafatra hindesintsika iro vahiny aby io izikoa olo mahay volan̈andro mitory amindro. Matokisa fa hitahiany Jehovah ezaka ataonao.

13. Akory ahitan̈a fa nahay nan̈araraotro fotoan̈a iro rahalahintsika aby a Russie an̈y?

¹³ Tsy karaha zen̈y ndraiky piaramanompo sasany fotony sakanany fanjakan̈a amy tany misy iro asa fitorian̈a ataontsika. Karaha zen̈y iziô iro a Russie an̈y. Tan̈atiny taon̈o taon̈o iro ninjehin̈y. Kanefa tamy fanjava Marsy 1991, nikeny fanjakan̈a tan̈y ho aradalàn̈a fivavahan̈antsika. Kadiriny 16 000 pitory tan̈y tamy zen̈y; kanefa 20 taon̈o tafara tatỳ nanjary 160 000 isakandro! Ten̈a mahay mandiniky iro fotony tsy voly iro nitady hevitry nitorian̈a tan̈atiny fotoan̈a mbala nilamindamin̈y. Nakiry iro nan̈ano zen̈y! Nimpody nisakanany fanjakan̈a ndraiky baka asantsika tan̈y tatoatony tato. Fa iro rahalahintsika aby an̈y mbala mazoto amy fivavahan̈a marin̈y fo ndreky tsy voly manompo Jehovah. Mitady hevitry hitorian̈a fo iro.

14-15. Akory nampiasany Jehovah angovonany han̈avotan̈a i Asa?

¹⁴ Niova fo fiain̈ana nilamin̈y be ta Joda in̈y izikoa fa nandeha fotoan̈a. Nisy maramila mandeha 1 tapitrisa nindesiny Zera baka ta Etiopie, navy nanafiky iro. An̈abo moraly mare Zera tamy zen̈y, fotony izy nan̈anten̈a handresy. Panjaka Asa ndraiky tsy nifantoko taminy  hamarozany maramilany Zera zen̈y, fa natoky Jehovah fo. Karaha ty ho izy tamy Jehovah: “Tahitahia kony zahay Jehovah Zan̈aharinay e! Efa anao edy tavandrainay salakady baka aminy an̈aran̈anao navianay eto niany, hiady amy vahoaka io.”​—2 Tan. 14:11.

¹⁵ Indroeny hamarozany maramilany Panjaka Asa maramilany Zera. Kanefa i Asa natoky angovony Jehovah. Hainy fa vitany Jehovah man̈avotro vahoakanany. Zen̈y ankitin̈y raha nataony Jehovah, fotony resy iro maramila etiopiain aby io salakady niloloha baraka.​—2 Tan. 14:8-13.

16. Ndray karaha milamin̈y fiain̈anany panompony Jehovah, nan̈ino atsika mivolan̈a fa tsy hahadin̈y ela raha zen̈y?

¹⁶ Marin̈y ndraiky fa tsy haintsika han̈ano akory fiain̈anantsika aminy amaray. Fa ndray milamin̈y fiain̈anany panompony Jehovah amy zioty, raha zen̈y tsy hahadin̈y ela. Jesosy baka efa nivolan̈a fa “ho halany firenena jiaby” olo ten̈a pan̈aradia izy aminandra farany izioty. (Mat. 24:9) Nivolan̈a koa apostoly Paoly fa “hampijalian̈a koa lan̈iany olo man̈iry hahafoe ten̈a amy Zan̈ahary ndreky hihavan̈a amy Kristy Jesosy.” (2 Tim. 3:12) “Meloko mare” Satana, ke tsy niany tsy amaray, tsy maintsy ampariny amintsika fo helokonany zen̈y.​—Apok. 12:12.

17. Ino raha mety hitsapa tsy fivadihan̈antsika teteky iô?

¹⁷ Hiatriky fitsapan̈a aby atsika jiaby io teteky iô, ke ho hita izikoa atsika tsy mivadiky ankitin̈y. Hely tavela tsy haviany “fahorian̈a be tsisy ambaka izy, rango nisiany donia ty firaka niany ty.” (Mat. 24:21) Amy zen̈y, mety hivadiky amintsika lafamìntsika. Mety hisakanany fanjakan̈a koa asa fitorian̈a ataontsika. (Mat. 10:35, 36) Ke akory hataonao? Han̈ano karaha i Asa ma anao, ke hatoky fa Jehovah han̈ampy anao ndreky hiaro anao?

18. Izikoa Hebreo 10:38, 39 zahan̈a, ino raha han̈ampy atsika ho von̈ono hiatriky fitsapan̈a tsy maintsy ho avy?

¹⁸ Nakiry Jehovah efa mampioman̈a atsika sandra rango iziô, baka atsika ho fatatra finoan̈a tsarabe. Hataony Jehovah raha hahavy atsika hahavita tsy hivadiky, ke mampiasa “panompo atokisan̈a ndreky mahadiniky raha” izy han̈amezan̈a atsika ‘hanin̈y arapan̈ahy amy fotoan̈a mety.’ (Mat. 24:45) Anjarantsika tompiny amy zay baka io man̈ano raha  hahavy finoan̈antsika ho fatatra mare, ke tsy ho voahozongozon̈o foeky!​—Vakia Hebreo 10:38, 39.

19-20. Izikoa zahan̈a 1 Tantara 28:9, ino aby fan̈ontanian̈a tokony hiritriretintsika, baka io nan̈ino?

¹⁹ ‘Mila mitady Jehovah’ atsika, karaha nataony Panjaka Asa in̈y. (2 Tan. 14:4; 15:1, 2) Akory han̈anovantsika zen̈y? Mila mianatra raha momba izy atsika, baka io atao batisa. Man̈ano zay vitantsika koa atsika baka ho tia Jehovah angovo jiaby. Efa man̈ano zen̈y ma anao? Izikoa tianao ho hay valinizen̈y, ty raha tsara iritriretinao: ‘Zaho ma mba miezaka mivory tsy tapaka?’ Fandaminan̈any Jehovah baka mandamin̈y fivorian̈a aby io. Atsika koa fa man̈aton̈o izio, manjary mahazo angovo atsika ke ho vitantsika fo hanompo Jehovah. Hahavita hifampahery amindro rahalahy ndreky ranabavy aby io koa atsika izikoa man̈ano zen̈y. (Mat. 11:28) Miniminia koa baka ty: Anao ma mba mazoto mianatra manokan̈a? Izikoa anao manambady amanjanaka, asa anao mba man̈ano fotoampivavahan̈any fianakavian̈a isaka herin̈iandra? Asa anao mba man̈ano zay vitanao hitorian̈a ndreky hampianaran̈a?

²⁰ Nan̈ino ma atsika mila mandiniky raha aby zen̈y? Baiboly mivolan̈a fa Jehovah mandiniky raha an̈aty jerintsika ndreky fontsika. Ndray Jehovah fo mandiniky raha aby zen̈y ke tsy mba tokony han̈ano karaha zen̈y atsika? (Vakia 1 Tantara 28:9.) Izikoa atsika tontohitry fa tokony han̈ova tanjon̈o na fomba fisain̈ana, atsika mila mivavaka amy Jehovah baka izy han̈ampy atsika han̈ano fan̈ovoan̈a aby zen̈y. Rango iziô atsika efa mila mioman̈a hiatriky fitsapan̈a mbala ho avy. Araraota fotoan̈a mbala milamindamin̈y iziô, ke ampiasà amy fomba tsara fotoan̈anao.