1. Nitaon̈o iro pan̈arato efadahy aby io han̈ino ma Jesosy, baka io akory nataondro?

PAN̈ARATO aby iry Petera, Andrea, Jakoba, ndreky Jaona. Tandraraiky, Jesosy nitaon̈o iro karaha ty: “Man̈araha zaho anaro, fa anaro hataoko pan̈arato olo.” * Akory nataondro? Koran̈iny Baiboly fa ‘direkty nambelandro haratondro, ke rôso iro nan̈araka izy.’ (Mat. 4:18-22) Komansy tio, niova mandrakizay fiain̈anandro, fotony efa tsy laoko eky raha naratôvindro fa “olo velon̈o.” (Lioka 5:10) Amy zioty koa, Jesosy mbala mitaon̈o olo manan̈a fô tsara ndreky tia fahamarin̈ana han̈ano asa io. (Mat. 28:19, 20) Anao ma mba nan̈eky kaikiny Jesosy zen̈y ke nanjary pan̈arato olo?

2. Nan̈ino ma atsika tokony handiniky tsarabe alohany hanapakevitry hanjary pan̈arato olo? Ino raha han̈ampy atsika han̈ano zen̈y?

² Mety efa refindrefin̈y nianaranao Baiboly zay sady mety efa maro fan̈ovoan̈a nataonao. Asa anao efa nieritreritry hanjary pitory vaovao tsara? Sa anao mbala misalasala? Izikoa zen̈y, aza rivan̈a. Matoa baka anao misalasala, dikanizen̈y hainao fa tsy zanazanaka fanapahankevitry izio. Koran̈iny Baiboly fa niaraka Petera ndreky fanamany aby io nitahôminy Jesosy, iro “direkty” nan̈eky. Ndray zen̈y, iro tsy nantaorantaoraka! Nan̈ino atsika mivolan̈a zen̈y? Fotony efa mandilatra tsiota fanjava nahaizandro Jesosy ndreky ninoandro fa izy Mesia. (Jaona 1:35-42) Mety efa maro koa raha hainao momba Jehovah ndreky Jesosy, ary anao tiho tsara fihavanan̈a amy Jehovah. Kanefa,  alohany anao hanapakevitry hanjary pitory, mandiniha tsarabe antsendriky. Ino ma raha nan̈ampy iry Petera nanapakevitry?

3. Ino aby toetry han̈ampy anao tsy hisalasala hanjary pan̈arato olo?

³ Olo Pan̈arato zen̈y mila mazoto miasa, mahay mampiasa fitaovan̈a ampelantan̈anany, misy korazy, avio mahavita man̈itsy ten̈a. Nan̈ampy iro pianatrany Jesosy aby io hanjary pan̈arato olo fanan̈ana toetry aby io. Ho hitantsika ato ino raha han̈ampy atsika hanan̈a toetry aby io ndreky ndreky hahavita tsara asa fitorian̈a io.

4. Nan̈ino ma Petera nan̈arato?

⁴ Petera farandraha tia nan̈arato eky. Izio lastio tadivola namilaomany fianakavian̈anany. (Jaona 21:3, 9-15) Karakory fo lera izy nan̈arato olo? Tsy maintsy nianatra ho tia izio koa izy, fa Jehovah nan̈ampy izy ke vitany tsarabe asa io.​—Asa. 2:14, 41.

5. Eraka raha koran̈iny Lioka 5:8-11, ino ma raha nampavozo Petera? Ino raha han̈ampy atsika tsy hisalasala hanjary pitory?

⁵ Fitiavantsika Jehovah antony maventy mahavy atsika mitory. Ndraikindraiky atsika mety hieritreritry fa tsy mahay asa io. Kanefa ho vitantsika fo hikoran̈a raha momba Jehovah izikoa atsika tia izy. Ho Jesosy tamy Petera: “Aza mavozo eky anao.” (Vakia Lioka 5:8-11.) Navozo hanjary pan̈arato olo ma Petera fotony tsy hainy raha mety havoa izy? Tsy zen̈y foeky. Tsy ela taloha helinizio baka, Jesosy nan̈ano fahagagan̈a ke nahazo laoko marobe iry Petera. Navozo izy tsao tsy hahavita raha karaha vitany Jesosy in̈y. Hitany tsy vain̈y hiaraka miasa amy Jesosy izy. Mety han̈ano karaha Petera io koa anao. Mety mavozo donko anao izikoa fa mieritreritry raha  mila ataony pianatrany Jesosy. Fa karaha ty, anao aza mavozo. Ampitombosa fo fitiavanao Jehovah ndreky Jesosy, baka io fitiavanao olo jiaby. Tsy hisalasala hanjary pitory edy anao izikoa man̈ano zen̈y.​—Mat. 22:37, 39; Jaona 14:15.

6. Ino koa antony hafa mahavy atsika mitory?

⁶ Mitory atsika fotony atsika tihan̈araka bekony Jesosy ty: “Mandihana, ataova pianatra olo.” (Mat. 28:19, 20) Mitory koa atsika fotony mbala marobe olo “nampijalian̈a ndreky naparitaka mira ondrikondriky tsisy piambin̈y in̈y.” Iro io koa mila maharen̈y vaovao tsara momba Fanjakan̈any Zan̈ahary. (Mat. 9:36) Tiany Jehovah hahay ny marin̈y ndreky ho voavonjy karazan̈olo jiaby.​—1 Tim. 2:4.

7. Izikoa Romanina 10:13-15 dinihin̈y, nan̈ino asa fitorian̈a io ten̈a ilain̈a?

⁷ Pan̈arato koa fa mahazo laoko, alafondro sasany fa sasany ndraiky hataondro rô. Tsy karaha zen̈y ndraiky hataontsika izikoa fa man̈arato olo. Tiantsika ho voavonjy iro, ke zen̈y mahavy atsika mitory amindro. Atsika koa fa mieritreritry hatsaran̈a ho azonolo baka amizio, manjary tihan̈ano asa man̈avotro fahin̈ana io fo atsika.​—Vakia Romanina 10:13-15; 1 Tim. 4:16.

8-9. Ino ma raha tokony ho hainy pan̈arato? Nan̈ino?

⁸ Taminandrany Jesosy, mila hainy pamintan̈a ndreky pan̈arato karazan̈a laoko mety nalain̈a. (Lev. 11:9-12) Mila hainy koa tany mety ahitany izio. Matetiky, amy faritry mety amy laoko ndreky ahitandro laoko aby io hanin̈y fo ten̈a misy laoko. Tsy kilakila fotoan̈a koa mety hamintan̈ana na han̈arataovan̈a. Indraiky andra, nisy rahalahy araiky mipetraka amy nosy aminy Osean Pasifiky, nitaon̈o rahalahy misionera zay handeha han̈arato. “Amaray nevera atsika mandeha!”, ho misionera io taminany. Fa nivolan̈iny rahalahy io: “Tsy azonao rahalahy! Tsy amy fotoan̈a mety amintsika ane atsika mandeha, fa amy lera ten̈a mampisy laoko!”

⁹ Karaha zen̈y koa nataony pianatrany Jesosy aby io izikoa fa nan̈arato olo. Nidinihindro tsarabe fotoan̈a nety taminolo, baka io iro nandeha tamy tany nisy olo. Ohatra, iro nitory isaka tran̈o, tamy tempoly ndreky tamy synagoga, baka io ta bazary. (Asa. 5:42; 17:17; 18:4) Karakory koa tokony hataontsika? Mila haintsika tsarabe koa lera mety hatakaran̈a iro olo aby io antran̈o, ndreky tany mety hahitan̈a iro. Hahavita zen̈y atsika izikoa von̈ono han̈ovaova programontsika.​—1 Kor. 9:19-23.

10. Ino aby fitaovan̈a namiany fandaminan̈any Jehovah atsika?

¹⁰ Olo pan̈arato koa tokony hanan̈a fitaovan̈a mety tsara ndreky hahay hampiasa fitaovan̈a aby zen̈y. Karaha zen̈y koa atsika, mila haintsika ino aby fitaovan̈a fampiasaintsika koa fa mitory, avio mila haintsika mampiasa iro io. Jesosy koa fa nampianatra pianatranany karakory atao man̈arato olo, nambarany iro ino aby raha mila indesindro, aia iro mitory, avio ino raha tokony hivolan̈indro. (Mat. 10:5-7; Lioka 10:1-11) Avahizo koa, fandaminan̈any Jehovah nan̈aboaka Fitaovan̈a Fampianaran̈a. Ten̈a mahomby fitaovan̈a aby io. * Efa nampianarin̈y hampiasa iro io atsika, ke raha zen̈y ten̈a man̈ampy atsika hasaky hitory ndreky hahay hampianatra.​—2 Tim. 2:15.

11. Nan̈ino ma olo pan̈arato zen̈y ten̈a mila misy korazy?

¹¹ Olo pamintan̈a ndreky pan̈arato zen̈y mila misy korazy. Matetiky iro io miasa alin̈y. Kanefa ny raha misy, tsy azo antoko toetrandra  andranomasin̈y an̈y. Ndraiky iro tojy andra ratsy. Ke iro koa tsisy korazy, tsy ho vitandro asa io. Lera atsika vo mitory, matetiky atsika man̈ambara aminolo fa atsika io Vavolombelon̈o Jehovah. Mety ho tojy problemo mira andra ratsy in̈y koa atsika. Ino aby zen̈y? Mety hanohitry atsika lafamìntsika, na han̈adroadro atsika jiranintsika. Misy ndraiky olo tsy tihitandren̈y foeky. Tsy mahagaga atsika raha zen̈y, fotony Jesosy efa nivolan̈a fa pan̈aradia izy ho halanolo.​—Mat. 10:16.

12. Izikoa zahan̈a Josoa 1:7-9, ino raha han̈ampy anao ho hisy korazy?

¹² Ino aby raha mila ataonao baka anao ho hisy korazy? Voanalohany, aza adin̈a fa mbala Jesosy fo mitariky asa fitorian̈a io. (Jaona 16:33; Apok. 14:14-16) Faharoe, matokisa fa Jehovah hikarakara anao ankitin̈y, eraka raha efa nambarany. (Mat. 6:32-34) Arakarakany mampafatatra finoan̈anao ny hampisy korazy anao. Fatatra finoan̈a mare iry Petera matoa iro nahavita niala tadivolandro in̈y, ke nan̈araka Jesosy. Hay be fa maro fan̈ovoan̈a nataonao tamy fiain̈ananao ndreky tamy toetrinao baka izio hifan̈araka amy fitsipikiny Jehovah. Vitanao koa nikoran̈a tamy lafamìnao ndreky tamy jiraninao fa anao mianatra Baiboly amy Vavolombelon̈o Jehovah sady mandeha mivory! Matoa anao nahavita raha aby zen̈y, dikanizen̈y anao misy korazy sady manan̈a finoan̈a matanjaka. Ke matokisa anao fa tsy maintsy ‘han̈ampy anao fo Jehovah Zan̈aharinao, na aia na aia tany imboànao.’​—Vakia Josoa 1:7-9.

13. Nan̈ino ma ten̈a ilain̈a mivavaka ndreky misaintsain̈y?

 ¹³ Han̈ampy anao ho hisy korazy koa vavaka ndreky fisaintsain̈ana. (Asa. 4:29, 31) Mivavaha baka Jehovah han̈ampy anao hisy korazy. Izy hamaly vavakanao zen̈y; izy tsy han̈ary anao foeky. Ankilanao iô fo izy sady han̈ampy anao. Tsy zen̈y fo, saintsain̈a koa fomba nan̈ampiany Jehovah iro panomponany aby taloha tan̈y. Iritrireta koa fomba efa nan̈ampiany Jehovah anao hahatôto problemo isankarazany ndreky fomba nan̈amezany angovo anao han̈ova fomba fiain̈ananao. Ndray Jehovah fo nahavita nampisaraka Ranomasin̈y Mena han̈avotan̈a vahoakanany, ke tsy ho vitany han̈ampy anao hanjary pianatrany Kristy? (Eks. 14:13) Matokisa Zan̈ahary, karaha nataony panoratra salamo nivolan̈a karaha ty: “Jehovah miaraka aminaka ke tsy havozo foeky zaho. Ino ma raha ho vitanolo hatao aminaka?”​—Sal. 118:6.

14. Ino raha ianaranao baka amy Masae ndreky Tomoyo?

¹⁴ Misy fomba hafa koa han̈ampy anao hahaiho hisy korazy fo. Diniha fomba nan̈ampiany Jehovah panomponany amy zioty. Maro amindro io bihen̈amaso, kanefa vitandro fo nitory fotony Jehovah nan̈ampy. Bihen̈amaso mare Ranabavy Masae, ke sarotro taminany nitory. Ndray izy mieritreritry hikoran̈a aminolo tsy hainy fo, efa problemo be tsy saomasaoma. Fa ino raha nan̈ampy izy? Nampitombosiny fitiavany Jehovah ndreky fitiavany olo. Nalainy onon̈o koa fa, efa hely fotoan̈a tavela ke nivavaka izy baka hazoto hitory. Vitany nandresy tahotronany, ary izy nan̈ano pisava lalan̈a pan̈ampy. Jehovah mahavita man̈ampy pitory vaovao hanan̈a korazy. Nan̈ino ma? Tamy Ranabavy Tomoyo sambany nitory, tompintran̈o io nan̈ajima mare. Ho izy: “Zaho tsy mila Vavolombelon̈o Jehovah!” avio nafodiny varavaran̈a. Tomoyo tamy zen̈y tsy navozo foeky. Ho izy tamy pitory namany: “Ndray zaho tsendriky nivolan̈a, efa hainy edy fa zaho Vavolombelon̈o Jehovah! Mba tsara koa in̈y e!” Tomoyo izioty pisava lalan̈a maharitry.

15. Ino toetry mila anan̈anolo pan̈arato? Nan̈ino koa atsika mila manan̈a izio?

¹⁵ Olo pan̈arato zen̈y mila mahay man̈itsy ten̈a. Olo karaha zen̈y baka mahabeko ain̈inany ke mahavita raha tokony hatao. Vitany mikomandy ain̈inany ho zatra mifoha maraindrain̈y. Vitany koa tsy miala aminy asanany izikoa tsy efa vita asa io, ndray ratsy karakory toetrandra. Karaha zen̈y koa, hahavita hiaritry ndreky hankefa asa fitorian̈a io firaka amy farany atsika izikoa mahay man̈itsy ten̈a.​—Mat. 10:22.

16. Ino raha han̈ampy atsika hahavita raha mety tsy mahazatra atsika?

¹⁶ Tsy miaraka atsika vo teraka efa mahay man̈itsy ten̈a edy. Matetiky aby atsika mitady raha tsy hanahiran̈a atsika fo! Mila manan̈a fifehezanten̈a atsika vo mahavita man̈itsy ten̈a. Mety ho sarotro amintsika han̈ano raha sasany, intsaka eky izikoa izio tsy mahazatra atsika. Kanefa, ho vitantsika fo han̈ano zen̈y, fotony Jehovah mampiasa fan̈ahy masin̈inany han̈ampian̈a atsika.​—Gal. 5:22, 23.

17. Koa 1 Korintianina 9:25-27 zahan̈a, ino raha tsy maintsy nataony Paoly baka izy nahavita nan̈itsy ten̈a?

¹⁷ Nahavita nan̈itsy ten̈a apostoly Paoly. Fa ndray zen̈y, tsy nora taminany nan̈ano raha tsara. Zen̈y nahavy izy nivolan̈a fa tsy maintsy ‘nivangoeny mare’ ain̈inany. (Vakia 1 Korintianina 9:25-27.) Nampirisiky olo hafa han̈ano karaha zen̈y koa izy, baka iro hahavita han̈ano raha ‘mendriky ndreky milamin̈y.’ (1 Kor. 14:40) Mila von̈ono han̈itsy ten̈a koa  atsika izikoa tihahavita hanompo Jehovah fo, ke hazoto hitory vaovao tsara ndreky hampianatra.​—Asa. 2:46.

18. Ino raha mila ataontsika izikoa atsika tihahomby, eraka fahitany Jehovah izy?

¹⁸ Arakaraka hamarozany laoko azony pan̈arato araiky ahitan̈a fa izy mahomby. Baka aminino fo ahitan̈a atsika mahomby? Baka aminy hamarozanolo nampiantsika hiditry amy fandaminan̈a? Tsy zen̈y. (Lioka 8:11-15) Izikoa atsika tsy voly mitory ndreky mampianatra, amy Jehovah, atsika efa mahomby fo. Ino antony? Fotony atsika man̈ano raha nan̈irahany Jehovah ndreky Zanany.—Mar. 13:10; Asa. 5:28, 29.

19-20. Nan̈ino ma atsika tokony hazoto hitory intsaka eky amy zioty?

¹⁹ Amy tany sasany, fanjava vitsivitsy fo mety han̈arataovan̈a. Ke izikoa fa marikitry ho tapitry fotoan̈a io, mahaimare fo ezakandro pan̈arato aby io. Karaha zen̈y koa tokony hataontsika pan̈arato olo, fotony efa ten̈a marikitry farany donia ty. Efa hely fotoan̈a ahavitan̈a man̈ano asa man̈avotro fahin̈ana io, ke aza mangataka andra eky! Avio aza miambin̈y raha jiaby efa mety tsara vo han̈ano izio.​—Mpito. 11:4.

²⁰ Iziô fotoan̈a tokony hampazoto anao hitory. Ataova koa raha ahaizanao Baiboly tsarabe. Mifen̈a hanan̈a korazy baka io mahaiza man̈itsy ten̈a. Izikoa anao mifen̈y hahafeno fepetra hanjary pitory, ho ravoravo anao fotony manan̈a tombontsoa miaraka miasa amindro pitory mandeha valo tapitrisa erantany. (Neh. 8:10) Mifen̈a fo hitory erakany mety ho vitanao. Aza voly foeky izikoa tsy Jehovah mivolan̈a fa vita asa io. Hidinihintsika amy lahatsoratra man̈araka raha tokony hataonao baka anao ho tapakevitry fo hitory.