1-2. Nan̈ino tokony hahasôfy Kristianin̈y jiaby hahay raha mikasiky familoman̈a olo hengo andan̈itry an̈y io?

MAN̈ANTEN̈A hiain̈y tsisy farany ambony tany aby ankamarozanolo manompo Jehovah, avahizo. Fa iro voahosotro mbala ambony tany eto ndraiky man̈anten̈a hengo andan̈itry. Tiandro ho hay mare han̈ano akory fiain̈anandro koa fa avy an̈y. Nan̈ino ma raha zen̈y tokony hahalian̈a atsika fo, ndray atsika man̈anten̈a hiain̈y mandrakizay ambony tany? Fotony maro hatsaran̈a ho azontsika baka amizio. Ke ndray aia ndray aia fan̈antinan̈antsika, tokony hahalian̈a atsika mare hahay raha mikasiky izio.

² Nirahiny Zan̈ahary nanoratra raha mikasiky familoman̈a olo hengo andan̈itry io sasany tamy pianatrany Jesosy. Karaha ty nambarany apostoly Jaona: “Efa zanakany Zan̈ahary atsika iziô, fa ndray zen̈y, mbala tsendriky naboaka tamintsika fo han̈ano akory atsika. Kanefa haintsika fa ho miran̈a izy atsika lera izy haboaka.” (1 Jaona 3:2) Tsy haindro voahosotro aby io han̈ano akory iro lera iro hivilomin̈y hiain̈y andan̈itry an̈y. Fa ndray zen̈y, hahita Jehovah ankitikitin̈y iro lera iro mahazo valisoandro an̈y. Marin̈y ndraiky fa tsy koran̈iny Baiboly tsipiriany jiaby mikasiky familoman̈a olo hiain̈y andan̈itry an̈y, fa misy raha sasany ndraiky nazavainy apostoly Paoly momba izio. Hiaraka amy Kristy iro voahosotro aby io lera Jesosy “handravan̈a fanjakan̈a jiaby ndreky fahifan̈a jiaby avio angovo”, an̈isanizen̈y “fahafatesan̈a, fahavalo farany io.” Afaranizen̈y amy zay, hampodindro amy Jehovah fitondrasan̈a. Ke Jehovah fo hanjaka amy raha hafa jiaby. (1 Kor. 15:24-28) Misaora hilamin̈y mare amy zen̈y! *

3. Izikoa zahan̈a 1 Korintianina 15:30-32, nahavita nan̈ino Paoly nohony izy natoky fa hivilomin̈y olo maty?

 ³ Nahavita niaritry raha sarotro i Paoly, fotony izy natoky fa olo maty mbala hivilomin̈y. (Vakia 1 Korintianina 15:30-32.) Ho izy tamindro Korintianin̈y aby io: “Efa kalikaly hofoaty zaho isanandra.” Karaha ty koa ho izy: “Niady tamy biby dỳ zaho ta Efesosy.” Mety biby ankitikitin̈y izy niadivany io, tamy stady ta Efesosy tan̈y. (2 Kor. 1:8; 4:10; 11:23) Na koa izy mety tihivolan̈a iro Jiosy nanohitry izy aby io ndreky olo hafa, fotony iro io kafiry miran̈a “biby dỳ.” (Asa. 19:26-34; 1 Kor. 16:9) Ndray ino ndray ino “biby dỳ” koran̈iny Paoly io, ndreky raha sarotro niaretany, izy mbala nan̈anten̈a hoavy tsara fo.​—2 Kor. 4:16-18.

4. Nan̈ino mankahery atsika mahay fa Jehovah mbala hamelon̈o olo maty? (Zahava sary amy fon̈ony gazety ty.)

⁴ Efa ratsy mare fotoan̈a iain̈antsika zioty. Misy amindro rahalahintsika aby io vonenolo. Sasany mipetraka amy tany misy lagera. Misy ndraiky mipetraka amy tany tsy an̈omboan̈a asa fitorian̈a ataontsika. Kanefa iro tsy rivan̈a foeky fa mahita hevitry hanompoan̈a fo, ndray mety hidiranandra iro koa takatra. Ten̈a ohatra tsara arehantsika iro rahalahy ndreky ranabavy aby io, fotony iro tsy voly manompo Jehovah. Iro tsy mavozo. Haindro fa ndray san̈atria iro maty, Jehovah hamelon̈o iro ndraiky aminy amaray. Jehovah tsy hadin̈ana iro foeky!

5. Ino ma raha mety hahavy atsika tsy hino tsarabe fa Jehovah mbala hamelon̈o olo maty?

⁵ Nisy olo taminandrany Paoly nieritreritry fa familoman̈a olo maty zen̈y tsisy foeky. Ke iro nivolan̈a: “Sitrany atsika hihinan̈a ndreky higiaka, fotony atsika io raha mbala hofoaty fo amaray.” Zen̈y nahavy Paoly nampitandrin̈y iro rahalahiny aby io tsy hanan̈a toetsain̈y karaha zen̈y. Tsy vo taminio olo nanan̈a toetsain̈y karaha zen̈y fa efa rango ela. Paoly tio mety nampiasa volan̈a aminy Isaia 22:13 ao. Izio mikoran̈a toetsain̈indro Israelita aby io. Iro nan̈erampô tamy fiain̈ana fa tsy nifen̈y ho tsara fihavanan̈a tamy Zan̈ahary. Karaha tihivolan̈a iro Israelita aby io: “Somà ny ain̈y koa mbala velon̈o ô! Tsy hainao kony raha handalo aminy amaray!” Mbala zen̈y fo koa toetsain̈inolo maro avahizo. Koran̈iny Baiboly ao fa ten̈a nisy vokany ratsy tamindro Israelita aby io toetsain̈y ratsindro zen̈y.​—2 Tan. 36:15-20.

6. Izikoa atsika mino fa olo maty mbala hivilomin̈y, nan̈ino atsika tokony hahay hifidy naman̈a?

⁶ Haintsika tsarabe fa Jehovah hamelon̈o olo maty. Fa ino ma tokony ho vokatranizen̈y amintsika? Tokony hahay hifidy naman̈a atsika. Iro Kristianin̈y ta Korinto tan̈y nila nitandrin̈y aminolo nataondro naman̈a. Iro tsy tokony ninaman̈a taminolo tsy nino familoman̈a olo maty. Akory fo atsika? Amy zioty, maro koa olo tsy mandiniky ny amaray fa fangalan̈a diandian̈a fo raha masaka amy jerindro. Ke izikoa olo karaha zen̈y ataontsika naman̈a na pitahantsika, ho robaka toetsain̈intsika ndreky fahazaran̈a tsara anan̈antsika. Mety ho voataon̈ondro hanota foeky atsika, kanefa fahotan̈a zen̈y raha halany Zan̈ahary. Zen̈y nahavy Paoly nampirisiky atsika karaha ty: “Mandiniha tsarabe ke man̈anaova ny marin̈y fa aza zatra manota.”​—1 Kor. 15:33, 34.

7. Ino fan̈ontanian̈a mety hapetrakanolo sasany, izikoa zahan̈a 1 Korintianina 15:35-38?

⁷ Vakia 1 Korintianina 15:35-38. Olo araiky koa fa tihampisalasala anao momba familoman̈a olo maty, matetiky izy man̈ontany: “Man̈ano akory ma olo maty koa fa hivilomin̈y? Karakory vatan̈andro?” Ke mila  mandiniky raha nivolan̈iny Paoly momba zen̈y atsika. Man̈ano akory marin̈y ma olo koa fa maty? Maro olo mihevitry fa mbala misy fiain̈ana afarany fahafatesan̈a, fa samby isany hevitrindro momba zen̈y. Kanefa, ino ma raha koran̈iny Baiboly?

8. Ino fan̈oharan̈a han̈ampy atsika hahay fomba hamilomany Jehovah iro olo hengo andan̈itry an̈y?

⁸ Raraka aininolo koa fa maty. Kanefa vitany Zan̈ahary man̈amia olo io vatan̈a pare tsarabe lera izy hivilominy. Izy lastio niasa raha jiaby, ke tsisy raha tsy vitany. (Gen. 1:1; 2:7) Tsy vatan̈any lay olo talohany nifatesany hampodiny Jehovah aminany, fa hamezany vatan̈a vaovao izy. Nan̈ino atsika mivolan̈a zen̈y? Paoly nampiasa fan̈oharan̈a momba “voandraha” han̈azavan̈a zen̈y. Izikoa fa atsabo voandraha araiky ke maniry, tsy voandraha natsabo in̈y miboaka baka ao fa kakazo vaovao mitovy aminany. Hitantsika baka amy fan̈oharan̈a nataony Paoly io fa vitany Jehovah, Zan̈ahary niasa raha jiaby, man̈amia vatan̈a vaovao lan̈iany olo hivilominy, erakany itiavany izy.

9. Izikoa zahan̈a 1 Korintianina 15:39-41, ino aby karazan̈a vatan̈a niasainy Zan̈ahary?

⁹ Vakia 1 Korintianina 15:39-41. Paoly nivolan̈a fa samby amy raha mampiavaka izy aby vatandraha niasainy Zan̈ahary. Ohatra iziô, samby isany vatan̈any aomby, ndreky niny voron̈o, baka io niny laoko. Nivolan̈a koa izy fa samby isany koa fanjava ndreky masoandra. ‘Samby aminy hazavan̈andro’ koa iro lakintan̈a aby io. Raha zen̈y ndraiky tsy hitany masontsika, kanefa iro io samby aminy habezan̈andro ndreky kolerandro. Misy amindro io mena, sasany malandy jiaka. Sasany amy lakintan̈a aby io ndraiky manamotamo; ohatra araiky amy zen̈y masoandra. Nivolan̈a koa Paoly fa ‘samby isany vatan̈any raha miain̈y andan̈itry ndreky ambony tany.’ Karakory ma zen̈y? Atsika olombelon̈o iziô manan̈a vatan̈a misy nofotro, ain̈intsika zen̈y. Fa iro andan̈itry an̈y ndraiky, vatan̈a arapan̈ahy nindro fotony iro tsy hitany maso, an̈isanizen̈y anjely.

10. Vatan̈a karakory ma ho azonolo hiain̈y andan̈itry?

 ¹⁰ Karaha ty tohiny koran̈any Paoly: “Karaha zen̈y koa familoman̈a olo maty. Vatan̈a mety lo izy koa fa afafy (na maty); fa vatan̈a tsy mety lo ndraiky izy koa fa hivilomin̈y.” Haintsika fa olo koa fa maty, lo vatan̈anany, raraka ain̈inany, ke mimpody jomòka ndraiky izy. (Gen. 3:19) Ke ino ndraiky ma nahavy Paoly nivolan̈a fa hahazo vatan̈a “tsy mety lo” iro koa fa hivilomin̈y? Tsy familoman̈a olo maty karaha nataony Elia, Elisa ndreky Jesosy in̈y raha tiany Paoly havian̈a, fotony olo nivilomindro aby in̈y nivilomin̈y tambony tany teto fo. Mikoran̈a momba iro hengo andan̈itry an̈y Paoly tio, fotony iro io hahazo ‘vatan̈a arapan̈ahy.’​—1 Kor. 15:42-44.

11-12. Karakory ma vatan̈any Jesosy, taminizy nivilomin̈y? Nan̈ino atsika mivolan̈a fa han̈ano karaha zen̈y koa iro voahosotro aby io lera iro hivilomin̈y?

¹¹ Tamy Jesosy niain̈y tambony tany, nofotro vatan̈anany. Fa izy koa fa nivilominy Jehovah avio nimpody tandan̈itry, izy nahazo vatan̈a ‘arapan̈ahy.’ Karaha zen̈y koa, hamezany Jehovah vatan̈a arapan̈ahy koa iro voahosotro aby io lera iro hivilomin̈y. Zen̈y nahavy Paoly nivolan̈a fa ‘atsika natao miran̈a araiky namboarin̈y tamy jomòka in̈y; fa lera atsika hiain̈y andan̈itry, vatan̈antsika hatao mira niny araiky andan̈itry an̈y in̈y [vatan̈a arapan̈ahy zen̈y].’​—1 Kor. 15:45-49.

¹² Alaiva onon̈o fa tsy vatan̈anolombelon̈o eky vatan̈any Jesosy taminizy nivilominy Jehovah. Nan̈ino atsika mivolan̈a zen̈y? Izikoa fa narikitry ho vita koran̈any Paoly, karaha ty ho izy: “Nofotro ndreky lio tsy handova Fanjakan̈any Zan̈ahary” andan̈itry an̈y. (1 Kor. 15:50) Karaha zen̈y koa lera iro apostoly aby io ndreky voahosotro hafa hivilomin̈y hengo andan̈itry. Tsy nofotro ndreky lio eky vatan̈andro fotony vatan̈a karaha zen̈y mety lo. Ombian̈a ma iro hivilomin̈y? Nivolan̈a Paoly fa tsy miaraka iro maty raha zen̈y ho hisy fa mbala aminy hoavy. Tamy Paoly nanoratra bokiny Korintianina Voanalohany, “efa naty” sasany tamy pianatrany Jesosy, an̈isanizen̈y apostoly Jakoba. (Asa. 12:1, 2) Fa ndray zen̈y,  mbala velon̈o sasany tamindro apostoly ndreky iro voahosotro aby io.​—1 Kor. 15:6.

13. Ino aby raha handalo an̈atiny “fan̈atrehany” Jesosy?

¹³ Jesosy ndreky Paoly samby naminan̈y momba fotoan̈a araiky miavaka amy tantara. Tsy ino zen̈y fa fan̈atrehany Kristy. An̈isany raha mampiavaka fotoan̈a io fisiany lagera, horohorontany, valan̈aretin̈y, ndreky raha ratsy maro hafa. Ombian̈a faminanian̈a io tanteraka? Nanomboko tamy taon̈o 1914. Misy raha hafa koa mampiavaka fan̈atrehany Kristy io. Jesosy nivolan̈a fa hitorian̈a “amy tany jiaby misy olo” vaovao tsara momba fanjakan̈any Zan̈ahary io, “ho vavolombelon̈o amy firenena jiaby, zay vo ho avy ny farany.” (Mat. 24:3, 7-14) Nivolan̈a koa i Paoly fa an̈atiny “fan̈atrehany Tompo” io Zan̈ahary hamelon̈o lan̈iany voahosotro ‘efa maty.’​—1 Tes. 4:14-16; 1 Kor. 15:23.

14. Han̈ano akory iro voahosotro maty an̈atiny fan̈atrehany Kristy?

¹⁴ Amy zioty, miaraka misy voahosotro araiky maty, direkty izy efa vilominy Jehovah mandeha andan̈itry. Mankamarin̈y zen̈y raha nisoratiny Paoly amy 1 Korintianina 15:51, 52 ao. Ho izy: “Tsy hofoaty aby atsika jiaby, kanefa atsika jiaby samby hivoan̈a an̈atiny fotoan̈a fôhiky hely, indraiky mipỳ maso fo, izikoa fa man̈aina trompety farany.” Tanteraka amy zioty raha nivolan̈iny io! Ravoravo mare iro rahalahiny Kristy aby io izikoa fa hivilomin̈y, fotony iro “hiaraka amy Tompo fo.”​—1 Tes. 4:17.

15. Ino asa miambin̈y iro voahosotro aby io lera iro avy andan̈itry an̈y?

¹⁵ Koran̈iny Baiboly fa ‘indraiky mipỳ maso fo’ han̈ovoan̈a iro voahosotro aby io. Ino ma asa handeha hataondro lera iro avy andan̈itry an̈y? Karaha ty ho Jesosy: “Lan̈iany olo mandresy  ke mahavita asanaka firaka amy farany, hamezako fahifan̈a amy firenena aby io. Miaraka amy kobay vy, izy hanjaka aminolo aby io ke hipotipotehiny karaha vilan̈y tanimanga in̈y iro. Hamezako fahifan̈a izy, karaha nataoko nahazo fahifan̈a baka tamy Babako in̈y.” (Apok. 2:26, 27) Hiaraka amy Jesosy iro, handripaka firenena jiaby amy kobay vy.​—Apok. 19:11-15.

16. Akory hamparesy fahafatesan̈a?

¹⁶ Hitantsika baka amy zen̈y fa ho resindro voahosotro aby io ankitin̈y fahafatesan̈a. (1 Kor. 15:54-57) Nohony iro nivilominy Zan̈ahary, iro ho afaka hitahitahy Kristy han̈adoso raha ratsy jiaby ambony tany eto. Ombian̈a? Aminy ady Aramagedona. Hisy lelahy ndreky man̈angy mandeha antapitrisany koa ho ‘tafitsaka velon̈o baka amy fahorian̈a be’ ke hiain̈y amy donia vaovao. (Apok. 7:14) Iro io koa hahita tsarabe fomba hamparesy fahafatesan̈a, lera Jesosy ndreky iro voahosotro aby io hamelon̈o olo maty mandeha andrivony tapitrisa, ambony tany eto. Haravoan̈a ma nintsika amy zen̈y! (Asa. 24:15) Tsy zen̈y fo, handresy fahafatesan̈a nilovain̈a baka taminy Adama koa lan̈iany olo tsy mivadiky amy Jehovah, amy farany arivo taon̈o, ke hiain̈y mandrakizay ambony tany eto.

17. Eraka raha koran̈iny 1 Korintianina 15:58, ino raha mila ataontsika avahizo?

¹⁷ Mankahery raha nisoratiny Paoly momba familoman̈a olo maty. Ke ten̈a tokony hamparavoravo Kristianin̈y jiaby raha zen̈y. Fahaizantsika zen̈y tokony handrisiky atsika han̈araka raha nivolan̈iny Paoly, ke hazoto mare aminy ‘asany Tompo.’ (Vakia 1 Korintianina 15:58.) Izikoa atsika tsy mivadiky foeky salakady mifen̈y fo han̈ano ny farany tsara mety ho vitantsika, hoavy tsara miambin̈y atsika. Ho tsara mandilatrany raha miniminiantsika izio, ke tsy very bôriny foeky asa mare nataontsika niny Tompo!