Asa nivakianao tsarabe Tilikambo Fiambesan̈a tamy taon̈o ty? Izikoa zen̈y, zahava asa hainao valiny fan̈ontanian̈a aby ty:

Karakory tokony ho fiheverantsika iro voahosotro aby io?

Ravoravo atsika fotony iro io manan̈a finoan̈a matanjaka. Fa ndray zen̈y, iro voahosotro aby io tsy tokony hampitovisintsika aminolo malaza amy donia ty. Zan̈ahary fo toraon̈antsika fa tsy olo. (Joda 16) Tsy man̈ontany iro mikasiky fan̈antinan̈andro foeky koa atsika.​—w20.01, p. 29.

Nan̈ino anao tokony hatoky fa Jehovah mijery anao?

Koran̈iny Baiboly fa efa azony Jehovah onon̈o edy anao, rango anao mbala tsy teraka. Tandrin̈esany vavakanao. Hainy raha an̈atiny fonao ndreky jerinao. Mety hamparavoravo izy na hampalahelo izy koa raha ataonao. (1 Tan. 28:9; Ohab. 27:11) Tahôminy han̈aton̈o izy anao.​—w20.02, p. 12.

Akory ahaizantsika lera tokony hivolan̈ana ndreky lera tokony hangin̈ana?

Ravoravo atsika mikoran̈a momba Jehovah, isaka atsika afaka man̈ano zen̈y. Mivolan̈a koa atsika lera mahita olo mitady han̈ano raha mety havoazany raha. Mila mivolan̈a koa iro antipan̈ahy aby io lera misy olo mila hamezan̈a torohevitry. Tokony hangin̈y ndraiky atsika lera tihan̈ontanitany na tihikoran̈a fomba an̈anaovan̈a asa fitorian̈a amy tany tsy han̈omboan̈a asantsika an̈y. Tsy mamosa sekire koa atsika.​—w20.03, p. 20-21.

Ino raha tsy mampiran̈a andiany valala koran̈iny Joela toko faha-​2 ndreky lay aminy Apokalypsy toko faha-​9?

Mivolan̈a Joela 2:20-29 ao fa hiroasiny Zan̈ahary iro valala aby io; nampan̈anten̈a koa izy fa hifainy raha jiaby nirobatindro io. Afaranizen̈y, izy handatsaka fan̈ahinany amindro. Tanteraka sasany tamy faminanian̈a io, taminiro Israelita aby io nitafihiny Babylonianin̈y; fa sasany efa tafara vo tanteraka. Valala aby koran̈iny Apokalypsy 9:1-11 ndraiky manondro iro voahosotro aminandrantsika iziô. Mifen̈y mare iro io man̈ambara didipitsaran̈any Zan̈ahary handeha amy donia ratsy ty, ke mialamboetry iro olo aby manohan̈a izity maharen̈y hafatra toriandro io.​—w20.04, p. 3-6.

Azovy “panjakany avaratra” amy zioty?

Russie ndreky fanamany. Iro io mampijaly atsika vahoakany Jehovah, ndreky tsy man̈aomba atsika han̈ano asa fitorian̈a, fotony atsika tsy tiandro. Mifan̈oesa amy panjakany atsimo koa panjakany avaratra io.​—w20.05, p. 13.

Efa iro toetry sivy koran̈iny Galatianina 5:22, 23 aby ao fo ma “vokatrany fan̈ahy”?

Aha. Fan̈ahy masin̈y io afaka man̈ampy atsika hanan̈a toetry tsara hafa, karaha ataony fahamarin̈ana. (Efes. 5:8, 9)​—w20.06, p. 17.

Nan̈ino ma atsika mila mitandrin̈y mare izikoa fa hampiditry raha aminy Internet ao?

Fotony arakaraka raha ampidirinao ao mety hahavy olo hieritreritry fa anao poerapoera na tsy manetry ten̈a.—w20.07, p. 6-7.

Ino raha ianarany pitory baka amy pan̈arato mahay tsarabe?

Pan̈arato koa mahay tsarabe: 1) Amy lera ten̈a mampisy laoko ndreky amy faritry maro laoko fo izy man̈arato. 2) Hainy mampiasa fitaovan̈a hanan̈any. 3) Von̈ono fo izy hiasa ndray ratsy andra. Karaha zen̈y koa tokony hataontsika lera manompo.​—w20.09, p. 5.

Akory han̈ampian̈a pianatra Baiboly hahaiho tia Jehovah fo?

Ampirisiha izy hamaky Baiboly isanandra ndreky hisaintsain̈y raha baka nivakiany. Ampianara mivavaka koa izy.​—w20.11, p. 4.

Azovy aby ma iro “olo jiaby” handeha ‘hivilomin̈y amy Kristy’ ao io?​—1 Kor. 15:22.

Tsy olo jiaby naty zay tiany apostoly Paoly koran̈iny handeha hivilomin̈y io. Iro Kristianin̈y voahosotro raha tiany havian̈a amizio, fotony iro io ‘efa nidiovin̈y sady tafaray amy Kristy Jesosy.” (1 Kor. 1:2; 15:18)​—w20.12, p. 5-6.

Koran̈iny Baiboly fa ‘hivoan̈a an̈atiny fotoan̈a fôhiky hely iro voahosotro aby io, indraiky mipỳ maso fo, izikoa fa man̈aina trompety farany.’ Ino raha hataondro afaranizen̈y?​—1 Kor. 15:51-53.

Iro voahosotro aby io hiaraka amy Kristy handripaka firenena jiaby, amy kobay vy. (Apok. 2:26, 27)​—w20.12, p. 12-13.