Ny marin̈y aminany, tsy zen̈y foeky raha tiany andininy io havian̈a fa olo miatriky problemo matetiky. Mety koran̈iny “lavo” izy lera izy miatriky raha sarotro, kanefa tafianko ndraiky, izikoa fa vitany miatriky izio.

Karaha ty koran̈iny andininy faha-​15 firaka faha-​17 aminy Ohabolana toko 24 io: “Anao aza manan̈a jery ratsy ke hisitriky handeha hamaky tran̈onolo marin̈y; aza robatin̈y tany fangalàny kajo. Mety ho lavo impito aby olo marin̈y, fa ho tafianko fo izy; fa olo ratsy fan̈ahy ndraiky higoroso baka amy raha ratsy havoa izy. Aza ravoravo anao izikoa lavo fahavalonao, avio fahavalonao koa avoatsikon̈o, anao aza mimoe.”

Misy olo mihevitry fa andininy faha-16 io mikoran̈a mikasiky olo nanota, fa izy nibebaka ke nanjary tsara fihavanan̈a amy Zan̈ahary. Nisy pitondra fivavahan̈a angiley aroe nivolan̈a fa “matetiky iro olo pan̈ano toriteny taloha tan̈y ndreky avahizo man̈azava andininy io karaha zen̈y. Iro mieritreritry fa ndray impirimpiry olo araiky nan̈ano fahotan̈a maventy, kanefa izy mbala tia Zan̈ahary fo sady mibebaka, izy mbala hankasitrahany Zan̈ahary fo.” Mety ho ravoravo olo araiky zatra manota maharen̈y zen̈y! An̈atiny jerinany, tsy maintsy ambelany Zan̈ahary fo hadisovan̈anany ndray impirimpiry izy manota.

Kanefa tsy zen̈y foeky raha tiany Ohabolana 24:16 io koran̈iny.

Mety ho maromaro dikany volan̈a hebreo “lavo” io aminy andininy faha-16 ndreky faha-17 io. Mety ho lavo arabakiteny dikanizio. Karaha ataony biby araiky lavo amy lalan̈a, na olo latsaka baka an̈abo tafontran̈o, na voambary madiniky araiky latsaka amy tany. (Deot. 22:4, 8; Amosa 9:9) Kanefa mety tsy ho arabakiteny koa dikanizio. Ohatra araiky amy zen̈y iziô, araiky koran̈iny Joba 4:4 ty: “Volan̈anao nampianko olo lavo, baka io anao nampafatatra olo malemy lohaliky.”​—Ohab. 11:5, 28.

Kanefa, zahava baka raha nivolan̈iny Edward Plumptre, manampahaizan̈a momba fivavahan̈a. Ho izy: “Volan̈a hebreo nadika [“lavo”] io tsy manondro olo manota foeky.” Ke akory fo basy mety han̈azavan̈a andininy io? Karaha ty nan̈azavany manampahaizan̈a araiky hafa andininy faha-16 io: “Very bôriny sady tsisy varany ezaka ataonolo ampijalian̈a panompony Zan̈ahary, fotony hahavita hiaritry fo iro. Fa iro olo ratsy fan̈ahy aby io ndraiky tsy hahômby foeky.”

Hitantsika baka amy zen̈y fa tsy manota raha tiany Ohabolana 24:16 io koran̈iny amy “lavo” io, fa matetiky miaritry raha manahiran̈a na raha sarotro. Izikoa mbala amy donia ratsy ty, mety harary na ho tojy problemo fo olo marin̈y. Mety hinjehiny fanjakan̈a koa iro nohony raha inoandro. Kanefa, iro mety matoky fa Jehovah han̈ampy iro hahavita hiaritry fo ndreky tsy hivadiky foeky. Tsy maintsy ho tsara fo hiafarany panompony Zan̈ahary, fotony “Jehovah man̈ampy lan̈iany olo lavo, sady mampianko lan̈iany olo mantohoko.” Sa akory ho anao?​—Sal. 145:14-19; 41:1-3.

Ndray izy man̈ano zen̈y, olo marin̈y zen̈y tsy mety ho ravoravo amy raha ratsy mahazo olo hafa. Mampahery izy mahay fa ‘ho tsara fo hiafaranolo mavozo Zan̈ahary.’​—Mpito. 8:11-13; Joba 31:3-6; Sal. 27:5, 6.