Aha. Tsy mikoran̈a momba zen̈y foeky Baiboly ndreky tantara.

Fomba nandikan̈a andininy io amy Baiboly maro, mahavy olo sasany mieritreritry fa nisy tamindro Kristianin̈y taloha tan̈y natao batisa ninolo efa maty. Karaha ty iziô nandikan̈a andininy io amy Baiboly Fandikan-teny Katolika: “Izikoa olo maty tsy hivilomin̈y foeky, nan̈ino fo basy iro atao batemo ninolo maty?”

Kanefa, mifanohitry amy zen̈y foeky raha nivolan̈indro manampahaizan̈a aroe ty: Gregory Lockwood nivolan̈a fa na amy Baiboly na amy tantara, tsiary ndraiky nisy porofo mankamarin̈y fa efa nisy olo taloha tan̈y nangala plasinolo maty ke natao batisa tamy plasinany. Karaha zen̈y koa volan̈iny Gordon Fee. Ho izy: “Raha zen̈y tsiary nisy tamy tantara, ary tsy voakoran̈a amy Baiboly koa. Tsy mikoran̈a momba zen̈y foeky Test[amenta] Vao[vao], ary tsisy porofo foeky mankamarin̈y fa iro Kristianin̈y voanalohany aby tan̈y efa navy nan̈ano zen̈y! Nata iro leglizy nifôron̈o tafarany nifatesandro apostoly aby io koa tsiary nan̈ano zen̈y foeky.”

Ino raha nirahiny Jesosy ataonolo pan̈aradia izy? Koran̈iny Baiboly fa iro mila ‘man̈ano pianatra olo baka amy firenena jiaby, ndreky han̈ano batisa iro, avio ampianatra iro hitandrin̈y raha jiaby nan̈irahany.’ (Mat. 28:19, 20) Dikanizen̈y, alohany olo araiky hatao batisa, izy mila: 1) Mianatra raha momba Zan̈ahary ndreky zanany, 2) mino iro io, avio 3) man̈araka raha volan̈indro. Ke olo mbala velon̈o fo mahavita man̈ano raha telo aby io fa tsy olo efa maty; tsisy olo afaka man̈ano zen̈y amy plasindro foeky.​—Mpito. 9:5, 10; Jaona 4:1; 1 Kor. 1:14-16.

Ino fo basy raha tiany Paoly koran̈iny?

Nisy Kristianin̈y sasany tsy nino fa olo maty mbala hivilominy Zan̈ahary. (1 Kor. 15:12) Ke tiany Paoly haboaka tamindro fa diso hevitry iro. Izy nivolan̈a fa efa impirimpiry izy tseky naty. Mbala velon̈o izy tamy fotoan̈anio. Ndray tio raha sarotro aby zen̈y, izy mbala natoky mare fa, koa san̈atria izy maty, hivilominy Zan̈ahary hengo andan̈itry an̈y koa izy, karaha nataony Zan̈ahary tamy Jesosy in̈y.​—1 Kor. 15:30-32, 42-44.

Nila nazava tsarabe tamindro Kristianin̈y ta Korinto fa iro voahosotro aby io tsy maintsy handalo raha sarotro isanandra, ndreky hofoaty antsendriky zay vo hivilomin̈y hengo andan̈itry. Ke ‘natao batisa tamy fahafatesan̈a’ iro izikoa fa ‘natao batisa tamy Kristy Jesosy.’ (Rom. 6:3) Hitantsika baka amy zen̈y fa tsy maintsy hiaritry raha sarotro iro avio hofoaty, zay iro vo hivilomin̈y hengo andan̈itry, karaha Jesosy in̈y.

Taon̈o aroe mahery hely tafarany nan̈anaovan̈a batisa Jesosy tan̈aty rano, nivolan̈a tamy pianatranany izy fa iro io koa handeha ‘hatao batisa amy raha efa an̈anaovan̈a batisa izy.’ (Mar. 10:38, 39) Ty raha tiany Jesosy havian̈a: Olo araiky koa tapakevitry tsy hivadiky amy Zan̈ahary, mety hifaran̈a amy fahafatesan̈a fiain̈ananany. Zen̈y nahavy Paoly nivolan̈a fa tsy maintsy ‘hijaly miaraka amy Jesosy’ iro voahosotro aby io, zay vo ‘hamian̈a voninahitry miaraka aminany.’ (Rom. 8:16, 17; 2 Kor. 4:17) Zen̈y mivolan̈a fa tsy maintsy hofoaty antsendriky iro, zay iro vo hivilominy Jehovah ndreky hiain̈y andan̈itry an̈y.

Izikoa dinihin̈y raha jiaby zen̈y, karakory ma ten̈a tokony handikan̈a raha nivolan̈iny Paoly io? Karaha ty: “Izikoa tsy zen̈y, ino ma hatsaran̈a ho azonolo atao batisa izikoa iro tsy maintsy hofoaty fo? Izikoa olo maty tsy hivilomin̈y eky, ino ma mbala han̈anaovan̈a batisa iro kanefa iro tsy maintsy hofoaty fo?”