NISY tsaiky man̈angy aroe nandalo tamy kartie feno birô ndreky tran̈o fivarotan̈a ta Baguio, a Philippines. Nahita olo nan̈ano fampirantian̈a iro, fa iro fo tsy nan̈aton̈o tarỳ. Helen an̈aran̈any ranabavy nan̈ano fampirantian̈a io. Nifen̈y i Helen nimoe tamindro. Nanohy diandro iro roe vavy, fa iro fo ravoravo nahita i Helen nimoe tamindro in̈y.

Nandeha bisy iro izikoa fa nody ke iro nahatazan̈a panô maventibe misy soratra jw.org, tamy ribany Tran̈o Fivorian̈a araiky. Azondro onon̈o fa nisy soratra io koa tamy fampirantian̈a in̈y. Ke nijotso tio iro, baka io iro niditry tamy Tran̈o Fivorian̈a io tao. Nitsangana tamy lakoro tio antsendriky iro namaky amy tany misy lerany fivorian̈a.

Direkty nivory iro roe vavy. Niaraka iro niditry tamy Tran̈o Fivorian̈a io, hainao azovy olo hitandro tao? I Helen! Direkty tsaroandro fa io viavy ravoravo nimoe tamindro tan̈y in̈y! Karaha ty ho Helen: “Somary navozo hely zaho, iro roe vavy koa fa nan̈aton̈o zaho. Loso diniky aby zaho tsao nisy raha tsy mety, nataoko!” Nazavaindro taminy Helen fa tsy zen̈y foeky raha nisy.

Ravoravo mare iro roe vavy io nivory niaraka tamy piaramanompo. Niaraka iro navy efa tamana edy! Izikoa fa ravan̈a, zahavandro fa iro piaramanompo aby io nan̈adio Tran̈o Fivorian̈a, ke iro nangataka tsao mba mety mitahitahy. Efa tsy a Philippines an̈y eky araiky amindro roe vavy io amy zioty, fa araiky ndraiky mbala an̈y, efa komansy mivory sady efa mianatra Baiboly. Baka taminy Helen ravoravo nimoe tamindro fo nahavy raha jiaby zen̈y!