1. Mety ho ino raha mamolavola fomba fitondrasany lelahy araiky vady amanjanakanany?

ARAKA dinikinao, man̈ano akory ma olo “manan̈a fahifan̈a” zen̈y? Ohatra araiky aminolo manan̈a fahifan̈a zioty, lohany fianakavian̈a. Lelahy sasany koa fa manambady, matetiky kolontsain̈y na fomba nitarimian̈a izy mamolavola fomba itondrasany vady amanjanakanany. Ho Yanita, ranabavy araiky an Eropy: “Aminay atỳ, maro olo mihevitry fa man̈angy zen̈y olo ambany izikoa ampiran̈iny amy lelahy, ke tokony hatao miran̈a ampiasa.” Karaha ty koa ho Luke, rahalahy araiky an Etazonỳ: “Misy lelahy tsy mitandren̈y hevitriny man̈angy foeky, fotony nampianarin̈y iro fa hevitriny viavy zen̈y tsisy dikany foeky ke tsy tokony tandrin̈esan̈a.” Kanefa, halany Jehovah izikoa lelahy tsy man̈isy fotiny man̈angy. (Ampiràn̈a amy Marka 7:13.) Ke ino raha han̈ampy lelahy hahay hitondra fianakavian̈a?

2. Ino raha mila hainy lohany fianakavian̈a? Nan̈ino?

² Hahay hitondra vady amanjanaka lelahy araiky, izikoa mazava aminany tsarabe ino raha takìny Zan̈ahary aminany. Tokony ho hainy nan̈ino Jehovah nan̈amia fahifan̈a olo sasany, avio akory hataony hangala tahaka Jehovah ndreky Jesosy. Nan̈ino? Fotony lelahy koa mba namiany Jehovah fahifan̈a, ke tiany izikoa ampiasainy lelahy amy fomba tsara fahifan̈a namezany iro io.​—Lioka 12:48b.

3. Koa zahan̈a 1 Korintianina 11:3, akory fomba nandaminany Jehovah fianakavian̈anany?

³ Vakia 1 Korintianina 11:3. Koran̈iny andininy io fomba nandaminany Jehovah fianakavian̈anany andan̈itry an̈y ndreky ambony tany eto. Izy lohany fianakavian̈a io. Dikanizen̈y, fahifan̈anany ny ten̈a an̈abo amizio ao. Fa namezany fahifan̈a koa iro anjely aby io ndreky olo sasany. Ke na tsara na ratsy fomba ampiasandro fahifan̈andro io, iro fo tomponandraikitry amy zen̈y fa tsy Jehovah. (Rom. 14:10; Efes. 3:14, 15) Hangala ohatra atsika. Jesosy iziô namezany Jehovah fahifan̈a an̈ivony fiangonan̈a. Ke na karakory na karakory fomba itondrasany Jesosy  atsika, izy fo tomponandraikitry. (1 Kor. 15:27) Karaha zen̈y koa lelahy. Namezany Jehovah fahifan̈a amy vadindro ndreky zanakandro iro. Ke amy Jehovah ndreky Jesosy, lelahy tomponandraikitry amy fomba itondrasany olo tran̈o araiky aminany.​—1 Pet. 3:7.

4. Manan̈a fahifan̈a han̈ino ma Jehovah ndreky Jesosy?

⁴ Jehovah Lohany fianakavian̈anany andan̈itry an̈y ndreky ambony tany eto. Izy tsy vitany manan̈a fahifan̈a han̈apetraka fitsipiky tsy maintsy arehany zanany, fa mbala vitany koa man̈ano raha hahavy iro zanany aby io han̈araka fitsipiky aby zen̈y. (Isaia 33:22) Karaha zen̈y koa Jesosy. Izy lohany fiangonan̈a, ke izy manan̈a fahifan̈a han̈apetraka fitsipiky an̈ivony fiangonan̈a ndreky han̈ano raha hahavy olo han̈araka fitsipiky napetrany.​—Gal. 6:2; Kol. 1:18-20.

5. Ino fahifan̈any lohany fianakavian̈a? Akory ahaizan̈a fa raha zen̈y misy limitiny?

⁵ Karaha ataony Jehovah ndreky Jesosy, lelahy manan̈a fahifan̈a hanapakevitry amy raha jiaby momba fianakavian̈anany, fotony izy lohany fianakavian̈a. (Rom. 7:2; Efes. 6:4) Kanefa misy erany fahifan̈anany zen̈y. Ohatra iziô, izikoa fa misy fitsipiky tiany hapetraka, tokony hataony mifan̈araka amy toro lalan̈any Baiboly fo fitsipiky aby zen̈y. (Ohab. 3:5, 6) Izy koa tsy manan̈a fahifan̈a han̈apetraka fitsipiky aminolo hafa tsy an̈isany fianakavian̈anany. (Rom. 14:4) Fan̈ampinizen̈y koa, efa tsy manan̈a fahifan̈a amy zanany eky izy, izikoa zanany io efa be ke efa tsy mipetraka aminany eky. Fa ndray izy man̈ano zen̈y, zanany io mbala tokony han̈aja izy fo.​—Mat. 19:5.

6. Ino nahavy Jehovah nan̈amia fahifan̈a olo sasany?

⁶ Nan̈ino marin̈y ma Jehovah nan̈amia fahifan̈a olo sasany? Fotony tiany fianakavian̈anany. Kadô baka aminany izio. Baka amizio mahavy fianakavian̈anany hiray sain̈y ndreky hilamin̈y tsara. (1 Kor. 14:33, 40) Izikoa tsy ten̈a mazava azovy ny manan̈a fahifan̈a, hikorontan̈a fianakavian̈any Jehovah, ke tsy ho sambatra foeky iro an̈isanizio. Tsy ho hay azovy ny tompiny fanapahankevitry farany, ndreky azovy ny tokony han̈atanteraka fanapahankevitry io.

7. Izikoa Efesianina 5:25, 28 zahan̈a, tiany Jehovah hanjikiziky amy man̈angy ma lelahy? Hazavà.

⁷ Hitantsika tio fa tiany Jehovah hahazo hatsaran̈a atsika matoa izy nan̈amia fahifan̈a lohany fianakavian̈a. Kanefa, maro viavy mahatsapa fa mampijaly iro ndreky manjikiziky amindro vadindro. Asa nan̈ino? Fotony maro lelahy tsy mijery fitsipikiny Jehovah momba fianakavian̈a, fa man̈araka fombantany ndreky fomba nitarimian̈a iro fo. Baka amy fitiavanten̈a koa mahavy lelahy sasany han̈ano zen̈y. Ohatra iziô, mahatsiaro ten̈a an̈abo mare lelahy sasany izikoa fa manjikiziky amy vadindro. Iro mihevitry fa zen̈y fomba an̈aboahandro aminolo fa iro “lelahy ankitin̈y.” An̈atiny dinikinolo karaha zen̈y, ndray tsy vitany miforse vadiny hankatia izy, ataony raha hahavy man̈angy io havozo izy. Tahotro zen̈y amy zay hindesiny manjikiziky amy vadiny. * Diso hevitry lelahy araiky izikoa manan̈a toetsain̈y karaha zen̈y na man̈ano raha ambaka zen̈y. Fotony izy tsy vitany tsy man̈aja man̈angy, fa man̈ano raha mifanohitry tanteraka amy raha takìny Jehovah koa.​—Vakia Efesianina 5:25, 28.

8. Akory hahaizany lelahy hitondra fianakavian̈anany tsarabe?

⁸ Ho hainy lelahy hitondra fianakavian̈anany, izikoa izy mangala tahaka fomba nampiasany Jehovah ndreky Jesosy fahifan̈andro. Alô atsika handiniky toetry aroe naboakany Jehovah  ndreky Jesosy, avio akory han̈aboahany lohany fianakavian̈a toetry aby io lera izy mifandray amy vadiny ndreky zanany.

9. Akory an̈aboahany Jehovah fa izy manetry ten̈a?

⁹ Fanetrenten̈a. Tsisy olo misy jery mandilatra Jehovah, kanefa izy von̈ono hitandren̈y hevitriny panomponany. (Gen. 18:23, 24, 32) Ambelany han̈amia sosokevitry koa olo ambany fahifan̈anany. (1 Mpanj. 22:19-22) Jehovah lavorary, kanefa izy tsy man̈anten̈a atsika hanjary lavorary miran̈a izy foeky. Ndray izy aby man̈ampy atsika, olombelon̈o tsy lavorary, baka atsika hahavita hanompo izy tsarabe. (Sal. 113:6, 7) Zen̈y aviany Baiboly mivolan̈a fa Jehovah ten̈a ‘man̈ampy’ atsika. (Sal. 27:9; Heb. 13:6) Resy lahatra Panjaka Davida fa izikoa Jehovah tsy nanetry ten̈a ndreky tsy nan̈ampy izy, tsy vitany foeky asa nan̈irahany Jehovah izy.​—2 Sam. 22:36.

10. Akory nan̈aboahany Jesosy fa izy manetry ten̈a?

¹⁰ Jesosy koa manetry ten̈a. Ndray izy Tompo, nisasàny vitindro pianatranany aby io! Nirahiny Jehovah nisoratin̈y amy Baiboly ao lastio raha nataony io. Asa mba hainao ino antony? Fotony tiany hangala tahaka raha nataony Jesosy io aby atsika jiaby, an̈isanizen̈y lohany fianakavian̈a. Ho Jesosy: ‘Modely izy namiako anaro in̈y, misy han̈anaovanaro karaha nataoko in̈y koa.’ (Jaona 13:12-17) Be fahifan̈a nanan̈any Jesosy, kanefa izy tsy nangataka hitompoen̈a foeky. Ndray izy aby nanompo iro!​—Mat. 20:28.

11. Akory han̈aboahany lohany fianakavian̈a fa izy manetry ten̈a, karaha Jehovah ndreky Jesosy?

¹¹ Ino raha ianarantsika baka amy zen̈y? Maro fomba mety an̈aboahany lohany fianakavian̈a fa izy manetry ten̈a. Ikeny, ohatra, fa tsy lavorary vady amanjanakanany. Tandrin̈esany fo koa hevitrindro io, nata tsy lanilaniny tsarabe. Karaha ty nambarany Marley, ranabavy an Etazonỳ: “Misy fotoan̈a zahay roe fivadiany tsy mitovy hevitry. Fa vadiko man̈ontany hevitrinaka fo, avio dinihiny tsarabe raha zen̈y alohany izy hanapakevitry. Hitako baka amy zen̈y fa tiany mare zaho sady hajainy koa!” Manetry ten̈a koa lelahy araiky izikoa mazoto man̈ano asa antran̈o, ndray asany man̈angy fiheveranolo raha zen̈y. Raha zen̈y ndraiky mora ampivolan̈ana fa sarotro atao. Nan̈ino ma? Karaha ty ho Rachel: “Fombanolo aminay atỳ, lelahy koa mitahitahy vadiny manasa lasety na man̈adio tran̈o, efa ataonolo matimbady edy! Tsy lelahy tsarabe.”  Izikoa karaha zen̈y toetsain̈inolo amy tany misy anaro, tsaraova Jesosy. Izy nanasa vitiny pianatranany, kanefa andevo olo pan̈ano raha zen̈y! Ke tsy resimbady foeky lelahy araiky izikoa mahay mitondra fianakavian̈anany, fa izy tia vady sady mitady raha hampasambatra iro tran̈o araiky. “Lelahy ankitin̈y” izy koa man̈ano zen̈y! Marin̈y fa ilain̈a manetry ten̈a, fa misy toetry hafa koa mila anan̈any baka izy hahay hitondra fianakavian̈anany tsarabe. Asa ino zen̈y?

12. Ino aby raha nataony Jehovah ndreky Jesosy nohony fitiavandro atsika?

¹² Fitiavan̈a. Baka amy fitiavan̈a fo mahavy Jehovah man̈ano raha. (1 Jaona 4:7, 8) Akory ahitan̈a fa Jehovah tia atsika? Namezany atsika Volan̈anany ndreky fandaminan̈anany, amy zen̈y atsika hahavita hihavan̈a aminany tsarabe. Mampahery atsika koa izy, fotony izy tihan̈amia toky atsika fa izy tia atsika. Ankoatranizen̈y, ‘amezany atsika koa raha ilaintsika amy fiain̈ana, baka atsika ho ravoravo.’ (1 Tim. 6:17) Tia atsika koa Jehovah fotony atsika koa fa man̈ano hadisovan̈a, izy man̈itsy atsika. Iô koa vidipan̈avotan̈a. Tiany Jesosy mare koa atsika ke nataony soron̈o ain̈inany han̈avotan̈a atsika. (Jaona 3:16; 15:13) Ke izikoa atsika tsy mivadiky amy Jehovah ndreky Jesosy, tsisy raha mahasakan̈a iro tsy hankatia atsika.​—Jaona 13:1; Rom. 8:35, 38, 39.

13. Nan̈ino ma lohany fianakavian̈a mila man̈aboaka fitiavan̈a? (Zahava “ Raha Tokony Hataony Lelahy Vo Nan̈ano Mariazy.”)

¹³ Ino raha ianarantsika baka amy zen̈y? Tokony ho fitiavan̈a fo mandrisiky lohany fianakavian̈a araiky han̈ano raha. Nan̈ino ma raha zen̈y ten̈a ilain̈a? Nivolan̈a apostoly Paoly fa olo araiky koa “tsy tia rahalahiny [na fianakavian̈anany]” hitany be ankilanany iô, akory ma ataony ho tia Zan̈ahary tsy hitany an̈y! (1 Jaona 4:11, 20) Akory han̈aboahany lelahy araiky fa izy tia vady amanjanakanany? Akory an̈aboahany fa mangala tahaka Jehovah ndreky Jesosy izy? Hifen̈y angovo jiaby izy han̈ampy fianakavian̈anany hihavan̈a tsarabe amy Jehovah. Hampahery iro koa izy sady hamelon̈o iro. (1 Tim. 5:8) Tsy zen̈y fo, hifen̈y koa izy hampiofan̈a ndreky han̈itsy iry zanany. Tsy maintsy mianatra mangala fanapahankevitry man̈amia voninahitry i  Jehovah ndreky mahatsara vady amanjanakanany koa izy. Ke atsika iziô handiniky hevitry telo aby io, baka io ho hitantsika akory ataony lohany fianakavian̈a mangala tahaka Jehovah ndreky Jesosy.

14. Ino raha tokony hataony lohany fianakavian̈a baka fianakavian̈anany hihavan̈a tsara amy Jehovah?

¹⁴ Man̈ampy vady amanjanakanany hihavan̈a tsarabe amy Jehovah. Jesosy nangala tahaka Babany, ke nifen̈y izy nan̈ampy iro pianatranany aby io hanan̈a finoan̈a matanjaka fo. (Mat. 5:3, 6; Mar. 6:34) Lohany fianakavian̈a koa tokony han̈ampy vady amanjanakanany hifandray tsara amy Jehovah fo. Tokony ho raha farany maventy aminany raha zen̈y. (Deot. 6:6-9) Akory han̈anaovany zen̈y? Tokony hifen̈y izy han̈ampy fianakavian̈anany hanjary kamaradiny Jehovah ndreky han̈ano raha arapan̈ahy miaraka amindro. Ohatra, miaraka mamaky Baiboly, miaraka mianatra Baiboly, miaraka mivory amindro, avio miaraka mitory vaovao tsara.

15. Akory han̈aboahany lohany fianakavian̈a fa ten̈a tia vady amanjanakanany izy?

¹⁵ Man̈aboaka fitiavan̈a amy fianakavian̈anany. Nataony Jehovah ren̈inolo tsarabe fa izy ten̈a tia Jesosy. (Mat. 3:17) Naboakany Jesosy tamy raha nivolan̈iny ndreky raha nataony fa ten̈a tiany iro pan̈aradia izy aby io. Iro baka tio nivolan̈a taminany fa iro koa mba tia izy. (Jaona 15:9, 12, 13; 21:16) Zen̈y koa raha tokony hataony lohany fianakavian̈a. Tokony ho hita amy raha ataony ndreky raha volan̈iny fa izy tia vady amanjanakanany. Iro koa ohatra nahavita raha tsara, izy tsy tokony hisalasala hidera iro, ndray ankilanolo.​—Ohab. 31:28, 29.

16. Ino aby raha mila ataony lohany fianakavian̈a? Ino raha mila tandremany?

¹⁶ Mamelon̈o fianakavian̈anany. Nisy fotoan̈a iro Israelita aby io tsy nan̈araka volan̈any Jehovah, ke iro nisaziany. Fa iro namiany Jehovah raha nilaindro fo. (Deot. 2:7; 29:5) Amezany Jehovah raha ten̈a ilaintsika koa atsika. (Mat. 6:31-33; 7:11) Akory fo Jesosy? Nikarakara raha nilainy pianatranany koa izy. (Mat. 14:17-20) Iro koa fa narary, nataony raha nampahivan̈a iro. (Mat. 4:24) Ke izikoa lohany fianakavian̈a tihan̈ano raha mamparavoravo Jehovah, izy tsy maintsy mamelon̈o vady amanjanakanany. Kanefa, mila mitandrin̈y izy tsao rikian̈a loatra aminy asanany. Tsy ho vitany han̈ampy fianakavian̈anany ho tsara fihavanan̈a amy Jehovah, izikoa izy tsy mahay mandanjalanja amy resaka asa. Tsy ho vitany koa hampahery iro na han̈aboaka fitiavan̈a amindro.

17. Ino modely nambelany Jehovah ndreky Jesosy ke tokony halaintsika tahaka?

¹⁷ Mampiofan̈a ndreky man̈itsy. Jehovah mampiofan̈a ndreky man̈itsy atsika fotony izy mitady raha mahatsara atsika. (Heb. 12:7-9) Mangala tahaka Babany koa i Jesosy, ke mampiofan̈a olo ambany fahifan̈anany. Ten̈a be fitiavan̈a izy koa fa man̈ano zen̈y. (Jaona 15:14, 15) Mentitry izy ndraikindraiky izikoa fa  man̈amia torohevitry, kanefa mifen̈y fo izy ho tsara fan̈ahy izikoa fa man̈ano zen̈y. (Mat. 20:24-28) Hainy baka fa atsika io tsy lavorary ke mora man̈ano diso.​—Mat. 26:41.

18. Ino raha tsy tokony hadin̈any lohany fianakavian̈a?

¹⁸ Akory han̈aboahany lohany fianakavian̈a fa mangala tahaka Jehovah ndreky Jesosy izy? Mila alainy onon̈o fa tsy lavorary vady amanjanakanany. Izy tsy tokony ho “meloko mare” amindro. (Kol. 3:19) Mifanohitry amy zen̈y, hifen̈y fo izy han̈araka raha koran̈iny Galatianina 6:1, ke han̈itsy iro “moramora” fo. Tsy tokony hadin̈any lohany fianakavian̈a fa ndray izy koa mba tsy lavorary. Hahômby fampianaran̈anany izikoa izy antsendriky man̈amia modely, karaha nataony Jesosy in̈y.​—1 Pet. 2:21.

19-20. Lohany fianakavian̈a koa fa hanapakevitry, akory an̈aboahany fa mangala tahaka Jehovah ndreky Jesosy izy?

¹⁹ Tsy tia ten̈a izikoa fa manapakevitry. Jehovah koa fa manapakevitry, raha mahatsara atsika fo ataony. Niasa raha manampahin̈ana i Jehovah, fotony atsika tiany hankafỳ fiain̈ana. Tsy zen̈y fo fa, nambelany hofoaty koa Jesosy han̈avotan̈a atsika. Tsisy olo niforse izy han̈ano zen̈y fa izy tihan̈ampy atsika. Jesosy koa karaha zen̈y. Nitady raha mahatsara olo fo izy. (Rom. 15:3) Ohatra iziô, kajo mare izy tandraraiky ke efa tseky hangala kajo. Fa izikoa fa navy iro vahoaka aby io nan̈aton̈o izy, nampandiferiny ninany fa direkty izy nampianatra iro.​—Mar. 6:31-34.

²⁰ An̈isany raha sarotro tsy maintsy ataony lohany fianakavian̈a, mangala fanapahankevitry. Hainy lelahy manambady tsarabe fa raha zen̈y tsy kidikidy. Ke tsy man̈anon̈ano na indesiny fô fo izy koa fa manapakevitry, fa mitavandra Jehovah fo sady man̈eky hampiofaniny. * (Ohab. 2:6, 7) Mitady raha mahatsara vady amanjanakanany izy izikoa man̈ano zen̈y, fa tsy mitady raha mahatsara ain̈inany fo.—Fil. 2:4.

21. Ino ma raha hidinihintsika amy lahatsoratra man̈araka?

²¹ Tsy mora andraikitry nankin̈iny Jehovah amy lohany fianakavian̈a, kanefa tiany Jehovah hahavita izio tsarabe iro. Ho haindro tsarabe hitondra vady amanjanakandro, izikoa iro mifen̈y mare mangala tahaka Jehovah ndreky Jesosy. Ndray izy man̈ano zen̈y, mila man̈ano andraikitrinany koa vadiny baka ho sambatra tokantran̈ondro. Akory tokony fiheverany man̈angy fahifan̈any vadiny? Ino raha sarotro mety ho tojy man̈angy manambady? Zen̈y raha ho hitantsika amy lahatsoratra man̈araka.