1. Ino aby raha mila dinihiny ranabavy mieritreritry hanambady?

AMBANY fahifan̈any Jesosy aby Kristianin̈y jiaby. Haintsika fa Jesosy io lavorary. Man̈angy kristianin̈y ndraiky koa fa manambady, izy manjary ambany fahifan̈any lelahy tsy lavorary. Ke mety tsy ho mora aminany raha zen̈y. Izikoa misy ranabavy tihanambady, ary efa misy rahalahy von̈ono hangala izy an̈y, ty antsendriky raha tsara dinihiny: ‘Mba ho vady tsara edy ranadahy io? Hahay hitondra tokantran̈o edy izy? Ino mahavy zaho matoky fa ho vitany raha zen̈y? Ten̈a raha maventy aminany edy fanompoan̈a Jehovah? Zahay koa manjary fivadiany, ho vitany fo ma han̈ampy zahay ho tsara fihavanan̈a amy Jehovah?’ Ankoatranizen̈y, mila man̈ontany ten̈a koa ranabavy io: ‘Ino ma toetry tsaranaka ke han̈ampy zahay hanan̈a tokantran̈o sambatra? Zaho ma mba maharidraha sady tsy matity? Tsara fihavanan̈a amy Jehovah ma zaho?’ (Mpito. 4:9, 12) Miankiny amy fanapahankevitry ataony ranabavy io alohany izy hanambady, hanan̈any tokantran̈o sambatra.

2. Ino raha hidinihintsika amy lahatsoratra ty ato?

² Antapitrisany man̈angy kristianin̈y man̈eky fahifan̈any vadindro, ke ten̈a ohatra tsara arehantsika iro. Ravoravo mare atsika manompo Jehovah miaraka amy ranabavy tsy mivadiky aby io. Fa amy lahatsoratra ty ato, atsika handiniky valiny fan̈ontanian̈a telo aby ty: 1) Ino aby raha sarotro iaretany man̈angy manambady? 2) Ino mahavy man̈angy kristianin̈y mifidy han̈eky fahifan̈any vadiny? 3) Ino raha ianaranolo fivadiany baka amy Jesosy, Abigaila, ndreky Maria reniny Jesosy?

3. Ino mahavy olo fivadiany tsy maintsy misy problemo?

³ Vadian̈a io kadô tsara sady lavorary baka amy Zan̈ahary. Fa ny raha misy, atsika tsy lavorary. (1 Jaona 1:8) Zen̈y mahavy Baiboly  mampitandrin̈y fa ho hisy problemo fo olo fivadiany. ‘Fahorian̈a amy nofotro’ ivolan̈any izio ao. (1 Kor. 7:28) Alô hidinihintsika sasany amy raha mety hanahiran̈a man̈angy manambady.

4. Ino mahavy viavy sasany mihevitry fa man̈ambany izy man̈eky fahifan̈any vadiny?

⁴ Misy viavy mihevitry fa manjary ambany izy, izikoa man̈eky fahifan̈any vadiny. Mety baka amy fomba nitarimian̈a izy donko mahavy izy mieritreritry zen̈y. Karaha ty volan̈iny ranabavy Marisol, baka an Etazonỳ: “Amy tany nahatombo zaho, matetiky nampodimpody taminay fa lelahy ndreky man̈angy zen̈y mitovy zò, amy raha jiaby. Haiko ndraiky fa lelahy nataony Jehovah lohany fianakavian̈a, avio man̈angy mila man̈eky fahifan̈any vadiny, fa hitako tsy mora man̈aja fahifan̈a zen̈y!”

5. Ino ma toetsain̈y ratsy anan̈any lelahy sasany?

⁵ Baka amy toetsain̈iny lelahy koa ndraikindraiky mahavy man̈angy sasany tsy man̈aja fahifan̈a. Misy lelahy mieritreritry fa man̈angy ambanimbany tozay lelahy. Karaha ty koran̈iny ranabavy araiky mipetraka an Ameriky Atsimo: “Amy tany misy zahay atỳ, man̈angy tsy miaraka mihinan̈a amy lelahy. Tsaiky man̈angy zen̈y raha natao handoky ndreky han̈ano asa antran̈o fo, fa tsaiky lelahy ndraiky natao hitompoeny mamany ndreky iry anabaviny. Ampianarin̈y iro tsaiky lelahy aby io rango mbala hely fa iro ‘panjaka an̈atiny tran̈o’ io.” Karaha ty koa nambarany ranabavy araiky hafa, mipetraka an Asie an̈y: “Misy fomba fivolan̈ana zay aminay atỳ mivolan̈a fa man̈angy zen̈y tsy voatery mahay raha ndreky marangitry be. Anjarany man̈angy ho iro, man̈ano asa jiaby an̈atiny tran̈o. Avio izy tsy mahazo man̈aboaka hevitrinany amy vadiny.” Tsisy fitiavan̈a foeky olo manan̈a toetsain̈y karaha zen̈y, salakady man̈ano raha mifanohitry amy toro lalan̈any Baiboly. Izikoa karaha zen̈y toetsain̈iny lelahy manambady, hijaly edy vadiny. Izy tsy vitany tsy mangala tahaka Jesosy, fa raha ataony io koa tsy mamparavoravo Jehovah.​—Efes. 5:28, 29; 1 Pet. 3:7.

6. Man̈angy manambady koa tiho tsara fihavanan̈a amy Jehovah, ino raha mila ataony?

⁶ Efa hitantsika tamy lahatsoratra talohany araiky ty, fa lelahy tokony han̈ampy iro hihavan̈a tsara amy Jehovah ndreky hitsinjo fihetsehampondro. Izy koa tokony hamelon̈o fianakavian̈anany. Zen̈y raha takìny Jehovah amy lohany fianakavian̈a. (1 Tim. 5:8) Ndray izy man̈ano zen̈y, man̈angy manambady koa mba mila manokan̈a fotoan̈a hamakian̈a Baiboly ndreky hisaintsain̈ana izio, isanandra. Mila mivavaka amy Jehovah amy fô jiaby koa izy. Mety tsy ho mora raha zen̈y, fotony izy maro asa. Ke izy mety hieritreritry fa izy tsisy fotoan̈a na angovo han̈anaovan̈a zen̈y. Kanefa nan̈ino ma izy ten̈a mila man̈ano zen̈y? Fotony tiany Jehovah hifandray tsara aminany fo atsika tsiaraikiaraiky.​—Asa. 17:27.

7. Ino raha tokony hataony man̈angy baka ho moramora aminany han̈eky vadiny?

⁷ Tsy mandeha ho azy amy man̈angy man̈eky fahifan̈any vadiny zen̈y, fotony vadiny io tsy lavorary. Kanefa ho moramora aminany han̈eky ndreky han̈aja vadiny, izikoa mazava aminany ndreky ikeny fa zen̈y raha tiany Jehovah hataony man̈angy manambady.

8. Eraka raha koran̈iny Efesianina 5:22-24, ino mahavy man̈angy kristianin̈y mifidy han̈eky fahifan̈any vadiny?

⁸ Ino marin̈y ma mahavy man̈angy kristianin̈y mifidy han̈eky fahifan̈any vadindro? Fotony zen̈y raha takìny Jehovah amindro. (Vakia Efesianina 5:22-24.) Iro matoky Jehovah, Babandro andan̈itry an̈y io. Haindro fa Jehovah tia iro, ke izy tsy mety han̈iraka iro han̈ano raha tsy mahatsara iro foeky.​—Deot. 6:24; 1 Jaona 5:3.

9. Ino vokany izikoa ranabavy araiky man̈eky fahifan̈any vadiny?

 ⁹ Maro olo amy donia ty mihevitry fa fitsipikiny Jehovah mikasiky fan̈ajan̈a fahifan̈any lohany fianakavian̈a io tsy man̈isy fotiny man̈angy, ke tsy tokony arehan̈a. Zen̈y tsy marin̈y! Zan̈ahary io fitiavan̈a, ke izikoa iro nahay izy, iro tsy mety hieritreritry karaha zen̈y. Man̈angy zen̈y farandraha valera amy Jehovah eky fotony iro io zanany. Ke izy tsy mety han̈ano raha han̈ambany iro. Izikoa ranabavy araiky mifen̈y man̈ano raha an̈irahany Jehovah izy, ke man̈eky fahifan̈any vadiny, hilamin̈y edy vadian̈anany. (Sal. 119:165) Hahita hatsaran̈a aby iro jiaby tran̈o araiky.

10. Ino raha ianarantsika baka amy raha nivolan̈iny Carol?

¹⁰ Jehovah nan̈amia fahifan̈a lelahy manambady. Marin̈y fa tsy lavorary lohany fianakavian̈a, fa man̈angy koa man̈eky fahifan̈any vadiny, ho hita fa izy ten̈a tia ndreky man̈aja Jehovah. Ho Carol, ranabavy an Ameriky Atsimo: “Mety han̈ano hadisovan̈a vadiko, kanefa miankiny amy raha hataoko amy fotoan̈anizen̈y hahitan̈a izikoa ten̈a raha maventy aminaka marin̈y fihavan̈ako amy Jehovah. Ke mifen̈y fo zaho han̈eky fahifan̈any vadiko, amy zay Babako andan̈itry an̈y ho ravoravo aminaka.”

11. Ino raha nan̈ampy Ranabavy Aneese han̈ambela hadisovan̈a? Ino raha ianaranao baka amy raha nivolan̈iny?

¹¹ Mety tsy ho mora amy man̈angy han̈eky fahifan̈any vadiny, izikoa izy mahatsapa fa tsy mijery fihetsehamponany na tsy man̈ahoa raha mampiasaloha izy vadiny io. Karaha ty ho Ranabavy Aneese: “Vadiko koa fa man̈ano raha tsy tiako, mifen̈y zaho mangala tahaka Jehovah ke man̈ambela hadisovan̈any vadiko ndreky tsy hitana heloko ampô. Alaiko onon̈o fa mety han̈ano diso aby atsika jiaby. Milamin̈y oe jerinaka, zaho koa fa man̈ano zen̈y.” (Sal. 86:5) Ho moramora amy man̈angy han̈eky fahifan̈any vadiny, izikoa izy man̈ambela hadisovan̈any vadiny.

12. Ino ma raha mampiavaka olo sasany koran̈iny Baiboly ao?

¹² Misy olo mihevitry fa tsy manan̈a ny maha izy izy olo araiky man̈aja fahifan̈a. Tsy honohono ho marin̈y foeky zen̈y. Maro olo koran̈iny Baiboly fa nan̈aja fahifan̈a, kanefa iro farandraha nisy korazy eky! An̈isanizen̈y Jesosy, Abigaila,  baka io i Maria. Ino aby raha mety ianarantsika baka amindro io?

13. Ino mahavy Jesosy man̈aja fahifan̈any Jehovah? Hazavà.

¹³ Jesosy man̈aja fahifan̈any Jehovah, fa zen̈y tsy mivolan̈a fa izy dindery na tsisy raha hay. Farandraha marangitry eky izy sady mahay raha koa. Ahitan̈a zen̈y iziô taminizy nampianatra. Tsotra sady mazava fampianaran̈anany. (Jaona 7:45, 46) Hainy Jehovah fahaizan̈any Zanany io, ke nambelany niaraka niasa taminazy i Jesosy taminizy namôron̈o raha jiaby. (Ohab. 8:30; Heb. 1:2-4) Tafarany Jesosy natsangana tamy maty, namezany Jehovah izy “fahifan̈a jiaby andan̈itry an̈y ndreky ambony tany eto.” (Mat. 28:18) Kanefa man̈aja fahifan̈any Jehovah fo izy sady mitady taridalan̈anany, fotony tiany mare Babany io.​—Jaona 14:31.

14. Ino raha ianarany lelahy manambady: a) Baka amy fomba fiheverany Jehovah man̈angy? b) Baka aminy Ohabolana 31?

¹⁴ Ino raha ianarany lelahy manambady baka amy zen̈y? Marin̈y fa Jehovah man̈iraka man̈angy han̈aja vady. Kanefa zen̈y tsy mivolan̈a fa amy Jehovah, man̈angy zen̈y olo ambany. Ohatra iziô izy koa fa nifidy olo hiaraka hanjaka amy Jesosy, tsy lelahy fo olo nifidiny fa mboàny man̈angy koa. (Gal. 3:26-29) Namezany Jehovah fahifan̈a i Jesosy fotony natokisany. Karaha zen̈y koa, misy jery lelahy manambady izikoa mangala tahaka Jehovah, ke man̈amia fahifan̈a vadindro han̈ano raha sasany. Koran̈iny Baiboly fa an̈isany raha mety ankin̈iny amy viavy iziô, man̈aramaso asa antran̈o ô, mividy tany ndreky mandafo tany e, na man̈ano resaka varotro. (Vakia Ohabolana 31:15, 16, 18.) Manan̈a zò hivolan̈a hevitrinany koa izy, fotony izy tsy andevo. Sady karaha ty baka! Akory ma hahavy lelahy hatoky vadiny izikoa izy tsy mitandren̈y hevitriny vadiny? (Vakia Ohabolana 31:11, 26, 27.) Izikoa lelahy man̈aja vadiny karaha zen̈y, ho ravoravo man̈angy io han̈eky fahifan̈anany.

15. Ino raha ianarany man̈angy manambady baka amy Jesosy?

¹⁵ Ino raha ianarany man̈angy manambady baka amy zen̈y? Maro raha tsara vitany Jesosy, fa izy tsiary nieritreritry fa man̈ambany izy man̈eky fahifan̈any Jehovah. (1 Kor. 15:28; Fil. 2:5, 6) Karaha zen̈y koa, mety marangitry mare man̈angy araiky, fa izy tsy mieritreritry foeky fa man̈ambany izy man̈eky fahifan̈any vadiny zen̈y. Mangala tahaka Jesosy izy, izikoa man̈ano zen̈y. Man̈aja vadiny izy fotony vadiny io tiany, avio ny raha ten̈a maventy, tiany sady hajainy i Jehovah.

16. Koa zahan̈a 1 Samoela 25:3, 23-28, ino raha sarotro niain̈any Abigaila? (Zahava sary amy fon̈ony gazety ty.)

¹⁶ Abigaila. Nabala an̈aran̈any vadiny Abigaila. Nabala io lelahy tia ten̈a, niavonkavon̈o ndreky tsy nahay nankasitraka. Tandraraiky, Davida ndreky maramilanany efa tseky hamono Nabala. Ino raha nataony Abigaila izikoa fa ren̈iny raha zen̈y? Izy ma nangin̈y fo, niambin̈y iro hamono vadiny io? Nararaotiny ma raha zen̈y baka izy tsy ho ambany fahifan̈any vadiny eky? Aha! Nitady hevitry fo izy hiarovan̈a Nabala ndreky fianakavian̈anany. Tsy mora taminy Abigaila nan̈ano zen̈y, fotony izy tsy maintsy nan̈aton̈o maramila 400 lahy nitondra raha fiadivan̈a. Nazavainy tampan̈ajan̈a tamy Davida ino problemo, avio niala tsin̈y tamy Davida izy ndray tsy baka taminany hadisovan̈a io. (Vakia 1 Samoela 25:3, 23-28.) Tontohitry i Davida fa nampiasa man̈angy misy korazy io Jehovah han̈amezan̈a torohevitry izy, ndreky hisakanan̈a izy tsy han̈ano hadisovan̈a maventy.

17. Ino raha ianarany lelahy manambady baka amy Davida ndreky Abigaila?

¹⁷ Ino raha ianarany lelahy manambady baka amy zen̈y? Ten̈a man̈angy misain̈y i Abigaila. Nakiry Davida nitandren̈y torohevitrinany, ke  maro olo tsy manantsin̈y avotro. Karaha zen̈y koa, alohany lelahy manambady han̈ano fanapakevitry maventy, tokony han̈ontany hevitriny vadiny antsendriky izy, baka io handiniky tsara. Mety hisakana izy tsy han̈ano fanapahankevitry ratsy raha zen̈y.

18. Ino raha ianarany man̈angy manambady baka aminy Abigaila?

¹⁸ Ino raha ianarany man̈angy manambady baka amy zen̈y? Izikoa man̈angy araiky tia Jehovah sady man̈aja izy, hahazo hatsaran̈a edy iro tran̈o araiky, nata ramosenany io tsy manompo Jehovah, na vadiny io Vavolombelon̈o Jehovah fa malemy arapan̈ahy fo. Tsy hizaha hevitry hisarahan̈a ranabavy io, fa han̈aja vadiny ndreky han̈eky izy fo. Mety hahavy ramosenany hianatra raha momba Jehovah raha zen̈y. (1 Pet. 3:1, 2) Ary ndray tsy ahoany vadiny foeky raha tsara jiaby ataony ranabavy io, tsy mivadiky foeky izy. Hainy fa hitany Jehovah raha zen̈y sady mamparavoravo izy koa.

19. Lera karakory ma man̈angy manambady tsy tokony han̈araka volan̈any vadiny?

¹⁹ Marin̈y fa man̈angy mila man̈eky fahifan̈any vadiny, kanefa vadiny io koa man̈iraka izy handika lalàn̈a na toro lalan̈any Baiboly, izy tsy tokony han̈eky foeky. Akory iziô, izikoa misy ranabavy manambady olo tsy manompo Jehovah, ke irahiny ramosenany io havandy izy, na hangalatra, na han̈ano raha hafa tsy fan̈araka amy Jehovah? Ranabavy io tsy han̈ano zen̈y foeky, fotony izy panompony Jehovah, ke tsy maintsy i Jehovah antsendriky arehany volan̈a voanalohany. Mila hazavainy amy vadiny antony tsy han̈anaovany izio, kanefa mila mentitry ndreky tsara fan̈ahy fo izy izikoa fa man̈ano zen̈y.​—Asa. 5:29.

20. Akory ahaizantsika fa ten̈a tsara fihavanan̈a tamy Jehovah i Maria?

²⁰ Maria. Tsara fifandraisan̈a tamy Jehovah mare izy sady ten̈a nahay Soratra Masin̈y. Akory ahaizantsika zen̈y? Maria koa fa nikoran̈a taminy Elizabeta, reniny Jaona Pan̈ano Batisa, mandilatrany in-20 izy nanon̈ono volan̈a baka tamy Soratra Hebreo. (Lioka 1:46-55) Tsy zen̈y fo. Efa fianseny Josefa izy tamy zen̈y, kanefa tsy Josefa nikoran̈any anjely io voanalohany fa i Maria. Nambarany anjely io taminany fa hiteraka Zanaka Zan̈ahary izy. (Lioka 1:26-33) Hainy Jehovah tsarabe i Maria, ke Jehovah natoky  fa ho tia ndreky hikarakara Zanany io izy. Mbala tsara fihavanan̈a tamy Jehovah fo i Maria, ndray efa naty i Jesosy sady efa nanonga tandan̈itry.​—Asa. 1:14.

21. Ino raha ianarany lelahy manambady baka amy Maria?

²¹ Ino raha ianarany lelahy manambady baka amy zen̈y? Misy jery lelahy araiky izikoa izy ravoravo mahita vadiny mahay Soratra Masin̈y mare. Tsy tokony havozo foeky izy tsao man̈angy io manjary tiho lohany fianakavian̈a. Izy koa tsy tokony hahatsapa ten̈a ho tsy mahay, ke tsy hatoky ten̈a. Ny raha tokony hidinihiny, hahavita han̈ampy fianakavian̈anany vadiny io izikoa mahay Soratra Masin̈y tsarabe sady mahay toro lalan̈a an̈atinizio ao. Ary ndray man̈angy io nahita fianaran̈a mandilatra vadiny, mbala lelahy fo manan̈a andraikitry hitariky fianakavian̈anany amy fanompoan̈a Jehovah, karaha ataony mitariky fotoampivavahan̈any fianakavian̈a.​—Efes. 6:4.

22. Ino raha ianarany man̈angy manambady baka amy raha nataony Maria in̈y?

²² Ino raha ianarany man̈angy manambady baka amy zen̈y? Mila ikeny man̈angy fa anjarany lelahy mitariky amy fanompoan̈a Jehovah. Ndray izy man̈ano zen̈y, andraikitrinany tompiny man̈ano raha hampafatatra finoan̈anany. (Gal. 6:5) Dikanizen̈y, izy mila manokan̈a fotoan̈a hianaran̈a manokan̈a ndreky hisaintsain̈ana. Ho tia ndreky han̈aja Jehovah fo izy izikoa man̈ano zen̈y, sady ho ravoravo han̈aja fahifan̈any vadiny.

23. Ino vokany izikoa man̈angy man̈aja fahifan̈any vadiny?

²³ Tia Jehovah ankitin̈y viavy manambady, izikoa man̈aja fahifan̈any vadiny fo. Ino vokatranizen̈y aminany? Ravoravo ndreky afapô mare izy, fa tsy karaha iro viavy tsy man̈aja fahifan̈a napetrakany Jehovah aby io. Modely arehany tanora koa izy sady man̈ampy fianakavian̈anany ndreky fiangonan̈a hifankatia ndreky hihavan̈a tsarabe. (Tit. 2:3-5) Amy zioty, presky man̈angy aby ankamarozany panompony Jehovah tsy mivadiky. (Sal. 68:11) Fa ndray zen̈y, samby afaka man̈ampy fiangonan̈a hahita haravoan̈a aby atsika jiaby, na lelahy zen̈y na man̈angy. Akory han̈anaovantsika zen̈y? Zen̈y raha hikoran̈iny lahatsoratra man̈araka.