Tafarany 1920 papako ndreky mamako nahita fahamarin̈ana. Iro tamy zen̈y mbala tsy fivadiany. Zaho teraka taminy 1939. Efa tan Angletera teto edy tany nipitrahanay tamy zaho mbala hely. Niaraka tamindro fo zaho iro koa fa nandeha nivory; nan̈ano anjara tamy Sekolin’ny Fanompoana koa zaho tafara tatỳ. Tiako raha zen̈y! Azoko onon̈o zaho somilany nan̈ano anjara, nampitsanganindro tan̈abony karton zay zaho baka tsy takotrony lampihazo. Poainta hely zaho tamy zen̈y, sady mbala tsiota taon̈o fo. Navozo mare zaho, fotony olobe aby pan̈atriky jiaby!

Nan̈amboarany papako karty hely findesin̈y mitory zaho izikoa fa nitory. Hevitry mora fo tan̈atinizio tao. Valo taon̈o zaho, tamy zaho sambany nitory manokan̈a. Ravoravo mare zaho izikoa fa nivakianolo nitoriako karty hely in̈y, sady direkty nangala boky “Aoka Andriamanitra no ho Fantatra fa Marina” in̈y olo io. Nilomoay angovo jiaby zaho nandeha nitantara zen̈y tamy papako. Farandraha tiako eky nandeha nanompo ndreky nandeha nivory, ke zen̈y nahavy zaho tihanjary panompo manontolo andra.

Nan̈anaovany papako abonnement-ny Tilikambo Fiambesan̈a koa zaho, ke nahaitiako fo fahamarin̈ana. Nazoto mare zaho namaky gazety aby io koa fa navy. Nanjary nahainatoky Jehovah fo zaho, ke zaho nanokanten̈a taminany.

Nan̈aton̈o fivoriambe Fitomboan’ny Asan’Andriamanitra, ta New York, zahay tran̈o araiky taminy 1950. “Andron’ny Misionera” fotokevitriny andra tamy kamisy 3 Aoty. Rahalahy Carey Barber nan̈ano kabarony batisa taminio. Nanjary an̈isany Filankevipitantan̈ana izy tafara tatỳ. Izikoa fa ho vita kabaronany, nisy fan̈ontanian̈a aroe napetrany taminolo hatao batisa aby tao, an̈isanizen̈y zaho. Nitsangana zaho namaly karaha ty: “Ia!” Mbala vo 11 taon̈o fo zaho tamy zen̈y, kanefa efa  haiko fa maventy ankitin̈y fanapahankevitry nataoko in̈y. Navozo mare zaho izikoa fa handeha hivarin̈y andrano fotony zaho tsy nahay nilomaon̈o. Ke niaraka taminaka tan̈atiny pisìny tao i papa, sady nan̈amia toky zaho karaha ty: “Korazy fa io tsy man̈ino!” Nisy rahalahy araiky nan̈adeky zaho tan̈aty rano, baka io amy zay nisy rahalahy araiky hafa koa nan̈aboaka zaho baka tan̈atiny pisìny tao. Betibetiky fo efa vita edy! Nata vitinaka tsy nikasiky tamy rapakany pisìny foeky. Komansy taminy andra maventibe io, nataony Jehovah nandeha mahitsy fo fiain̈ananaka.

Tihan̈ano pisava lalan̈a zaho izikoa fa nafaka BAC, fa nampirisihiny papianatranay mare ndraiky zaho hanohy fianaran̈a ambony. Ke zaho nandeha nianatra taminy iniversite. Tsy elany nianarako tan̈y, hitako fa tsy ho vitako hidôko amy fahamarin̈ana sady hifantoko amy fianaran̈a. Ke zaho tapakevitry hiala hianatra taminy iniversite. Nikoran̈iko tamy Jehovah raha io, baka io zaho nanoratra taratasy fialàn̈a. Taon̈o voanalohany nianarako taminy iniversite taminio, fa koa fa tapitry taompianaran̈a, zaho niala. Natoky Jehovah mare zaho, ke zaho direkty nan̈ano pisava lalan̈a.

Tamy Zie 1957 zaho komansy nan̈ano fanompoan̈a manontolo andra, ta Wellingborough. Nan̈ontany iro rahalahy tamy Betelany Londres zaho, tsao mba mety izikoa pisava lalan̈a efa zadraharaha ataondro fanamako. Ke i Rahalahy Bert Vaisey nampiarahindro taminaka. Farandraha nazoto nitory eky rahalahy io! Maro mare raha nianarako taminany. Ohatra iziô, nampiany zaho hahay handamin̈y fotoan̈anaka, baka zaho hahavita hitory tsarabe. Nisy ranabavy tsiota efa samby natoe fiangonan̈a araiky taminay tao, ankoatrany zahay roe lahy. Noman̈iko aby fivorian̈a jiaby, sady nandray anjara fo koa zaho, ke raha zen̈y nahavy zaho nanan̈a finoan̈a matanjaka ndreky nahainatoky Jehovah fo.

Nigadrain̈a zaho fotony tsy nan̈eky han̈ano maramila. Fa tsy nahadin̈y ela aby! Nitraotro tamy Barbara zaho tafaranizen̈y. Pisava lalan̈a manokan̈a izy. Nan̈ano mariazy zahay taminy 1959. Von̈ono zahay handeha amy tany jiaby anendren̈a zahay. Ta Lancashire, amy faritry avaratra andrefany Angletera, fanendren̈a nazonay voanalohany. Navoakaiky han̈ano Sekolin’ny Fanompoana Ilay Fanjakana zaho, tamy Zanvie 1961. Tamy Betelany Londres tan̈y nan̈anaovan̈a izio, tan̈atiny fanjava araiky. Tsy nampoiziko foeky fa navoatendry hanjary piandraikitry faritry zaho izikoa fa vita sekoly io. Nisy piandraikitry faritry efa zadraharaha zay nampiofan̈a zaho, ta Birmingham. Antsasaka fanjava zaho niofan̈a. Nimboan̈a niaraka taminaka i Barbara taminio. Izikoa fa vita fiofan̈ananay io, navoatendry ta Lancashire ndreky ta Cheshire tan̈y ndraiky zahay.

Nahazo taratasy baka tamy birôny sampan̈a zahay tan̈atiny zahay nan̈ano vakansy, taminy Aoty 1962. Ainvitasion han̈ano Sekolin’i Gileada izio! Nahadin̈y folo fanjava sekoly ara-baiboly io tamy zen̈y. Nivavaka momba izio zahay roeny Barbara, baka io nivalianay taratasy io. Nalaifanay nalaky tamy birôny sampan̈a izio baka tiô, fotony zen̈y raha nirahindro. Nafaka dimy fanjava, zahay nandeha ta Brooklyn, a New York, nan̈aton̈o Sekolin’i Gileada kilasy faha-38.

 Zahay tan̈y tsy vitany nianatra momba Volan̈a Zan̈ahary ndreky fandaminan̈a fo fa momba tsy fivadihan̈any piaramanompo erantany koa. Nianatra raha maro taminolo niaraka nianatra taminay koa zahay. Zaho tamy zen̈y 24 taon̈o, fa i Barbara ndraiky 23 taon̈o. An̈isany papianatranay tan̈y i Rahalahy Fred Rusk. Navoatendry niaraka niasa taminany zaho isanandra, ke ravoravo mare zaho. An̈isany raha nampianariny zaho, tokony hiôrin̈y amy Soratra Masin̈y fo lan̈iany torohevitry amezantsika olo. Nisy rahalahy efa ten̈a zadraharaha maromaro koa navy, nan̈ano kabaro, tamy zahay nan̈ano sekoly io. An̈isanizen̈y Rahalahy Nathan Knorr, Frederick Franz, ndreky Karl Klein. Maro koa raha nianaranay tamy Rahalahy Macmillan. Zay rahalahy nanetry ten̈a ay! Nampianariny zahay taminizy nan̈ano kabaro fa nitaridalan̈a vahoakanany fo i Jehovah, izikoa fa nisy fitsapan̈a komansy taminy 1914 firaka tamy fanomboany 1919.

Izikoa fa narikitry ho vita fianaran̈anay, nivolan̈a taminay roeny Barbara i Rahalahy Knorr fa zahay voatendry handeha a Burundi, an Afriky. Koa fa vita koran̈anay, lôso zahay roeny Barabara nandeha tamy bibliôtekiny Betela, nizaha Diary misy kontiny pitory ta Burundi. Lany fan̈ahy zahay fotony tsisy Diary misy kontiny pitory ta Burundi foeky tao. Kaiky zahay io navoatendry amy tany mbala tsisy pitory! Tamy zen̈y koa, tsisy raha hainay momba Afriky foeky. Ke niasaloha mare zahay. Fa ny raha nan̈ampy zahay tsy ho taitaitry, zahay nivavaka mare tamy Jehovah.

Vaovao taminay aby raha jiaby hitanay ta Burundi. Na toetrandra zen̈y, na fombanolo, na fivolan̈ana. Ohatra iziô, zahay tsy maintsy nianatra teny fransay. Sarotro mare koa nitady tran̈o ipitrahan̈a. Kanefa andra aroe tafarany navianay tan̈y, namangy zahay i Harry Arnott, rahalahy niaraka nianatra taminay ta Gileada tan̈y. Handeha himpody a Zambie izy tamy zen̈y. Tan̈y tany nanendren̈a izy. Nitahitahiany zahay nitady tran̈o, ke zahay nahita. Tran̈o nipitrahanay io tran̈ony misionera voanalohany. Tsy nahay raha momba Vavolombelon̈o Jehovah foeky manampahifan̈a tan̈y tamy zen̈y. Ke tsy elany navianay tan̈y, nanjary nisy problemo tamindro zahay. Tsy mahazo midôko a Burundi zahay ho iro, izikoa tsy mahazo taratasy baka amy fanjakan̈a man̈amia lalan̈a zahay hiasa ao. Nampahinakinaka fa tsy maintsy niala ta Burundi zahay. Nifindra ta Ogandà zahay, ke maintsy nizatra fiain̈ana vaovao ndraiky koa.

Navozo mare zahay izikoa fa handeha ta Ogandà fotony zahay tsisy vizà. Fa zahay ndraiky natoky  Jehovah fo, ke mba kirikiry hely asalohanay. Nisy rahalahy kanadiain zay nan̈itatra ta Ogandà, ke izy nan̈azava antondianay tamindro manampahifan̈a aby tan̈y. Nahazo lalan̈a hidôko tan̈y fanjava vitsivitsy zahay, parpazahoanay lalan̈a hipetraka tan̈y. Hitanay tamy raha nandalo in̈y fa nan̈ampy zahay mare i Jehovah.

Tsy nitovy foeky Burundi ndreky Ogandà, fotony efa nisy pitory 28 ta Ogandà. Nahita olo maro niteny angiley zahay tamy faritaninay tan̈y, kanefa tontohitry koa zahay fa maro volan̈a ampiasainolo a Ogandà. Ke zahay nanapakevitry hianatra volan̈a ampiasainolo, na araiky fo farany hely, amy zen̈y zahay hahavita han̈ampy olo lian̈a, handroso. Ta Kampala zahay nanomboko nitory, ke zahay nianatra niteny Luganda fotony zen̈y volan̈anolo tao. Efa maromaro taon̈o zahay vo nahavita niteny Luganda tsarabe. Nan̈ampy zahay hahita vokatra mare raha zen̈y. Nanjary nahainazava taminay raha nilainy pianatra Baiboly. Izikoa fa hitandro fa ten̈a tihan̈ampy iro mare zahay, nikoran̈indro taminay aby raha jiaby tan̈aty fondro. Nivolan̈indro taminay koa karakory fahitandro fianaran̈a Baiboly io.

Manetry ten̈a mare olo ta Ogandà sady ten̈a tia fahamarin̈ana, ke ravoravo mare zahay nanompo tan̈y. Nahairavoravo fo zahay zaho koa fa navoatendry hanjary piandraikitry faritry man̈eran̈a Ogandà. Tsy nampoizinay foeky raha zen̈y! Nirahiny birôny sampan̈any Kenya zahay, hizaha aia aby faritry mbala ten̈a mila pisava lalan̈a manokan̈a ndreky hitady tran̈o mety tsarabe hipitrahandro. Farandraha tia mandray vahiny eky olo an̈y, ary matetiky raha zen̈y hitanay. Nisy tamindro aby nandoky hanin̈y hoaninay foeky! Kanefa mbala vo sambany taminio iro nahita Vavolombelon̈o Jehovah.

Nan̈ano dia hafa koa zahay tafaranizen̈y. Niala ta Kampala zaho, baka io nandeha train tan̈atiny andra roe nandeha ta Mombasa. An̈y tany misy paorony Kenya. Tao zaho niondran̈a sambo, nandeha ta Seychelles; izio fitambarany nosy maromaro aminy Océan Indien an̈y. Natetiky nandeha ta Seychelles zaho tafaranizen̈y, komansy taminy 1965 firaka taminy 1972. Dia araiky fo zahay roeny Barbara. Aroe fo pitory tan̈y tamy zen̈y, fa izikoa fa nandeha fotoan̈a, nanjary nisy antokopitory tan̈y, baka io izio nanjary fiangonan̈a nandroso mare. Tafaranizen̈y, zahay nandeha nitsidiky piaramanompo ta Érythrée, ta Éthiopie, ndreky ta Soudan.

Nisy fandronganan̈a fanjakan̈a ta Ogandà tamy zen̈y, ke tampotampoko tio nikorontan̈a ambony ambany resaka pôlitìky. Nampavozo mare fiain̈ana tan̈y tan̈atiny taon̈o taon̈o. Hitako tamy zen̈y fa ten̈a tsara ankitin̈y man̈araka torohevitriny Baiboly ty: “Ifà amy Kaisara lan̈iany raha niny Kaisara.” (Mar. 12:17) Nisy fotoan̈a iziô lan̈iany olo teratany vahiny jiaby, nirahin̈y nisoratra an̈aran̈a tamy birôny polisy marikitry izy. Niaraka zahay naharen̈y izin̈y, zahay efa nan̈ano edy. Ino raha nisy andra vitsivitsy tafaranizen̈y? Niaraka tamy misionera araiky zay zaho tamy zen̈y. Nandeha tomobily ta Kampala tao zahay, ke nisy polisy nanakan̈a zahay. Fombo mare zahay roe lahy! Nan̈odiandro ho pitsikilo zen̈y zahay, ke nandesindro tamy paostiny polisy tan̈y. Zahay koa fa navy tan̈y, nazavainay tamindro fa zahay io misionera fa tsy pitsikilo zen̈y, ary zahay tsy mieritreritry han̈akorontan̈a zen̈y foeky. Karaha ty koa ho zahay tamindro: “Sady zahay efa nisoratra an̈aran̈a tamy polisy!” Fa raha zen̈y tsy nahoandro. Nandesindro tamy birôny polisy narikitry tran̈ony misionera koa zahay tafaranizen̈y, sady nisy gardy nilanja basy niambin̈y zahay. Nahivankivan̈a zahay izikoa fa navy tao fotony olo tomponandraikitry tao nahazo onon̈o fa zahay efa nisoratra an̈aran̈a. Niaraka zahay hitany in̈y efa hainy edy, ke nirahiny nivotsaoran̈a direkty zahay!

 Navozo mare zahay isaka nandalo ta bazary, intsaka eky izikoa fa namo iro maramila aby tao. Nivavaka fo zahay izikoa fa tojy raha karaha zen̈y, ke nanjary tsy taitaitry foeky zahay. Namezandro maramila aby io lalan̈a koa zahay. Nampalahelo fa nirahin̈y niala ta Ogandà aby misionera jiaby tan̈y, taminy 1973.

Navoatendry ta Côte d’Ivoire, an Afriky Andrefa zahay tafaranizen̈y. Ke tsy maintsy nizatra fiain̈ana vaovao ndraiky zahay: Nianatra kolontsain̈y vaovao, avio zahay tsy maintsy niteny fransay koa! Tsy vitanizen̈y fo fa nizatra niaraka niain̈y tamy misionera baka amy kolontsain̈y samby isany koa zahay. Jehovah ndraiky tsiary niala zahay foeky, teky koa. Nahita olo manan̈a toepô tsara sady manetry ten̈a zahay tamy faritaninay tao. Ke iro direkty nandray tsara, zahay koa fa nitory fahamarin̈ana tamindro. Hitanay roe fivadiany fa nataony Jehovah nandeha nahitsy fo fiain̈ananay, fotony zahay natoky izy.

Tio fo hita fa avoany kansera i Barbara. Tampoko nahaizanay raha zen̈y! Natetiky zahay nody tan Eropy nitaha izy. Kanefa taminy 1983, hitanay fa tsy ho afaka hanohy hanompo an Afriky eky zahay. Ke diso fan̈antinan̈a mare zahay!

Tamy Betelany Londres tato fo zahay nanompo tafaranizen̈y. Kanefa nahainiaho fo aretin̈iny Barbara, ke namono izy foeky aretin̈y io tamy farany. Nankahery zaho mare fianakavian̈any Betela tamy zen̈y. Nisy fivadiany araiky zay ten̈a nan̈ampy zaho hahadin̈y ndreky han̈eky fivoan̈a maventy nandalo taminaka io sady nan̈ampy zaho hatoky Jehovah fo. Nitraotro tamy ranabavy piasa antsitrapo tamy Betela tato zaho tafara tatỳ. Farandraha tia Jehovah eky ranabavy io, sady efa pisava lalan̈a manokan̈a koa izy taloha. Ann an̈aran̈anazy. Nan̈ano mariazy zahay taminy 1989. Nanompo tamy Betelany Londres tato fo zahay komansy tamy zen̈y.

Nahazo tombontsoa maventy zaho komansy taminy 1995 firaka 2018, fotony zaho nanjary solonten̈any foibe. (Piandraikitry pitety sampan̈a nivolan̈ana andraikitry zen̈y taloha.) Tamy zen̈y, efa ho 60 firenena nitsidihiko. Hitako tamy tany tsiaraikiaraiky nitsidihiko aby io fa mikarakara panomponany ankitin̈y Jehovah, na ino na ino raha iain̈andro.

Nimpody tan Afriky ndraiky zaho taminy 2017, namangy sampan̈a tan̈y. Nankafiziko mare niaraka taminy Ann nandeha ta Burundi! Sambany taminio izy nandeha tan̈y. Ravoravo mare zahay roe fivadiany nahita olo marobe nanjary panompony Jehovah. Hainaro ino raha misy amy faritry nitoriako tamy 1964 in̈y iziô? Betela tsara mare, mikarakara pitory mandilatra 15 500!

Ravoravo mare koa zahay koa fa nahay tany handeha hitsidihinay taminy 2018. Tan̈atiny listy io tao Abidjan, tanàna farany maventy a Côte d’Ivoire. Miran̈a nody tantanindrazan̈anaka zaho koa fa navy tan̈y. Tamy tran̈o fandraisan̈a vahiny tamy Betela tao zahay nipetraka. Zaho koa fa nizaha an̈aran̈a tamy listiny telefaony, hitako fa nipetraka tankilany sambranay tao i Sossou. Sambarako i Sossou piandraikitry tanàna * tamy zaho mbala nipetraka ta Abidjan teto izio. Kaiky izio tsy izy, fa zanany lahy!

Jehovah koa fa mampan̈anten̈a raha, io tsy maintsy tantirahiny fo. Hitako tamy raha sarotro jiaby niain̈ako fa atsika koa fa matoky izy, hataony mandeha mahitsy fiain̈anantsika. Von̈ono hanompo Jehovah fo zahay, fotony hainay fa ho tsara mare hoavy hamezany zahay.​—Ohab. 4:18.