1-2. Eraka raha koran̈iny Matio 5:11, karakory tokony ho fahitantsika raha sarotro mahazo atsika?

JESOSY nampan̈anten̈a olo pan̈aradia izy fa ho sambatra mare iro. Mahatsiaro sambatra marin̈y atsika, fotony nanjary pianatrany Kristy. Kanefa nivolan̈a koa izy fa lan̈iany olo tia izy, tsy maintsy handalo raha sarotro isankarazany. (Mat. 10:22, 23; Lioka 6:20-23) Akory, ohatra, izikoa tsy ikeny lafamìntsika atsika manompo Jehovah, na toheriny fanjakan̈a, na misy olo lekoly araiky amintsika na miaraka miasa amintsika miforse atsika han̈ano raha tsy manjary? Tsy mora! Ke normaly atsika koa miasaloha mare izikoa fa mandiniky zen̈y.

² Aminy ankapobeny, injehin̈y na toherin̈y zen̈y tsiary ndraiky namparavoravo. Kanefa Baiboly ndraiky man̈iraka atsika ho ravoravo fo nata injehin̈y. Nikoran̈a momba zen̈y i Jakoba, pianatrany Jesosy. Nivolan̈a izy fa atsika koa fa miatriky fitsapan̈a na raha sarotro, atsika tokony ho ravoravo fa tsy halemy trôko. (Jak. 1:2, 12) Jesosy koa nivolan̈a fa tokony hahatsiaro sambatra fo atsika nata injehin̈y. (Vakia Matio 5:11.) Akory fo basy hahavy atsika ho ravoravo fo nata misy problemo? Han̈ampy atsika amy zen̈y raha koran̈iny Jakoba tamy taratasy nisoratany tamindro Kristianin̈y voanalohany tan̈y. Fa alohanizen̈y, hizahavantsika antsendriky sasany amy raha sarotro navoa iro Kristianin̈y aby io.

3. Ino raha nandalo, tafara heliny Jakoba nanjary pianatrany Jesosy?

³ Tafara heliny Jakoba rahalahiny Jesosy nanjary Kristianin̈y, ninjehin̈y mare iro Kristianin̈y ta Jerosalema tan̈y. (Asa 1:14; 5:17, 18) Tafara tatỳ koa, Stefana pianatrany Jesosy koa fa nivonenolo, maro Kristianin̈y nandeha nilefa nan̈eran̈a faritriny Jodia  ndreky Samaria, ndreky firaka ta Sipra ndreky ta Antiokia tan̈y. (Asa 7:58–8:1; 11:19) Hay be fa maro raha sarotro niaretandro. Fa ndray zen̈y, nazoto nitory fo iro, ndray taia ndray taia tany ningoandro. Ke nanjary nisy fiangonan̈a marobe nifôron̈o erany Fanjakan̈a Romanin̈y jiaby. (1 Pet. 1:1) Mbala nisy problemo bebenizen̈y koa niambin̈y iro.

4. Ino aby raha tsy maintsy niaretandro Kristianin̈y voanalohany tan̈y?

⁴ Niatriky problemo isankarazany iro Kristianin̈y voanalohany aby io. Ohatra iziô, kadiriny tamy taon̈o 50, nan̈amia beko i Klaodio amperaira romanin̈y fa tsy maintsy miala a Roma ao Jiosy jiaby. Ke iro Jiosy nanjary Kristianin̈y aby io tsy maintsy niala tran̈ondro, avio nandeha nifindra tantany hafa. (Asa 18:1-3) Nanoratra koa i Paoly, kadiriny tamy taon̈o 61 tan̈y, fa maro tamindro Kristianin̈y aby io nitihitihin̈a tan̈ivonolo maro ndreky nigadrain̈a, baka io niravain̈a fanan̈anandro. (Heb. 10:32-34) Tsy zen̈y fo fa, sahiran̈a mare koa Kristianin̈y sasany fotony iro masikiny, avio sasany narary, karaha olo jiaby fo.​—Rom. 15:26; Fil. 2:25-27.

5. Ino aby fan̈ontanian̈a hivaliantsika ato?

⁵ Hainy Jakoba tsarabe raha sarotro niaretany piaramanompo taminany aby io, taminizy nanoratra taratasinany, talohany taon̈o 62. Izy taminio nirahiny Jehovah nanoratra taratasy handeha tamindro Kristianin̈y aby io, fotony tiany Jehovah ho haindro raha tokony hataondro, baka iro hahita haravoan̈a fo ndray mafy raha mahazo iro. Alô atsika handiniky taratasy nisoratiny Jakoba io, baka io hivaliantsika fan̈ontanian̈a aby ty: Ino ma haravoan̈a nisoratiny Jakoba io? Akory mety hahavy Kristianin̈y araiky tsy hanan̈a izio eky? Izikoa atsika tiho ravoravo fo na ino na ino raha mandalo, nan̈ino ma atsika mila manan̈a fahendrena, ndreky finoan̈a, avio korazy?

6. Eraka raha koran̈iny Lioka 6:22, 23, ino mahavy Kristianin̈y araiky ho ravoravo fo ndray maro problemo?

⁶ Maro olo mihevitry fa ho ravoravo fo iro izikoa salama tsara ndreky manjary pan̈arivo, baka io mihavan̈a tsara iro tran̈o araiky. Kanefa tsy zen̈y haravoan̈a nikoran̈iny Jakoba. Izio tsy miankiny amy raha mandalo amy fiain̈ana, fa vokatrany fan̈ahy masin̈iny Zan̈ahary. (Gal. 5:22) Manjary ravoravo ndreky sambatra mare Kristianin̈y araiky, izikoa fa hainy fa ankasitrahiny Jehovah ndreky Jesosy izy. (Vakia Lioka 6:22, 23; Kol. 1:10, 11) Haravoan̈antsika io miran̈a lelany môtro an̈atiny lalampo fanala in̈y. Voaro tsarabe lelany môtro io, fotony tsy azony tsiko ndreky mahalen̈y foeky. Karaha zen̈y koa, tsy mihen̈y foeky haravoan̈antsika io ndray san̈atria marary atsika na misy problemo arabola. Ravoravo fo koa atsika nata tihitihinolo, na injehiny fianakavian̈a ndreky olo hafa. Nata tadiavinolo hivonen̈a lelany môtrony haravoan̈a io, izio tsy maty foeky fa mahaimiredaka fo. Matoa misy raha mitsapa finoan̈antsika, dikanizen̈y, ten̈a pianatrany Kristy ankitin̈y atsika. (Mat. 10:22; 24:9; Jaona 15:20) Zen̈y nahavy Jakoba nanoratra karaha ty: “Rahalahiko aby, anaro koa fa tojy fitsapan̈a isankarazany, ataovanaro antony mamparavoravo anaro mare raha zen̈y.”​—Jak. 1:2.

7-8. Man̈ano akory finoan̈antsika, atsika koa fa miatriky raha sarotro?

⁷ Nikoran̈a antony hafa mahavy atsika Kristianin̈y von̈ono hiatriky fitsapan̈a koa i Jakoba. Ho izy: ‘Finoan̈anaro koa fa mandalo fitsapan̈a, izio miteraka fiaretan̈a.’ (Jak. 1:3) Problemo isankarazany mahazo atsika io mety ampiran̈iny amy môtro fampiasain̈a lera manefy vy. Baka vy tifen̈a io hahery tsarabe, iroan̈a may be antsendriky izy, avio ampanintsian̈a an̈atiny rano manintsy. Karaha zen̈y koa finoan̈antsika. Mahaifatatra fo izio, atsika koa fa miatriky problemo. Zen̈y nahavy Jakoba nanoratra karaha ty: “Ambilà fiaretan̈a io hankefa asanany, baka anaro ho lavorary sady tsy hisy tsin̈y amy lafiny jiaby.” (Jak. 1:4) Ino vokany izikoa fa mahaifatatra fo finoan̈antsika? Manjary mahatôto raha sarotro atsika salakady ravoravo fo.

⁸ Nikoran̈a antony mahavy atsika tsy hahita haravoan̈a eky i Jakoba, amy taratasy nisoratiny. Asa ino aby zen̈y, baka io akory fomba handrisiantsika iro io?

9. Nan̈ino ma atsika mila fahendrena?

⁹ Problemo: Tsy hay raha hatao. Izikoa fa misy problemo, atsika mila miangavy Jehovah baka izy han̈ampy atsika han̈ano safidy tsara. (Jer. 10:23) Nan̈ino ma? Fotony, na ino na ino safidy ataontsika, tiantsika hamparavoravo Jehovah ndreky iro piaramanompo aby io raha zen̈y, sady han̈ampy atsika tsy hivadiky. Ke mila fahendrena atsika misy ahaizantsika raha tokony hatao, ndreky raha tokony hivolan̈iny aminolo manohitry atsika. Mety ho lany hevitry ndreky  halemy trôko edy atsika, izikoa tsy haintsika raha tokony hatao. Ke betibetiky fo, mety efa tsy ho ravoravo eky atsika.

10. Koa Jakoba 1:5 zahan̈a, ino raha tsy maintsy ataontsika izikoa atsika tihahazo fahendrena?

¹⁰ Raha mila atao: Mangataka fahendrena amy Jehovah. Izikoa atsika tihahavita hiaritry ny mafy sady ho ravoravo fo, ty raha tsy maintsy hataontsika voanalohany: Mangataka fahendrena amy Jehovah, baka atsika hahay hanapakevitry. (Vakia Jakoba 1:5.) Akory ndraiky izikoa karaha tsy direkty valiany Jehovah vavakantsika? Jakoba nivolan̈a fa atsika ‘tsy tokony ho voly hangataka amy Zan̈ahary.’ Tsy ho meloko amintsika foeky i Jehovah ndray impirimpiry atsika mangataka aminany. Tsy hamezany tsin̈y koa atsika sady tsy hamezany pake. Farandraha ‘tsy matity’ eky Babantsika andan̈itry an̈y io. Ke atsika koa fa mivavaka sady mangataka fahendrena aminany, azo antoko fa hamezany fahendrena ankitin̈y atsika baka hahavita hiaritry. (Sal. 25:12, 13) Hitany problemo jiaby mavoa atsika. Mahinakinaka koa izy mahita atsika mijaly mare, ke izy von̈ono han̈ampy atsika. Mamparavoravo! Tsy zen̈y? Asa akory marin̈y fomba an̈amezany Jehovah atsika fahendrena io?

11. Izikoa tiantsika hahazo fahendrena, ino koa raha mila ataontsika?

¹¹ Mampiasa Volan̈anany i Jehovah han̈amezan̈a fahendrena atsika. (Ohab. 2:6) Dikanizen̈y, izikoa tiantsika koa hahazo fahendrena, atsika tsy maintsy mianatra Baiboly ndreky iro raha isankarazany aboakany fandaminan̈a, fotony miorin̈y amy Baiboly aby iro io. Tanjon̈ontsika koa fa mianatra iro io, tsy raha hamory fahaizan̈a fo fa, hampihatra raha nianarantsika tamy Soratra Masin̈y tao. Ty raha nisoratiny Jakoba: ‘Irarian̈a anaro mba han̈araka volan̈a, fa tsy raha hitandren̈y be fo.’ (Jak. 1:22) Hahaiho tsara fihavanan̈a aminolo fo atsika, izikoa man̈araka torohevitriny Baiboly, sady hahay handanjalanja ndreky hamindra fô. (Jak. 3:17) Izikoa atsika manan̈a toetry aby io, ho ravoravo fo atsika ndray miatriky raha sarotro.

12. Nan̈ino ma atsika ten̈a tokony hahay Baiboly?

 ¹² Volan̈any Zan̈ahary io miran̈a fitaratra. Izio man̈ampy atsika hahay ino raha tokony hahitsintsika ndreky akory atao man̈itsy izy. (Jak. 1:23-25) Ohatra, atsika koa fa baka mianatra Baiboly in̈y, mety ho tontohitry atsika fa kaiky atsika io mbala mora meloko, ke mila mianatra mifehy ten̈a. Atsika amy zay koa fa ampiany Jehovah, atsika manjary malemy toetry fo, nata misy raha mampameloko atsika. Sady atsika koa fa malemy toetry, ho moramora amintsika hiatriky zay raha manahiran̈a mandalo amintsika. Manjary mahay mandiniky tsarabe atsika ke mahaitsara fanapahankevitry ataontsika. (Jak. 3:13) Hitantsika baka amy raha jiaby zen̈y fa ten̈a ilain̈a mahay tsarabe raha koran̈iny Baiboly.

13. Nan̈ino atsika tokony handiniky tantaranolo voakoran̈a amy Baiboly ao?

¹³ Matetiky ny raha misy, efa avoa atsika vo tontohitry. Kanefa tsy voatery ho voa atsika vo hahay. Hahazo fahendrena atsika izikoa mangala fianaran̈a baka amy raha tsara ndreky hadisovan̈a nataonolo. Zen̈y nahavy Jakoba nandrisiky atsika handiniky tantaranolo amy Baiboly ao, karaha ataony Abrahama, Rahaba, Joba, ndreky Elia. (Jak. 2:21-26; 5:10, 11, 17, 18) Iro panompony Jehovah tsy nivadiky aby io niatriky problemo, kanefa iro nahavita tsy nivadiky ndreky ravoravo fo. Ino raha ianarantsika baka amy zen̈y? Hahavita tsy hivadiky koa atsika izikoa fa ampiany Jehovah.

14-15. Ino raha mety hampisalasala atsika? Nan̈ino raha zen̈y tsy tokony banjaitsika karaha io fo?

¹⁴ Problemo: Misy raha mampisalasala. Ndraikindraiky mety tsy hazava amintsika raha koran̈iny Baiboly. Na mety tsy arakarakany nantin̈aintsika fomba namaliany Jehovah vavakantsika. Raha karaha zen̈y mety hahavy atsika hisalasala. Kanefa raha zen̈y koa banjaintsika karaha io fo, mety hihen̈y finoan̈antsika avio mety ho robaka koa fihavanan̈antsika amy Jehovah. (Jak. 1:7, 8) Mety tsy hatoky raha ampan̈antin̈ainy Jehovah momba ny amaray koa atsika.

¹⁵ Nampitovisiny Paoly tamy vatofantsiky fan̈antinan̈antsika io. (Heb. 6:19) Baka amy vatofantsiky mahavy sambo araiky tsy hihetsiketsiky izikoa fa misy andra ratsy, sady misakana izy tsy hantreky amy vato. Kanefa tsisy dikany foeky vatofantsiky io izikoa mahito silisily mamehy izy amy sambo in̈y. Mahaimalemy fo koa silisily io koa fa rofesin̈y. Karaha zen̈y koa, izikoa atsika misalasala, halemy finoan̈antsika. Izikoa misy problemo mavoa olo araiky misalasala, mety tsy hino eky izy fa mbala ho tanteraka raha nampan̈antin̈ainy Jehovah. Ke atsika koa tsisy finoan̈a, ho vôsotro fan̈antinan̈a anan̈antsika. Zen̈y nahavy Jakoba nivolan̈a fa ‘olo araiky koa misalasala, izy miran̈a darobandranomasin̈y afikofikony tsiko’ in̈y. (Jak. 1:6) Hay be fa tsy ho ravoravo foeky olo karaha zen̈y!

16. Ino raha tokony hataontsika izikoa fa misy raha mampisalasala atsika?

¹⁶ Raha mila atao: Ankafatara finoan̈anao, baka anao tsy hisalasala eky. Nisalasala tamy raha ninoandro, vahoakany Jehovah taminandrany paminan̈y Elia. Ke ho Elia tamindro: ‘Zisky ombian̈a ma anaro ty hisalasala? Izikoa Jehovah ten̈a Zan̈ahary, man̈araha izy. Fa izikoa ndraiky izio i Bala, man̈araha izy.’ (1 Mpanj. 18:21) Karaha zen̈y koa avahizo. Alaiva antoko raha inoanao. Man̈anaova fikarohan̈a, baka anao ho resy lahatra fa Jehovah marin̈y ten̈a Zan̈ahary, avio Baiboly io baka aminany. Ho resy lahatra koa anao fa Vavolombelon̈o Jehovah ten̈a vahoakanany. (1 Tes. 5:21) Tsy hisalasala eky anao izikoa man̈ano zen̈y, avio hahaiho fatatra fo finoan̈anao. Mety manontany antipan̈ahy anao izikoa mila fan̈ampian̈a. Tsy maintsy man̈ano raha meky atsika izikoa tiho ravoravo fo amy fanompoan̈a Jehovah!

17. Man̈ano akory atsika izikoa fa tsisy korazy?

¹⁷ Problemo: Malemy trôko. Karaha ty koran̈iny Baiboly: “Izikoa an̈atiny fotoan̈a sarotro anao kivy, hihen̈y edy angovonao.” (Ohab. 24:10) Mety ho karaha ty koa dikany volan̈a hebreo  nadika “kivy” io: “Tsisy korazy eky.” Malaky tsy ravoravo atsika izikoa fa tsisy korazy.

18. Ino ma dikany miaritry zen̈y?

¹⁸ Raha mila atao: Mangataka korazy amy Jehovah baka hahavita hiaritry. Zen̈y raha ilaintsika atao izikoa fa miatriky raha sarotro. (Jak. 5:11) Izikoa zahan̈a volan̈a nampiasainy Jakoba amy ‘miaritry’ io, izio manondro: Olo mitsangamahitsy amy tany itsanganany. Maramila araiky misy korazy ndreky tsy mavozovozo donko raha azontsika onon̈o amy zen̈y. Tsy miala amy paostinazy foeky izy ndray manafiky marebe karakory fahavalo.

19. Ino raha ianarantsika baka aminy apostoly Paoly?

¹⁹ Tsara alaintsika tahaka i apostoly Paoly, fotony izy nisy korazy sady nahavita niaritry. Ndray taminizy nahatsiaro ho tsisy angovo foeky, izy mbala nahavita niaritry fo. Ino raha nan̈ampy izy? Hainy izy nila angovo ke nangataka angovo fan̈ampiny tamy Jehovah izy. (2 Kor. 12:8-10; Fil. 4:13) Hahazo angovo ndreky korazy karaha i Paoly koa atsika, izikoa manetry ten̈a ke man̈eky fa atsika mila fan̈ampian̈a baka amy Jehovah.​—Jak. 4:10.

20-21. Ino raha mety atokisantsika?

²⁰ Matokisa fa jaly ndreky problemo mavoa atsika io tsy sazy baka amy Zan̈ahary. Ty toky namezany Jakoba atsika: “Izikoa fa misy fitsapan̈a, aza mivolan̈a fa ‘Zan̈ahary mitsapa jery zaho fo io’, fotony Zan̈ahary tsy mety tsapain̈a amy raha ratsy, avio izy koa tsy mitsapa olo amy zen̈y foeky.” (Jak. 1:13) Izikoa atsika resy lahatra fa karaha zen̈y ankitin̈y Babantsika be fitiavan̈a andan̈itry an̈y io, mahay tihikamarady aminany fo atsika.​—Jak. 4:8.

²¹ Jehovah io “tsy miovaova.” (Jak. 1:17) Iro Kristianin̈y tamy taonjato voanalohany tan̈y koa fa niatriky raha sarotro, nampiany. Matoky koa atsika fa izy han̈ampy atsika tsiaraikiaraiky amy zioty. Iangavia mare i Jehovah han̈amia anao fahendrena ndreky finoan̈a, baka io korazy. Matokisa fa hamaly vavakanao izy sady han̈ampy anao ho ravoravo fo izikoa fa miatriky raha sarotro!