1-2. Ino raha nianarany antipan̈ahy araiky momba fan̈amezan̈a torohevitry?

TAON̈O maro lôso zay, nisy antipan̈ahy aroe namangy ranabavy araiky efa refindrefin̈y tsy nivory. Antipan̈ahy nitondra koran̈a io namaky andininteny maromaro ampirisihan̈a ranabavy io hivory. Nihevitry iro roe mirahalahy fa ten̈a nampahery izy raha zen̈y. Kanefa egy iro handeha, karaha ty ho ranabavy io: “Hitanaro ranadahy, tsy hainaro foeky raha mahazo zaho.” Iro baka tsy nan̈ohatra nan̈ontany ranabavy io ino raha mahazo izy, fa direkty iro nan̈amia torohevitry. Ke hitany ranabavy io tsy fandanja izy foeky torohevitry namezandro.

² Antipan̈ahy io koa fa mahatsiaro raha nandalo in̈y, karaha ty ho izy: “Nihevitry zaho tamy zen̈y fa tsy nankasitrahiny ranabavy in̈y torohevitry namezanay izy. Kanefa tontohitry zaho baka tiô fa, andininteny handeha hivakiako ny raha ten̈a nahasôfy zaho, fa zaho tsy tafieritreritry raha nahazo anabaviko io. Ôtrizay zaho nan̈ontany izy karaha ty: ‘Akory ma naninao ranabavy?’ ‘Ino raha mety han̈ampiako anao?’ ” Maventy leson nianarany antipan̈ahy io baka tamy raha nandalo in̈y. Ke antipan̈ahy io iziô nanjary piambin̈y ten̈a be fitiavan̈a sady tia man̈ampy olo.

3. Azovy aby mety man̈amia torohevitry olo an̈ivony fiangonan̈a?

 ³ Iro antipan̈ahy aby io manan̈a andraikitry han̈amia torohevitry olo an̈ivony fiangonan̈a, izikoa ilain̈a zen̈y, fotony iro piambin̈y ondrikondrikiny Zan̈ahary. Kanefa, tsy antipan̈ahy fo olo mety man̈amia torohevitry. Ohatra, mety hisy rahalahy na ranabavy araiky han̈amia torohevitry baka amy Soratra Masin̈y amy naman̈a araiky. (Sal. 141:5; Ohab. 25:12) Ranabavy efa mahazoazo taon̈o koa mety ‘han̈amia torohevitry ranabavy tanora’ amy raha karaha lay koran̈iny Titosy 2:3-5 ao. Mazava ho azy,  fa raimandreny koa mila man̈anatra ndreky man̈itsy zanakandro. Mivantan̈a aminy antipan̈ahy lahatsoratra ty, fa ndray izy man̈ano zen̈y, izity han̈ampy atsika jiaby hahavita han̈amia torohevitry mampahery ndreky ‘mamparavoravo fônolo.’​—Ohab. 27:9.

4. Ino aby fan̈ontanian̈a hidinihintsika ato?

⁴ Handiniky fan̈ontanian̈a efatra han̈ampy atsika hahay han̈amia torohevitry atsika amy lahatsoratra ty: 1) Ino ma ten̈a antony mahavy atsika man̈amia torohevitry? 2) Ten̈a ilainolo io ankitin̈y ma torohevitry io? 3) Azovy tokony han̈amia torohevitry io? 4) Ino raha mila ataonao baka hahômby torohevitry amezanao?

5. Ino raha tokony hataony antipan̈ahy baka ho moramora aminolo han̈eky torohevitry amezany? (1 Korintianina 13:4, 7)

⁵ Iro antipan̈ahy aby io tia piaramanompo. Hita tsara raha zen̈y lera iro man̈amia torohevitry olo tafan̈ano raha tsy mety. (Gal. 6:1) Alohany antipan̈ahy han̈amia torohevitry, tsara izy mandiniky raha sasany nambarany apostoly Paoly momba fitiavan̈a. Ho izy: ‘Fitiavan̈a io maharidraha ndreky tsara fan̈ahy, mandefitry raha jiaby, mino raha jiaby, man̈anten̈a raha jiaby, miaritry raha jiaby.’ (Vakia 1 Korintianina 13:4, 7.) Mila misaintsain̈y raha koran̈iny andininy aby io antipan̈ahy, baka ho azony antoko tsarabe fa feno fitiavan̈a torohevitry amezany olo. Ho moramora aminolo araiky han̈eky torohevitry, izikoa tsapany fa tia izy sady mitady raha mahatsara izy antipan̈ahy.​—Rom. 12:10.

6. Ino modely tsara nambelany Paoly?

⁶ Apostoly Paoly nan̈ambela modely tsara arehany antipan̈ahy. Tsy nisalasala foeky izy nan̈amia torohevitry piaramanompo ta Tesalonika, izikoa fa hitany fa nilaindro raha zen̈y. Fa ndray zen̈y, nidera iro antsendriky Paoly fotony iro nanan̈a finoan̈a, be fitiavan̈a, salakady niaritry. Nidinihiny koa raha niain̈andro, avio nikoran̈iny tamindro fa tsy mora raha andalaovandro. Iro Kristianin̈y ta Tesalonika aby io lastio niaritry fan̈injehan̈a kanefa iro tsy nivadiky. (1 Tes. 1:3; 2 Tes. 1:4) Nivolan̈a foeky izy fa iro io modely tsara arehany Kristianin̈y hafa. (1 Tes. 1:8, 9) Misaora ravoravo donko iro naharen̈y Paoly nidera iro! Hay be fa tiany Paoly mare iro rahalahiny aby io. Ke zen̈y nahavy izy nahavita nan̈amia torohevitry mety tsarabe, tamy taratasy aroe nalefany tamindro.​—1 Tes. 4:1, 3-5, 11; 2 Tes. 3:11, 12.

7. Mety ho ino antony mahavy olo sasany tsy man̈eky torohevitry?

⁷ Ino ma raha mety ho hisy izikoa tsy aminany fomba nan̈amezantsika torohevitry olo? Karaha ty ho antipan̈ahy araiky efa zadraharaha: “Matetiky antony mahavy olo sasany tsy man̈eky torohevitry, tsy raha torohevitry io tsy pare, fa tsisy hatsarampan̈ahy foeky fomba nivolan̈ana izio taminany.” Ino raha ianarantsika baka amy zen̈y? Tsy ho sarotro aminolo araiky han̈eky torohevitry, izikoa tsara fan̈ahy olo man̈amia torohevitry izy fa tsy meloko na mahinihiny.

8. Ino aby fan̈ontanian̈a tokony dinihiny antipan̈ahy, alohany izy han̈amia torohevitry?

⁸ Antipan̈ahy tsy tokony ho mekimeky han̈amia torohevitry. Alohany izy han̈amia torohevitry, izy tokony han̈ontany ten̈a karaha ty: ‘Zaho ma ten̈a mila mivolan̈a marin̈y? Ten̈a tsy mety marin̈y ma raha nataonolo io? Mifanohitry amy toro lalan̈any Baiboly ma raha ataony? Sa raha zisty tsy azoazoko fo?’ Misy jery antipan̈ahy izikoa ‘tsy mekimeky mivolan̈a.’ (Ohab. 29:20) Izikoa tsy azony antipan̈ahy io antoko valiny fan̈ontanian̈a aby zen̈y, izy mety mangala hevitry aminy antipan̈ahy hafa, misy ahitan̈a izikoa nandika toro lalan̈any Soratra  Masin̈y ankitin̈y olo io ke mila ahitsy.​—2 Tim. 3:16, 17.

9. Ino raha ianarantsika baka amy Paoly, izikoa atsika han̈amia torohevitry olo momba fisikinan̈a ndreky fisanjian̈a? (1 Timoty 2:9, 10)

⁹ Mety tsy lanilaniny antipan̈ahy araiky iziô sanjiny rahalahy na ranabavy araiky. Tsara antipan̈ahy io man̈ontany ten̈a karaha ty: ‘Nandika toro lalan̈any Baiboly ma izy, ke mila volan̈iny?’ Mila mitandrin̈y antipan̈ahy baka tsy hiforse olo han̈araka hevitrinany. Izy mety man̈ontany hevitriny antipan̈ahy hafa, na rahalahy na ranabavy matotro. Ke iro mety miaraka mandiniky torohevitriny Paoly momba fisikinan̈a ndreky fisanjian̈a. (Vakia 1 Timoty 2:9, 10.) Paoly tsy nan̈amia tsipiriany momba lamba tokony sikininy Kristianin̈y. Tsy nan̈ano listiny lamba mety ndreky tsy mety amy Kristianin̈y koa izy. Raha nivolan̈iny, mila maotin̈y ndreky milamin̈y fisikinan̈a ndreky sanjintsika. Anjarany Kristianin̈y tsiaraikiaraiky mifidy raha tiany sikinin̈y, izikoa mbala tsy mifanohitry amy raha koran̈iny Baiboly. Ke alohany antipan̈ahy han̈amia torohevitry, mila dinihiny antsendriky tsao fisikinan̈anolo io efa maotin̈y ndreky milamin̈y fa tsy mahazatra izy fo!

10. Ino raha mila alaintsika onon̈o, amy raha momba fanapahankevitrinolo tsiaraikiaraiky?

¹⁰ Tsara alaintsika onon̈o fa mety tsy hitovy safidiny rahalahy aroe samby matotro, kanefa zen̈y tsy mivolan̈a fa niny araiky mety na niny araiky diso. Ke atsika tsy tokony hiforse piaramanompo han̈ano raha iritriretintsika fa mety.​—Rom. 14:10.

11-12. Izikoa misy olo mila hamian̈a torohevitry, ino fan̈ontanian̈a tokony dinihiny antipan̈ahy mieritreritry hivolan̈a izy? Nan̈ino?

¹¹ Izikoa fa azony antipan̈ahy antoko fa mila amezan̈a torohevitry ankitin̈y olo io, ty fan̈ontanian̈a hafa tsara dinihiny: Azovy ny tokony han̈amia torohevitry olo io? Alohany antipan̈ahy han̈amia torohevitry ranabavy manambady na tsaiky araiky, izy mila mikoran̈a amy lohany fianakavian̈a antsendriky. Nan̈ino? Fotony mety izy fo baka tiany mivolan̈a vadiny na zanany! * Na koa, tiany lohany fianakavian̈a io ho iô izy, lera antipan̈ahy io han̈amia torohevitry io. Avio eraka raha nikoran̈iny  fehintsoratra faha-3 in̈y, misy fotoan̈a tsara izikoa ranabavy efa mahazoazo taon̈o man̈amia torohevitry ranabavy tanora.

¹² Ty koa fan̈ontanian̈a hafa mila dinihiny antipan̈ahy: ‘Zaho ma ny ten̈a tokony han̈amia torohevitry izy, sa ho moramora aminany han̈eky torohevitry io, izikoa olo hafa mivolan̈a izy?’ Ohatra iziô misy piaramanompo araiky miady mare fotony izy mahatsapaten̈a tsisy dikany. Misy antipan̈ahy amy zay tihan̈ampy izy. Ho moramora aminolo io han̈eky torohevitry izikoa antipan̈ahy hafa, efa nanan̈a fihetsehampô karaha zen̈y mivolan̈a izy. Mitovitovy  baka raha iadivandro, ke ho moramora aminy antipan̈ahy io hivolan̈a raha maharesy lahatra piaramanompo io. Fa ndray zen̈y, antipan̈ahy jiaby manan̈a andraikitry hampahery ndreky hampirisiky piaramanompo han̈ano fan̈ovoan̈a mifan̈araka amy raha takiany Soratra Masin̈y. Ke ndray antipan̈ahy araiky tsiary niain̈y raha mitovy amy piaramanompo io, mila vôn̈ono fo izy han̈amia torohevitry izikoa ilain̈a zen̈y.

13-14. Nan̈ino antipan̈ahy mila ten̈a mahay mitandren̈y?

¹³Mahaiza mitandren̈y. Antipan̈ahy araiky koa fa mioman̈a han̈amia torohevitry, izy tokony han̈ontany ten̈a karaha ty: ‘Haiko tsarabe ma raha iain̈any rahalahiko io? Ino raha mandalo amy fiain̈ananany? Tsao izy iziô an̈atiny problemo fa tsy haiko fo? Ino raha ten̈a ilainy amy zioty?’

¹⁴ Mandeha aminolo man̈amia torohevitry, toro lalan̈a amy Jakoba 1:19 ty: “Irarian̈a olo jiaby ho vôn̈ono hitandren̈y, tsy ho mekimeky hivolan̈a, tsy ho mora meloko.” Mety hihevitry antipan̈ahy araiky fa efa hainy aby raha jiaby nandalo, kanefa marin̈y ankitin̈y ma zen̈y? Ohabolana 18:13 mampatsiaro atsika karaha ty: ‘Lefaka sady ho voabaraka lan̈iany mamaly volan̈a mbala tsendriky ren̈iny.’ Hita baka amy zen̈y fa, tsara an̈ontanian̈a olo io antsendriky ino marin̈y raha mandalo na raha iain̈any. Ke alohany antipan̈ahy araiky hivolan̈a, izy tokony hitandren̈y tsarabe antsendriky. Aleva onon̈o baka fianaran̈a nazony antipan̈ahy nikoran̈iny fehintsoratra aroe voanalohany in̈y. Tontohitry izy fa tsy fan̈oman̈ana nataony tan̈y ny raha ten̈a tokony nampasôfy izy, fa izy tokony nan̈ontany ranabavy nivangiandro iny karaha ty: “Akory ma naninao ranabavy?” “Ino raha mety han̈ampiako anao?” Izikoa antipan̈ahy mangala fotoan̈a handinihan̈a ny ten̈a raha misy, ho moramora amindro han̈ampy ndreky hankahery piaramanompo amindro.

15. Akory mety han̈arehany antipan̈ahy toro lalan̈a aminy Ohabolana 27:23?

¹⁵Ataova raha ahaizanao iro ondrikondriky aby io. Efa hitantsika, fa man̈amia torohevitry zen̈y tsy vitany mamaky andininteny na man̈amia sosokevitry araiky na aroe fo. Izikoa tiantsika hahômby torohevitry amezantsika, mila ataontsika raha hahavy piaramanompo amintsika hahatsapa fa ten̈a tiantsika iro, azontsika raha mahazo iro, avio atsika tihan̈ampy iro. (Vakia Ohabolana 27:23.) Mila miezaka antipan̈ahy man̈ano eraka ny vitandro hinaman̈a amy piaramanompo.

16. Ino raha mila ataony antipan̈ahy baka hahômby torohevitry amezandro?

¹⁶ Tsy tiany antipan̈ahy foeky han̈ano raha hahavy piaramanompo hieritreritry fa lera iro man̈ano raha tsy mety fo antipan̈ahy vo man̈aton̈o iro. Mifanohitry amy zen̈y, iro tokony hikoran̈a matetiky amy piaramanompo, avio tokony haboakandro fa tsapandro raha mahazo piaramanompo amindro. Misy antipan̈ahy efa zadraharaha nivolan̈a karaha ty: “Izikoa anao man̈ano zen̈y, hanjary namanao iro rahalahy  ndreky ranabavy aby io. Ke lera anao mila man̈amia torohevitry iro, tsy sarotro aminao foeky hikoran̈a amindro.” Ho moramora aminolo amezan̈a torohevitry io koa han̈eky torohevitry azony.

17. Ombian̈a antipan̈ahy ny ten̈a mila maharidraha ndreky tsara fan̈ahy?

¹⁷Mifen̈a haharidraha ndreky ho tsara fan̈ahy. Nan̈ino ke? Fotony, ndraikindraiky olo amezan̈a torohevitry io tsy direkty man̈araka toro lalan̈any Baiboly. Ke izikoa zen̈y ny raha misy, tsy tokony ho meloko foeky antipan̈ahy izikoa olo amezany torohevitry io tsy direkty man̈araka. Karaha ty koran̈iny Baiboly momba Jesosy: ‘Izy tsy hanôrotôro bararata efa folaka, avio tsy voneny lamesy mitsemboko.’ (Mat. 12:20) Ke lera antipan̈ahy io mivavaka manokan̈a, izy mety miangavy Jehovah han̈ampy olo io hahazo tsara antony ilavany torohevitry io ndreky han̈araka izio. Mety mila fotoan̈a rahalahy io handinihan̈a torohevitry nazony. Ke antipan̈ahy koa maharidraha sady tsara fan̈ahy, tsy ho sarotro aminolo io han̈araka torohevitry nazony. Mazava ho azy, fa tsy maintsy ataony antipan̈ahy miôrin̈y amy Volan̈a Zan̈ahary aby zay torohevitry amezandro olo.

18. a) Ino raha mila alaintsika onon̈o, izikoa atsika han̈amia torohevitry olo? b) Izikoa zahavan̈a efajoro io, ino raha mila dinihiny raimandreny?

¹⁸Mangalà fianaran̈a baka aminy hadisovan̈anao. Tsy lavorary atsika, ke tsy ho arakantsika amy fomba feno aby torohevitry jiaby nikoran̈intsika tato. (Jak. 3:2) Tsy maintsy han̈ano hadisovan̈a fo atsika, ke lera atsika tafan̈ano zen̈y, atsika mila mifen̈y hangala fianaran̈a baka aminy hadisovan̈antsika. Izikoa tsapandro rahalahy ndreky ranabavy aby io fa tiantsika iro, tsy ho sarotro amindro hamindra fô amintsika izikoa atsika tafan̈ano raha nampameloko iro, na tamy volan̈antsika zen̈y na tamy raha nataontsika.​—Zahava koa “ Fampatsiarovan̈a Ilainy Raimandreny.”

19. Atsika koa fa han̈amia torohevitry piaramanompo, ino raha mila ataontsika baka izy ho ravoravo?

¹⁹ Hitantsika tiô fa, fan̈amezan̈a torohevitry mahômby zen̈y tsy mandeha ho azy. Samby tsy lavorary aby, na lay olo man̈amia torohevitry  na lay amian̈a torohevitry. Ke aza adin̈a raha nikoran̈intsika tamy lahatsoratra tato aby in̈y. Mifen̈a fo ho tsara fan̈ahy izikoa fa man̈amia torohevitry. Ataova azo antoko koa, fa ten̈a ilainolo io torohevitry amezanao izy. Diniha, anao sa tsy anao ny olo ten̈a tsara plasy hivolan̈a izy. Avio alohany anao han̈amia torohevitry olo araiky, tandrin̈esa tsarabe raha koran̈iny; koa ilain̈a, an̈ontania izy ino raha tsapany baka ho hainao tsarabe raha iaretany. Mipitraha amy plasinany. Miezaha hinaman̈a marikitry amy piaramanompo ndreky ho tsara fan̈ahy amindro. Tsaraova fo ty: Tanjon̈ontsika tsy raha han̈amia torohevitry mahômby fo fa, han̈amia torohevitry ‘mamparavoravo fô’ koa.​—Ohab. 27:9.