TAMINY andrany Baiboly, lelahy araiky koa fa han̈ainga, izy na lafamìnany tsy maintsy man̈efa mahary amy raimandreniny man̈angy io. Mety natao mahary aby na raha valera, na biby, na vola. Tamy fotoan̈anizen̈y koa, mahary io mety nifen̈a taminy asa. Karaha zen̈y iziô nataony Jakoba; izy tsy maintsy niasa fito taon̈o tamy babany Rahely zay vo afaka han̈ainga i Rahely. (Gen. 29:17, 18, 20) Ino ma antony nan̈ifan̈a mahary io?

Karaha ty ho Carol Meyers, manampahaizan̈a momba Baiboly: “Mahary io namandraha solony asa tokony nataony viavy io taminiry olobeny tan̈y, fotony ten̈a nilaindro angovony zanakandro io izikoa iro [pambôly].” Mahary io koa nankafatatra fihavanan̈a nisy tamy fianakavian̈any pan̈ainga ndreky lay ningain̈a. Afaka nifan̈ampy fianakavian̈a aroe io izikoa fa nisy problemo. Sôsoko zen̈y koa, mahary io porofo mankamarin̈y fa man̈angy io efa misy tômpiny, ke kômansy iô efa tsy babany eky mikarakara ndreky miaro izy fa ramosenany.

Dikanizen̈y ma nalafo na nivangain̈a man̈angy io? Tsy zen̈y. Karaha ty koran̈iny boky Fomba Fiain̈ana Ndreky Lalàn̈a tan Israely Taloha Tan̈y (angiley): “Tsy maintsy nifain̈a tamy fianakavian̈any man̈angy io mahary, na vola zen̈y na raha hafa mifandanja amy zen̈y. Ke maro olo mihevitry fa fan̈ifan̈a mahary tamy mariaziny Israelita io efa miran̈a varotro. Kanefa, tsy zen̈y aby izio fotony mahary io tsy vangany man̈angy, fa namandraha solony depansiny raimandreny.”

Amy tany sasany, mbala maro olo man̈araka fomba io, ke man̈efa mahary izikoa fa han̈ainga man̈angy. Izikoa raimandreny kristianin̈y mangataka mahary, mila aboakandro fo fa iro ‘mahay mandanjalanja’ ke tsy hangataka raha mandilatrany tokony ho izy. (Fil. 4:5; 1 Kor. 10:32, 33) Zen̈y fomba an̈aboahandro fa iro tsy “tia vola” ndreky tsy tia ten̈a. (2 Tim. 3:2) Fan̈ampinizen̈y, raimandreny kristianin̈y koa tsy tokony hitaky mahary be loatra, ke mety hahavy lelahy io voatery han̈ateky datiny mariazy fotony tsy ampy volanany. Tsy tokony baka amy zen̈y koa mahavy lelahy araiky voatery hiala pisava lalan̈a, fotony tsy maintsy miasa man̈ariva andra izy hitadiavan̈a vola han̈ifan̈a mahary io.

Amy tany sasany ndraiky, efa misy lalàn̈a momba fan̈ifan̈a mahary. Izikoa zen̈y raha misy, raimandreny Kristianin̈y man̈araka lalàn̈a misy. Nan̈ino? Fotony Baiboly man̈iraka Kristianin̈y “han̈eky manampahifan̈a”, izikoa tsy mifanohitry amy lalàn̈any Zan̈ahary lalàn̈a aboakandro.​—Rom. 13:1; Asa. 5:29.