1. Ino tombontsoa tsisy ambaka izy anan̈antsika?

TOMBONTSOA tsisy ambaka izy nintsika, fotony atsika an̈isany fiangonan̈any Jehovah! Mahatsiaro sambatra ndreky milamintsain̈y mare atsika miaraka manompo Jehovah amy piaramanompo amintsika. Fa karaha ty, hainao ma nan̈ino anao ten̈a ilain̈a amy fiangonan̈a?

2. Ino fan̈oharan̈a matetiky nampiasainy apostoly Paoly tamy taratasy sasany nisoratiny?

² Akory marin̈y ma ahaizantsika fa ten̈a ilain̈a ankitin̈y atsika amy fiangonan̈a? Han̈ampy atsika hahay valinizen̈y fan̈oharan̈a matetiky nampiasainy apostoly Paoly tamy taratasy sasany nisoratiny amy Baiboly ao. Nampiran̈iny Paoly amy vatan̈anolombelon̈o fiangonan̈a, fa olo tsiaraikiaraiky an̈ivony fiangonan̈a ndraiky nampiran̈iny amy rantsambatan̈a isankarazany.​—Rom. 12:4-8; 1 Kor. 12:12-27; Efes. 4:16.

3. Ino aby raha telo hidinihintsika amy lahatsoratra ty ato?

³ Atsika jiaby io samby ilain̈a amy fiangonan̈a, ary samby afaka mankahery olo aby atsika jiaby. Ke ndray karakory kolerantsika, na tany faviantsika, na kolontsain̈y ndreky fianaran̈a vitantsika, avio na pan̈arivo atsika na masikiny, valera amy Jehovah aby atsika tsiaraikiaraiky. Ho hitantsika ato raha telo ianarantsika baka amy fan̈oharan̈a nataony Paoly. Voanalohany, nan̈ino atsika tsiaraikiaraiky samby ten̈a ilain̈a an̈ivony fiangonan̈a. Faharoe, ino raha tokony hataontsika izikoa atsika mahatsapa fa tsisy dikany. Baka io fahatelo, nan̈ino atsika mila mifen̈y mare han̈ano zay vitantsika an̈atiny fiangonan̈a.

4. Ino raha ianarantsika baka amy Romanina 12:4, 5?

⁴ Ty raha voanalohany ianarantsika baka amy fan̈oharan̈a nataony Paoly: Ilain̈a aby atsika tsiaraikiaraiky an̈isany fiangonan̈a. Karaha ty nanombohany koran̈a, izy koa fa nan̈ano fan̈oharan̈a in̈y: “Maro rantsambatan̈a amy vatan̈antsika, kanefa iro jiaby io samby aminy asandro. Karaha zen̈y koa, atsika ndray maro, an̈isany vatan̈a araiky tafaray amy Kristy aby atsika, salakady rantsambatan̈a mifameno.” (Rom. 12:4, 5) Ino raha tiany Paoly koran̈iny? Valera amy Jehovah aby atsika tsiaraikiaraiky an̈isany fiangonan̈a, ndray samby isany fomba ampiasany atsika.

5. Ino ma raha namezany Jehovah fiangonan̈a?

⁵ Azovy aminolo an̈ivony fiangonan̈a ma ten̈a ilain̈a? Mety iro rahalahy manan̈a andraikitry donko olo avy amy jerinao voanalohany. (1 Tes. 5:12; Heb. 13:17) Haintsika fa misy lelahy ataony Jehovah kadôny fiangonan̈a, ke Kristy ampiasainy han̈amia iro io. (Efes. 4:8) Azovy aby ma iro io? Tafiditry amizio Filankevipitantan̈ana ndreky olo pan̈ampy iro, Komitiny Sampan̈a, piandraikitry faritry, papianatra amy sekoly, antipan̈ahy amy fiangonan̈a, baka io pan̈ampy amy fanompoan̈a. Iro io samby nitindreny fan̈ahy masin̈y hikarakara ondrikondrikiny Jehovah ndreky hankahery fiangonan̈a.​—1 Pet. 5:2, 3.

6. Izikoa zahan̈a 1 Tesalonianina 2:6-8, mifen̈y han̈ano ino ma iro rahalahy voatendry aby io?

⁶ Vity ndreky tan̈ana an̈isany rantsambatan̈a amy vatan̈antsika. Iro io ndray samby isany, iro miaraka miasa ke maro hatsaran̈a azony vatan̈antsika. Karaha zen̈y koa, samby isany andraikitrindro rahalahy voatendry aby io. Kanefa iro samby mifen̈y miasa mare hampatsara fiangonan̈a. Iro rahalahy aby io tsy mitady voninahitra baka aminolo, fa mifen̈y mankahery fiangonan̈a. (Vakia 1 Tesalonianina 2:6-8.) Man̈ano mersy Jehovah atsika fotony izy nan̈amia atsika rahalahy ten̈a mahakarakara fa tsy tia ten̈a.

7. Ino aby hatsaran̈a azony panompo manontolo andra maro?

⁷ Sasany aminolo an̈ivony fiangonan̈a koa iziô avoatendry ho misionera, pisava lalan̈a manokan̈a, na koa pisava lalan̈a maharitry. Maro rahalahy ndreky ranabavy erantany man̈ano fanompoan̈a manontolo andra karaha zen̈y. Iro io mandany lera maro hitorian̈a ndreky hampianaran̈a olo, ke maro taminolo nampianarindro nanjary pan̈aradia Jesosy. Ankamarozandro panompo manontolo andra aby io tsy dia manandraha, fa maro hatsaran̈a namezany Jehovah iro io. (Mar. 10:29, 30) Ten̈a tiantsika iro io, sady ravoravo atsika man̈ana iro an̈ivony fiangonan̈a.

8. Ino ivolan̈ana fa valera amy Jehovah aby pitory tsiaraikiaraiky?

⁸ Ke izio ma iro rahalahy avoatendry ndreky iro panompo manontolo andra aby io fo ten̈a ilain̈a amy fiangonan̈a? Tsy zen̈y foeky! Pitory tsiaraikiaraiky ten̈a valera amy Jehovah ndreky amy fiangonan̈a. (Rom. 10:15; 1 Kor. 3:6-9) Miniminia baka ty: Ino ma tanjon̈o maventy takariny fiangonan̈a? Han̈ampy olo hanjary pianatrany Jesosy Kristy Tompo, tsy zen̈y? (Mat. 28:19, 20; 1 Tim. 2:4) Pitory jiaby, na vita batisa izy na tsendriky, samby mifen̈y man̈ano voalohantoeran̈a asa io aby.​—Mat. 24:14.

9. Nan̈ino ma iro ranabavy aby io ten̈a valera?

⁹ Jehovah koa ten̈a man̈amia voninahitry iro ranabavy aby io, ke iro han̈ankin̈any asa maventy. Ten̈a valera aminany iro ranabavy tsy mivadiky aby io, an̈isanizen̈y man̈angy manambady, reny, ranabavy maty vady, avio ranabavy tsy manambady. Maro man̈angy miavaka sady nan̈ano raha namparavoravo  Zan̈ahary koran̈iny Soratra Masin̈y. Ten̈a modely tsara arehan̈a iro io fotony iro hendry, nanan̈a finoan̈a matanjaka, nafana fô, tsy navozovozo, tsy matity. Maro koa raha tsara vitandro. (Lioka 8:2, 3; Asa. 16:14, 15; Rom. 16:3, 6; Fil. 4:3; Heb. 11:11, 31, 35) Aminandra izioty koa, maro ranabavy manan̈a toetry tsara aby io, ke ten̈a man̈ano mersy Jehovah atsika manan̈a iro io.

10. Nan̈ino piaramanompo matoe aby io ten̈a misy valerany amintsika?

¹⁰ Sambatra koa atsika manan̈a iro piaramanompo matoe aby io. Misy amindro io nampiasa fiain̈anandro jiaby anompoan̈a Jehovah. Sasany ndraiky mety mbala vo tsy ela nahita fahamarin̈ana. Maro amindro matoentsika aby io marary fotony mahaimahazo taon̈o. Efa tsy mahavita raha maro eky iro, na aminy asa an̈ivony fiangonan̈a zen̈y na amy fitorian̈a. Ndray izy man̈ano zen̈y, mifen̈y fo iro manompo erakany mety ho vitandro, avio mankahery ndreky mampiofan̈a atsika. Efa maro baka raha nandalovandro, ke ten̈a ilaintsika fahaizan̈andro. Farandraha tsara eky fahitany Jehovah iro io ndray efa matoe, ary karaha zen̈y koa fahitantsika iro.​—Ohab. 16:31.

11-12. Tantarà ino tamy raha nataondro tanora amy fiangonan̈anaro ten̈a nankahery anao.

¹¹ Miatriky raha sarotro maro koa iro tanorantsika aby io. Ino antony? Satana baka mamehy donia ty, ke man̈araka fomba fisain̈ananany aby ankamarozanolo. (1 Jaona 5:19) Ndray zen̈y, mifen̈y fo iro tanorantsika aby io mamaly teny ampivorian̈a ndreky mazoto manompo. Tsy zen̈y fo fa misy korazy koa iro miaro finoan̈andro. Mankahery atsika mare mahita iro man̈ano raha aby zen̈y! Ke matokisa anaro tanora fa mila anaro mare fiangonan̈a.—Sal. 8:2.

¹² Sarotro amy rahalahy ndreky ranabavy sasany ndraiky man̈eky fa ilain̈a mare iro amy fiangonan̈a ao. Asa anao mba karaha zen̈y? Izikoa zen̈y, ino raha mety ataonao baka ho tsapanao fa anao ten̈a ilainy fiangonan̈a? Alô zahavantsika valiny.

13-14. Nan̈ino olo sasany mieritreritry fa iro tsy ilainy fiangonan̈a?

¹³ Ino fianaran̈a faharoe azontsika baka amy fan̈oharan̈any Paoly? Izy nikoran̈a momba problemo mahazo olo maro aminandra izioty. Sarotro amindro baka mino fa iro ten̈a ilainy fiangonan̈a. Karaha ty ho Paoly: “Izikoa vity mivolan̈a: ‘Zaho tsy an̈isany vatan̈a fotony zaho tsy tan̈ana!’, tsy baka amy zen̈y foeky hahavy izy tsy an̈isany vatan̈a. Karaha zen̈y koa sofin̈y, izikoa izy mivolan̈a: ‘Zaho tsy an̈isany vatan̈a fotony zaho tsy maso!’, tsy baka amy zen̈y foeky hahavy izy tsy an̈isany vatan̈a.” (1 Kor. 12:15, 16) Ino ma raha tiany Paoly havian̈a?

¹⁴ Izikoa anao mampiran̈a raha vitanao amy raha vitanolo fiangonan̈a araiky aminao, hanjary tsy hitanao edy raha mampa valera anao. Sasany mahay mampianatra. Misy ndraiky mahay mandamin̈y raha, na mahay mankahery. Ke anao mety hieritreritry fa karaha tsy tsara be karaha nindro foeky raha vitanao. Manetry ten̈a anao zen̈y. (Fil. 2:3) Fa ndray zen̈y, mitandrema. Mety ho kivy baka anao amy farany izikoa anao zatra mizaha raha vitanolo. Mety ho karaha raha nivolan̈iny Paoly in̈y raha tsapanao, ke anao mety hieritreritry fa tsisy raha ilàny fiangonan̈a anao foeky. Ino raha mety hataonao izikoa zen̈y raha tsapanao?

15. Izikoa 1 Korintianina 12:4-11 zahan̈a, ino raha tsy tokony hadin̈antsika?

¹⁵ Diniha baka ty: Jehovah nampiasa fan̈ahy masin̈inany nan̈amezan̈a iro Kristianin̈y sasany tamy taonjato voanalohany tan̈y fahaizan̈a mahagaga. Samby isany fahaizan̈a mahagaga nazondro zen̈y. (Vakia 1 Korintianina 12:4-11.) Fa ndray tsy nitovy fahaizan̈a namezany Jehovah iro, valera taminany aby iro tsiaraikiaraiky. Amy zioty, atsika tsy mahazo fahaizan̈a mahagaga karaha zen̈y, fa ny raha azo antoko fo, atsika jiaby io samby valera amy Jehovah aby ndray samby isany raha haintsika.

16. Ino torohevitry tsara namiany apostoly Paoly ke tokony harehantsika?

 ¹⁶ Hitantsika baka amy zen̈y fa atsika tsy tokony hampiran̈a ain̈intsika ndreky raha vitantsika amy ninolo. Tsara atsika man̈araka torohevitriny apostoly Paoly ty: “Irarian̈a olo tsiaraikiaraiky samby handiniky raha ataony, fa tsy ampiran̈a ain̈inany aminolo, amy zen̈y izy ho ravoravo aminy ain̈inany tompiny.”​—Gal. 6:4.

17. Nan̈ino ma mahatsara atsika man̈araka torohevitriny Paoly?

¹⁷ Izikoa atsika man̈araka torohevitriny Paoly ke mandiniky raha ataontsika, ho hitantsika fa kaiky atsika io mba misy raha haintsika ndreky raha mampiavaka atsika fo. Mety misy antipan̈ahy araiky ohatra tsy dia mahay man̈ano kabaro, kanefa izy ten̈a mahay man̈ampy olo hanjary panompony Jehovah. Na koa izy mety tsy mahay mandamindraha karaha antipan̈ahy hafa, kanefa izy tsara fan̈ahy sady ten̈a be fitiavan̈a ke mora amy pitory mangataka torohevitriny Baiboly aminazy. Na koa izy malaza tia mandray vahiny. (Heb. 13:2, 16) Izikoa fa haintsika ino toetry tsarantsika ndreky raha mampiavaka atsika, ho ravoravo ndreky ho afapo atsika. Ho haintsika baka fa, misy raha fo ilàn̈a atsika amy fiangonan̈a. Ke ndray misy olo mahay raha tsy haintsika, atsika tsy ho be fô izy foeky.

18. Ino raha han̈ampy atsika hankatsara fahaizan̈antsika?

¹⁸ Ndray karakory raha vitantsika an̈ivony fiangonan̈a, atsika tsiaraikiaraiky samby tokony hifen̈y hampitombo fahaizan̈antsika ndreky hankatsara fanompoan̈antsika. Jehovah mampiasa fandaminan̈anany hampiofanan̈a atsika. Fivorian̈a andavanandra iziô, man̈ampy atsika hankatsara fahaizantsika manompo. Ke asa anao mba man̈araka sosokevitry nazonao tamy fivorian̈a io?

19. Ino han̈ampy anao izikoa anao tihan̈ano Sekolin’ny Mpitory Ilay Fanjakana?

¹⁹ Mahazo fampiofanan̈a ten̈a tsara koa atsika amy Sekolin’ny Mpitory Ilay Fanjakana. Rahalahy ndreky ranabavy an̈elan̈elan̈a 23 taon̈o ndreky 65 taon̈o, manompo manontolo andra kahian̈a han̈ano izio. Anao mety hieritreritry fa tsy ho vitanao foeky hanakatra tanjon̈o io. Izikoa zen̈y, antony mahavy anao tihan̈ano izio fo diniha, fa aza mandany fotoan̈a mieritreritry antony jiaby mety tsy hahavitanao izio. Baka io iritrireta ino raha mety ataonao baka ho fenonao raha takin̈y aminolo tihan̈ano sekoly io. Izikoa anao mifen̈y mare, ho vitanao fo han̈ano raha zen̈y ndray karaha tsy posibla, fotony Jehovah han̈ampy anao.

20. Ino raha ianarantsika baka amy Romanina 12:6-8?

²⁰ Ino koa fianaran̈a fahatelo azontsika baka amy fan̈oharan̈any Paoly in̈y? Mikoran̈a zen̈y Romanina 12:6-8. (Vakia.) Tio Paoly nan̈ambara fa samby isany fahaizan̈a anan̈andro Kristianin̈y aby io. Fa ndraikinity, namafisiny tsarabe fa kila olo tokony hampiasa fahaizan̈anany zen̈y hankahirezan̈a fiangonan̈a.

21-22. Ino raha ianarantsika baka amy tantarany Robert ndreky Felice?

²¹ Aleva onon̈o baka raha nataony antipan̈ahy araiky ty, Robert an̈arany. Nanompo tantany hafa izy taloha, fa izy baka tio navoatendry nanompo amy Betela amy tany faviany. Ndray fa nan̈amia toky izy iro rahalahy aby io fa izy tsy nan̈ano raha ratsy, tsy navoamboatrany foeky jerinany. Ho izy: “Tsy mety nilamin̈y jerinaka tan̈atiny fanjava fanjava. Ho zaho tamy jeriko tan̈y: ‘Efa tsisy raha ilàn̈a zaho foeky e!’ Efa nisy fotoan̈a zaho tihiala tamy Betela, ary raha zen̈y tsy indraiky tsy indroe.” Fa nahita haravoan̈a fo izy tafara tatỳ. Ino raha nan̈ampy izy? Nisy antipan̈ahy  araiky nampatsiaro izy fa fanendren̈a jiaby nazontsika taloha aby in̈y fomba nampiofan̈any Jehovah atsika fo, amy zen̈y atsika hahavita raha anendreny atsika amy zioty. Tontohitry Robert fa tsy tokony handiniky raha efa loso izy, fa tokony hifantoko amy raha mety ataony amy zioty.

²² Karaha zen̈y koa Rahalahy Felice Episcopo. Iro roeny vadiny nahazo diplaomy tamy Sekoliny Gileada taminy 1956, baka io iro nan̈ano asany faritry ta Bolivie. Kanefa taminy 1964, iro niteraka. Ho Felice: “Mafy taminay niala ta Bolivie, fotony tianay mare nanompo tan̈y. Kivy mare zaho tan̈atiny taon̈o araiky tio. Fa Jehovah nan̈ampy zaho, ke vitako fo nan̈ova toetsain̈inaka. Nifen̈y zaho nifantoko taminy andraikitrinaka vaovao, tsy ino zen̈y fa hikarakara zanako.” Asa mitovy amy Robert ndreky Felice raha tsapanao? Malahelo ma anao fotony efa tsy nanan̈anao eky tombontsoampanompoan̈anao taloha? Izikoa zen̈y, tsaraova fa ho sambatra fo anao izikoa anao man̈ova toetsain̈inao ke mifantoko amy raha vitanao amy zioty, amy fanompoan̈a ndreky fan̈ampian̈a piaramanompo. Mifen̈a angovo jiaby man̈ano zay vitanao, baka io fahaizan̈anao io ampiasà han̈ampian̈a olo. Ho ravoravo edy anao fotony mankahery fiangonan̈a.

23. Ino raha mila alaintsika onon̈o, baka io ino raha hidinihintsika amy lahatsoratra man̈araka?

²³ Valera amy Jehovah aby atsika tsiaraikiaraiky, sady tiany hanjary fianakavian̈anany. Ke mila alaintsika onon̈o akory fomba hankahirezan̈a iro rahalahy ndreky ranabavintsika aby io, baka io hifen̈y mare atsika han̈ano zen̈y. Ho hitantsika edy amy zen̈y fa misy raha ilàn̈a atsika ankitin̈y amy fiangonan̈a. Asa mba karakory fomba fiheverantsika olo hafa an̈ivony fiangonan̈a? Akory mety an̈amboahantsika fa tiantsika mare iro salakady hajaintsika? Ilain̈a mare koa zen̈y, ke zen̈y raha hidinihintsika amy lahatsoratra man̈araka.