1-2. Ino raha tiany Jesosy volan̈iny amy Jaona 4:35, 36 ao?

JESOSY tamy zen̈y nandeha namakivaky tanimbary. Mety vary orzy mbala nahitsohitso tamizio tao. (Jaona 4:3-6) Ho izy: “Alifasa lavitry baka masonaro, zahava fa efa matoe vary, ke efa mila jinjain̈a.” (Vakia Jaona 4:35, 36.) Karaha somary hafahafa volan̈a zen̈y, fotony nan̈ino? Tokony mbala efatra fanjava iô baka vo avy fotoan̈a fijinjan̈a. Asa ino raha tiany Jesosy koran̈iny amy zen̈y?

² Mety famorian̈a olo donko raha tiany Jesosy koran̈iny tamy fijinjan̈a io. Aleva onon̈o raha nandalo taloha helinizio. Tsy nifankahazo foeky Samaritanin̈y ndreky Jiosy. Jesosy nitory tamy man̈angy samaritanin̈y araiky, ary man̈angy io nitandren̈y izy tsarabe. Maro koa Samaritanin̈y nanjary nino Jesosy, baka tamy raha nivolan̈iny man̈angy io. (Jaona 4:9, 39-42) Tamy fotoan̈anizen̈y, Jesosy nivolan̈a fa “efa matoe vary ke efa mila jinjain̈a.” Karaha ty nambarany boky araiky momba raha nandalo io: “Efa tsy din̈indro aby hitandren̈y Jesosy. ... Zen̈y nahavy iro io nampitovisin̈y tamy vary matoe, efa mila didian̈a na tsongoen̈a”; koa atao amy volan̈a hafa, iro efa von̈ono hanjary pianatrany Jesosy.

3. Ino vokany izikoa mitovy amy fahitany Jesosy olo fahitanao olo itorianao?

³ Karakory ma fiheveranao olo itorianao? Asa anao mba mieritreritry iro mira vary matoe efa mila jinjain̈a in̈y? Nan̈ino ma raha zen̈y misy vokany aminao ndreky amy raha ataonao? Voanalohany, anao tsy hirekireky hitory fotony asa io meky. Karaha ataony lera fijinjan̈a in̈y, mila sarombain̈a malaky vokatra. Faharoe, ho ravoravo anao izikoa mahita olo mitandren̈y hafatra indesinao. Baiboly mivolan̈a fa an̈isany ‘fotoan̈a hisiany haravoan̈a fotoan̈any fijinjan̈a.’ (Isaia 9:3) Fahatelo, hifen̈y koa anao hampifan̈araka hafatra indesinao amy raha tianolo,  fotony anao man̈anten̈a fa olo io mety hanjary pianatrany Jesosy.

4. Ino aby raha hianarantsika baka aminy apostoly Paoly?

⁴ Mety nisy tamy pianatrany Jesosy nieritreritry fa tsy mety iro Samaritanin̈y aby io koa hanjary pan̈aradia Jesosy, fa Jesosy tsy nieritreritry zen̈y. Tokony hitovy amy niny Jesosy zen̈y koa fahitantsika olo itoriantsika. Modely tsara harehantsika koa apostoly Paoly. Hidinihintsika ato raha telo ianarantsika baka aminany: 1) Hainy raha ninoanolo nitoriany. 2) Nidinihiny ino raha tiandro. 3) Izy nan̈anten̈a fo fa mety hanjary pianatrany Kristy aby olo jiaby.

5. Nan̈ino ma tsy sarotro tamy Paoly nahay toetsain̈inolo nitandren̈y izy tamy synagoga tao?

⁵ Matetiky apostoly Paoly nitory taminolo tamy synagogany Jiosy. Karaha ataony taminizy tamy synagoga ta Tesalonika, ‘nifen̈y izy nampiasa Soratra Masin̈y izikoa fa nandresy lahatra iro Jiosy aby io, tan̈atiny sabata telo.’ (Asa. 17:1, 2) Misaora tiany Paoly nitory tamy synagoga tan̈y, fotony izy Jiosy. (Asa. 26:4, 5) Hainy tsarabe baka toetsain̈indro Jiosy aby io, ke nora taminany nitory tamindro. Tsy navozo foeky izy.—Fil. 3:4, 5.

6. Ino raha tsy nampitovy olo nitoriany Paoly ta bazariny Atena ndreky tamy synagoga?

⁶ Paoly koa fa ninjehin̈y, izy tsy maintsy niala ta Tesalonika ndreky ta Beria. Farany, izy navy ta Atena. Karaha fataony in̈y, izy nandeha tamy synagoga. ‘Nifen̈y izy nandresy lahatra iro Jiosy ndreky olo hafa nivavaka tamy Zan̈ahary.’ (Asa. 17:17) Izy koa fa nitory ta bazary, tsy Jiosy eky olo nitandren̈y izy fa olo hafa, an̈isanizen̈y iro filôzaofy aby io. Tan̈atiny jerindro, Paoly navy io nitondra “fampianaran̈a vaovao.” Ho iro taminany: ‘Vaovao amy sofin̈inay raha volan̈inao zen̈y.’—Asa. 17:18-20.

7. Izikoa Asan’ny Apostoly 17:22, 23 zahan̈a, akory nampifan̈arahany Paoly koran̈anany taminolo nitoriany?

⁷ Vakia Asan’ny Apostoly 17:22, 23. Tsy nitovy foeky fomba fitorian̈a nampiasainy Paoly taminolo tsy Jiosy ta Atena, ndreky tamindro Jiosy aby tamy synagoga tao. Mety loso diniky izy: ‘Asa ino raha inoanolo eto?’ Nalainy onon̈o tsarabe raha nan̈odidin̈y izy ndreky raha fataonolo tao koa fa nivavaka. Ke izy koa fa nan̈ambara ny marin̈y amy Soratra Masin̈y tamindro, zay hevitry nikendro fo nanombohany koran̈a. Karaha ty ho manampahaizan̈a araiky: “Paoly baka Jiosy sady Kristianin̈y, ke hainy tsarabe fa tsy nivavaka taminy araiky ten̈a Zan̈ahary, erakany  fiheverany Jiosy ndreky Kristianin̈y izy iro Griky [na Atenianin̈y] panompo sampy aby io. Nifen̈y izy nan̈aboaka tamindro fa tsy raha vaovao foeky Zan̈ahary nikoran̈iny tamindro io.” Hainy Paoly nampifan̈araka raha nikoran̈iny taminolo fanojy izy. Nambarany tamindro Atenianin̈y aby io fa raha jiaby nikoran̈iny tamindro io baka amy ‘Zan̈ahary Tsy Hay’ nivavahandro io fo. Marin̈y fa tsy nahay Soratra Masin̈y iro, kanefa Paoly tsiary ndraiky nieritreritry fa iro io tsy mety hiova Kristianin̈y. Miran̈a vary matoe efa mila jinjain̈a in̈y fahitany iro, ke nataony nifan̈araka tamy raha efa haindro fitorian̈anany.

8. a) Akory hahaizanao raha inoanolo amy faritaninaro? b) Akory izikoa izy mivolan̈a fa efa pivavaka?

⁸ Atsika mila mahay mandiniky, karaha nataony Paoly. Diniha ino raha inoanolo amy faritaninaro. Ohatra: Karakory ataony mampisanjy tran̈onany na tomabilinany? Mety han̈ampy anao hahay raha inoany koa an̈aranany na fomba fisikinany na fomba fivolan̈any. Mety hivolan̈a aminao foeky izy fa efa pivavaka. Nisy pisava lalan̈a manokan̈a araiky zay efa tojy olo karaha zen̈y. Flutura an̈arany. Akory nataony? Karaha ty ho izy: “Zaho navy io tsy raha handeha han̈ova finoan̈anao, fa zaho mba tihikoran̈a momba...”

9. Ino aby hevitry itovizantsika amy pivavaka sasany?

⁹ Mitadiava marimaritry iraisan̈a izikoa fa hikoran̈a aminolo efa pivavaka. Iritrireta, ino hevitry itovizanaro? Anaro ma samby mino fa Jesosy nan̈avotro atsika, avio araiky fo Zan̈ahary? Samby resy lahatra ma anaro fa mahairatsy fiain̈ana amy zioty, ke tsy ho ela raha ratsy aby io hifaran̈any Zan̈ahary? Hevitry itovizanaro ampiasà han̈ambaran̈a aminany hafatra baka amy Baiboly, ke ataova raha hitiavany izio.

10. Tokony hifen̈y han̈ino ma atsika, baka io nan̈ino?

¹⁰ Aza adin̈a fa olo araiky ndray efa pivavaka be, mety misy raha tsy hinoany fo raha ampianariny fivavahan̈andro. Izikoa hainao ino fivavahan̈anany, diniha ino raha ten̈a inoany. Karaha ty raha nambarany David, pisava lalan̈a manokan̈a an Australie: “Amy zioty, filôzôfỳ aharonolo amy fivavahan̈a.” Volan̈iny Donalta, baka an Albanie: “Misy aminolo itorianay aby io efa pivavaka, fa izikoa zahay efa mikoran̈a amindro tsarabe, kaiky iro tsy ten̈a mino Zan̈ahary aby.” Misionera araiky baka an Argentine zay koa nivolan̈a: “Ndray iro mivolan̈a mino Trinite aby io tsy voatery han̈eky fa Zan̈ahary araiky fo Baba ndreky Zanaka avio fan̈ahy masin̈y zen̈y.” Karaha ty koa ho izy: “Izikoa fa hainao raha aby zen̈y, ho moramora aminao hahita marimaritry iraisan̈a.” Ke diniha tsarabe ino marin̈y  raha ten̈a inoanolo io, amy zen̈y anao ‘hahavita han̈ampy karazan̈olo jiaby.’—1 Kor. 9:19-23.

11. Karakory nataony Paoly nitaon̈o olo ta Lystra hazoto hitandren̈y izy, koa zahan̈a Asan’ny Apostoly 14:14-17?

¹¹ Vakia Asan’ny Apostoly 14:14-17. Hainy Paoly ino raha tianolo nikoran̈any, ke nataony nifan̈araka tamy zen̈y fitorian̈anany. Ohatra iziô, tsy nahay Soratra Masin̈y foeky na an̈arany nahay zen̈y fo olo aby nitoriany ta Lystra tao. Ke lan̈iany hevitry haindro fo nikoran̈iny tamindro, karaha ataony resaka fambolian̈a ndreky fotoan̈a ten̈a nampisy vokatra be, ndreky fahaizan̈a mankafỳ fiain̈ana. Volan̈a ndreky ohatra mora hainolo nitandren̈y izy fo nampiasainy.

12. Akory hahaizanao raha tianolo itorianao? Akory hampifan̈arahanao raha zen̈y amy fomba fitorianao?

¹² Mifen̈a mare hahay raha tianolo amy faritaninaro ke ataova mifan̈araka amy zen̈y fitorian̈anao. Ino iziô ohatra, raha mety hahaizanao koran̈a tianolo araiky, lera anao man̈aton̈o izy na man̈aton̈o tran̈onany? Miran̈a araiky tio in̈y fo, anao mila mandiniky tsarabe. Man̈amboatra zaridain̈y ma izy, sa mamaky boky, sa man̈amboatra tomabily, va man̈ano raha hafa? Izikoa mety, nan̈ino izikoa raha ataony in̈y fo hanombohanao koran̈a? (Jaona 4:7) Nata lamba sikininy fo mety efa ahaizanao raha maro momba izy, ohatra tany faviany, asanany, na ekipinolo pan̈ano spaoro ten̈a tiany. Karaha ty ho Gustavo: “Nikoran̈a tamy manafolahy 19 taon̈o zay zaho tandraraiky. Nisy sariny pihira araiky malaza tamy lambanany, ke nan̈ontaniako izy raha mikasiky izio. Nambarany zaho baka tio raha itiavany pihira io. Nitohy fo koran̈anay, ke nan̈eky nianatra Baiboly izy baka tio. Izy iziô efa rahalahintsika.”

13. Lera anao mitaon̈o olo hianatra Baiboly, ino raha mety ataonao baka izy hazoto hianatra?

¹³ Lera anao mitaon̈o olo hianatra Baiboly, ataova raha hahavy izy hazoto hianatra. Aboaha izy nan̈ino izio ten̈a ilainy. (Jaona 4:13-15) Karaha ty nataony ranabavy Hester taminizy  nitory tamy viavy araiky lian̈a be zay. Nataony man̈angy io karibo antran̈o izy. Nisy diplaomy hitany Hester nihanton̈o tamy riba, ke zen̈y nahaizany fa man̈angy io olo manampahaizan̈a momba fampianaran̈a. Nazavainy tamy man̈angy io amy zay fa atsika koa mba mampianatra, fotony atsika mampianatra Baiboly sady mandamin̈y fivorian̈a. Nan̈eky hianatra Baiboly izy, sady nandeha nivory kiakanizin̈y. Nandeha fivoriambeny faritry koa izy tsy elanizin̈y. Taon̈o araiky tafara tatỳ, natao batisa izy. Ke tsara koa atsika man̈ontany ten̈a karaha ty: ‘Ino raha mahalian̈a olo hitsidihiko io? Lera zaho hitaon̈o izy hianatra Baiboly, ino raha mety ataoko baka izy hazoto hianatra?’

14. Karakory atao mampifan̈araka raha ampianarin̈y amy raha ilainy pianatra?

¹⁴ Nanomboko fampianaran̈a Baiboly aminolo araiky ma anao? Man̈omàn̈a tsarabe isaka anao handeha hampianatra izy. Iritrireta raha momba fianakavian̈anany, fianaran̈a nataony, raha niain̈any, ndreky raha tiany. Fidiana ino andininteny hivakianao lera anaro mianatra, ino video haboakanao izy ndreky ohatra tianao hampiasain̈a han̈azavan̈a hevitry. Ataova karaha zen̈y pianatranao tsiaraikiaraiky. Diniha, ‘ino raha ten̈a mety hahalian̈a pianatranao ndreky hanohin̈y fonany?’ (Ohab. 16:23) Zen̈y tsarabe raha nataony Flora, pisava lalan̈a baka an Albanie, man̈angy nampianariny koa fa nan̈izingizin̈y karaha ty: “Zaho tsy mino familoman̈a olo maty zen̈y foeky!” Flora tsy nanery izy hino izio. Ho izy: “Tontohitry zaho fa tsy tokony familoman̈a olo maty raha nikoran̈iko taminany voanalohany, fa tokony raha momba Zan̈ahary mampan̈anten̈a izio antsendriky.” Ke komansy tio isaka Flora nampianatra izy, nankamafisiny fo fa Jehovah io be fitiavan̈a, hendry, sady farandraha mahery eky. Nanjary nahainino familoman̈a olo maty fo man̈angy io, tafara tatỳ. Izy iziô efa Vavolombelon̈o Jehovah salakady mazoto mare.

15. Izikoa Asan’ny Apostoly 17:16-18 zahan̈a, ino raha nampalahelo Paoly taminolo ta Atena tan̈y? Nan̈ino fo izy mbala nitory tamindro?

¹⁵ Vakia Asan’ny Apostoly 17:16-18. Olo ta Atena tan̈y panompo sampy, ratsy fitondranten̈a sady nan̈araka filôzôfìny panompo sampy. Nalahelo Paoly, fa izy tsy rivan̈a. Nitihitihindro koa izy fa mbala nitoriany vaovao tsara fo iro. Ndray izy fo nanjary Kristianin̈y, kanefa izy amy zen̈y taloha olo ‘tsy nan̈isy fotiny Zan̈ahary’ sady ‘pan̈enjiky ndreky pan̈ambany olo’! Ke intsaka eky iro olo aby io, ho dinikinany! (1 Tim. 1:13) Karaha nataony Jesosy natoky fa Paoly mbala mety hanjary kristianin̈y, Paoly koa natoky fa iro Atenianin̈y aby io mbala mety hiova. Ary zen̈y ankitin̈y raha nisy!—Asa. 9:13-15; 17:34.

16-17. Ino ivolan̈ana fa mety hanjary pianatrany Kristy aby karazan̈olo jiaby? Man̈ameza ohatra.

¹⁶ Tamy taonjato voanalohany, isankarazany olo nanjary pianatrany Jesosy. An̈isanizen̈y olo tamy fiangonan̈a ta Korinto, ta Gresy tan̈y. Paoly koa fa nanoratra tamindro, koran̈iny fa efa navy kafiry ndreky ratsy fitondranten̈a sasany tamindro io taloha, fa iro baka tio ‘efa avoasasa madio tsarabe.’ (1 Kor. 6:9-11) Izikoa anao nitory tamindro, asa anao mba nan̈anten̈a fa iro io mbala mety hiova ke hanjary pianatrany Jesosy?

¹⁷ Amy zioty, mahaimaro fo olo von̈ono han̈ano fan̈ovoan̈a ke hanjary pianatrany Jesosy. Tontohitry Yukina, pisava lalan̈a manokan̈a an Australie, fa mety han̈eky hafatra baka amy Baiboly aby karazan̈olo jiaby. Tandraraiky izy nandeha nitory tamy sosiete pivarotro tany ndreky tran̈o. Fanojy tsaiky man̈angy feno tatoazy sady man̈ano lamba mangolaobaka be izy tao. Volan̈iny Yukina: “Tamy  voanalohany zaho nisalasala han̈aton̈o izy, fa zaho baka tio nikoran̈a taminany fo. Kaiky izy ten̈a tia Baiboly! Ndray sasany amy tatoazinany kaiky andininteny baka amy Salamo.” Nanjary nianatra Baiboly izy sady nivory. *

18. Nan̈ino atsika tsy tokony hitsararatsara olo itoriantsika?

¹⁸ Ino ma nahavy Jesosy nivolan̈a momba tanimbary misy vary efa matoe mila jinjain̈a in̈y? Izy ma nan̈anten̈a fa hanjary pianatranany aby ankamarozanolo? Aha, fotony Baiboly efa nan̈ambara fa vitsy fo olo hino Jesosy. (Jaona 12:37, 38) Jesosy koa mahay raha an̈aty fonolo, ke hainy fa ho vitsy fo olo hino izy. (Mat. 9:4) Iro olo vitsy aby io fo nifantohany, ke zen̈y nahavy izy nivolan̈a fa efa matoe vary ke efa mila jinjain̈a. Atsika tsy miran̈a Jesosy, fotony tsy haintsika raha an̈aty fonolo. Zen̈y mahavy atsika mahaimila mitandrin̈y fo tsy hitsaratsara olo itoriantsika. Tsarova fa mety hanjary pianatrany Jesosy olo io. Karaha ty ho Marc, misionera a Burkina Faso an̈y: “Matetiky, pianatra Baiboly niritriretiko hanjary panompony Jehovah in̈y edy voly mianatra, fa lay tsy niritriretiko han̈ano raha in̈y ndraiky nandroso. Hitako baka amy zen̈y fa sitrany fo man̈eky hitaritiny fan̈ahy masin̈iny Jehovah.”

19. Tokony ho karakory fahitantsika olo amy faritanintsika?

¹⁹ Anao mety mieritreritry fa vitsy fo olo amy faritaninaro ao mety ampitovisin̈y amy vary matoe efa mila jinjain̈a. Kanefa aza adin̈a raha nambarany Jesosy tamy pianatranany in̈y: “Efa matoe vary ke efa mila jinjain̈a.” Dikanizen̈y, mety miova aby olo jiaby ke hanjary pianatrany Kristy. Valera amy Jehovah iro olo aby zen̈y. (Hag. 2:7) Izikoa fahitantsika olo aby io mitovy amy niny Jehovah ndreky Jesosy, hifen̈y fo atsika hahay raha momba iro ndreky raha tiandro. Atsika tsy hieritreritry fa iro io tsy han̈ano raha foeky! Tokony han̈anten̈a fo atsika fa iro io mbala hanjary rahalahy ndreky ranabavintsika.