1. Ino raha tsy maintsy ataontsika jiaby?

AKORY izikoa an̈atiny anao marary na lonja mare in̈y irahin̈y milomoay? Anao tsy han̈ano. Apostoly Paoly nivolan̈a fa milomoay aby olo ten̈a Kristianin̈y. (Heb. 12:1) Izikoa atsika tihahazo loka hamiany Jehovah atsika, tsy maintsy miaritry firaka amy farany atsika jiaby, na tanora na matoe na matanjaka na efa kajo.—Mat. 24:13.

2. Izikoa 2 Timoty 4:7, 8 zahan̈a, nan̈ino Paoly nasaky nandrisiky atsika hilomoay?

² Paoly ‘efa nahatody lomoay io’ firaka amy farany, ke zen̈y nahavy izy nasaky nandrisiky atsika han̈ano izio. (Vakia 2 Timoty 4:7, 8.) Fa ino ma lomoay nikoran̈iny io?

3. Ino ma lomoay nikoran̈iny Paoly io?

³ Refin̈y Paoly koa fa tihampianatra olo raha maventy, saomandro Griky taloha tan̈y nataony fan̈oharan̈a. (1 Kor. 9:25-27; 2 Tim. 2:5) Matetiky, nampiran̈iny Paoly tamy lomoay mahadin̈y ela be fiain̈anany Kristianin̈y. (1 Kor. 9:24; Gal. 2:2; Fil. 2:16) Mikomansy “lomoay” io Kristianin̈y araiky izikoa fa manokanten̈a amy Jehovah ndreky atao batisa. (1 Pet. 3:21) Amezany Jehovah kadô lan̈iany Kristianin̈y mahatody izio firaka amy farany, tsy ino loka zen̈y fa fiain̈ana tsisy farany.—Mat. 25:31-34, 46; 2 Tim. 4:8.

4. Ino raha hidinihintsika ato?

⁴ Maromaro raha mampiran̈a lomoay mahadin̈y ela be io amy fiain̈anany Kristianin̈y. Alô atsika handiniky telo amy zen̈y. Voanalohany, atsika mila man̈araka lalan̈a tokony himboan̈a. Faharoe, mila iritriretintsika fo tsipiky farany. Fahatelo, mila milomoay fo atsika ndray misy problemo.

5. Lalan̈a karakory ma tokony harehantsika? Nan̈ino?

⁵ Tsy maintsy mandeha amy lalan̈a efa nifidiny piandraikitry lomoay io olo araiky izikoa tihahazo loka. Karaha zen̈y koa atsika. Atsika koa tihahazo fiain̈ana tsisy farany, tsy maintsy arehantsika lalan̈a na fomba fiain̈ana tsy maintsy arehany Kristianin̈y. (Asa. 20:24; 1 Pet. 2:21) Tsy tiany Satana ndreky olonany aby io han̈ano zen̈y atsika, fa tiandro ‘hiaraka hilomoay amindro fo.’ (1 Pet. 4:4) Ankaratsiandro fomba fiain̈anantsika, ke nindro fo zen̈y ten̈a tsara fotony tsisy raha manohantohan̈a. Vandy areriky!—2 Pet. 2:19.

6. Ino raha ianaranao baka amy Brian?

⁶ Olo amy donia ty mieritreritry fa iro mahavita man̈ano zay raha tiandro hatao, kanefa teteky iô, ho tontohitry iro fa andivoziny fomba fiain̈anany doniany Satana ty. (Rom. 6:16) Karaha zen̈y raha navoa Brian. Ry olobeny nandrisiky izy han̈araka fomba fiain̈ana kristianin̈y, fa izy koa fa kadiriny 12 na 13 taon̈o, nanjary nisalasala izy tsao tsy mampasambatra izy raha zen̈y. Nanapakevitry niaraka taminolo tsy nan̈araka fitsipikiny Jehovah izy. Karaha ty ho izy: “Tsy nidinihiko lalin̈y fa kaiky fomba fiain̈ana tsy man̈araka fitsipikiny Jehovah io tsy manjary ankitin̈y. Nihina jamala zaho, nigiaka toaka, baka io nijangajanga. Nahainasaky nihina jamala maro mahery fo zaho, ke nanjary nandivozinizio ... Nanjary nandafo jamala foeky zaho nan̈anovako pleziranaka.” Tontohitry Brian, ke tapakevitry han̈araka fitsipikiny Jehovah fo. Niova izy, avio natao batisa taminy 2001. Ravoravo mare izy amy zioty, fotony man̈araka lalan̈a tokony harehany Kristianin̈y. *

7. Izikoa Matio 7:13, 14 zahan̈a, ino aby lalan̈a aroe mety fidintsika?

⁷ Ten̈a mila mifidy lalan̈a tokony harehany Kristianin̈y io atsika! Fotony nan̈ino? Tiany Satana baka atsika jiaby tsy han̈araka lalan̈a maletry “mandeha amy fiain̈ana”, fa han̈araka lalan̈a malalaka arehanolo amy donia ty. Tianolo mare lalan̈a io sady mora andihanan̈a, kanefa izio “mandeha amy fandripahan̈a.” (Vakia Matio 7:13, 14.) Mila matoky Jehovah ndreky mitandren̈y izy atsika, baka tsy voafitakanolo tsy man̈araka fitsipikinany, fa hidoko amy lalan̈a maletry mandeha amy fiain̈ana fo.

8. Koa san̈atria lavo olo araiky milomoay, ino raha ataony?

⁸ Olo koa fa milomoay, masonany tokony hizaha aloha fo, baka izy tsy lavo. Ndray  zen̈y, mety ho lavo fo izy izikoa tafikon̈onolo miaraka milomoay aminany, na latsaka an̈aty lavaka. Koa san̈atria izy lavo, direkty izy mitsangana malaky avio efa milomoay edy. Tsy tokony amy raha nandavo izy hampandihanany jerinany fa amy tsipiky farany ndreky loka ho azony.

9. Ino raha tokony hataontsika izikoa atsika lavo?

⁹ Mety ho lavo matetiky koa atsika amy lomoay ataontsika, fotony atsika mety tafivolan̈a na tafan̈ano raha tsy mety. Tokony efa ampoizintsika raha zen̈y. Atsika jiaby samby miaraka milomoay amy lalan̈a mandeha amy fiain̈ana tsisy farany. Kanefa ny raha misy, atsika tsy lavorary, ke mety ho tafan̈ano raha mampameloko namantsika. Karaha nivolan̈iny Paoly in̈y, atsika io samby mety misy raha hitarain̈ana momba namantsika. (Kol. 3:13) Aza mifantoko amy raha nampaneloko anao, fa mifantoha amy loka ho azonao. Izikoa anao sendra lavo, mitsangàna, avio tohiza direkty lomoainao. Anao koa mitana heloko ampô ke tsy nahefa hanompo Jehovah eky, anao tsy hahazo loka edy! Aza adin̈a fa, ndray anao mba mety han̈ano raha hahavy olo tsy ho ravoravo hanompo Jehovah. Kanefa iro amy zen̈y efa mifen̈y mare milomoay amy lalan̈a maletry mandeha amy fiain̈ana io!

10. Akory tokony hataontsika baka atsika tsy handavo rahalahintsika?

¹⁰ Tsy handavo rahalahintsika ndreky anabavintsika atsika izikoa tsy miforse iro han̈araka hevitrintsika fo, fa mba man̈ambela iro han̈ano raha tiandro hatao koa, izikoa tsy mifanohitry amy Baiboly. (Rom. 14:13, 19-21; 1 Kor. 8:9, 13) Olo pilomoay arabakiteny ndraiky tsy karaha zen̈y, fotony iro mifan̈oesa. Mamono ten̈a iro hahazo loka io. Raha mahatsara iro fo dinihindro fa tsy raha mahatsara olo. Zen̈y mahavy iro misy kinia mandavo namandro. Atsika ndraiky tsy karaha zen̈y, fotony atsika tsy mifan̈oesa. (Gal. 5:26; 6:4) Tanjon̈ontsika han̈ampy olo farany maro hahavita lomoay io miaraka amintsika, ndreky hahazo lokany fiain̈ana. Zen̈y mahavy atsika mifen̈y man̈araka torohevitriny Paoly ‘hizaha raha mahatsara namantsika, fa tsy raha mahatsara atsika tompiny fo.’—Fil. 2:4.

11. Tokony hifantoko aminino ma olo pilomoay? Nan̈ino?

 ¹¹ Olo pilomoay zen̈y tsy vitany mizaha alohanany fo fa mifantoko amy tsipiky farany koa. Ndray tsipiky io mbala tsy honohono ho hitany, efa azony menimeny izy tody an̈y ndreky mahazo loka. Mahaimisy korazy fo izy izikoa tsy man̈adin̈a loka ho azony io.

12. Ino toky namezany Jehovah atsika?

¹² Tsara fan̈ahy Jehovah ke namezany toky atsika fa hamiany fiain̈ana mandrakizay lan̈iany olo mahatody lomoay io firaka amy farany. Sasany hiain̈y mandrakizay andan̈itry an̈y, fa misy ndraiky hiain̈y mandrakizay amy Paradisa ambony tany eto. Koran̈iny Baiboly ao han̈ano akory fiain̈ana amy zen̈y, baka ho azontsika sary antsain̈y fiain̈ana tsara miambin̈y atsika. Atsika koa misaintsain̈y raha ampan̈antin̈ainy Jehovah atsika aminy amaray an̈y, tapakevitry hanohy lomoaintsika fo atsika, ndray misy raha mety handavo.

13. Ino tombony anan̈antsika izikoa oharin̈y amy pilomoay aby io?

¹³ Maro problemondro pilomoay tamy saomandro Griky aby io, karaha ataony hakajoan̈a ndreky tehotehoko. Kanefa fampiofan̈ana nazondro ndreky angovondro tompiny fo nindesindro niatriky zen̈y. Akory ndraiky atsika? Atsika koa mba mahazo fampiofan̈ana mira iro pilomoay aby io. Fa tombony anan̈antsika fo, atsika tsy miady manokan̈a. Atsika mety mangataka angovo baka amy Jehovah, sady angovonany io tsy mahailany foeky. Ke atsika koa matoky Jehovah, izy mampan̈anten̈a fa hampiofan̈a atsika ndreky hampatanjaka atsika fo!—1 Pet. 5:10.

14. Nan̈ino 2 Korintianina 12:9, 10 io man̈ampy atsika hiatriky problemo?

¹⁴ Naro problemony Paoly. Nitihitihin̈y ndreky ninjehin̈y izy. Ndraikindraiky koa izy nahatsiaro lany angovo. Niatriky raha manahiran̈a hafa koa izy, ke “fatsiky amy nofotro” nikahiany izio. (2 Kor. 12:7) Tsy nataony tamban̈a tsy hanompoan̈a Jehovah foeky raha zen̈y, fa nararaotiny han̈aboahan̈a fatokisany Jehovah. (Vakia 2 Korintianina 12:9, 10.) Ino vokatranizen̈y? Nampiany Jehovah fo izy.

15. Koa atsika man̈ano karaha nataony Paoly, ino raha atokisantsika?

¹⁵ Atsika koa mety hitihitihinolo ndreky hinjehindro nohony finoan̈antsika. Mety harary ndreky ho kajo koa atsika. Fa ndray iô raha manahiran̈a aby zen̈y, hifen̈y fo atsika hilampy amy Jehovah, karaha nataony Paoly in̈y. Matoky atsika fa izy han̈ampy atsika fo.

16. Izikoa anao tsy salama, ino raha mety hataonao?

¹⁶ Marary tsy afaka miala an̈abony fandrian̈a ma anao sa aposy amy sezy misy larò? Va anao marary lohaliky? Sa efa manomboko tsy mahita tsara masonao? Ndray zen̈y raha mahazo anao, matokisa fa anao mbala mahavita miaraka milomoay amindro tanora salama vatan̈a aby io fo. Maro aminolo efa matoe ndreky marary mbala mahavita milomoay amy lalan̈a mandeha amy fiain̈ana io. Izikoa angovondro tompiny fo, iro tsy mahavita zen̈y! Fa iro mangala angovo amy Jehovah. Amy fomba karakory? Mitandren̈y fivorian̈a amy telefony iro na mizaha fivorian̈a nalain̈a taminy Internet. Mitory aminy havandro, amy dokoterandro, ndreky aminolo mikarakara iro koa iro.

17. Akory fahitany Jehovah panomponany tsy salama aby io?

¹⁷ Mety halemy troko anao izikoa marary, intsaka eky izio koa mahadin̈y ela be. Fa anao aza rivan̈a! Ho todinao fo lomoay mandeha amy fiain̈ana io, fotony Jehovah han̈ampy anao. Tiany anao, fotony anao mino izy sady  mifen̈y tsy hivadiky aminany. Hainy fa iziô edy anao mila fan̈ampiany, ke izy tsy mety han̈ary anao. (Sal. 9:10) Ndray izy aby han̈ano raha han̈aton̈ana anao fo ke! Zahava baka raha nivolan̈iny ranabavy araiky marary ty: “Nahainaro fo aretin̈inaka, ke mahalan̈a zaho vo afaka mandeha manompo. Fa ravoravo fo zaho fotony haiko fa ndray hely raha vitako amy fanompoan̈a, Jehovah ravoravo fo.” Lera anao rivan̈a, tsarova fa Jehovah miaraka aminao. Iritrireta raha nataony apostoly Paoly ke aleva onon̈o volan̈a mankahery nivolan̈iny ty: ‘Mamparavoravo zaho fahalimian̈anaka. ... Lera zaho malemy, aminin̈y edy zaho matanjaka.’—2 Kor. 12:10.

18. Ino raha sarotro mare mahazo olo sasany?

¹⁸ Misy problemo hafa koa mahazo iro olo man̈ano lomoay mandeha amy fiain̈ana io. Mety manan̈a problemo manokan̈a iro, ke mety tsy hazava aminolo ino mahazo iro. Misy amindro io malemy troko na miasaloha mare, ke raha zen̈y efa manjary aretin̈y. Nan̈ino ma iro panompony Jehovah ten̈a tiany aby io miaritry raha sarotro karaha zen̈y? Fotony izikoa olo araiky folaka tan̈ana, na misy antsa ke aposy amy sezy misy larò, olo jiaby mahita raha iaretany ke miraparapa man̈ampy izy. Tsy karaha zen̈y ndraiky ny raha misy, izikoa olo araiky manan̈a asaloha mare efa mivadiky aretin̈y. Tsy hita ambelan̈a baka raha zen̈y ke tsisy olo hitepô izy. Kanefa olo karaha zen̈y mba mijaly mare, karaha olo folaka tan̈ana na folaka vity.

19. Ino raha ianarantsika baka amy Mefiboseta?

¹⁹ Izikoa misy raha sasany tsy vitanao, na anao mahatsapa fa tsy takatranolo raha mahazo anao, mety hankahery anao ohatrany Mefiboseta. (2 Sam. 4:4) Efa problemo edy izy malemy vity, kanefa mbala nisôsoko problemo hafa koa raha zen̈y, baka tamy fitsaran̈a tsy marin̈y nataony Davida taminany. Tsy baka tamy raha nataony foeky navoazany raha aby zen̈y. Ndray zen̈y, tsy nataony nampalemy troko izy foeky raha niaretany zen̈y. Raha tsara fo nifantohany, ke izy nankasitraka hatsarampan̈ahy naboakany Davida taminany. (2 Sam. 9:6-10) Zen̈y nahavy izy nandiniky tsarabe raha nisy, Davida koa fa nan̈ano fitsaran̈a tsy marin̈y. Tsy nataony Mefiboseta hampiova toetrinany hadisovan̈any Davida. Tsy nan̈amia tsin̈y Jehovah koa izy nohony hadisovan̈any Davida zen̈y. Nifantoko tamy raha mety nataony fo izy, ke nitady fomba fo izy han̈ampian̈a panjaka nifidiny Jehovah io. (2 Sam. 16:1-4; 19:24-30) Nirahiny Jehovah nisoratin̈y amy Baiboly ao  tantarany Mefiboseta hangalantsika fianaran̈a.—Rom. 15:4.

20. Ino vokatrany asaloha mare loatra aminolo sasany? Fa ino raha mety atokisandro?

²⁰ Misy rahalahy ndreky ranabavy masiaka mare koa fa mifandray aminolo, fotony efa mare loatra asalohandro. Mety tsy mahazo ain̈y iro izikoa fa ankilanolo maro, fa iro mbala mandeha man̈aton̈o fivorian̈a ndreky man̈aton̈o fivoriambe fo. Hitandro sarotro mikoran̈a aminolo tsy haindro kanefa iro mbala mandeha manompo fo. Asa anao mba karaha zen̈y? Matokisa fa tsy anao zaraiky karaha zen̈y. Tsarova fa ravoravo Jehovah mahita anao mifen̈y manompo izy amy fô jiaby. Matoa anao tsy man̈eky resy, dikanizen̈y Jehovah mitahy anao ndreky man̈amia angovo ilainao. * (Fil. 4:6, 7; 1 Pet. 5:7) Izikoa anao mbala manompo Jehovah fo ndray anao tsy salama ndreky miasaloha mare, matokisa fa mamparavoravo Jehovah raha zen̈y.

21. Ino raha ho vitantsika jiaby nohony fan̈ampiany Jehovah?

²¹ Maro raha tsy mampitovy lomoay arabakiteny ndreky lomoay nikoran̈iny Paoly. Amy lomoay arabakiteny, olo araiky fo nahazo loka. Fa akory ndraiky lomoay ataony Kristianin̈y io? Zay olo mahatody izio firaka amy farany hahazo loka aby. (Jaona 3:16) Amy lomoay arabakiteny koa, lan̈iany olo salama fo mahazo man̈ano izio. Tsy karaha zen̈y ndraiky amy lomoay kristianin̈y ataontsika io, fotony maro amintsika io tsy salama, kanefa tsy mitsoaka foeky. (2 Kor. 4:16) Hahavita hilomoay fo atsika firaka amy farany, fotony Jehovah man̈ampy atsika!