1. Ino mahavy olo hiasaloha mare? Ino mety ho vokatranizen̈y aminany?

ANAO ma efa navy niasaloha * mare? Mety baka tamy raha nivolan̈inolo na raha nataonolo raha zen̈y. Na mety baka tamy raha nivolan̈inao na nataonao taminolo. Mety nisy hadisovan̈a koa vitanao ke mavozo anao tsao tsy hamafa hadisovan̈anao Jehovah. Fa ny ten̈a ratsy, anao mety hieritreritry fa matoa anao miasaloha be karaha zen̈y, dikanizen̈y anao tsy ampy finoan̈a na olo tsy manjary. Marin̈y ma raha zen̈y?

2. Ino aby ohatra amy Baiboly ahitan̈a fa tsy voatery tsy ampy finoan̈a olo araiky koa miasaloha?

² Alô atsika hizaha ohatra telo baka amy Baiboly ao. Voanalohany: Hana, reniny paminan̈y Samoela. Ten̈a nanan̈a finoan̈a matanjaka izy. Fa nanjary niasaloha mare izy koa fa nampijaliany rafivaviny. (1 Sam. 1:7) Faharoe: Apostoly Paoly. Izy koa mba an̈isanolo ten̈a fatatra finoan̈a, fa izy mbala ‘niasaloha mare momba fiangonan̈a jiaby.’ (2 Kor. 11:28) Fahatelo: Panjaka Davida. Nanan̈a finoan̈a matanjaka izy, ary Jehovah tia izy mare. (Asa. 13:22) Ndray zen̈y, nisy hadisovan̈a nataony Davida, ke nahavy izy niasaloha mare raha zen̈y. (Sal. 38:4) Iro telo io samy nankahireziny Jehovah. Alô zahantsika ino raha ianarantsika baka amindro io.

3. Mety han̈ano akory atsika izikoa misy olo man̈ano volan̈a mahery na tsy avoadiniky amintsika?

³ Izikoa fa misy olo man̈amia vava na volan̈a mahery atsika, mety ho meloko ndreky hahinihiny atsika, intsaka eky izikoa olo io namantsika marikitry na havantsika. Mety havozo atsika tsao ho robaka fihavan̈antsika aminolo io. Ndraiky koa izio volan̈a tsy avoadiniky, ke fontsika mira voatomboko saboa in̈y. (Ohab. 12:18) Misy ndraiky olo kinia man̈ano volan̈a mandratra fô. Zen̈y raha nahazo ranabavy tanora araiky. Ho izy: “Taon̈o vitsivitsy loso zay, nisy olo niritriretiko ho naman̈a, kanefa izy nivolan̈a raha ratsy momba zaho taminy Internet. Nalahelo mare zaho sady niasaloha. Tsy azoko foeky nan̈ino izy nan̈ano raha karaha zen̈y taminaka.” Ino raha ianaranao baka aminy Hana, izikoa nisy namanao na havanao nan̈ano raha nampameloko anao?

4. Ino aby problemony Hana?

⁴ Maro problemony Hana. Izy tsy niteraka. (1 Sam. 1:2) Kanefa tamy kolontsain̈indro Israelita aby io, man̈angy koa tsy miteraka mira olo navoa ozon̈o. Ke Hana nahatsiaro avoabaraka mare. (Gen. 30:1, 2) Sosoko zen̈y koa, Elkana vadiny Hana nampirafy. Penina an̈arany rafivaviny. Penina io niteraka marobe. Tsy vitanizen̈y fo fa nampijaly ndreky ‘nangala baraka i Hana.’ (1 Sam. 1:6) Tamy voanalohany, tsy hainy Hana raha samborin̈y. Nalahelo mare izy ke ‘tsy voly nitomoan̈y sady tsy nahalany hanin̈y’ foeky. (1 Sam. 1:7, 10) Karakory nazahoany Hana fankahirezan̈a?

5. Karakory nataony Hana koa fa nivavaka? Nan̈ino raha zen̈y ten̈a nan̈ampy izy?

⁵ Hana nivavaka, ke nikoran̈iny tamy Jehovah aby raha jiaby nampalahelo izy ndreky nampiasaloha izy. Tafaranizen̈y, nazavainy Hana taminy Ely raha aby zen̈y. Ely io Pisoron̈obe. Ke ho Ely taminany: “Aza mavozo, mindao anao, ary irarian̈a Zan̈ahariny Israely han̈amia raha nangatahinao!” Ino vokany? “Hana baka tio nody tamy tany nisy izy sady nahalany hanin̈y. Hita tamy soranany koa fa izy tsy niasaloha eky.” (1 Sam. 1:17, 18) Vavaka raha nan̈ampy Hana tsy hiasaloha eky.

6. Ino aby raha ianarantsika baka aminy Hana ndreky baka amy Filipianina 4:6, 7?

⁶ Hilamin̈y jerintsika izikoa atsika tsy voly mivavaka. Farandraha nahadin̈y ela eky Hana koa fa nivavaka tamy Jehovah. (1 Sam. 1:12) Mety man̈ano karaha zen̈y koa atsika izikoa fa mikoran̈a amy Jehovah momba  raha mampiasaloha atsika ndreky mampavozo atsika. Mety koran̈intsika aminany koa toetry tsy manjary ndreky fan̈irian̈a ratsy tiantsika hialan̈a. Atsika koa fa mivavaka tsy voatery hampiasa volan̈a mihaja mare na mira tononkalo. Fotony baka, izikoa fa mare loatra raha mahazo atsika, mety hikapokapoko atsika. Mety hitomoan̈y lastio koa atsika. Fa Jehovah tsy empaka foeky mitandren̈y atsika. Tsara alaintsika onon̈o fo torohevitriny Paoly amy Filipianina 4:6, 7. (Vakia) Hita ao fa tsy raha manahiran̈a fo hikoran̈intsika koa fa mivavaka, fa mety man̈ano mersy Jehovah koa atsika. Maro raha mety han̈anovantsika mersy izy. Fotony nan̈ino? Baka aminany fahin̈anantsika. Maro tsara koa raha niasainy. Na ino na ino raha mandalo, tiany fo atsika. Iô koa raha tsara hantin̈aintsika aminy hoavy. Asa mbala misy raha hafa ianarantsika baka aminy Hana?

7. Zatra nandeha taia ma Hana?

⁷ Marin̈y ndraiky fa maro problemony Hana, fa izy zatra nandeha ta Silo tamy tran̈o fivavahan̈a tamy Jehovah, niaraka taminy Elkana vadiny. (1 Sam. 1:1-5) Efa tamy tran̈olay tan̈y i Hana vo nahazo fampahirezan̈a baka taminy Ely Pisoron̈obe. Ely tamy zen̈y nivolan̈a taminany fa Jehovah hamaly vavaka nataony.—1 Sam. 1:9, 17.

8. Amy karakory ma fan̈aton̈ana fivorian̈a ten̈a man̈ampy atsika?

⁸ Hilamin̈y sain̈intsika izikoa atsika mazoto mivory. Amy vavaka fanombohan̈a amy fivorian̈a, rahalahy man̈ano vavaka io mangataka fan̈ahiny Zan̈ahary. Izio hampilamin̈y jerintsika, fotony fiadan̈ana an̈isany vokatrany fan̈ahy io. (Gal. 5:22) Izikoa atsika mivory fo ndray maventy karakory problemontsika, atsika man̈ambela Jehovah ndreky iro piaramanompo aby io mankahery ndreky man̈ampy atsika, ke tsy hitotòko foeky atsika. Vavaka ndreky fivorian̈a fomba aroe maventy hankahirezany Jehovah atsika. (Heb. 10:24, 25) Ino koa raha hafa ianarantsika baka aminy Hana?

9. Izio ma nafaka tio ny iô problemony Hana? Ino raha nan̈ampy izy?

⁹ Izio ma nafaka tio ny iô problemony Hana? Ehe. Izy koa fa nimpody baka tamy tran̈olay masin̈y tan̈y, izy mbala tran̈o araiky tamy Penina rafivaviny. Ary Penina mbala nampijaly izy fo. Fa i Hana efa tsy niasaloha be karaha taloha in̈y eky. Ino raha nan̈ampy izy? Napetrany tampelatan̈any Jehovah raha nanahiran̈a izy, ke nilamin̈y jerinany. Nambelany hankahery ndreky han̈ampy izy Jehovah. Izikoa fa nandeha fotoan̈a, nivaliany Jehovah vavaka nataony Hana in̈y, ke izy namiany zanaka.—1 Sam. 1:19, 20; 2:21.

10. Ino raha ianarantsika baka aminy Hana?

¹⁰ Hilamin̈y fo koa sain̈intsika ndray mbala iô problemontsika. Ny raha misy baka, ndray atsika fa mivavaka mare ndreky mivory tsy tapaka, problemontsika aby io mety mbala iô fo. Fa ino raha ianarantsika baka taminy Hana in̈y? Tsisy raha mahavita misakana Jehovah tsy hankahery atsika, izikoa imboantsika izy han̈ano zen̈y amintsika. Jehovah tsy mety han̈adin̈a atsika, ke ndray ho ela ndray ho malaky, izy han̈amia hatsaran̈a atsika fo izikoa atsika tsy mivadiky.—Heb. 11:6.

11. Ino aby antony mety nampiasaloha Paoly?

¹¹ Maro raha mety nampiasaloha Paoly. Izikoa fa nisy raha navoa iro piaramanompo taminany aby io, niasaloha mare izy, fotony iro io tiany. (2 Kor. 2:4; 11:28) Izy koa fa nitory, izy nitoherinolo. Izy tsy basiny nipopohindro fo fa nigadraindro lastio. Maro koa raha  sarotro nandalovany. Nisy fotoan̈a izy sahiran̈a vo nahita hanin̈y nihoaniny. (Fil. 4:12) Tsy vitanizen̈y fo fa mety niasaloha koa izy isaka hitsaka ranomasin̈y, fotony nisy fotoan̈a sambo niondranany dobo. (2 Kor. 11:23-27) Ino raha nan̈ampy Paoly?

12. Ino raha nampakirikiry asalohany Paoly?

¹² Niasaloha mare Paoly izikoa fa nisy raha sarotro nandalo tamindro piaramanompo aminany aby io, fa izy tsy nitoron̈o angovonany hamahan̈a problemo aby zen̈y. Nanetry ten̈a izy ke nangataka fan̈ampian̈a. Tsy nisalasala foeky izy nizara andraikitry tamindro antipan̈ahy atokisan̈a aby io, karaha ataony Timoty ndreky Titosy. Azo antoko fa nampakirikiry asalohany Paoly raha zen̈y.—Fil. 2:19, 20; Tit. 1:1, 4, 5.

13. Akory mety hangalany antipan̈ahy tahaka raha nataony Paoly?

¹³ Mangataha fan̈ampian̈a. Be fitiavan̈a koa iro antipan̈ahy aminandra izioty, ke miasaloha iro izikoa fa misy raha mahazo olo amy fiangonan̈a. Fa ny raha misy, tsy ho vitany antipan̈ahy araiky han̈ampy olo jiaby amy fiangonan̈a, fotony voafetra raha mety ho vitany. Manetry ten̈a karaha Paoly izy, izikoa tsy misalasala mangataka fan̈ampian̈a aminy antipan̈ahy hafa. Azony atao koa mampiofan̈a rahalahy tanora han̈ampy izy hikarakara ondrikondriky Zan̈ahary.—2 Tim. 2:2.

14. Tsy niasaloha taminino Paoly? Ino raha ianarantsika baka amy zen̈y?

¹⁴ Ikia fa mila ampahirezin̈y anao. Nanetry ten̈a Paoly, ke tsy nisalasala izy nitady fan̈ampian̈a ndreky nan̈eky hampian̈a. Maro olo nihevitry fa olo malemy fo mangataka fan̈ampian̈a zen̈y. Tsy nampiasaloha Paoly foeky na ny hely fihiveranolo izy karaha zen̈y. Karaha ty ho izy tamy taratasy nisoratiny tamy Filemona: “Ten̈a namparavoravo ndreky nankahery zaho naharen̈y fomba nan̈aboahanao fitiavan̈a.” (Filem. 7) Nanon̈ono an̈aranolo sasany nankahery izy mare Paoly, intsaka eky taminizy nandalo raha sarotro. (Kol. 4:7-11) Izikoa atsika man̈eky fa mila ampahirezin̈y, ho ravoravo iro piaramanompo amintsika aby io han̈ampy atsika.

15. Ino raha nataony Paoly, izy koa fa niatriky raha sarotro?

¹⁵ Ianara Volan̈a Zan̈ahary. Paoly ten̈a resy lahatra fa nankahery izy Volan̈a Zan̈ahary. (Rom. 15:4) Izio nan̈amia izy fahendrena taminizy niatriky raha sarotro.  (2 Tim. 3:15, 16) Paoly koa fa nigadrain̈a fan̈indroeny, hainy fa tsy ela izy hofoaty. Tsy mora taminany niatriky zen̈y, fa ino raha nataony? Hoizy tamy Timoty: ‘Lera anao mandeha atỳ, mba indesa aminaka kony horonamboky aby in̈y.’ (2 Tim. 4:6, 7, 9, 13) Ino antony? Mety an̈isany Soratra Hebreo donko iro horonamboky aby io, ke nampiasainy taminizy nan̈ano fianaran̈a manokan̈a. Mangala tahaka Paoly koa atsika, izikoa mazoto mianatra Volan̈a Zan̈ahary. Izio ampiasainy Jehovah hankahirezan̈a atsika, intsaka eky lera misy problemo maventy.

16. Ino raha tsapany Davida, izy koa fa nan̈ano fahotan̈a maventy?

¹⁶ Davida nan̈ano fahotan̈a maventy. Izy nijangajanga tamy Batseba, baka io nivoneny foeky vadiny Batseba. Tsy zen̈y fo fa mbala nasitriny koa raha aby zen̈y. (2 Sam. 12:9) Tamy voanalohany, nan̈ano sary tsy taitry foeky izy ndray fa ninjehiny eritreritrinany. Fa raha zen̈y nandrobaka fifandraisany tamy Jehovah. Niasaloha loatra izy tamy farany ke izy nanjary kivy mare, ndraiky narary foeky! (Sal. 32:3, 4) Ino raha nan̈ampy Davida, baka io ino koa raha han̈ampy atsika izikoa atsika nan̈ano fahotan̈a maventy?

17. Ino amy volan̈a Davida amy Salamo 51:1-4 io ahitan̈a fa Davida ten̈a nanen̈iny?

¹⁷ Mangataha familankeloko. Davida nivavaka tamy Jehovah. Nanen̈iny mare izy, ke nikoran̈iny tamy Jehovah aby raha ratsy nataony. (Vakia Salamo 51:1-4.) Nan̈ampy izy tsy hiasaloha ndreky ho ravoravo ndraiky raha zen̈y. (Sal. 32:1, 2, 4, 5) Izikoa anao nan̈ano fahotan̈a maventy, aza asitriky. Mivavaha ke koràn̈a amy Jehovah raha zen̈y. Hahivankivan̈a anao izikoa man̈ano zen̈y, fotony hilamin̈y eritreritrinao. Fa izikoa anao tihihavan̈a tsara amy Jehovah ndraiky, misy raha hafa koa tsy maintsy ataonao.

18. Nan̈ano karakory Davida koa fa nanarin̈y?

¹⁸ Mifen̈a han̈eky fan̈anaran̈a. Jehovah koa fa nan̈iraka paminan̈y Natana hampatontohitry Davida tamy fahotan̈a vitany in̈y, Davida tsy nankamarinten̈a. Tsy nankamorainy koa hadisovan̈anany. Tontohitry izy fa tsy taminy Oria fo izy nanota fa tamy Jehovah koa. Davida nan̈eky nanariny Jehovah, ke Jehovah nan̈ambela hadisovan̈anany. (2 Sam. 12:10-14) Atsika koa nahavita fahotan̈a  maventy, mila mikoran̈a amindro antipan̈ahy aby io, fotony iro io nitindreny Jehovah hikarakara atsika. (Jak. 5:14, 15) Atsika tsy tokony hankamarinten̈a. Izikoa atsika tsy mirekireky man̈eky ndreky man̈araka anatra, tsy mahadin̈y ela aby atsika efa hilamintsain̈y ndreky ho ravoravo edy.

19. Tokony ho tapakevitry han̈ino ma atsika?

¹⁹ Ataova raha hampatapakevitry anao tsy han̈ampodipody hadisovan̈a. Hainy Davida fa izikoa izy tsy tihan̈ampody hadisovan̈anany taloha in̈y, izy mila mangataka fan̈ampian̈a amy Jehovah. (Sal. 51:7, 10, 12) Jehovah koa fa nan̈ambela hadisovan̈anany in̈y, tapakevitry mare Davida tsy hanan̈a eritreritry tsy manjary eky. Ino vokany? Nanjary nilamin̈y sain̈inany.

20. Akory an̈aboahantsika fa ten̈a mankasitraka Jehovah man̈ambela hadisovan̈a atsika?

²⁰ Jehovah ten̈a man̈ambela hadisovan̈a. Fa akory an̈aboahantsika fa ten̈a mankasitraka toetrinany zen̈y atsika? Mivavaha, areha fan̈anaran̈anany, baka io miezaha tsy han̈ampody hadisovan̈antsika in̈y eky. Izikoa atsika man̈ano zen̈y, hilamin̈y ndraiky jerintsika. Karaha ty nikoran̈iny James, rahalahy araiky nan̈ano fahotan̈a maventy: “Zaho koa fa nikoran̈a momba fahotan̈a io taminy antipan̈ahy, karaha nisy raha mavesatra be nadoso taminaka. Nanomboko tio nilamin̈y jerinaka.” Ten̈a mankahery mahay fa “Jehovah marikitry olo torotoro fô, ary izy mamonjy lan̈iany olo kivy.”—Sal. 34:18.

21. Akory an̈aboahanao fa anao man̈eky hankahireziny Jehovah?

²¹ Arakaraka mamparikitry farany donia ty, mahaimaro fo raha mety hampiasaloha atsika. Izikoa anao mandalo raha sarotro mare, aza mirekireky mangataka fan̈ampiany Jehovah. Ianara tsarabe koa Baiboly. Aleva tahaka raha nataony Hana, Paoly ndreky Davida. Mivavaha amy Jehovah, amy zay ho hainao nan̈ino anao miasaloha be karaha io. (Sal. 139:23) Ankìn̈a aminany problemonao, baka io ambilà izy han̈ampy anao, intsaka eky izikoa fa nitady hevitry anao fa tsy navoavahanao izio. Izikoa anao man̈ano zen̈y, hitovy amy panoratra salamo ty fihetsehamponao. Ho izy taminy hira nisoratiny: “Izikoa fa nahainaro raha nampiasaloha zaho, anao nankahery zaho ndreky namparavoravo fonaka.”—Sal. 94:19.