Zaho teraka tamy Tanànany Québec. Mbala an̈atiny provainsiny Québec, a Kanada, misy izio. Miteny fransay olo an̈y. Louis an̈arany papako, fa an̈arany mamako ndraiky Zélia. Iro ten̈a tia zaho. Papako olo tsy dia maro koran̈a. Izy koa tia mamaky boky. Farandraha tiako eky manoratra, ke zaho nieritreritry hanjary pan̈ano gazety andra araiky an̈y.

Tamy zaho 12 taon̈o, nisy olo niaraka niasa tamy papako namangy zahay. Rodolphe Soucy an̈arany. Izy tamy zen̈y niaraka tamy namany. Vavolombelon̈o Jehovah iro io. Zaho tamy zen̈y tsy nahay raha momba Vavolombelon̈o Jehovah, ary tsy nahasôfy zaho foeky fivavahan̈andro. Fa ny raha nanaitry zaho tamindro, fahaizandro nampiasa Baiboly izikoa fa namaly fan̈ontanian̈anay. Ndray iry olobeko mba karaha zen̈y koa, ke zahay nan̈eky hianatra Baiboly.

Zaho tamy zen̈y nianatra tamy lycée katoliky. Misy lerany zaho mba tafikoran̈a tamindro tsaiky lekoly araiky taminaka aby tao, momba raha nianarako tamy Baiboly. Ren̈indro papianatranay aby io raha zen̈y tafara tatỳ, ke nan̈ajima mare iro. Tsy lanilanindro baka raha nivolan̈iko, ke zaho nataondro maditry ndreky mierin̈y olo, kanefa raha zen̈y tsy marin̈y aby. Nata iro tsy nampiasa Baiboly foeky nanohitry raha nivolan̈iko, kanefa iro amy zen̈y mompera! Marin̈y ndraiky fa setry mare zaho tamy zen̈y, fa nisy nahatsara izy fo raha nataondro in̈y. Hitako baka tamizin̈y fa ten̈a tsy fan̈araka amy Baiboly ankitin̈y raha ampianarindro momba fivavahan̈a. Tontohitry zaho fa nila nifindra lekoly. Nikeniry olobeko raha zen̈y.

Nitohizako fianaran̈a Baiboly, fa zaho fo tsy nety nandroso fotony zaho navozo nitory isaka tran̈o. Tamy zen̈y farandraha masinteny taminolo eky raha volan̈iny leglizy. Kanefa leglizy katoliky taminio nanohitry  zahay mare. Tsy vitanizen̈y fo fa Maurice Duplessis, premie ministriny Québec taminio, nanohan̈a leglizy mare. Ke izy nitaon̈o vahoaka han̈enjiky ndreky hampijaly Vavolombelon̈o Jehovah. Ten̈a nila nisy korazy kony tamy zen̈y izikoa fa hitory!

Nisy rahalahy nahazo diplomy tamy sekoliny Gileada zay ten̈a nan̈ampy zaho tsy havozovozo. John Rae an̈arany. Mahay mitory rahalahy zen̈y! Izy koa tsara fan̈ahy, manetry ten̈a, sady mora aton̈iny. Mahalan̈a ndraiky izy nan̈itsy zaho, fa nianarako raha maro ohatra tsaranany. Tsy dia nahay teny fransay John, ke zaho nitatahy izy. Niaraka nitory matetiky koa zahay, ke ten̈a nan̈ampy zaho han̈iry hanjary Vavolombelon̈o Jehovah raha zen̈y. Folo taon̈o tafarany nifanojoako voanalohany tamy Vavolombelon̈o Jehovah, zaho natao batisa, tamy 26 May 1951.

Presky pisava lalan̈a aby pitory tamy fiangonan̈a hely nisy zahay tamy Tanànany Québec. Modely nambelandro ten̈a nandrisiky zaho. Tamy zen̈y, Baiboly fo nampiasainay koa fa nitory, ke tsy maintsy niezaka zahay baka nahay nampiasa izio tsarabe. Nianatra andininteny maromaro koa zaho baka hahavita hiaro fahamarin̈ana. Ndray zen̈y, maro olo tsy nan̈eky hamakian̈a andininteny fotony Baibolinay tsisy lamariky man̈ambara fa nikeny Leglizy Katoliky.

Taminy 1952 natao mariazinay roeny Simone Patry, ranabavy fiangonan̈a araiky taminay. Ten̈a tia Jehovah izy. Taloha heliny vadian̈anay io, zaho niala pisava lalan̈a, fa zahay nifen̈y fo hanan̈a fiain̈ana tsotra. Nan̈ampy zahay hifantoko tamy fanompoan̈a raha zen̈y. Taon̈o araiky tafarany vadian̈anay, teraka i Lise, zanakanay man̈angy.

Tihimpody han̈ano pisava lalan̈a ndraiky zaho koa fa nafaka folo taon̈o. Nandeha nan̈ano Sekolin’ny Fanompoana Ilay Fanjakana natao niny antipan̈ahy zaho taminy 1962. Tamy Betelany Kanada nan̈anovan̈a izio, ary nahadin̈y fanjava araiky izio. Rahalahy Camille Ouellette sambra araiky taminaka. Ten̈a nampiafatra zaho rahalahy io, fotony izy manambady amanjanaka kanefa ten̈a mazoto manompo. Tamy zen̈y, sasatra anao maharen̈y olo ta Québec teto mananjanaka ke pisava lalan̈a zen̈y! Kanefa zen̈y edy tanjon̈ony Camille. Nampirisihiny handiniky tanjon̈onaka koa zaho. Ke fanjava vitsivitsy tafaranizen̈y, nimpody nan̈ano pisava lalan̈a ndraiky zaho. Maro olo nivolan̈a zaho tamy zen̈y, fotony nataondro tsy nandiniky tsara zen̈y zaho nanapakevitry. Fa  zaho tsy rivan̈a, fotony haiko fa Jehovah han̈ampy zaho fo.

Taminy 1964 zahay navoatendry pisava lalan̈a manokan̈a tamy tany favianay, tamy Tanànany Québec. Tao fo zahay nanompo tan̈atiny taon̈o maro. Efa kirikiry fan̈injehan̈a tamy zen̈y, fa mbala nisy olo nanohitry fo.

Tandraraiky, sabotsy folakandra tamy zen̈y, nisamboriny polisy zaho ta Sainte-Marie, tanàna hely araiky tsy lavitry Tanànany Québec. Nafodindro tamy prizon zaho fotony nitory isaka tran̈o kanefa tsy nahazo lalan̈a. Baillargeon, an̈arany pitsara tokony hitsara zaho tamy tribinaly. Malaza masiaka eky pitsara io. ‘Azovy avôkànao?’ ho izy nan̈ontany. Ho zaho taminany: “Glen How.” * Izio avôkàny Vavolombelon̈o Jehovah tamy zen̈y, ary mafy koa, ke ho pitsara io taminaka: “Azalà! Efa i Glen koa?” Navosotrondro foeky zaho tafaranizen̈y, baka io nifoan̈any fitsaran̈a fitarain̈ana jiaby momba zaho.

Tsy nora nahita tran̈o fondroen̈a hatao tran̈o fivorian̈a ta Québec, fotony nisy nanohitry asa fitorian̈a ataontsika. Garazy efa kaikay zay fo hitany fiangonan̈anay, kanefa raha io amy zen̈y tsisy chauffage na raha mampafana tran̈o lerany ririnin̈y manintsy be in̈y. Ke zahay nampiasa chauffage mandeha amy gazoaly. Alohany fivorian̈a nanomboko, nipetraka mikodidin̈y raha io antsendriky zahay an̈atiny lera vitsivitsy, mikoran̈a raha mampahery.

Ravoravo anten̈a mahita vokatra tsara azo baka aminy asa fitorian̈a. Mbala vitsy fo fiangonan̈a tamy Tanànany Québec tamy taon̈o 1960 tan̈y, karaha ataony tamy faritry Côte-Nord, ndreky tamy Tsekinosiny Gaspé mitambatra. Amy zioty ndraiky, efa mahaforon̈o faritry mandilatrany aroe lastio fiangonan̈a aby an̈y. Ravoravo mare koa iro rahalahy aby io mivory amy Tran̈o Fivorian̈a tsara.

Navoatendry piandraikitry faritry zaho taminy 1970, baka io nanjary piandraikitry vondroparitry taminy 1973. Tan̈atiny fotoan̈a jiaby zen̈y, maro raha nianarako tamindro rahalahy matotro, karaha ataony Laurier Saumur * ndreky David Splane. * Iro io tamy zen̈y samy pitety faritany. Fombanay roeny David mifampizara sosokevitry isaka mahavita fivoriambe, nindesinay nankatsara fomba fampianaranay. Azoko onon̈o tandraraiky David nivolan̈a taminaka: “Ren̈inao Léonce, tiako kabaro farany nataonao in̈y! Ten̈a tsara, fa izin̈y nahavitako kabaro telo aby.” Marin̈y zen̈y. Zatra nan̈azava raha maro loatra baka zaho, ke tsy maintsy nianatra nifantoko taminy hevitry maventy.

Piandraikitry vondroparitry manan̈a andraikitry hankahery piandraikitry faritry. Problemo hely fo, presky nahay zaho aby piaramanompo ta Québec, ke tihiaraka taminaka aby iro taminy herin̈iandra io. Farandraha tiako eky zen̈y, fa  antsany hely fo, nanjary tsy ampy fotoan̈a niarahako tamy piandraikitry faritry tokony nitsidihiko io. Ndraiky tafivolan̈a foeky izy tamy farany: “Ren̈inao Rahalahy, tsara ndraiky anao mankahery iro piaramanompo aby io, fa zaho fo kaza adin̈a! Zaho mba mila fankahirezan̈a.” Torohevitry feno fitiavan̈a zen̈y ten̈a nan̈ampy zaho hahay handanjalanja.

Nisy raha nampalahelo sady tampoko, nandalo taminy 1976. Narary fatatra i Simone, ke naty. Ten̈a vady tsara izy fotony izy tsy tia ten̈a, ary ten̈a tia Jehovah. Fa nifen̈y fo zaho nan̈ano be erakany vitako tamy fanompoan̈a, ke zen̈y nan̈ampy zaho tsy ho kivy loatra. Mankasitraka Jehovah koa zaho, fotony tsapako fa nohony fan̈ampiany zaho nahavitako niatriky izin̈y. Koa fa nandeha fotoan̈a, nan̈ano mariazy zahay roeny Carolyn Elliott, ranabavy pan̈itatra faritany mazoto ta Québec. Teny angiley ten̈a volan̈a fampiasainy. Carolyn ten̈a mora aton̈iny ndreky tia mankahery olo, intsaka eky olo misy hen̈amaso na mitokantokan̈a. Izy ten̈a nan̈ampy zaho nan̈ano asa fititezan̈a faritany.

Tamy Zanvie 1978, zaho nirahin̈y hampianatra tamy Sekoliny Fanompoan̈any Pisava Lalan̈a voanalohany ta Québec. Fombo zaho tamy zen̈y, fotony zaho tsiary nan̈ano sekoly io, ary zaho koa tsiary nahita boky fampiasain̈a tamizio. Nahatsara izy, iro tamy kilasy voanalohany io tao presky pisava lalan̈a zadraharaha aby. Marin̈y fa zaho papianatrandro, fa mbala maro raha nianarako tamindro.

Tafaranizen̈y, nisy Fivoriambe Iraisampirenen̈a tamy taon̈o 1978, tamy Stady Olaimpikiny Montréal. Fotokevitrinany: “Finoan̈a io Mandresy.” Maro zahay tamy zen̈y. Mandilatra 80 000 pan̈atriky. Zaho tamy zen̈y navoatendry hikoran̈a momba fivoriambe io tamy pan̈ano vaovao ndreky zornalisty. Ten̈a namparavoravo naharen̈y iro mikoran̈a raha tsara momba atsika. Nisy  fan̈adikadin̈ana nataondro taminay, na tamy tele zen̈y na tamy radio, ke mandilatra 20 lera fitambarany fotoan̈a lany tamy zen̈y. Anjatony koa lahatsoratra naboakandro momba atsika. Nandeha mare fitorian̈a tamy zen̈y!

Nisy fivoandraha maventy nandalo taminy 1996. Rango tamy zaho vita batisa, tamy faritany miteny fransay ta Québec fo nan̈irahan̈a zaho, fa niova raha zen̈y. Nanjary piandraikitry vondroparitry tamy provainsiny Toronto zahay. Angiley volan̈anolo tao. Navozo zaho han̈ano kabaro fotony zaho tsy nahay teny angiley tsarabe. Nila nivavaka matetiky tamy Jehovah zaho sady nilampy taminany.

Setry mare zaho tamy voanalohany, fa kanefa, an̈isany fotoan̈a ten̈a tiako nanompo tamy faritry Toronto io, tan̈atiny taon̈o aroe zay. Carolyn nan̈ampy zaho nianatra angiley. Izy ten̈a maharidraha. Iro rahalahy aby io koa ten̈a nan̈ampy ndreky nankahery zaho. Tsy ela, nanjary nanan̈a naman̈a vaovao marobe zahay.

Izikoa fa an̈atiny herin̈iandrany fivoriambe, maro asa ndreky fan̈oman̈ana mila natao. Fa nifen̈y fo zaho nitory lera araiky iô, joma hariva. Misy olo nivolan̈a: ‘Anao efa sahiran̈a be amy fivoriambe io mbala mandeha mitory fo?’ Ny marin̈y aminany, ten̈a mankahery zaho mikoran̈a aminolo tihahay ny marin̈y momba Jehovah. Nanjary farandraha tiako eky mitory, firaka izioty.

Taminy 1998, zahay roeny Carolyn navoatendry pisava lalan̈a manokan̈a ta Montréal. Tan̈atiny taon̈o maro zay, an̈isany andraikitrinaka mandamin̈y fitorian̈a amy tany maro olo ndreky miaraka miasa amindro pan̈ano gazety, fotony maro olo diso hevitry momba Vavolombelon̈o Jehovah. Ravoravo zahay ndreky Carolyn mitory aminolo mifindra a Kanada, ary maro amindro io tihianatra Baiboly.

Efa ho 68 taon̈o zay nanompoako Jehovah, fa ny raha tsapako, maro hatsaran̈a nazoko. Ravoravo zaho fotony nianatra nankafỳ fanompoan̈a, baka io nan̈ampy olo maro hahay ny marin̈y. Ravoravo koa zaho fotony mbala mazoto mitory ndreky mampianatra Lise, zanako man̈angy in̈y. Nanjary pisava lalan̈a maharitry iro roeny vadiny koa fa be zanakandro. Mankasitraka iro piaramanompo aby io koa zaho fotony iro ten̈a ohatra tsara. Torohevitry tsara baka tamindro koa nan̈ampy zaho hifandray tsarabe tamy Jehovah ndreky hanompo izy tamy fomba isankarazany. Ny raha hitako, ho vitantsika fo han̈ano raha an̈irahany fandaminany Jehovah atsika izikoa atsika mangataka fan̈ahy masin̈y amy Jehovah, fotony izio mahery. (Sal. 51:11) Mbala man̈ano mersy Jehovah fo zaho fotony zaho namezany tombontsoa maventy, tsy ino zen̈y fa midera an̈aranany.—Sal. 54:6.