LAHATSORATRA FIANARAN̈A 10
Fitiavan̈a Jehovah Mahavy Olo Araiky Tihan̈ano Batisa
“Ino tamban̈a tsy han̈anovan̈a batisa zaho?”—ASA. 8:36.
HIRA 37 Hanompo Anao Amin’ny Foko Manontolo Aho
HO HITA ATO *
1-2. Izikoa Asan’ny Apostoly 8:27-31, 35-38 zahan̈a, ino nahavy manampahifan̈a etiopiain araiky tihan̈ano batisa?
ANAO ma tihan̈ano batisa ke hanjary pianatrany Kristy? Fitiavan̈a Jehovah ndreky fankasitrahan̈a raha nataony mahavy olo araiky tihan̈ano batisa. Karaha zen̈y zioty manampahifan̈a etiopiain araiky koran̈iny Baiboly ao. Alô baka zahavantsika tantaranany.
2 Lelahy io koa fa nianatra Soratra Masin̈y ke hainy raha tokony hataony, direkty izy nan̈ano raha nifan̈araka tamy raha nianarany. (Vakia Asan’ny Apostoly 8:27-31, 35-38.) Nisy kontiny taminany Volan̈a Zan̈ahary, matoa izy namaky bokiny Isaia, taminizy tan̈atiny saretinany tao. Filipo koa fa nitory taminany, nanjary hainy manampahifan̈a io raha nataony Jesosy han̈avotan̈a izy, ke ten̈a raha maventy taminany koa raha zen̈y. Baka ta Jerosalema izy taminio. Handeha hanompo Jehovah ten̈a diany tan̈y. Evandraha nialany lelahy etiopiain io fivavahan̈a nahatombo izy, ke izy nifidy hanompo Jehovah, Zan̈ahary marin̈y nitompoeny firenenany Israely. Ten̈a tia Jehovah ankitin̈y izy! Izy baka tio natao batisa ke nanjary pianatrany Kristy. Mbala baka tamy fitiavany Jehovah fo koa nahavy izy nan̈ano fanapahankevitry maventy be io.—Mat. 28:19.
3. Ino raha mety hanamban̈a olo araiky tsy hatao batisa? (Zahava “ Tany Karakory ma Miran̈a amy Fonao?”)
3 Fitiavan̈a Jehovah mahavy anao han̈iry hatao batisa. Fa fitiavan̈a lafamỳ ndreky kamarady tsy manompo Jehovah ndraiky mety hanamban̈a anao tsy hatao batisa. Nan̈ino ma? Anao koa baka midaon̈o tsao ho halandro, anao mety havozo han̈ano batisa. (Mat. 10:37) Na mety misy raha ankafizinao mare kanefa tsy tiany Zan̈ahary. Mety ho sarotro aminao tsy han̈ano raha aby zen̈y. (Sal. 97:10) Na koa, mety ho zatra nan̈araka fomba misy ifandraisany amy fivavahan̈a diso anao rango mbala hely, ke tianao mare mangala onon̈o sovenira tsara aby tamy zen̈y. Manjary sarotro aminao tsy han̈ano fomba aby io eky, ndray iro io efa hainao fa tsy tiany Jehovah. (1 Kor. 10:20, 21) Izikoa zen̈y raha mahazo anao, man̈ontania ten̈a karaha ty: “Ino ma raha ten̈a tiako?” na “Azovy ma ten̈a tiako?”
AZOVY MA TEN̈A TOKONY HO TIANAO?
4. Ino antony ten̈a maventy tokony hahavy anao han̈ano batisa?
4 Mety maro raha tianao ndreky ankafizinao. Ndray taminy anao mbala tsendriky nianatra Baiboly, anao mety efa ten̈a tia Soratra Masin̈y ndreky tia Jesosy. Nanjary ankafizinao mare koa miaraka amy Vavolombelon̈o Jehovah, anao koa fa nianatra Baiboly niaraka tamindro. Nanjary hainao tsarabe azovy marin̈y iro io. Fa fitiavanao raha aby zen̈y tsy ampy handrisiky anao hanokanten̈a amy Jehovah ndreky hatao batisa. Ino ma antony voanalohany ndreky ten̈a maventy tokony hahavy anao han̈iry hatao batisa? Fitiavanao Jehovah. Izikoa Jehovah ny ten̈a tianao, tsisy raha tokony hambelanao hisakana anao tsy hanompo izy, na olo zen̈y, na raha, na ino na ino. Fitiavanao Jehovah handrisiky anao han̈ano batisa, ndreky han̈ampy anao tsy hivadiky aminany foeky.
5. Ino aby raha hidinihintsika ato?
5 Jesosy nivolan̈a fa atsika mila tia Jehovah amy fontsika jiaby, ndreky vatan̈antsika jiaby, ndreky jerintsika jiaby, baka io aminy angovontsika jiaby. (Mar. 12:30) Akory hahavy anao ho tia Jehovah ndreky han̈aja izy tsarabe? Aleva onon̈o fo fa anao io ten̈a tiany ankitin̈y. (1 Jaona 4:19) Hidinihintsika ato sosokevitry han̈ampy atsika hahay raha tokony hataontsika baka hitombo fitiavantsika Jehovah, ke ho von̈ono hatao batisa atsika. *
6. Izikoa Romanina 1:20 zahan̈a, ino fomba araiky ahaizanao Jehovah?
6 Diniha raha niasainy Jehovah fotony zen̈y han̈ampy anao hahay izy. (Vakia Romanina 1:20; Apok. 4:11) Izikoa anao mandiniky iro biby ndreky raha maniry aby io, ho hitanao fa Jehovah io Zan̈ahary hendry ankitin̈y. Diniha baka fomba niasany Zan̈ahary vatan̈anao, fa ten̈a maharikian̈a. (Sal. 139:14) Asa efa niritriretinao karakory habezan̈a angovo nataony Jehovah amy masoandra? Kanefa masoandra io mbala araiky amy lakintan̈a mandeha miliara miliara andan̈itry an̈y. * (Isaia 40:26) Hahaihan̈aja Jehovah fo koa anao, izikoa fa mandiniky raha niasainy aby zen̈y. Ten̈a ilainao mahay fa Jehovah hendry ndreky mahery, fa zen̈y tsy ampy. Izikoa tianao hitombo fo fitiavanao izy, anao mila manohy mianatra raha momba izy. Hanjary kamaridiny koa anao izikoa man̈ano zen̈y.
7. Mila resy lahatra aminino anao izikoa tianao hitombo fitiavanao Jehovah?
7 Anao mila resy lahatra fa Jehovah ten̈a tia anao. Mety tsy ho mora aminao zen̈y, fotony anao mety mieritreritry fa Zan̈ahary niasa lan̈itry ndreky tany io tsy mijery anao na tsy tia anao foeky. Kanefa aza adin̈a fa Jehovah io “tsy lavitry atsika tsiaraikiaraiky.” (Asa. 17:26-28) Izy ‘mandiniky fô jiaby’, ke mampan̈anten̈a izy fa ‘izikoa anao mitady izy, hataony raha hahitanao izy.’ (1 Tan. 28:9) Matoa anao iziô mianatra Baiboly, dikanizen̈y anao nitahominy Jehovah. (Jer. 31:3) Hahaiho tia izy fo anao izikoa hainao ino aby raha nataony ndreky raha mbala hataony aminao.
8. Akory han̈aboahanao fa ten̈a ankasitrahanao fitiavany Jehovah anao?
8 Vavaka an̈isany fomba araiky han̈aboahanao fa ten̈a ankasitrahanao fitiavany Jehovah anao. Hahaiho tia izy fo anao izikoa koran̈inao aminany raha mampiasaloha anao. Izikoa misy raha tsara nataony taminao, mahaiza mankasitraka ke ataova mersy izy. Hamaly vavakanao Jehovah ke zen̈y hahavy anao tiho kamaradiny. (Sal. 116:1) Ho hitanao fa izy zaraiky fo ten̈a mahay raha mahazo anao. Ino raha han̈ampy anao hifandray marikitry aminany? Mila hainao ino raha tiany ndreky tsy tiany, baka io karakory fomba fan̈anovany raha. Mila hainao koa ino raha tiany hataonao. Tsy ho hainao raha jiaby zen̈y, izikoa anao tsy mianatra Baiboly.
Efa fianaran̈a Baiboly edy fomba ten̈a tsara hahavy atsika hanjary kamaradiny Zan̈ahary ndreky hahay raha han̈irahany atsika (Zahava fehintsoratra 9) *
9. Akory ahitan̈a fa anao tia Volan̈a Zan̈ahary?
9 Ataova raha itiavanao Volan̈a Zan̈ahary. Amy Baiboly ao zaraiky fo misy ny marin̈y momba Jehovah ndreky raha tiany hamian̈a anao. Ho hita fa tia Volan̈a Zan̈ahary anao izikoa mamaky Baiboly isanandra, ndreky mampiasa izio lera anao man̈ano fianaran̈a manokan̈a, baka io mampifan̈araka raha ataonao amy raha nianaranao. (Sal. 119:97, 99; Jaona 17:17) Anao ma efa misy programo famakian̈a Baiboly? Mba mamaky Baiboly isanandra ma anao?
10. Ino an̈isany raha mampiavaka Baiboly amy boky hafa?
10 Maro raha mampiavaka Baiboly amy boky hafa. Araiky amy zen̈y zioty, ao zaraiky fo ahitan̈a tantarany Jesosy tantarainolo ten̈a nahita maso izy. Baiboly fo koa boky mikoran̈a raha marin̈y momba raha nataony Jesosy. Ke izikoa anao mianatra raha nivolan̈iny Jesosy ndreky raha nataony, anao hanjary tiho kamaradiny.
11. Ino koa raha han̈ampy anao ho tia Jehovah?
11 Ataova raha itiavanao Jesosy. Hitombo fitiavanao Jehovah izikoa anao tia Jesosy. Ino antony? Fotony tsisy ny hafa amy toetriny Jehovah toetrinany. (Jaona 14:9) Arakaraka ny ahaizanao Jesosy hahavy anao hahay Jehovah ndreky ho tia izy. Aleva onon̈o baka fahaizany Jesosy mahinakinaka olo masikiny, ndreky olo marary, ndreky olo tsisy piaro tamy zen̈y. Diniha baka torohevitry namiany anao amy Baiboly ao. Tsy hitanao mahatsara anao man̈araka torohevitry aby zen̈y?—Mat. 5:1-11; 7:24-27.
12. Ino vokany izikoa anao mahay Jesosy?
12 Jesosy nan̈ano soron̈o ain̈inany baka atsika hahazo familankeloko. (Mat. 20:28) Hitombo fitiavanao izy, izikoa anao mangala onon̈o raha nataony zen̈y. Fahaizanao zen̈y handrisiky anao hibebaka ndreky hangataka familankeloko amy Jehovah. (Asa. 3:19, 20; 1 Jaona 1:9) Ino vokany izikoa anao manjary tia Jehovah ndreky Jesosy? Hanjary ho tia anao koa lan̈iany olo tia iro.
13. Namiany Jehovah ino ma anao?
13 Tiava lafamìny Jehovah. Mety tsy hazava amy lafamìnao ndreky namanao tsy manompo Jehovah, nan̈ino anao tihanokanten̈a amy Zan̈ahary. Mety hanohitry anao lastio iro. Aza mavozo fa Zan̈ahary han̈ampy anao. Namiany rahalahy ndreky ranabavy amy fiangonan̈a anao, ke iro io koa havanao. Izikoa anao mifandray amindro io, ho azonao fo fitiavan̈a ndreky fan̈ampian̈a tadiavinao. (Mar. 10:29, 30; Heb. 10:24, 25) Ndraindray, izikoa fa mandeha fotoan̈a, mety hanompo Jehovah ndreky han̈araka fitsipikinany fo lafamìnao aby io.—1 Pet. 2:12.
14. Ino vokany izikoa anao fa nan̈araka raha koran̈iny 1 Jaona 5:3?
14 Ataova raha itiavanao fitsipikiny Jehovah ke areha izio. Taminy anao mbala tsendriky nahay Jehovah, lan̈iany raha hitanao fa tsara fo nataonao. Fa iziô ndraiky, hitanao tsarabe fa fitsipikiny Jehovah fo ny ten̈a tsara. (Sal. 1:1-3; vakia 1 Jaona 5:3.) Aleva onon̈o baka torohevitriny Baiboly mandeha aminolo fivadiany, baka io raimandreny ndreky tsaiky. (Efes. 5:22–6:4) Tsy hitanao nahainilamin̈y ndreky nahaisambatra fo anaro izikoa fa nan̈araka torohevitry aby zen̈y? Nirahiny Jehovah hahay hifidy naman̈a koa atsika. Asa mba nan̈ampy anao hanan̈a fahazaran̈a tsara torohevitry zen̈y? Asa mba nampatsara anao izio? (Ohab. 13:20; 1 Kor. 15:33) Hay be fa ia valiny fan̈ontanian̈a jiaby io.
15. Akory tokony hataonao izikoa tsy hainao fomba han̈arehan̈a toro lalan̈a sasany amy Baiboly?
15 Mety tsy ho hainao ndraikindraiky, akory mety han̈arehan̈a toro lalan̈a sasany amy Baiboly ao. Zen̈y mahavy Jehovah mampiasa fandaminan̈anany, han̈amezan̈a anao boky ndreky gazety momba Baiboly. (Heb. 5:13, 14) Izikoa anao mazoto mamaky ndreky mianatra iro io, ho hainao fomba han̈arehanao toro lalan̈a aby zen̈y, ke ho hitanao fa ten̈a mahatsara anao iro io. Zen̈y koa hahavy anao tiho an̈isany fandaminan̈any Jehovah.
16. Akory nataony Jehovah nandamin̈y vahoakanany?
16 Ataova raha itiavanao fandaminan̈any Jehovah baka io tohàn̈a izio. Nalaminy Jehovah hanjary fiangonan̈a vahoakanany, ke Jesosy Zanany nataony lohany fiangonan̈a jiaby. (Efes. 1:22; 5:23) Jesosy nanendry lelahy voahosotro vitsivitsy handamin̈y asa tiany hataontsika. “Panompo atokisan̈a ndreky mahadiniky raha” ikahian̈a iro io amy fitambarany. Andraikitrindro man̈amia hanin̈y arapan̈ahy anao, ndreky miaro fihavanan̈anao amy Jehovah. Mifen̈y mare iro man̈ano andraikitrindro zen̈y amy fomba tsara. (Mat. 24:45-47) Akory ataony panompo io mikarakara anao? Ataony panompo io azo antoko tsarabe fa misy antipan̈ahy mahafeno fepetra voatendry an̈ivony fiangonan̈a, hitaridalan̈a anao ndreky hiaro anao. (Isaia 32:1, 2; Heb. 13:17; 1 Pet. 5:2, 3) Iro antipan̈ahy aby io von̈ono han̈ano zay vitandro hankahirezan̈a anao ndreky han̈ampiana anao hihavana tsara amy Jehovah. Iro io koa han̈ampy anao hahavita hampianatra olo raha momba Jehovah, ke zen̈y an̈isany fomba farany maventy han̈ampiandro anao.—Efes. 4:11-13.
17. Izikoa Romanina 10:10, 13, 14 zahan̈a, ino mahavy atsika mikoran̈a aminolo raha momba Jehovah?
17 Ataova raha itiavanolo Jehovah. Jesosy nan̈iraka pan̈aradia izy hampianatra olo raha momba Jehovah. (Mat. 28:19, 20) Misy olo man̈araka volan̈any Jesosy zen̈y, fa aminy akory atao fo. Fa izikoa fa mitombo fitiavanao Jehovah, hitovy amy raha tsapany apostoly Petera ndreky Jaona ty raha tsapanao. Ho iro: “Izikoa zahay fo, zahay tsy mety ho voly hivolan̈a raha efa hitanay ndreky ren̈inay.” (Asa. 4:20) Miniminia hely baka haravoan̈anao izikoa fa mahavita man̈ampy olo ho tia Jehovah! Asa azonao onon̈o raha tsapany Filipo taminizy nan̈ampy lelahy etiopiain in̈y? Izikoa fa nambarany Filipo izy ny marin̈y amy Soratra Masin̈y ao, lelahy io nanapakevitry han̈ano batisa. Misaora ravoravo Filipo! Fa akory han̈aboahanao fa anao tihanjary Vavolombelon̈o Jehovah? Aleva tahaka raha nataony Filipo, ke areha volan̈any Jesosy man̈iraka atsika hitory in̈y. (Vakia Romanina 10:10, 13, 14.) Anao koa man̈ano zen̈y, han̈ano karaha lelahy etiopiain in̈y koa anao, ke hivolan̈a: “Ino tamban̈a tsy han̈anovan̈a batisa zaho?”—Asa. 8:36.
18. Ino aby fan̈ontanian̈a hivaliantsika amy lahatsoratra man̈araka?
18 Batisa io fanapahankevitry farany maventy ataonao amy fiain̈ananao. Ke alohany anao han̈ano batisa, mila dinihinao antsendriky ino aby raha tafiditry amizio. Ino aby ma raha mila hainao momba batisa? Ino raha tokony hataonao aloha ndreky afarany batisa? Amy lahatsoratra man̈araka atsika mamaly fan̈ontanian̈a aby io.
HIRA 2 Jehovah no Anaranao
^ feh. 5 Misy olo tia Jehovah fa misalasala hatao batisa ke hanjary Vavolombelon̈o Jehovah. Asa anao mba karaha zen̈y? Ho hitanao ato raha sasany han̈ampy anao hatao batisa.
^ feh. 5 Tsy voatery hitovy amy filaharany raha avoakoran̈a ato fomba han̈arehanolo sosokevitry aby ato, fotony olo samby isany.
^ feh. 6 Misy ohatra hafa koa amy bokikely Nisy Namorona ve Izao Rehetra Izao? ndreky Ahoana no Nampisy Antsika? Fanontaniana Dimy Mila Dinihina.
^ feh. 61 FAN̈AZAVAN̈A SARY: Ranabavy araiky man̈amia trakty tsaiky man̈angy mivarotro a bazary.
