1. Ino ma raha nambarany Jesosy momba harian̈a andan̈itry an̈y?

Tsy kila raha valera zay hitany maso aby! Ny marin̈y aminany, misy raha farany valera eky kanefa tsy hitany maso. Tamy Jesosy nan̈ano Toriteny tan̈abony Bongo in̈y, izy nikoran̈a momba harian̈a andan̈itry an̈y. Nivolan̈a izy fa valera mandilatra vola ndreky raha anan̈antsika iro io. Karaha ty koa ho izy: ‘Zay tany misy harian̈anao, an̈y koa fonao.’ (Mat. 6:19-21) Diniha hely baka! Izikoa fa misy raha hiverintsika fa valera, tsy maintsy man̈ano hevitry fo atsika hazahoan̈a izin̈y. Akory basy hamoriantsika “harian̈a andan̈itry an̈y” io? Man̈ano zen̈y atsika izikoa fa mifen̈y hanan̈a laza tsara man̈oloan̈a Zan̈ahary. Izikoa atao volan̈a hafa, mifen̈y fo atsika han̈araka fitsipikinany. Nivolan̈a Jesosy fa izio tsy mety robaka salakady tsy azony pangalatra.

2. a) Nandrisiky atsika hifantoko aminino ma apostoly Paoly, amy 2 Korintianina 4:17, 18? b) Ino raha hidinihintsika ato?

² Apostoly Paoly nandrisiky atsika ‘hampifantoko masontsika amy raha tsy hitany maso.’ (Vakia 2 Korintianina 4:17, 18.) Ino aby raha tafiditry amy zen̈y? Rango iziô atsika efa mahazo sasany aminy harian̈a tsy hitany maso aby zen̈y. Handiniky efatra amy zen̈y atsika: 1) Atsika mety mikamarady amy Zan̈ahary, 2) atsika mety mivavaka aminany, 3) man̈ampy atsika fan̈ahy masin̈y, baka io 4) man̈ampy atsika Jehovah ndreky Jesosy ndreky iro anjely aby io lera atsika manompo. Asa anao mba mankasitraka iro io? Hahita fomba mety han̈anovan̈a zen̈y atsika amy lahatsoratra ty ato.

3. Ino harian̈a tsy hitany maso farany valera anan̈antsika? Akory mampamety zen̈y?

³ Ino harian̈a tsy hitany maso farany valera anan̈antsika?  Fikamaradianan̈a amy Jehovah. (Sal. 25:14) Jehovah karaha Zan̈ahary masin̈y, ke akory basy mampamety zen̈y kanefa atsika tsy lavorary? Afaka man̈ano zen̈y izy fotony soropan̈avotan̈a nataony Jesosy in̈y “man̈adoso fahotan̈anolombelon̈o.” (Jaona 1:29) Ndray talohany nifatesany Jesosy, efa nisy kamarady olombelon̈o edy Jehovah. Efa hainy tsialohaloha baka fa Jesosy tsy hivadiky foeky, ke ho vitany fo han̈avotro olombelon̈o.—Rom. 3:25.

4. Azovy aby sasany aminolo nanjary kamaradiny Jehovah, talohany naviany Jesosy tambony tany teto?

⁴ An̈isany kamaradiny Jehovah talohany naviany Jesosy tambony tany teto Abrahama. Ten̈a nanan̈a finoan̈a matanjaka izy. Kadiriny 1 000 taon̈o tafarany nifatesany, Jehovah mbala nikaiky izy ‘kamaradiny’ fo. (Isaia 41:8) Hitantsika baka amy zen̈y fa tsisy raha mahavita mampisaraka Jehovah aminolo nifidiny ho naman̈a, ndray fahafatesan̈a. Abrahama ndray fa naty, izy mbala velon̈o fo amy Jehovah. (Lioka 20:37, 38) Kamaradiny Jehovah koa Joba. Nisy fotoan̈a iro anjely aby io nivory nan̈oloan̈a Jehovah, ke naboakany Jehovah tsarabe fa izy ten̈a natoky Joba. Tamy Jehovah, Joba “lelahy tsisy tsin̈iny, sady marin̈y ndreky matahotro Zan̈ahary, baka io fady izy man̈ano raha ratsy.” (Joba 1:6-8) Niavaka koa fikamaradianany Jehovah tamy Daniela. Voatery niaraka niain̈y tamy panompo sampy izy tan̈atiny 80 taon̈o tio, kanefa izy tsy nivadiky tamy Jehovah foeky. Izy koa fa natoe, nisy anjely nan̈amia toky izy karaha ty: ‘Daniela, anao ten̈a tiany Zan̈ahary.’ Tsy indraiky fo anjely aby io nan̈ano zen̈y fa intelo aby. (Dan. 9:23; 10:11, 19) Hay be fa, efa tsy din̈iny Zan̈ahary hamelon̈o ndraiky iro kamaradiny ten̈a tsy foeny aby io!—Joba 14:15.

5. Ino ma raha tokony hataontsika izikoa tiantsika hanjary kamaradiny Jehovah?

⁵ Amy zioty, efa antapitrisany olo tsy lavorary manjary kamaradiny Jehovah: Ao lelahy, man̈angy, baka io tsaiky marobe. Iro io samby man̈aboaka amy raha ataondro fa iro ten̈a kamaradiny Zan̈ahary. Mivolan̈a Ohabolana 3:32 fa “olo man̈ano raha mahitsy fo ho tsara fihavan̈ana aminany.” Afaka mikamarady amy Jehovah iro fotony iro mino soropan̈avotan̈any Jesosy. Akory fo atsika? Baka amy soron̈o io, atsika koa mety manjary kamaradiny Jehovah ndreky manokanten̈a aminany. Antapitrisany olo efa nan̈ano zen̈y, ke ‘manjary tsara fihavan̈ana amy’ Jehovah, Zan̈ahary Farany An̈abo. Hanjary an̈isandro zen̈y koa anao, izikoa man̈ano dingana maventy aby io.

6. Akory mety han̈aboahantsika fa ten̈a raha maventy amintsika fihavanan̈antsika amy Jehovah?

⁶ Asa karakory fiheveranao fikamaradianan̈a amy Jehovah zen̈y? Asa izio mba raha maventy aminao? Aleva tahaka Abrahama ndreky Joba. Iro tsy nivadiky foeky, kanefa iro amy zen̈y velon̈o kadiriny zato taon̈o. Aza mivadiky foeky, ndray vo tsy ela ndray efa ela nanompoanao Jehovah, amy donia efa ho ravan̈a ty. Aleva tahaka koa Daniela. Taminany, fihavan̈any tamy Jehovah ny raha ten̈a maventy. (Dan. 6:7, 10, 16, 22) Na ino na ino problemo handalovantsika, hahavita hiaritry fo atsika, fotony Jehovah man̈ampy. Hanjary kamaradiny fo atsika.—Fil. 4:13.

7. a) Izikoa Ohabolana 15:8 zahan̈a, akory fahitany Jehovah vavaka ataontsika? b) Akory ataony Jehovah mamaly vavakantsika?

⁷ An̈isany harian̈a tsy hitany maso vavaka. Miniminia hely baka! Karakory ataonolo izikoa iro efa kamarady mare? Iro tsy mihafahafa mikoran̈a raha an̈aty jerindro ndreky fondro, tsy zen̈y? Karaha zen̈y koa amy Jehovah. Izy mampiasa Baiboly ikoran̈ana amintsika raha an̈aty jerinany ndreky fonany. Lera atsika mivavaka, anjarantsika koa mikoran̈a  aminany raha miniminentsika ndreky an̈aty fontsika. Ravoravo Jehovah mitandren̈y vavaka ataontsika. (Vakia Ohabolana 15:8.) Izy tsy vitany mitandren̈y vavakantsika fo, fa mamaly vavakantsika koa. Hita baka amy zen̈y fa Jehovah ten̈a tia atsika. Misy lera, malaky be izy mamaly vavakantsika. Misy fotoan̈a ndraiky atsika mila mivavaka matetiky momba raha araiky. Fa ny raha azo antoko, tsy maintsy azontsika fo raha nangatahintsika in̈y amy fotoan̈a mety. Ary ten̈a raha ilaintsika izy amiany atsika amy zen̈y. Ndraikindraiky, tsy arakaraka raha nangatahintsika raha ho azontsika. Fotony mety tsy hadosony raha manahiran̈a atsika, fa atsika ndraiky hamiany fahendrena ndreky angovo baka ho din̈intsika raha mahazo atsika.—1 Kor. 10:13.

8. Akory an̈aboahantsika fa ten̈a raha maventy amintsika vavaka?

⁸ Asa mba raha maventy aminao vavaka io? Akory mety han̈aboahanao fa mankasitraka izio anao? Amy fan̈arahan̈a torohevitry amiany Jehovah ty: “Aza voly mivavaka.” (1 Tes. 5:17) Jehovah tsy manery atsika hivavaka aminany, fa ambelany atsika hisafidy. Ndray zen̈y, izy mandrisiky atsika ‘haharitry amy vavaka.’ (Rom. 12:12) Mankasitraka kadô miavaka baka amy Jehovah io atsika, izikoa mivavaka matetiky isanandra. Ke atsika koa fa mivavaka, tsy tokony hadin̈antsika foeky hisaotra izy ndreky hidera izy.—Sal. 145:2, 3.

9. Akory nan̈aboahany rahalahy araiky fa raha maventy aminany vavaka? Akory koa fahitanao izio?

⁹ Mety efa ela nanompoanao Jehovah, ke mety efa hitanao fomba namaliany vavakanao. Izikoa zen̈y, tokony ho raha maventy aminao koa vavaka io. Zen̈y raha tsapany Chris, rahalahy efa 47 taon̈o nanompoan̈a manontolo andra. Ho izy: “Tiako mare mifoha mahizikiziky fotony aminin̈y zaho tsy voaelingelin̈y sady mahavita mikoran̈a elaela amy Jehovah. Mbala tsendriky honohono tarafiny masoandra iro vontro aby amy zaridain̈y io, efa mikoran̈a aminany edy zaho. Zaho ndraiky koa fa baka mivavaka aminany alin̈y, mahatsiaro mahivankivan̈a mare zaho, fotony milamin̈y jerinaka.”

10. Nan̈ino ma fan̈ahy masin̈y io tokony ho ten̈a raha maventy amintsika?

¹⁰ Fan̈ahy masin̈y koa an̈isany harian̈a tsy hitany maso baka amy Jehovah, ary izio ten̈a raha maventy amintsika. Jesosy nandrisiky atsika hangataka izio fo. (Lioka 11:9, 13) Jehovah mampiasa fan̈ahy masin̈y io lera izy man̈amia atsika “angovo fan̈ampiny.” (2 Kor. 4:7; Asa. 1:8) Atsika koa fa mahazo fan̈ampiany fan̈ahy masin̈y, manjary vitantsika fo miaritry zay raha manahiran̈a atsika.

11. Akory han̈ampiany fan̈ahy masin̈y atsika?

¹¹ Fan̈ahy masin̈y io man̈ampy atsika hahavita raha an̈irahan̈a atsika amy fanompoan̈a Jehovah. Izio koa mahavita mankatsara talenta ndreky fahaizan̈a efa anan̈antsika. Izikoa fa ten̈a dinihin̈y, maro raha mety tsy ho vitantsika izikoa tsy tio fan̈ampiany fan̈ahy masin̈y.

12. Izikoa Salamo 139:23, 24 zahan̈a, akory han̈ampiany fan̈ahy masin̈y io anao?

¹² Akory han̈aboahanao fa ten̈a raha maventy aminao fan̈ahy masin̈y io? Mangataha fan̈ahy masin̈y amy Jehovah baka izio han̈ampy anao hahita eritreritry tsy manjary na fan̈irian̈a ratsy anan̈anao. (Vakia Salamo 139:23, 24.) Han̈ampy anao hahita raha mila ahitsinao Jehovah, izikoa anao man̈ano zen̈y. Izikoa fa hitanao amy zay eritreritry tsy manjary na fan̈irian̈a ratsy an̈atinao ao, tokony hangataka fan̈ahy masin̈y fo koa anao baka hahazo angovo hanohitry raha aby zen̈y. Fan̈anovanao zen̈y hahitan̈a fa ten̈a tapakevitry tsy han̈ano raha mety hahavy Jehovah tsy han̈amia anao fan̈ahy masin̈y io anao.—Efes. 4:30.

13. Akory hahavy atsika hankasitraka fan̈ahy masin̈y io tsarabe?

¹³ Hahaihitombo fo fankasitrahantsika raha ataony fan̈ahy masin̈y io izikoa atsika mandiniky raha ataonizio amy zioty. Karaha ty raha nambarany Jesosy tamy pianatranany, talohany nimpodianany tandan̈itry tan̈y: ‘Hahazo angovo anaro lera fan̈ahy masin̈y avy aminaro, ke anaro hanjary vavolombelon̈onaka amy tany farany lavitry an̈y.’ (Asa. 1:8) Zen̈y ankitin̈y raha misy avahizo. Olo mandilatra 8 600 000 baka amy faritry jiaby ambony tany eto manompo Jehovah. Man̈ampy atsika  hanan̈a toetry tsara koa fan̈ahy masin̈y io, ke atsika efa miain̈y amy paradisa arapan̈ahy. Izio man̈ampy atsika hanan̈a fitiavan̈a, haravoan̈a, fiadan̈ana, haharidraha, ho tsara fan̈ahy, han̈ano ny tsara, hanan̈a finoan̈a, halemy toetry ndreky hahafehy ten̈a. “Vokatrany fan̈ahy” ikahian̈a toetry aby io. (Gal. 5:22, 23) Akory, tsy hitanao baka amy zen̈y fa ten̈a raha maventy ankitin̈y fan̈ahy masin̈y io?

14. Azovy aby ma man̈ampy atsika lera manompo?

¹⁴ Atsika io “miaraka miasa” amy Jehovah ndreky Jesosy, baka io iro anjely aby io. (2 Kor. 6:1) An̈isany harian̈a tsy hitany maso anan̈antsika koa fiarahamiasa zen̈y. Miaraka miasa amindro atsika lera manompo. Karaha ty nambarany Paoly momba ain̈inany ndreky iro namany tamy fanompoan̈a: “Zahay io miaraka miasa amy Zan̈ahary.” (1 Kor. 3:9) Miaraka miasa amy Jesosy koa atsika izikoa fa manompo. Mety mbala azonao onon̈o donko volan̈any Jesosy man̈iraka pianatranany ‘hampianatra olo baka amy firenena jiaby’ in̈y? Izy nampan̈anten̈a: “Zaho hiaraka aminaro fo.” (Mat. 28:19, 20) Akory fo basy iro anjely aby io? Miaraka miasa amindro koa ma atsika. Iro io mitariky atsika, lera atsika mitory ‘vaovao tsara mandrakizay aminolo ambony tany ty.’—Apok. 14:6.

15. Man̈ameza ohatra ahitan̈a fa ten̈a man̈ampy atsika Jehovah lera atsika manompo.

¹⁵ Haintsika fa Jehovah ndreky Jesosy avio iro anjely aby io man̈ampy atsika. Ke ino vokatranizen̈y amy fanompoan̈antsika? Hafatra momba Fanjakan̈any Zan̈ahary torintsika io mety ampitovisin̈y amy voandraha afafy. Ke lera atsika mamafy voany fahamarin̈ana io, mety hitombo an̈aty fonolo manan̈a fô tsara izio. (Mat. 13:18, 23) Baka aminjovy mahavy izio hitombo? Jesosy nivolan̈a fa tsisy olo manjary pan̈aradia izy zen̈y, izikoa tsy raha “nitahôminy Baba andan̈itry an̈y.” (Jaona 6:44) Man̈aporofo zen̈y tantarany Lydia, voakoran̈a amy Baiboly. Tamy Paoly nitory tambelan̈a tanànany Filipy, izy nitory tamy man̈angy maromaro tio, an̈isanizen̈y Lydia. Baiboly baka io mivolan̈a: “Nisokafiny Jehovah tamy fomba feno fonany, baka ho moramora aminany handray tsara hafatra nitoriny Paoly.” (Asa. 16:13-15) Antapitrisany koa olo nitahôminy Jehovah, karaha nataony tamy Lydia in̈y.

16. Azovy tokony hamezantsika voninahitry, izikoa atsika mahita vokatra amy fanompoan̈a?

¹⁶ Baka aminjovy fo basy mampahomby fanompoan̈antsika? Karaha ty nambarany Paoly, izy koa fa nikoran̈a momba fiangonan̈a ta Korinto: “Zaho namboly, Apolosy ndraiky nandrôzy, fa Zan̈ahary tsy voly nampitombo. Ke tsy araiky mamboly na araiky mandrôzy ny ten̈a nahavita raha, fa Zan̈ahary araiky mampitombo fo ny ten̈a izy.” (1 Kor. 3:6, 7) Ke izikoa atsika mahita vokatra amy fanompoan̈a, tsy tokony hadin̈antsika foeky han̈amia voninahitry Jehovah, karaha nataony Paoly in̈y.

17. Ten̈a tombontsoa miaraka miasa amy Zan̈ahary ndreky Kristy, ndreky iro anjely aby io. Akory han̈aboahantsika zen̈y?

¹⁷ Ten̈a tombontsoa tsisy ambaka izy “miaraka miasa” amy Zan̈ahary ndreky Kristy, avio iro anjely aby io zen̈y. Ke asa anao mba mankasitraka tombontsoa anan̈anao zen̈y? Haboakantsika fa mankasitraka izio atsika izikoa tsy voly mitady hevitry hitorian̈a vaovao tsara io. Maro fomba mety han̈anovan̈a zen̈y. Ohatra, fitorian̈a amy tany maro olo na “isaka tran̈o.” (Asa. 20:20) Maro koa pitory tia mitory tsy arapotoan̈a. Iro koa fa fanojy olo, somary mimohehy hely iro sady man̈ano mbalatsara olo, baka io iro mitady hevitry hanombohan̈a koran̈a aminolo io, intsaka eky izikoa olo io man̈eky hikoran̈a.

18-19. a) Karakory ma ataontsika mandrôzy voany fahamarin̈ana? b) Akory nataony Jehovah nan̈ampy pianatra Baiboly araiky?

 ¹⁸ Tsy mamafy voany fahamarin̈ana fo raha tafiditry amy “miaraka miasa amy Zan̈ahary” zen̈y fa mandrôzy izio koa. Izikoa atsika fa mahita olo lian̈a, mimpody mitsidiky izy ndraiky atsika. Izikoa atsika sendra tsy afaka, man̈iraka pitory hafa atsika hitsidiky olo io. Hampianatra izy Baiboly ten̈a tanjon̈ontsika koa fa man̈ano zen̈y. Olo io koa fa tapakevitry hianatra Baiboly, ke manohy fo, ho ravoravo atsika mahita fomba han̈ampiany Jehovah olo io han̈ova toetsain̈inany ndreky fihetsehamponany.

¹⁹ Diniha hely baka tantarany Raphalalani, rahalahy araiky an Afrika Atsimo. Moasy be izy taloha, ary zen̈y tadivolanany. Marin̈y fa tiany mare raha nianarany tamy Baiboly, fa tsy nora taminany nan̈eky raha koran̈inizio momba fifandraisan̈a aminolo maty. (Deot. 18:10-12) Ndray zen̈y, Zan̈ahary nambelany rahalahy io han̈ova tsihelihely toetsain̈inany. Izy iziô efa tsy moasy eky, ndray izio velonten̈anany tio. Raphalalani io iziô efa 60 taon̈o, ke ho izy: “Ten̈a mankasitraka iro Vavolombelon̈o Jehovah aby io zaho. Ten̈a nan̈ampy zaho iro, ary matetiky koa. Mankasitraka Jehovah mare koa zaho, fotony izy nan̈ampy zaho hiova, ke zaho iziô nanjary Vavolombelon̈onany vita batisa.”

20. Ino raha tokony hataontsika?

²⁰ Nikoran̈a momba harian̈a tsy hitany maso efatra atsika tato. Fa ny ten̈a maventy amindro io, araiky momba fikamaradianantsika amy Jehovah in̈y. Nan̈ino ke? Atsika koa fa manjary kamaradiny Jehovah, hahazo harian̈a tsy hitany maso maro hafa koa atsika. Atsika afaka mivavaka aminany, mahazo fan̈ampiany fan̈ahy masin̈y. Fan̈ampinizen̈y koa, atsika miaraka miasa amy Jehovah ndreky Jesosy avio iro anjely aby io. Tsy mandrisiky atsika hankasitraka Jehovah raha jiaby zen̈y? Atsika tsy hahita naman̈a tsara mandilatra Jehovah!