Ho Sara *: “Farandraha bihen̈amaso eky zaho sady tsy matoky ten̈a. Ke izikoa olo mikoran̈a aminaka manjikiziky aminy hevitrinany, zaho fa tsy alaizilaizy edy. Fa izikoa izy olo mora na malemy toetry avio manetry ten̈a, azoazoko oe ain̈inaka. Mora aminaka mikoran̈a problemonaka aminany. Karaha zen̈y aby olo ataoko kamarady.”

Hita baka amy raha nivolan̈iny Sara io fa atsika koa malemy toetry, ho mora aminolo han̈aton̈o atsika. Ho ravoravo koa Jehovah izikoa atsika manan̈a toetry io. Amy Kolosianina 3:12, Baiboly mampirisiky atsika ‘halemy toetry.’ Karakory ma olo malemy toetry zen̈y? Karakory nan̈aboahany Jesosy toetry io? Amy karakory fanan̈ana toetry io han̈ampy atsika ho sambatra amy fiain̈ana?

Malemy toetry olo araiky izikoa tia fihavanan̈a. Olo araiky malemy toetry tsy vitany tsara fan̈ahy fo, fa mahatana heloko ndray misy raha kontiny hampameloko.

Misy olo mieritreritry fa olo tsy manan̈a ny maha izy izy olo “malemy toetry” zen̈y. Fa zen̈y tsy marin̈y! Izikoa volan̈a griky nandikan̈a malemy toetry io zahan̈a, izio ivolan̈ana sevaly dy araiky matanjaka kanefa nampiofanin̈y hifehy angovonany. Karaha zen̈y koa, olo araiky malemy toetry mahafehy toetry ratsy efa aminany ao, baka io mifen̈y hihavan̈a aminolo.

Atsika mety hivolan̈a: ‘Zaho ty tsy olo malemy toetry zen̈y e.’ Atsika baka miain̈y amy donia araiky kafiry ndreky tsy mahadin̈y raha, ke mety tsy ho mora amintsika han̈aboaka toetry io. (Rom. 7:19) Marin̈y ndraiky fa mila mifen̈y atsika baka hanan̈a toetry io, fa fan̈ahy masin̈iny Jehovah han̈ampy atsika. (Gal. 5:22, 23) Nan̈ino ma atsika tokony hifen̈y baka halemy toetry?

Farandraha tianolo eky olo malemy toetry. Karaha nambarany Sara taloha tio in̈y, tiantsika miaraka aminolo malemy toetry. Nan̈ambela modely tsara arehantsika Jesosy, fotony izy nalemy toetry sady tsara fan̈ahy. (2 Kor. 10:1) Matetiky, sarotro amy tsaiky han̈aton̈o olo tsy haindro; fa tiandro tsaiky aby io ndraiky nan̈aton̈o Jesosy, ndray izy tsy haindro, fotony izy nalemy toetry ndreky tsara fan̈ahy.—Mar. 10:13-16.

Izio koa mahatsara ain̈intsika ndreky mahatsara olo hafa. Izikoa atsika malemy toetry, atsika tsy mora mahinihiny na mora meloko. (Ohab. 16:32) Tsy  hanen̈iny foeky atsika, fotony atsika tsy han̈ano raha mampalahelo olo, intsaka eky fa olo tiantsika. Mahatsara olo koa izio fotony ho vitantsika hifehy fihetsehampontsika ke atsika tsy han̈ano raha mampalahelo iro.

Jesosy ndray naro andraikitry ndreky naro asa, izy nalemy toetry taminolo jiaby. Maro olo taminandrany Jesosy nahatsiaro mijaly ndeky kivy, ke iro nila fankahirezan̈a. Jesosy nivolan̈a tamindro: “Man̈aton̈a zaho anaro ... fa zaho malemy toetry ndreky manetry ten̈a.” Misaora ravoravo iro naharen̈y zen̈y!—Mat. 11:28, 29.

Akory hahavy atsika halemy toetry, karaha Jesosy? Atsika mila mianatra Volan̈a Zan̈ahary, amy zen̈y haintsika fomba nitondrasany Jesosy olo ndreky raha nataony. Ke atsika koa tojy raha sarotro mety hahavy atsika tsy halemy toetry, hifen̈y fo atsika han̈ano karaha nataony Jesosy. (1 Pet. 2:21) Ino raha telo nan̈ampy Jesosy? Alô zahavantsika.

Jesosy ten̈a manetry ten̈a. Jesosy nivolan̈a fa izy sady “malemy toetry avio manetry ten̈a.” (Mat. 11:29) Misy toetry aroe koran̈iny Baiboly fa mifandray: Malemy toetry ndreky manetry ten̈a. (Efes. 4:1-3) Ino mahavy atsika mivolan̈a zen̈y?

Fanetrenten̈a man̈ampy atsika tsy halaky ho meloko izikoa misy olo man̈ano raha tsy tiantsika. Nisy fotoan̈a Jesosy nataonolo ‘tendankanin̈y’ ndreky ‘pigiaka divain mare’, fa izy tsy neloko. Ino raha nan̈ampy izy? Baiboly mivolan̈a fa ‘fahendrena anan̈anolo araiky hita amy raha ataony.’ (Mat. 11:19) Zen̈y tsarabe nataony Jesosy. Hita baka amy zen̈y fa izy ten̈a manetry ten̈a.

Izikoa misy olo man̈ano volan̈a tsy voadiniky momba karazan̈anao na fomba nitaizan̈a anao, mifen̈a fo halemy toetry. Karaha ty nambarany Peter, antipan̈ahy baka Afrika Atsimo: “Izikoa fa misy olo mivolan̈a raha tsy tiako, aleko onon̈o karakory nataony Jesosy, izikoa izy tamy plasinaka. Zen̈y nan̈ampy zaho tsy ho mora meloko.”

Hainy Jesosy fa atsika io olombelon̈o tsy lavorary. Tihan̈ano ny tsara iro pianatra Jesosy aby io, fa ndraikindraiky tsy vitandro raha zen̈y fotony iro tsy lavorary. Ohatra iziô taminy alin̈y talohany nifatesany Jesosy, Petera, Jakoba ndreky Jaona tsy nahadin̈y niaritry toromaso. Ke Jesosy nivolan̈a fa ‘menimeny tihan̈ano, fa nofotro ao malemy.’ (Mat. 26:40, 41) Fahaizany Jesosy fa tsy lavorary iro apostolinany aby io nan̈ampy izy tsy neloko tamindro.

An̈isany ranabavy sarotiny mare Mandy, fa izioty izy mifen̈y mangala tahaka toetriny Jesosy malemy toetry io. Hainy baka fa mbala hisaziny Zan̈ahary olo ratsy fan̈ahy aby io. Hainy koa fa Zan̈ahary han̈ampy izy fo. Ho izy: “Aleko onon̈o fo fa tsy lavorary aby olo jiaby, ke mifen̈y zaho mandiniky toetry tsaranolo, karaha ataony Jehovah.” Hainy Jesosy fa tsy lavorary olombelon̈o, ke izy nahinakinaka iro ndreky nifen̈y fo halemy toetry izikoa fa nifandray tamindro. Asa anao mba karaha zen̈y koa?

Nankin̈iny Jesosy tamy Zan̈ahary raha nampiasaloha izy. Taminizy tambony tany teto, maro raha tsy rariny navoa izy. Tsy nazava taminolo ino nahavy izy nan̈ano raha sasany; halanolo koa izy sady nampijalindro. Fa izy tsy neloko nifotafota, fotony efa ‘nankin̈iny tamy Zan̈ahary raha nahazo izy.’ (1 Pet. 2:23) Hainy Jesosy baka fa Babany andan̈itry an̈y io mahavita man̈ampy izy hiaritry. Hainy koa fa amy fotoan̈a mety, mbala hisaziany Zan̈ahary iro nampijaly izy aby io.

Mety han̈ajima mare atsika, izikoa fa misy olo mampijaly na man̈ano raha mampameloko atsika. Zen̈y aviany Soratra Masin̈y mivolan̈a karaha ty: ‘Heloko tsy avoafehy tsy havitan̈a raha marin̈y man̈oloan̈a Zan̈ahary.’ (Jak. 1:20) Nohony atsika tsy lavorary, mety tsy hahatana heloko atsika, intsaka eky izikoa hitantsika fa misy antony aradrariny.

Karaha ty nambarany Cathy, ranabavy araiky baka an Allemagne: ‘Azovy ma olo hiaro anao, koa tsy ain̈inao tompiny?’ Fa koa fa nandeha fotoan̈a, nianatra natoky Jehovah izy, ke niova. Ho izy: “Tsy voatery hiaro ten̈a fo zaho. Mifen̈y fo zaho halemy toetry, fotony haiko fa vitany Jehovah mandamin̈y raha jiaby.” Akory fo basy izikoa misy olo nan̈ano raha tsy rariny taminao? Ino han̈ampy anao halemy toetry fo? Mifen̈a hatoky Zan̈ahary, karaha nataony Jesosy in̈y.

Jesosy nivolan̈a: “Sambatra olo malemy toetry.” (Mat. 5:5) Mila manan̈a toetry io atsika izikoa tiho sambatra. Alô baka atsika hizaha ohatra vitsivitsy hahitantsika fa toetry io ten̈a man̈ampy atsika.

Ho moramora aminolo fivadiany hifan̈araka izikoa iro samy malemy toetry. Karaha ty nambarany Robert, rahalahy baka an Australie zay: “Matetiky zaho tafivolan̈a raha namparary fony vadiko. Mora mandefa volan̈a tsy voadiniky anten̈a izikoa fa meloko, mira rano nararaka in̈y raha zen̈y, ke tsy mety ivozin̈y eky. Nanen̈iny mare zaho koa fa hitako fa nampalahelo izy raha nivolan̈iko.”

Mivolan̈a Jakoba 3:2 fa atsika jiaby io samy ‘man̈ano hadisovan̈a aby, ary matetiky koa.’ Izikoa atsika manan̈a toetry io, ho voafehintsika fo helokontsika ke tsy han̈ano volan̈a tsy voadiniky atsika.—Ohab. 17:27.

Nifen̈y mare Robert baka tsy taitaitry ndreky hifehy ten̈a. Ino vokany? Ho izy: “Zahay koa fa misy raha tsy ifan̈arahan̈a, zaho tsy direkty mivolan̈a fa tandrin̈esako tsarabe antsendriky raha koran̈iny. Zen̈y man̈ampy zaho halemy toetry, koa fa mikoran̈a aminany. Mifen̈y koa zaho baka tsy ho mora meloko. Nanjary nahaitsara fo fifandraisan̈anay.”

Ho tsara fihavanan̈a aminolo koa atsika izikoa malemy toetry. Tsisy naman̈a ankamarozanolo mora meloko. Fa atsika koa malemy toetry, ho vitantsika han̈ano raha hihavanan̈a, ke izio “mira tady mampifandray.” (Efes. 4:2, 3) Karaha ty nambarany Cathy, araiky nikoran̈intsika taloha tio in̈y: “Zaho koa fa nifen̈y halemy toetry, nahaitianolo fo niaraka taminaka, firaka aminolo sarotiny.”

Hilamin̈y jerinao izikoa anao malemy toetry. Amy Baiboly ao, mifandray toetry aroe ty: Malemy toetry ndreky fiadanan̈a. Iro io samy an̈isany vokatrany fan̈ahy. (Gal. 5:22, 23) Olo malemy toetry zen̈y “tsy mora taitaitry.” (Ohab. 14:30) Zen̈y raha tsapany Martin, izy koa fa nifen̈y hanan̈a toetry io. Ho izy: “Zaho iziô tsy manjikiziky aminy hevitrinaka eky fa mitandren̈y hevitrinolo hafa. Milamin̈y jerinaka, baka io mahatsiaro sambatra fo zaho.”

Mety mila miezaka mare atsika baka halemy toetry. Ho rahalahy araiky zay: “Firaka iziô zaho mbala mifen̈y fo hanan̈a toetry io. Izikoa fa misy raha mampameloko zaho, zaho mbala meloko mifotafota.” Jehovah han̈ampy atsika hiala amy toetry ratsy io ke hanjary halemy toetry atsika. (Isaia 41:10) Sady izy lastio mandrisiky atsika halemy toetry. (1 Pet. 5:10) Apostoly Paoly nahavita nangala tahaka toetriny Kristy. Arakaraka fandehany fotoan̈a koa, hanjary halemy toetry koa atsika ndreky ho tsara fan̈ahy, karaha Paoly in̈y.—2 Kor. 10:1.