1. Izikoa 2 Korintianina 3:1-3 zahan̈a, nan̈ino tombontsoa tsisy ambaka izy man̈ampy olo ho vita batisa? (Zahava sary amy fon̈ony gazety ty.)

ASA ino raha tsapanao izikoa misy pianatra Baiboly amy fiangonan̈a misy anao atao batisa? Misaora ravoravo anao! (Mat. 28:19) Intsaka eky izikoa anao nampianatra izy! (1 Tes. 2:19, 20) Matoa izy nandroso ke natao batisa, dikanizen̈y niasa mare anao, avio tio koa fan̈ampiany fiangonan̈a. Karaha “taratasy fideran̈a” iro pianatra vita batisa aby io, kanefa tsy ninolo nampianatra iro fo fa ninolo jiaby amy fiangonan̈a koa.​—Vakia 2 Korintianina 3:1-3.

2. a) Ino fan̈ontanian̈a matomboko mila iritriretintsika, baka io nan̈ino? b) Ino ma fampianaran̈a Baiboly zen̈y? (Zahava lamariky amy pazy ambany.)

² Mankahery mahita fa olo mandilatra 280 000 isaka taon̈o natao batisa tan̈atiny efatra taon̈o tato ato, ke nanjary Vavolombelon̈o Jehovah ndreky pianatrany Jesosy Kristy. Kanefa tan̈atiny fotoan̈a jiaby zen̈y, kadiriny 10 000 000 olo nampianarintsika Baiboly, * erantany! Akory han̈ampiantsika pianatra aby zen̈y hahafeno fepetra hatao batisa? Mila mifen̈y angovo jiaby atsika ke han̈ano erakany mety ho vitantsika, diany Jehovah mbala man̈ambela iro hifidy hanjary pianatrany Kristy. Efa hely ndraiky fotoan̈a tavela!​—1 Kor. 7:29a; 1 Pet. 4:7.

3. Ino raha hidinihintsika amy lahatsoratra ty ato?

 ³ Meky mare asa fan̈anovan̈a pianatra io. Zen̈y nahavy Filankevipitantan̈ana nan̈ontany birôny sampan̈a fomba mety han̈ampian̈a iro pianatra Baiboly marobe aby io hatao batisa. Hidinihintsika amy lahatsoratra ty ato ndreky amy lay man̈araka, ino raha efa nataondro pisava lalan̈a, misionera, ndreky piandraikitry faritry efa zadraharaha aby io. * (Ohab. 11:14; 15:22) Hazavaindro amintsika raha mila ataony papianatra ndreky pianatra Baiboly, baka fianaran̈a io ho hisy vokany tsara aminolo ampianarin̈y. Ho hitantsika ato koa raha dimy tokony hataony pianatra Baiboly baka izy handroso ke hatao batisa.

4. Han̈ano akory pianatrantsika izikoa tsy mahadin̈y ela atsika mampianatra izy?

⁴ Maro piaramanompo zatra mampianatra Baiboly ambaravaran̈a sady tsy mahadin̈y ela. Tsy zen̈y fo fa, mbala tsy atao isaka herin̈iandra koa izio. Mahavy olo ampianarin̈y io ho lian̈a amy Baiboly fo ndraiky marin̈y izy atao karaha zen̈y, fa zen̈y tsy ampy. Mila atao raha hahavy izy hahaiho lian̈a fo ke han̈iry han̈ano fandrosoan̈a. Akory han̈anaovan̈a zen̈y? Misy pitory mangataka nimerony telefaoninolo ampianariny, ke ndraikindraiky izy mikaiky pianatranany io na mandefa mesazy misy hevitry baka amy Baiboly aminany. Mety hitohy fanjava fanjava raha zen̈y kanefa mbala tsy mandroso fo pianatra io. Fotony nan̈ino? Izikoa pianatra io tihandroso ke hanokanten̈a ndreky hatao batisa, izy mila mahafoe fotoan̈a maromaro hianaran̈a Soratra Masin̈y.

5. Ino raha namafisiny Jesosy amy Lioka 14:27-33 ao, ke mety hampiasaintsika han̈ampian̈a pianatrantsika?

⁵ Nisy fan̈oharan̈a nataony Jesosy tandraraiky zay, nan̈azavan̈a raha tsy maintsy ataonolo araiky izikoa izy tihanjary pianatranany. Izio momba olo tihiasa tilikambo ndreky panjaka araiky tihandeha lagera. Izikoa lelahy io tihahavita tilikambo ho Jesosy, izy mila “mipetraka antsendriky, mandiniky” ôtrino vola mety ho laniny. Karaha zen̈y koa panjaka in̈y izikoa tihandresy fahavalonany; izy mila “mipetraka antsendriky, avio mangataka sosokevitry.” (Vakia Lioka 14:27-33.) Hainy Jesosy fa zen̈y koa raha tokony hataonolo tihanjary pianatranany. Mila dinihinolo io tsarabe karakory marin̈y ma man̈aradia Jesosy zen̈y. Zen̈y mahavy atsika mila mampirisiky pianatrantsika hianatra tsy tapaka isaka herin̈iandra. Akory han̈anovantsika zen̈y?

6. Ino aby raha mety hataonao izikoa tianao handroso pianatranao?

 ⁶ Ampitombosa lera fianaranaro. Mikoràn̈a hevitry fan̈ampiny baka amy Baiboly, isaka anaro mianatra. Izikoa hitanao fa tsy mampan̈ino olo io mianatra elaela, an̈ontania izy tsao fo misy tany mety hipitripitrahan̈a hanohizanaro koran̈anaro. Ho hitanao amy raha koran̈iny izikoa ten̈a tiany mianatra Baiboly. Izikoa fa mandeha fotoan̈a, an̈ontania izy tsao afaka mianatra indroe isaka herin̈iandra. Fa ankoatrany mianatra indraiky na indroe isaka herin̈iandra io, misy raha hafa koa mila atao.

7. Ino aby raha tokony hataony papianatra Baiboly isaka izy handeha hampianatra?

⁷ Anao papianatra antsendriky ny mila man̈oman̈a tsarabe, isaka anao handeha hampianatra Baiboly. Vakia tsialohaloha fianaran̈a handeha hataonaro, baka io zahava andininteny. Ataova mazava tsarabe aminao antsendriky hevitry maventy amizio ao. Diniha lohateny, lohatenihely, fan̈ontanian̈a, andininteny misoratra “vakia”, baka io sary ndreky video mety han̈ampy anao han̈azava fianaran̈a io. Iritrereta fo koa raha ilainy pianatranao, avio ataova tsotra sady mazava fomba han̈azavanao fianaran̈a io, amy zen̈y hazava aminany raha ianarany, baka io ho mora aminany hampifan̈araka fomba fiain̈ananany amy raha ianarany io.​—Neh. 8:8; Ohab. 15:28a.

8. Izikoa raha koran̈iny apostoly Paoly amy Kolosianina 1:9, 10 zahan̈a, nan̈ino ma atsika mila mivavaka momba pianatra io?

⁸ Misy raha hafa koa tafiditry amy fan̈oman̈ana ataontsika? Ilaintsika mivavaka momba pianatra io ndreky raha ilainy. Misaora ravoravo donko anao izikoa raha nampianarinao tafiditry lalin̈y amy fony pianatranao! Tsy zen̈y? Ke mivavaha baka Jehovah han̈ampy anao hahavita zen̈y. (Vakia Kolosianina 1:9, 10.) Iritrireta tsialohaloha ino raha mety ho sarotro amy pianatra io na mety tsy hikeny. Aleva onon̈o fa tanjon̈onao han̈ampy izy handroso ndreky hatao batisa.

9. Akory mety han̈ampian̈a pianatra Baiboly hanoman̈a tsarabe? Hazavà.

⁹ Mifen̈y atsika baka tsy ho tapatapaka fianaran̈a Baiboly, fotony tiantsika izikoa olo ampianarintsika io hankasitraka raha nataony Jehovah ndreky Jesosy taminany. Hahavy izy tihianatra raha maro momba iro raha zen̈y. (Mat. 5:3, 6) Baka olo ampianarintsika  hahita hatsaran̈a baka amy fianaran̈a io, izy mila mifantoko tsarabe. Hazavay aminany nan̈ino izy mila man̈oman̈a fo isaka hianatra. Iraha vakiny tsialohaloha raha ianaran̈a io, baka io ampirisiha izy handiniky akory mety han̈arehany izio amy fiain̈ananany. Akory han̈anovanao zen̈y? Miaraha man̈oman̈a toko araiky na fizaran̈a araiky miaraka aminany, misy ahaizany man̈oman̈a. * Ambarà izy fomba mety hahitany valiny fan̈ontanian̈a. Izikoa fa hitany valiny, volan̈a na fehezanten̈y manohan̈a hevitry maventy fo iraha tsipìny, amy zen̈y tsy ho sarotro aminany hahatsiaro valiny. Iraha amy zay izy han̈amia valinteny amy fomba fivolan̈any. Ho hitanao baka amy zen̈y izikoa ten̈a mazava aminolo io raha nianarany na tsy azony. Mbala misy raha hafa koa mety hataonao.

10. Nan̈ino ma pianatra ten̈a mila mamaky Baiboly isanandra? Akory hazahoany hatsaran̈a amy fomba feno baka amizio?

¹⁰ Ankoatrany fianaran̈a Baiboly irahany amy papianatranany, misy raha hafa koa mila ataony pianatra io isanandra. Mila mikoran̈a amy Jehovah izy. Karakory ma zen̈y? Mila koran̈iny amy Jehovah raha an̈aty fonany, baka io mila tandrin̈esany koa raha volan̈iny Jehovah. Mitandren̈y Jehovah izy lera mamaky Baiboly isanandra. (Jos. 1:8; Sal. 1:1-3) Ampianara izy fomba fampiasan̈a “Programo Vaky Baiboly” amy jw.org ao. * Baka izy hahazo hatsaran̈a amy fomba feno, ampianara misaintsain̈y raha nivakiny tamy Baiboly tao izy. Karaha ataony, ‘Ino raha ianarany momba Jehovah baka amizio?’ na ‘Akory mety an̈arehany raha ianarany io amy fiain̈ananany?’​—Asa. 17:11; Jak. 1:25.

11. Akory mety han̈ampian̈a pianatra Baiboly baka izy ho zatra mivavaka? Nan̈ino izy ten̈a mila man̈ano zen̈y?

¹¹ Ampirisiha pianatranao hikoran̈a amy Jehovah; izikoa atao volan̈a hafa hivavaka aminany isanandra. Man̈anova vavaka baka amy fô isaka anaro hanomboko hianatra ndreky amy farany fianaran̈a, ke volàn̈a amizio ao raha ilainy pianatranao. Han̈ampy izy hivavaka amy Jehovah amy fô jiaby raha zen̈y, sady ho hainy koa fa tsy maintsy mivavaka amy Jehovah aminy an̈arany Jesosy izy. (Mat. 6:9; Jaona 15:16) Miniminia hely baka! Mitandren̈y Jehovah izy koa fa mamaky Baiboly isanandra. Mikoran̈a amy Jehovah ndraiky izy lera mivavaka. Izikoa izy man̈ano zen̈y  isanandra, ho tsara fihavanan̈a amy Zan̈ahary edy izy. (Jak. 4:8) Han̈ampy izy handroso ke hanokanten̈a ndreky hatao batisa raha zen̈y. Mbala misy raha hafa koa han̈ampy izy.

12. Akory mety han̈ampian̈a pianatra Baiboly hifandray tsara amy Jehovah?

¹² Tiantsika izikoa olo ampianarintsika io mahay Jehovah tsarabe, fa zen̈y tsy ampy. Nan̈ino? Fotony tsy ho von̈ono hampifan̈araka fomba fiain̈ananany amy raha ianarany izy, izikoa tsy tafiditry lalin̈y amy fonany ndreky amy jerinany antsendriky raha ianarany. Maro raha nampianariny Jesosy, ary tianolo koa raha nampianariny. Fa ny antony maventy nahavy iro nan̈araka izy, fotony tafiditry lalin̈y tan̈aty fondro raha nampianariny Jesosy. (Lioka 24:15, 27, 32) Mila resy lahatra koa olo ampianarinao fa ten̈a misy ankitin̈y Jehovah. Mila tsapany fa afaka mifandray amy Jehovah izy; mila tsapany koa fa Jehovah io Babany, Zan̈aharinany, ndreky kamaradiny. (Sal. 25:4, 5) Ke lera anao mampianatra izy, na ino na ino fotokevitry dinihinaro, aboaha izy tsarabe ino aby toetry miavaka anan̈any Jehovah. (Eks. 34:5, 6; 1 Pet. 5: 6, 7) An̈isanizen̈y fitiavan̈a, hatsarampan̈ahy ndreky famindrampo. Ke ampia izy ho ‘tia Jehovah Zan̈ahary’ amy fonany jiaby, fotony izio nivolan̈iny Jesosy fa ‘didy farany maventy sady voanalohany.’​—Mat. 22:37, 38.

13. Akory mety han̈ampian̈a pianatra Baiboly hahay toetriny Jehovah? Man̈ameza ohatra.

¹³ Hazavà amy pianatranao ino raha itiavanao Jehovah. Raha zen̈y mety han̈ampy izy ho tontohitry fa izy koa mba mila manjary kamaradiny Jehovah ndreky ho tia izy. (Sal. 73:28) Aboaha pianatranao volan̈a na andininteny mikoran̈a mikasiky toetriny Jehovah, ambaka ataony fitiavan̈anany, fahendrenanany, fitiavany ny rariny na angovonany, ke mety hanohin̈y fonany. Volàn̈a aminany fa izio mbala araiky amy toetry maro tsara itiavanao Jehovah, Babantsika andan̈itry an̈y. Han̈ampy izy handroso ndreky hatao batisa raha zen̈y. Mbala misy raha hafa koa han̈ampy izy.

14. Ino ma koran̈iny Hebreo 10:24, 25 ao momba fivorian̈a ke mety han̈ampy pianatra Baiboly handroso?

¹⁴ Atsika jiaby io samby man̈iry hanan̈a fampianaran̈a Baiboly mandroso firaka amy batisa aby. Ke zen̈y mahavy atsika mampirisiky iro handeha hivory. Koran̈indro pitory zadraharaha aby io fa pianatra mandeha mivory ny  ten̈a malaky mandroso. (Sal. 111:1) Ke sasany amindro direkty mikoran̈a amy pianatrandro fa mizara aroe fianaran̈a Baiboly, ke antsasany aminany io atao antran̈o, fa antsasany ndraiky amy fivorian̈a an̈y. Mety man̈ano zen̈y koa anao. Vakia amy pianatranao amy zay Hebreo 10:24, 25, ke hazavà aminazy hatsaran̈a ho azony izikoa izy mivory. Aboaha izy video Ino ma Raha Atao amy Tran̈o Fivorian̈a An̈y? * Izikoa izy efa mandeha mivory, ampia izy baka tsy hanapatapaka fivorian̈a.

15. Ino raha mety hataonao baka olo ampianarinao hivory tsy tapaka?

¹⁵ Karakory fo izikoa pianatranao mbala tsy mivory na mahalan̈a mivory? Mila koran̈inao aminany raha nianaran̈a tampivorian̈a tan̈y vo tsy ela. Man̈anaova mafana fô tsara anao koa fa mitantara raha zen̈y. Mety tihandeha hivory edy izy izikoa anao man̈ano zen̈y. Ameza izy koa Tilikambo Fiambesan̈a na Boky Fianaran̈a amy Fivorian̈a Momba Fiain̈anantsika Ndreky Fanompoan̈a, ampiasain̈a amy fotoan̈a io. Aboaha izy raha hianaran̈a amy fivorian̈a man̈araka, baka io an̈ontania izy aia amy raha handeha hianaran̈a aby io ten̈a tiany. Ataova tsapany fa ho tsara mandilatra raha hitany ndreky ren̈iny amy fivavahan̈a hafa an̈y raha ho tsapany ampivorian̈a an̈y. (1 Kor. 14:24, 25) Hahita kamarady tsara mety halain̈a tahaka izy an̈y, ke iro io mety han̈ampy izy hahafeno fepetra hatao batisa.

16. Ino aby raha mila atao baka pianatra Baiboly araiky handroso ke hatao batisa, avio ino raha hidinihintsika amy lahatsoratra man̈araka?

¹⁶ Akory han̈ampian̈a pianatra Baiboly ho avy amy batisa? Mila ataontsika tsapany fa fianaran̈a Baiboly io ten̈a raha maventy ankitin̈y. Ke ampirisiha izy hianatra izio tsy tapaka isaka herin̈iandra ndreky han̈oman̈a tsarabe alohany hianatra. Ampirisiha koa izy hikoran̈a amy Jehovah isanandra, baka izy hanan̈a fifandraisan̈a manokan̈a aminany. Aza adin̈a mitaon̈o izy handeha hivory. (Zahava “ Raha Mila Ataony Pianatra Baiboly Baka Izy Handroso ke Hatao Batisa”) Ho hitantsika amy lahatsoratra man̈araka ndraiky raha dimy mila ataony papianatra Baiboly baka pianatranany handroso ke hatao batisa.