LAHATSORATRA FIANARAN̈A 42
Ampia Pianatranao Hahafeno Fepetra Hatao Batisa—Fizaran̈a 2
‘Tandrema tsara fo ain̈inao ndreky fampiaran̈anao.’—1 TIM. 4:16.
HIRA 77 Mamiratra ao Anaty Haizina
HO HITA ATO *
1. Ino ivolan̈ana fa asa fan̈anovan̈a pianatra io man̈avotro fahin̈ana?
MAN̈AVOTRO fahin̈ana asa fan̈anovan̈a pianatra io. Amy Matio 28:19, 20 ao baka Jesosy man̈iraka pan̈aradia izy karaha ty: ‘Mandihana, ataova pianatra olo, baka io ataova batisa iro.’ Nan̈ino ma batisa io ten̈a ilain̈a? Fotony tsy maintsy atao batisa olo araiky izikoa tiho voavonjy. Tsy maintsy mino izy fa baka amy Jesosy naty ndreky nivilomin̈y, mahavy izy afaka man̈anten̈a ho avotro. Zen̈y nahavy apostoly Petera nivolan̈a: ‘Batisa ny raha man̈avotro anaro, baka tamy familoman̈a Jesosy Kristy.’ (1 Pet. 3:21) Lera olo araiky vita batisa vo afaka man̈anten̈a ho voavonjy ndreky hiain̈y mandrakizay.
2. Ino raha mila hifen̈antsika mare, koran̈iny 2 Timoty 4:1, 2?
2 Izikoa atsika tihan̈ampy olo hanjary pan̈aradia Jesosy, atsika mila mankatsara fahaizantsika mampianatra. (Vakia 2 Timoty 4:1, 2.) Salakady Jesosy lastio nan̈iraka atsika ‘hampianatra olo.’ Apostoly Paoly koa nivolan̈a fa ‘mila maharitry aminy asa io’ atsika. Ino antony? Fotony atsika ‘koa man̈ano zen̈y’ ho izy, ‘tsy atsika fo ho avotro fa lan̈iany olo mitandren̈y atsika koa.’ Zen̈y nahavy izy nandrisiky atsika ‘hitandrin̈y ain̈intsika ndreky fampianaran̈antsika fo.’ (1 Tim. 4:16) Dikanizen̈y, man̈ampy olo hanjary pan̈aradia Jesosy atsika izikoa fa mampianatra Baiboly. Ke tokony han̈ano erakany farany tsara vitantsika atsika izikoa fa man̈ano asa io.
3. Ino raha hidinihintsika amy lahatsoratra ty ato?
3 Mandeha antapitrisany olo ampianarintsika Baiboly, erantany. Lahatsoratra araiky taloha in̈y, efa nikoran̈a fomba sasany han̈ampian̈a olo farany maro ho vita batisa ke hanjary pianatrany Jesosy Kristy. Aminy araiky ty ato ndraiky atsika hizaha raha dimy mety ataony papianatra, han̈ampian̈a pianatranany handroso ke ho vita batisa.
MAHAIZA MAMPIASA BAIBOLY
Iangavia papianatra Baiboly efa zadraharaha han̈ampy anao hahay hampiasa Baiboly tsarabe (Zahava fehintsoratra 4-6) *
4. Nan̈ino ma atsika tsy tokony han̈azava raha maro loatra izikoa fa mampianatra Baiboly? (Zahava lamariky amy pazy ambany.)
4 Tiantsika mare raha ampianarintsika baka amy Baiboly ao, ke tara hely, tiantsika koran̈iny amy pianatrantsika aby raha jiaby haintsika. Kanefa mila mitandrin̈y fo atsika. Fotony na anao hitariky fianaran̈a Tilikambo Fiambesan̈a, na hitariky Fianaran̈a Baiboly Ataony Fiangonan̈a, na hampianatra Baiboly, anao tsy tokony han̈azava raha maro loatra. Izikoa tiantsika hahay hampiasa Baiboly tsarabe, atsika mila mifehy ten̈a tsy han̈azava indraiky mipàka raha jiaby haintsika momba andininy na fotokevitry io. * (Jaona 16:12) Aleva onon̈o baka raha hainao taminy anao vo natao batisa. Mety fampianaran̈a fototro fo donko raha hainao tamy zen̈y. (Heb. 6:1) Efa maromaro taon̈o anao vo nahay raha jiaby hainao iziô io. Ke aza totofan̈a fan̈azavan̈a maro loatra olo ampianarinao.
5. a) Izikoa 1 Tesalonianina 2:13 dinihin̈y, ino raha tiantsika hazava aminolo ampianarintsika? b) Akory mety han̈ampiantsika izy hikoran̈a raha ianarany?
5 Tiantsika hazava tsarabe aminolo ampianarintsika fa baka amy Baiboly ankitin̈y raha ianarany. (Vakia 1 Tesalonianina 2:13.) Ino raha mety hataontsika? Ampirisiha izy hikoran̈a raha ianarany io aminolo. Anaro koa fa mamaky andininteny, ndraikindraiky mba iraha izy koa man̈azava izio. Ataova tsapany fa mahakasiky izy raha koran̈iny Baiboly. Man̈apitraha fan̈ontanian̈a mety han̈ampy izy han̈aboaka raha an̈atiny jerinany momba andininteny nivakiany. (Lioka 10:25-28) Ohatra iziô, an̈ontania izy: “Ino ma toetriny Jehovah hitanao baka aminy andininy io?” “Ino hatsaran̈a azonao baka amy raha koran̈iny Baiboly io?” “Akory fahitanao raha vo nianaranao tio in̈y?” (Ohab. 20:5) Ke tsy hamarozany raha hainy pianatra io ny ten̈a raha maventy, fa fitiavany izio ndreky fan̈arehany izio.
6. Ino mahatsara mampianatra Baiboly miaraka amy papianatra zadraharaha?
6 Asa anao efa navy niaraka nampianatra tamy papianatra zadraharaha? Izikoa sendra tafiaraka aminolo karaha zen̈y anao, an̈ontania izy karakory fahitany fomba fampianaranao ndreky fahaizanao mampiasa Baiboly. Mila manetry ten̈a anao izikoa tihahay hampianatra tsarabe. (Ampiràn̈a aminy Asan’ny Apostoly 18:24-26.) An̈ontania koa izy, asa nazava tamy pianatra io raha nianarany. Izikoa sendra tsy iô anao an̈atiny herin̈iandra araiky na vitsivitsy, iangavia papianatra zadraharaha io hampianatra olo ampianarinao Baiboly io, baka hitohy fo fianaran̈anany. Amy zen̈y ho hitany pianatra io fa ten̈a raha maventy ankitin̈y mianatra Baiboly. Adosoa an̈aty jery foeky firitriretan̈a fa pianatra io “ninao”, ke tsisy olo hafa tokony hampianatra izy eky izikoa tsy anao. Hitady raha hahatsara pianatra io baka ny raha tadiavinao. Hitombo raha ho hainy izikoa mitohy fo fianaran̈anazy ndray anao tsy iô.
ABOAHA FA TIANAO SALAKADY INOANAO RAHA AMPIANARINAO
Koràn̈a aminolo ampianarinao tantaranolo nan̈ano fan̈ovoan̈a tamy fiain̈ana, misy hahitany fomba mety han̈arehany raha nianarany (Zahava fehintsoratra 7-9) *
7. Akory mety han̈ampianao pianatranao ho tia raha ianarany?
7 Mila ataonao hitany pianatranao fa inoanao ankitin̈y ny marin̈y amy Baiboly ao sady tianao mare. (1 Tes. 1:5) Izikoa anao man̈ano zen̈y, hanjary ho tiany pianatranao io koa raha ianarany. Ho hitany fa mahatsara izy man̈araka raha koran̈iny Baiboly. Ke nan̈ino izikoa mba tantarainao aminany hely hatsaran̈a nazonao, izikoa anao fa nampifan̈araka fiain̈ananao tamy raha nianaranao!
8. Ino koa raha mety hataonao han̈ampian̈a pianatranao? Nan̈ino?
8 Karakory ndraiky izikoa pianatra io misy problemo? Mety misy tantarany piaramanompo niatriky raha sarotro miran̈a ninany amy lahatsoratra ndreky video amy jw.org ao. * Ke nan̈ino izikoa mba tantarainao aminany raha zen̈y ndreky fomba niatrehandro izio! Amy zen̈y ho hitany fa hahazo hatsaran̈a izy izikoa man̈araka toro lalan̈any Baiboly. Izikoa ndraiky piaramanompo io amy fiangonan̈anaro, indesa izy miaraka mampianatra aminao.
9. Akory mety han̈ampianao pianatranao ho zatra mikoran̈a raha ianarany aminy havany ndreky amy kamaradiny?
9 Izikoa pianatranao manambady kanefa vadiny mbala tsy mianatra Baiboly, tahaoma vadiny hiaraka hianatra aminaro. Ampirisiha pianatranao hikoran̈a raha ianarany aminy havany ndreky amy kamaradiny. (Jaona 1:40-45) Lera anaro mianatra, an̈ontania izy: “Akory han̈azavanao izio amy lafamìnao?” na “Ino andininteny hiritriretinao hampiasain̈a han̈aporofoan̈a zen̈y amy kamaradinao?” An̈isany fomba ampiofan̈anao izy hanjary papianatra raha zen̈y. Fotony izikoa fa mandeha fotoan̈a, mety hahafeno fepetra hitory miaraka amy fiangonan̈a izy. An̈ontania izy tsao misy olo hainy mba tihianatra Baiboly. Izikoa misy, direkty mitadiava fomba hifandraisan̈a aminolo io, baka io aboaha izy fomba fianaran̈a Baiboly. Aboaha izy koa video Karakory ma Fianaran̈a Baiboly Zen̈y? *
AMPIA IZY HIKAMARADY AMINOLO AMY FIANGONAN̈A
Ampirisiha pianatranao hikamarady aminolo amy fiangonan̈a (Zahava fehintsoratra 10-11) *
10. Izikoa 1 Tesalonianina 2:7, 8 zahan̈a, akory hangalantsika tahaka raha nataony apostoly Paoly?
10 Olo mampianatra Baiboly zen̈y mila mizaha raha ilainolo ampianariny. Aza adin̈a fa pianatra io mety hanjary rahalahy na ranabavy amy fiangonan̈a! (Vakia 1 Tesalonianina 2:7, 8.) Ndraikindraiky mety tsy ho mora aminany han̈ova fomba fiain̈ana efa nahazatra izy na hiala iry namany taloha. Ke ampia izy hahita naman̈a vaovao amy fiangonan̈a ao. Anao antsendriky mila mifen̈y hanjary kamaradiny. Dikanizen̈y, ankoatrany fianaran̈a Baiboly ataonaro, tokony han̈ano raha miaraka koa anaro. Kahia amy telefony izy, na andifasa mesazy, baka io mba vangivangia koa izy lera anaro tsy mianatra in̈y. Ho hitany baka amy zen̈y fa anao tia izy ankitin̈y sady mitady raha mahatsara izy.
11. Nan̈ino ma atsika mila man̈ampy olo ampianarintsika hinaman̈a amy piaramanompo?
11 Asa efa navy ren̈inaro fomba fivolan̈ana ty: “Olo araiky tsy mahabe tsaiky.” Mbala marin̈y fo volan̈a zen̈y firaka aminy asa fampianaran̈a Baiboly. Tsisy olo hahavita han̈ampy olo ampianariny hanjary pianatrany Jesosy, izikoa tsy iô fan̈ampiany fiangonan̈a. Zen̈y mahavy pitory zadraharaha aby io man̈ano raha ifandraisanolo ampianariny amy piaramanompo. Fotony piaramanompo aby io koa afaka man̈ampy pianatra io hanjary kamaradiny Jehovah, ndreky han̈amia korazy izy lera izy an̈atiny problemo. Tiantsika ho tsapanolo ampianarintsika fa manan̈a havan̈a izy fotony an̈isany fiangonan̈a. Ke ataova raha hahavy pianatranao ho tia piaramanompo. Izikoa anao man̈ano zen̈y, ho moramora aminany hanapaka fifandraisan̈a aminolo tsy man̈ampy izy ho tia Jehovah. (Ohab. 13:20) Tsy hahatsiaro ho latsatokan̈a foeky izy izikoa hialandry kamaradiny, fotony izy manan̈a ten̈a naman̈a an̈ivony fandaminan̈any Jehovah.—Mar. 10:29, 30; 1 Pet. 4:4.
AMAFISA TSARABE FA TEN̈A ILAIN̈A MANOKANTEN̈A NDREKY HATAO BATISA
Koa fa mandeha fotoan̈a, hahafeno fepetra hatao batisa fo pianatra io (Zahava fehintsoratra 12-13)
12. Nan̈ino ma atsika tsy tokony havavy hikoran̈a momba fanokan̈anten̈a ndreky batisa aminolo ampianarintsika?
12 Aza adin̈a fa han̈ampy olo hanompo Jehovah ndreky hanjary Vavolombelon̈onany mahavy atsika mampianatra Baiboly. Ke aza misalasala foeky hikoran̈a aminolo ampianarinao fa ten̈a ilain̈a manokanten̈a amy Jehovah ndreky atao batisa, intsaka eky izikoa fa refindrefin̈y na fanjava maromaro izy nianatra tsy tapaka sady efa nanomboko nivory. Tokony hazava aminany tsarabe fa matoa atsika mampianatra izy, tiantsika ho vita batisa izy.
13. Ino aby raha mila ataony pianatra Baiboly baka izy hahafeno fepetra hatao batisa?
13 Izikoa olo ampianarinao Baiboly tihatao batisa, misy raha maromaro mila ataony. Mila mianatra raha momba Jehovah antsendriky izy, baka izy ho tia Jehovah ndreky hatoky izy. (Jaona 3:16; 17:3) Mila mifen̈y izy baka hanjary kamaradiny Jehovah ndreky piaramanompo. (Heb. 10:24, 25; Jak. 4:8) Koa fa mandeha fotoan̈a, hanen̈iny izy tamy raha ratsy nataony, ke han̈ano fan̈ovoan̈a mifan̈araka amy zen̈y izy. (Asa. 3:19) Hikoran̈iny aminolo koa raha inoany. (2 Kor. 4:13) Hanokanten̈a ndreky hatao batisa amy zay izy. (1 Pet. 3:21; 4:2) Haravoan̈a ma ninolo jiaby aminandra io! Fa parpavianizen̈y, deray izy aminy ezaka jiaby ataony, baka io ampirisiha fo izy hiezaka.
DINIHA MATETITETIKY FANDROSOAN̈ANANY
14. Karakory ahaizany papianatra Baiboly fa ten̈a mandroso ankitin̈y olo ampianariny?
14 Mila maharidraha atsika izikoa fa man̈ampy olo araiky hanokanten̈a ndreky hatao batisa. Fa ndray zen̈y, mila alaintsika onon̈o tsarabe izikoa olo ampianarintsika io ten̈a man̈iry hanompo Jehovah ankitin̈y. Asa mba hitanao amy raha volan̈iny na raha ataony fa izy mifen̈y man̈araka didiny Jesosy? Sa raha tihahay Baiboly fo izy?
15. Akory hahaizany papianatra Baiboly fa mandroso pianatranany va tsy mandroso?
15 Diniha matetitetiky fandrosoan̈any pianatranao. Ohatra iziô, koran̈iny aminao ma raha tsapany momba Jehovah? Mivavaka amy Jehovah ma izy? (Sal. 116:1, 2) Izy ma tia mamaky Baiboly? (Sal. 119:97) Izy ma mivory tsy tapaka? (Sal. 22:22) Efa nivoany ma fomba fiain̈ananany? (Sal. 119:112) Efa nikoran̈iny tamy lafamìnany ndreky tamindry namany ma raha ianarany? (Sal. 9:1) Fa ny raha ten̈a maventy, izy ma tihanjary Vavolombelon̈o Jehovah? (Sal. 40:8) Izikoa misy araikiaraiky amindro raha aby io tsy ataony, diniha ino mahavy izy tsy man̈ano izio, baka io koràn̈a izy. Avantàn̈a direkty koran̈a, fa ndray zen̈y, mifen̈a fo ho tsara fan̈ahy. *
16. Akory ahaizan̈a fa tokony hifaran̈ana fianaran̈a Baiboly ataonolo araiky?
16 Diniha matetitetiky tsao efa tokony hadôko fianaran̈any pianatra io. Aleva onon̈o: ‘Tsy man̈oman̈a foeky ma izy isaka anaro hianatra? Kamo mivory ma izy? Izy ma mbala manan̈a fahazaran̈a ratsy? Va izy mbala mivavaka amy fivavahan̈a diso an̈y?’ Raharaha izikoa mbala “ia” valiny fan̈ontanian̈a aby io! Nan̈ino ma? Fotony izikoa atsika mbala manohy mampianatra olo karaha zen̈y, atsika miran̈a mampianatra olo hilomaon̈o kanefa olo io tsy mimenimeny hijobo rano aby. Ke izikoa tsy ten̈a tiany pianatra io raha ianarany na tsy von̈ono hiova foeky izy, tsaratsara aminany donko faran̈ana fianaran̈a e!
17. Ino aby raha mila ataontsika baka atsika hahavita ‘hitandrin̈y fomba fampianaran̈antsika fo’, eraka raha koran̈iny 1 Timoty 4:16?
17 Ten̈a raha maventy amintsika andraikitrintsika mampianatra Baiboly io. Tiantsika hahafeno fepetra hatao batisa baka iro olo ampianarintsika aby io. Zen̈y mahavy atsika mifen̈y mare hahay hampiasa Baiboly izikoa fa mampianatra. Ataontsika hitany pianatrantsika koa fa inoantsika sady tiantsika raha ampianarintsika io. Ampirisihintsika koa izy hinaman̈a amy piaramanompo. Ataontsika mazava aminany tsarabe fa ten̈a ilain̈a manokanten̈a ndreky atao batisa zen̈y. Tsy zen̈y fo fa, dinihintsika matetitetiky koa fandrosoan̈anany. (Zahava “ Raha Mila Ataony Papianatra Baiboly Baka Pianatranany Hahafeno Fepetra Hatao Batisa”) Ravoravo mare atsika fotony mba an̈isany man̈ano asa man̈avotro fahin̈ana io! Ke irarian̈a atsika han̈ano erakany farany tsara vitantsika han̈ampian̈a iro pianatra Baiboly aby io hahafeno fepetra hatao batisa.
HIRA 79 Ampianaro Izy Ireo mba Handroso Hatrany
^ feh. 5 Tombontsoa tsisy ambaka izy nintsika izikoa fa mampianatra Baiboly, fotony atsika afaka man̈ampy olo han̈ano raha nan̈irahany Jehovah ndreky hanan̈a fomba fisain̈ana tiany. Lahatsoratra ty han̈ampy atsika hankatsara fahaizantsika mampianatra.
^ feh. 4 Zahava lahatsoratra “Tandrema Fandriky aby ty koa fa Mampianatra Baiboly”, amy Boky Fianaran̈a amy Fivorian̈a Momba Fiain̈anantsika Ndreky Fanompoan̈a Septambra 2016.
^ feh. 8 Amy jw.org/mg ao, mandihana amy MOMBA ANAY > FITANTARANA > MANOVA OLONA NY BAIBOLY.
^ feh. 9 Amy JW Library® ao, mandihana amy MULTIMÉDIA > NOS RÉUNIONS ET NOTRE MINISTÈRE > OUTILS POUR LA PRÉDICATION.
^ feh. 15 Zahava lahatsoratra “Fitiavan̈a Jehovah Mahavy Olo Araiky Tihan̈ano Batisa” ndreky “Anao ma Efa Von̈ono Hatao Batisa?” amy Tilikambo Fiambesan̈a Marsy 2020.
^ feh. 77 FAN̈AZAVAN̈A SARY: Ranabavy araiky miaraka mampianatra amy ranabavy araiky zadraharaha. Nambarany ranabavy zadraharaha io izy tafaranio raha mety hataony baka izy tsy han̈azava raha maro loatra lera mampianatra.
^ feh. 79 FAN̈AZAVAN̈A SARY: Pianatra io koa fa nianatra Baiboly, nanjary hainy raha tokony hataony hankatsaran̈a fifandraisan̈andro roeny vadiny. Raha io baka tio nikoran̈iny tamy vadiny.
^ feh. 81 FAN̈AZAVAN̈A SARY: Nahazo kamarady pianatra io izikoa fa nivory tamy Tran̈o Fivorian̈a. Ravoravo iro roeny ramosenany izikoa fa niainviteny kamaradiny io tantran̈o.
