1. Ino safidy farany tsara mety hataontsika?

MATETIKY, safidy ataony raimandreny misy vokany amy fiain̈ananiry zanakandro, ndray fa mandeha fotoan̈a. Izikoa raimandreny tsy man̈ano safidy tsara, mety ho tatrany problemo edy zanakandro. Fa iro ndraiky koa man̈ano safidy tsara, mety ho sambatra ndreky ho afapo amy fiain̈ana zanakandro. Ndray izy man̈ano zen̈y, tsy raimandreny fo mila man̈ano safidy tsara fa iro tsaiky aby io koa. Ino safidy farany tsara mety hataontsika? Manompo Jehovah Babantsika be fitiavan̈a andan̈itry an̈y.​—Sal. 73:28.

2. Ino safidy tsara nataony Josefa ndreky Maria? Ino koa safidy tsara nataony Jesosy?

² Nifen̈y Josefa ndreky Maria, olobeny Jesosy, nan̈ampy zanakandro hanompo Jehovah. Naboakandro tamy safidy nataondro fa fanompoan̈a Jehovah ny raha farany naventy tamindro. (Lioka 2:40, 41, 52) Jesosy koa nan̈ano safidy tsara, ke safidy aby nataony zen̈y nan̈ampy izy hahavita raha nan̈irahany Jehovah izy. (Mat. 4:1-10) Izy koa fa be, nanjary tsara fan̈ahy, nisy korazy ndreky tsy nivadiky. Zen̈y koa raha iriny raimandreny kristianin̈y hataony zanakandro. Ravoravo iro izikoa zanakandro man̈ano karaha nataony Jesosy.

3. Ino aby fan̈ontanian̈a handeha hidinihintsika ato?

³ Handiniky fan̈ontanian̈a aby ty atsika amy lahatsoratra ty ato: Ino aby safidy tsara nataony Jehovah momba Jesosy? Ino aby raha mety ianarany raimandreny kristianin̈y baka amy safidy tsara nataony Josefa ndreky Maria, olobeny Jesosy? Baka io ino raha mety ianarany tanora baka amy safidy nataony Jesosy?

4. Ino safidy maventy nataony Jehovah momba Zanany?

⁴ Jehovah nifidy raimandreny ten̈a tsara, nirahiny nitarimy Jesosy. (Mat. 1:18-23; Lioka 1:26-38) Karaha ataony Maria, izy ten̈a tia Jehovah ndreky Volan̈anany. Mankamarin̈y zen̈y vavaka baka tamy fô jiaby nataony, koran̈iny Baiboly ao. (Lioka 1:46-55) Josefa koa farandraha nazoto nan̈araka volan̈any Jehovah eky. Hita baka amy zen̈y fa Josefa tsy vitany navozo Zan̈ahary fo fa tihamparavoravo izy koa.—Mat. 1:24.

5-6. Ino aby raha sarotro nambelany Jehovah niaretany Zanany?

⁵ Tsy olo nanandraha nifidiny Jehovah hitarimy Jesosy, fa olo masikiny. Man̈aporofo zen̈y fan̈atitry nataony Josefa ndreky Maria, tafara heliny Jesosy teraka. (Lioka 2:24) Josefa lastio pandrafitry, ke evandraha nanan̈a tran̈o hely fiasany izy, narikitry tran̈ondro ta Nazareta tan̈y. Nanan̈a fiain̈ana tsotra koa iro roe fivadiany, fotony iro maro anaka. Kadiriny fito tio zanakandro tamy zen̈y.—Mat. 13:55, 56.

⁶ Marin̈y ndraiky fa Jesosy narovany Jehovah tamy fotoan̈a sasany, fa ndraikindraiky koa, nambelany izy hiatriky raha sarotro. (Mat. 2:13-15) Iritrireta hely baka! Tamy voanalohany, havany Jesosy aby io tsy nino fa izy Mesia. Misaora nampalahelo Jesosy raha zen̈y! (Mar. 3:21; Jaona 7:5) Mbala tanora koa izy, efa naty Josefa. Hay be fa nafy taminany raha zen̈y. Tsy maintsy nisoatra asany babany izy, fotony izy talan̈olo. (Mar. 6:3) Tsy maintsy niasa mare izy namelon̈o mamany ndreky iry zandriny sady nikarakara raha nilaindro. Niasa fo izy rango maraindrain̈y firaka andra tsôfotro, ke misaora kajo mare izy koa fa hariva andra.

7. a) Ino aby fan̈ontanian̈a mila iritriretinolo tihiteraka? b) Amy karakory Ohabolana 2:1-6 io man̈ampy raimandreny hahay hitahiza?

⁷ Izikoa anaro fivadiany tihiteraka, ty fan̈ontanian̈a tsara iritriretinaro: ‘Zahay roe fivadiany ma manetry ten̈a ankitin̈y? Ten̈a tia Jehovah ndreky Volan̈anany ankitin̈y ma zahay?’ (Sal. 127:3, 4) Izikoa ndraiky anao efa mananjanaka, ty raha tsara dinihinao: ‘Zaho ma mba mampiofan̈a iro zanako aby io hazoto miasa?’ (Mpito. 3:12, 13) ‘Mifen̈y ma zaho miaro iro amy karazan̈a antambo mety handalo amy donia ty? Zaho ma miezaka man̈ampy  iro ho tsara fitondranten̈a fo?’ (Ohab. 22:3) Tia tsy tia, tsy maintsy hiatriky raha sarotro fo zanakanao. Ke sakavy ampioman̈a tsihelihely iro baka hahavita hiatriky fiain̈ana. Ambarà iro ampitiavan̈a karakory fomba fitadiavan̈a torohevitry amy Volan̈a Zan̈ahary ao izikoa fa misy problemo. (Vakia Ohabolana 2:1-6.) Akory iziô mety ataonao izikoa misy araiky aminy havanaro na lafamìnaro niala Jehovah? Mitadiava andininteny amy Soratra Masin̈y ao, ke ampia zanakanao hahita fa ten̈a raha maventy ankitin̈y tsy mivadiky amy Jehovah zen̈y. (Sal. 31:23) Izikoa ndraiky nisy araiky aminy havanaro na kamaradinaro naty, ambarà izy andininteny mety han̈ampy izy hahavita hiatriky favoazan̈a zen̈y ndreky tsy ho taitaitry.​—2 Kor. 1:3, 4; 2 Tim. 3:16.

8. Akory nan̈arehany Josefa ndreky Maria raha koran̈iny Deoteronomia 6:6, 7?

⁸ Vitany Josefa ndreky Maria nan̈ampy Jesosy hahazo sitraka tamy Zan̈ahary, fotony iro nan̈araka taridalan̈any Jehovah mandeha amy raimandreny. (Vakia Deoteronomia 6:6, 7.) Iro ten̈a tia Jehovah, ke nifen̈y angovo jiaby iro nan̈ampy zanakandro ho tia Jehovah karaha zen̈y koa.

9. Ino safidy maventy nataony Josefa ndreky Maria?

⁹ Josefa ndreky Maria nifidy hanompo Jehovah niaraka tamy zanakandro, ary raha zen̈y nataondro fahazaran̈a. Isaka herin̈iandra, iro nivory tamy synagoga ta Nazareta. Iro koa zatra nan̈aton̈o Pasky fatao isaka taon̈o, ta Jerosalema. (Lioka 2:41; 4:16) Iro koa fa nan̈ano diabe nandeha ta Jerosalema io, mety nararaotindro raha zen̈y nampianaran̈a zanakandro tantarany vahoakany Jehovah. Evandraha nitsidiky tany nikoran̈iny Soratra Masin̈y koa donko iro tandalan̈a. Kanefa izikoa fa nahainaro zanakandro, mety nahaisarotro tamindro nan̈ano raha arapan̈ahy niaraka tamy zanakandro. Kanefa nifen̈y fo iro nan̈ano zen̈y, ke maro hatsaran̈a nahazondro. Fanompoan̈a Jehovah ny raha ten̈a nifantohandro tamy fiain̈anandro, ke nanjary kamaradiny Jehovah aby iro jiaby fehiny!

10. Ino raha mety ianarany raimandreny kristianin̈y baka amy Josefa ndreky Maria?

¹⁰ Ino raha mety ianarany raimandreny kristianin̈y baka tamy raha nataony Josefa ndreky  Maria zen̈y? Ataova hitandry zanakanao amy raha volan̈inao ndreky amy raha ataonao fa tianao marin̈y Jehovah. Zen̈y raha ten̈a maventy. Tsaraova fa mila ampianao ho tia Jehovah zanakanao. Zen̈y kadô farany tsara mety hamezanao zanakanao! Ino ndraiky basy raha farany tsara mety ampianarinao iro? Fomba hanan̈a fahazaran̈a tsara aminy arapan̈ahy, karaha ataony mazoto mianatra Baiboly, mivavaka matetiky, mivory tsy tapaka sady mazoto manompo. (1 Tim. 6:6) Marin̈y ndraiky fa anao tsy maintsy miasa hamilaoman̈a zanakanao. (1 Tim. 5:8) Ndray izy man̈ano zen̈y, aleva onon̈o fa tsy vola ndreky fanan̈ana ny raha han̈avotro zanakanao lera Jehovah handravan̈a donia ty, fa fanan̈andro fifandraisan̈a tsara amy Jehovah. Zen̈y zaraiky fo koa raha han̈ampy iro ho tafiditry amy donia vaovao. *​—Ezek. 7:19; 1 Tim. 4:8.

11. a) Amy karakory 1 Timoty 6:17-19 io ten̈a man̈ampy raimandreny han̈ano safidy tsara? b) Ino aby tanjon̈o mety takarany fianakavian̈anaro, avio ino aby hatsaran̈a mety ho azonaro izikoa anaro man̈ano zen̈y? (Zahava “ Raha Mety Hataonaro Tran̈o Araiky”)

¹¹ Ten̈a mampahery mahita raimandreny marobe man̈ano safidy tsara, ke man̈ampy zanakandro hihavan̈a tsara amy Jehovah. Samby manompo Jehovah iro jiaby fehiny. Iro miaraka mivory, man̈aton̈o fivoriambe, avio miaraka manompo. Fianakavian̈a sasany ndraiky mandeha mitory amy tany tsy matetiky itorian̈a. Misy ndraiky miaraka mitsidiky Betela, na man̈orin̈y tran̈o ampiasainy fandaminan̈a. Iro io tsy maintsy nahafoe vola han̈anovan̈a raha jiaby zen̈y, ary hay be fa tsy mora amindro man̈ano zen̈y. Kanefa tsy very bôriny ezakandro zen̈y, fotony marobe hatsaran̈a hazondro baka amy Jehovah. (Vakia 1 Timoty 6:17-19.) Matetiky tsaiky nitarimin̈y tamy fomba karaha zen̈y, manjary manan̈a fahazaran̈a tsara fo firaka iro be. Ravoravo aby iro fotony karaha zen̈y fomba nitarimiany raimandrenindro iro. *—Ohab. 10:22.

12. Tsy maintsy nan̈ino Jesosy izikoa fa nahaibe?

¹² Tsy maintsy tsara fo safidy ataony Babany Jesosy andan̈itry an̈y. Ndray iry olobeny Jesosy tambony tany teto koa farandraha nahay nifidy eky. Tsy maintsy nan̈ano safidy koa Jesosy izikoa fa nahaibe. (Gal. 6:5) Nanan̈a safidy malalaka, karaha atsika koa baka izy, ke izy nety nifidy han̈ano zay raha tiany hatao fo. Kanefa tsy zen̈y raha nataony, fotony izy tiho tsara fihavanan̈a tamy Jehovah fo. (Jaona 8:29) Nan̈ino ma modely nambelany Jesosy zen̈y han̈ampy tanora maro han̈ano safidy tsara?

13. Ino safidy tsara nataony Jesosy, rango izy mbala hely?

 ¹³ Rango Jesosy mbala hely, izy efa nifidy han̈araka volan̈aniry olobeny edy, ke najainy fo iro. Izy tsiary ndraiky nieritreritry fa izy mahaihay tozay iro. (Lioka 2:51) Nataony tsara koa andraikitrinany amy maha talan̈olo izy. Tsy maintsy nifen̈y mare izy nianatra asany Josefa babany, amy zen̈y ho vitany tsarabe hamelon̈o iro jiaby fehiny.

14. Akory ahaizantsika fa Jesosy nazoto nianatra Soratra Masin̈y?

¹⁴ Mety nitantarainiry Josefa ndreky Maria tamy Jesosy donko, fa baka tamy fahagagan̈a nataony Jehovah nahavy izy teraka. Evandraha nitantaraindro taminany koa raha nivolan̈iny anjely in̈y momba izy. (Lioka 2:8-19, 25-38) Jesosy tsy vitany nitandren̈y raha nitantarain̈a taminany fo fa, nazoto nianatra Soratra Masin̈y koa izy. Akory ahaizantsika zen̈y? Mbala tsaiky izy efa ‘nampihafatra iro papianatra aby ta Jerosalema tan̈y, tamy fahaizany Soratra Masin̈y ndreky tamy valinteninany.’ (Lioka 2:46, 47) Resy lahatra mare koa izy taminio fa Jehovah ankitin̈y ten̈a Babany. Firy taon̈o ma izy tamy zen̈y? Folo aroe amby taon̈o fo!​—Lioka 2:42, 43, 49.

15. Akory nan̈aboahany Jesosy fa nifidy han̈ano sitrapony Jehovah izy?

¹⁵ Izikoa fa hainy Jesosy raha nan̈irahany Jehovah izy, direkty izy nan̈eky nan̈ano izio. (Jaona 6:38) Hainy fa tsy ho tianolo izy, ke mety nampandiniky izy hely raha zen̈y. Fa izy nifidy han̈araka volan̈any Jehovah fo. Jesosy koa fa natao batisa tamy taon̈o 29, han̈ano raha nan̈irahany Jehovah izy fo amy zay raha nahasôfy izy nanomboko tio. (Heb. 10:5-7) Ndray taminizy efa hofoaty taminy hazofijalian̈a, tsy niova hevitry foeky izy fa mbala nan̈ano sitrapony Babany fo.—Jaona 19:30.

16. Akory han̈arahany tsaiky modely nambelany Jesosy?

¹⁶ Hajà raimandreninao. Tsy lavorary olobenao, karaha Josefa ndreky Maria in̈y fo. Fa hajà fo iro ke tandrin̈esa tsarabe torohevitrindro, baka io areha. Ino antony? Fotony iro io nirahiny Jehovah hiaro anao ndreky hitarimy anao. Ho maro hatsaran̈a ho azonao izikoa anao man̈ano zen̈y.​—Efes. 6:1-4.

17. Izikoa zahan̈a Josoa 24:15, ino fanapahankevitry tsy maintsy ataony tanora tsiaraikiaraiky?

¹⁷ Fidiana azovy tianao hitompoen̈a. Io fanapahankevitry farany maventy tsy maintsy ataonao amy fiain̈ananao. Ke izikoa anao tihanompo  Jehovah, ataova hevitry ahaizanao azovy marin̈y izy, ino programonany, baka io akory mety han̈anovanao sitraponany. (Vakia Josoa 24:15; Mpito. 12:1; Rom. 12:2) Izikoa anao mamaky Baiboly isanandra sady mazoto mianatra izio, hahaihitombo fo fitiavanao Jehovah sady hatanjaka mare finoan̈anao.

18. Ino koa safidy tsy maintsy ataony tanora, baka io ino vokany?

¹⁸ Sitrapony Jehovah fo ataova voanalohany. Nan̈ino ma? Mampan̈anten̈a baka doniany Satana ty fa ho sambatra mare anao izikoa mampiasa fahaizan̈anao hampavantan̈a anao. Kanefa ny marin̈y aminany, olo karaha zen̈y ‘mitrebiky ain̈inany amy raha maro mampanehotehoko.’ (1 Tim. 6:9, 10) Fa anao ndraiky koa mitandren̈y volan̈any Jehovah ke mifidy han̈ano voalohantoeran̈a sitraponany, hahômby edy anao amy raha jiaby hataonao, sady ‘hahay handiniky tsarabe anao izikoa fa man̈ano raha.’​—Jos. 1:8.

19. Ino raha tsy mila adin̈any raimandreny?

¹⁹ Anaro raimandreny, mifen̈a angovo jiaby han̈ampy zanakanaro hanompo Jehovah. Iangavia Jehovah han̈ampy anaro han̈ano safidy tsara. (Ohab. 3:5, 6) Aza adin̈a fa raha ataonaro ny ten̈a misy vokany amy zanakanaro tozay raha volan̈inaro. Ke izikoa fa misy fanapahankevitry handeha hataonaro, ty raha ten̈a tsara iritriretinaro: ‘Akory hahavy zanako hahazo rady amy Jehovah?’

20. Ino aby hatsaran̈a ho azony tsaiky ndreky tanora, izikoa iro mifidy hanompo Jehovah?

²⁰ Akory ndraiky anaro tsaiky ndreky tanora? Afaka man̈ampy anaro han̈ano safidy tsara iro raimandreninaro aby io. Fa izikoa tianaro hahazo rady baka amy Zan̈ahary, mila mifen̈y anaro han̈ano safidy tsara. Aleva tahaka Jesosy, ke tompoe Jehovah Babanaro be fitiavan̈a andan̈itry an̈y. Izikoa anaro man̈ano zen̈y, rango izioty, ho hisy dikany fiain̈ananaro, baka io anaro ho sambatra ndreky ho ravoravo. (1 Tim. 4:16) Tsy zen̈y fo fa ho tsara mare fiain̈ananaro aminy hoavy!