1. Ino raha tsy maintsy ataontsika ndray atsika efa vita batisa?

ANAO ma efa vita batisa? Izikoa zen̈y, efa naboakanao taminolo jiaby fa anao mino Jehovah salakady von̈ono hanompo izy miaraka amy fandaminan̈anany. * Fa ndray zen̈y, tsy maintsy mifen̈y fo anao hampitombo fatokisanao Jehovah, ndreky ho resy lahatra fo fa izy ankitin̈y mitariky fandaminan̈anany, firaka iziô.

2-3. Ino raha ho hitantsika izikoa fa mandiniky fomba itaritany Jehovah fandaminan̈anany? Man̈ameza ohatra.

² Ino raha ho hitantsika izikoa fa mandiniky fomba itaritany Jehovah fandaminan̈anany? Toetrinany, raha handeha hataony, avio fitsipikinany. Handiniky toetrinany telo atsika ato.

³ Voanalohany, Jehovah tsy man̈avakavaka. (Asa. 10:34) Tiany Jehovah mare atsika, ke Zanany lastio namezany hatao ‘vidipan̈avotan̈a hamonjian̈a olo jiaby.’ (1 Tim. 2:6; Jaona 3:16) Jehovah koa man̈iraka vahoakanany hitory vaovao tsara aminolo jiaby tihitandren̈y, fotony tiany hahazo hatsaran̈a baka amy vidipan̈avotan̈a io olo jiaby. Faharoe, Jehovah io Zan̈ahary tia fihavanan̈a ndreky tia filaminan̈a. (1 Kor. 14:33, 40) Zen̈y aviany panomponany miray hina ndreky milamin̈y tsarabe. Fahatelo, Jehovah tia mampianatra. (Isaia 30:20, 21) Zen̈y mahavy fandaminan̈a mifen̈y mampianatra Volan̈a Zan̈ahary aminolo jiaby, fa tsy amintsika an̈ivony fiangonan̈a fo. Akory nahitan̈a fa nanan̈a iro toetry aby io koa iro Kristianin̈y taloha tan̈y? Nan̈ino atsika masaky mivolan̈a fa manan̈a toetry aby io koa vahoakany  Jehovah avahizo? Baka io akory fomba han̈ampiany fan̈ahy masin̈y anao tsy hiala amy fandaminan̈a foeky?

4. Nirahiny Jesosy han̈ino ma iro pan̈aradia izy tamy taonjato voanalohany, izikoa Asan’ny Apostoly 1:8 zahan̈a? Akory nahavitandro izio?

⁴ Tamy taonjato voanalohany. Baka aminy hafatra nitoriany Jesosy nahavy olo jiaby han̈anten̈a raha tsara. (Lioka 4:43) Izy nan̈iraka pan̈aradia izy hanohy asa efa nikomanseny io, ke hitory aminolo jiaby ambony tany, firaka ‘amy tany farany lavitry an̈y.’ (Vakia Asan’ny Apostoly 1:8.) Kanefa izikoa taminy angovondro manokan̈a fo, tsy ho vitandro asa io. Iro nila fan̈ampiany fan̈ahy masin̈y. Izio “pan̈ampy” nampan̈antin̈ainy Jesosy in̈y.​—Jaona 14:26; Zak. 4:6.

5-6. Karakory aby fomba nan̈ampiany fan̈ahy masin̈y iro pianatrany Jesosy aby io?

⁵ Tamy Pantekoty taon̈o 33, nahazo fan̈ahy masin̈y iro pan̈aradia Jesosy tamy taonjato voanalohany. Niaraka iro nahazo izio kony, iro efa nitory edy e! Tsy elanizin̈y, efa andrivony aby olo nan̈eky vaovao tsara nitoriandro. (Asa. 2:41; 4:4) Ninjehin̈y mare iro tafaranizen̈y. Iro ndraiky tsy navozo foeky, fotony iro efa nangataka tamy Jehovah: ‘Ataova raha hahavy zahay panomponao hafana fô ke hasaky hitory tsarabe.’ Nanjary feno fan̈ahy masin̈y iro baka tio, ke ‘nafana fô tsarabe iro koa fa nan̈ambara volan̈any Zan̈ahary.’​—Asa. 4:18-20, 29, 31.

⁶ Nisy problemo hafa koa iro pianatrany Jesosy aby io. Vitsy tamindro fo nanan̈a Soratra Masin̈y. Iro tamy zen̈y koa tsendriky nisy boky fianaran̈a Baiboly karaha amy zioty, kanefa samby isany fivolan̈anolo nila nitoriandro. Fa ndray tiô raha jiaby zen̈y, nazoto nitory fo iro, ke tan̈atiny 30 taon̈o tiô fo, efa vitandro ‘nitory tamy zavaboary jiaby tambaniny lan̈itry.’ (Kol. 1:6, 23) Ndray anao tsy miafatra!

7. Tan̈atiny 100 taon̈o loso zay, akory nahaizany vahoakany Jehovah raha tiany hataondro, baka io ino raha nataondro?

⁷ Aminandrantsika iziô. Jehovah tsy voly mitariky ndreky man̈amia angovo vahoakanany. Mampiasa Baiboly izy hitaritan̈a iro, ary izio baka amy fan̈ahy masin̈y. Amizio ao ahitan̈a fanompoan̈any Jesosy ndreky asa nan̈irahany pan̈aradia izy. Mbala mitohy firaka amy zioty asa zen̈y. (Mat. 28:19, 20) Karaha ty raha nambarany Tilikambo Fiambesan̈a, Zie 1881 (angiley): “Jehovah tsy raha nifidy atsika baka atsika halaza na hanjary pan̈arivo! Nifidy atsika izy baka atsika hampiasa zay raha anan̈antsika hitorian̈a vaovao tsara.” Ty koa raha nambarany bokikely Azovy ma Nan̈ankin̈ana Asa Io? (angiley), niboaka taminy 1919: “Maro mare asa tokony hatao. Kanefa asany Tompo aby iro io, ke izy han̈amia atsika angovo hahavitan̈a izio.” Nangala tahaka iro Kristianin̈y tamy taonjato voanalohany tan̈y iro rahalahintsika aby io, ke iro tsy vitany nisy korazy fo fa nazoto niasa koa. Iro natoky fa ho vitandro hitory aminolo isankarazany, fotony fan̈ahy masin̈y man̈ampy iro. Mbala zen̈y fo koa raha atokisantsika firaka iziô.

8-9. Ino ma raha nataony fandaminan̈any Jehovah baka vaovao tsara io ho ren̈inolo farany maro?

⁸ Fandaminan̈any Jehovah mampiasa fitaovan̈a farany tsara baka ho ren̈inolo vaovao tsara io. An̈isanizen̈y raha vita boky, “Photo-Drame de la Création” (angiley), grafôfaony, baka io fandaharan̈a amy radio. Izikoa fa nandeha fotoan̈a, nampiasa fitaovan̈a elektroniky ndreky Internet koa fandaminan̈a. Adika amy volan̈a isankarazany koa iro raha aboakantsika aby ao. Ino antony? Amy zen̈y kila olo maharen̈y vaovao tsara io amy fivolan̈ananany. Sady Jehovah lastio efa nivolan̈a fa vaovao tsara io tsy maintsy ambara ‘aminolo jiaby ambony tany, ndreky amy firenena jiaby, ndreky amy fivolan̈ana jiaby.’ (Apok. 14:6, 7) Tiany  Jehovah haharen̈y hafatra momba Fanjakan̈a io aby baka olo jiaby. Tsy man̈avakavaka ankitin̈y Jehovah! Sa akory ho anao?

⁹ Akory fo basy fomba hitorian̈a aminolo sarotro azo, karaha ataony olo mipetraka amy tran̈o misy sekirite mare in̈y ke sarotro idiran̈a? Fitorian̈a amy tany maro olo. Izio lamin̈y nataony fandaminan̈any Jehovah, amy zen̈y hahaiho maro fo olo karaha zen̈y haharen̈y vaovao tsara. Karaha ataony taminy 2001 in̈y, nikeny Filankevipitantan̈ana fampiasan̈a raha fan̈anaovan̈a fampirantian̈a misy larò ndreky karazany hafa izikoa fa nitory ta France. Nan̈ano karaha zen̈y koa pitory tantany hafa tafara tatỳ, ke raha zen̈y ten̈a nisy vokany tsara. Nan̈andran̈a fomba fitorian̈a vaovao koa atsika taminy 2011, ta Etazonỳ. Tamy tany farany maro olo ta New York tan̈y nan̈anaovan̈a izio. Tamy taon̈o voanalohany, nisy boky 102 129 ndreky gazety 68 911 nirasain̈a taminolo. Kadiriny 4 701 koa isakanolo nangataka hianatra Baiboly. Hita baka amy zen̈y fa ten̈a man̈ampy vahoakany Jehovah ankitin̈y fan̈ahy masin̈y. Nikeny Filankevipitantan̈ana hampiasa fampirantian̈a amy zay pitory jiaby erantany.

10. Izikoa tiantsika hankatsara fahaizantsika mitory ndreky mampianatra, ino raha mila ataontsika?

¹⁰ Ino raha mety hataonao? Areha fo zay raha ianaranao amy fivorian̈a, fotony zen̈y fomba ampiofan̈any Jehovah atsika hitory. Mifen̈a fo koa hiaraka hitory aminolo andiampitory araiky aminao. Iro io koa han̈ampy anao hankatsara fahaizanao mitory ndreky mampianatra. Aza voly manompo foeky, ndray misy problemo. Andininteny fototro ioren̈any lahatsoratra ty mampatsiaro atsika fa, tsy aminy angovontsika hahavitantsika sitrapony Jehovah io, fa baka amy fan̈ampiany fan̈ahy masin̈y. (Zak. 4:6) Matoky atsika fa hamezany atsika angovo ilaintsika, fotony atsika man̈ano asanany.

11. Akory nataony filankevipitantan̈ana tamy taonjato voanalohany baka vahoakany Jehovah niray hina tsarabe?

¹¹ Tamy taonjato voanalohany. Nilamin̈y ndreky niray hina tsarabe vahoakany Jehovah, fotony filankevipitantan̈ana ta Jerosalema nahay niaraka niasa ndreky niray sain̈y. (Asa. 2:42) Nan̈ino ma atsika mivolan̈a zen̈y? Raha  nandalo tamy taon̈o 49. Tsy nitovy hevitry momba famosiran̈a baka iro Kristianin̈y aby tan̈y taminio, ke nidinihiny filankevipitantan̈ana tsarabe raha io sady nitady fan̈ampiany fan̈ahy masin̈y koa iro. Izikoa baka tsy nilamin̈y problemo io, mety ho nisaratsaraka fiangonan̈a, ke mety nisy vokany ratsy taminy asa fitorian̈a raha zen̈y. Marin̈y ndraiky fa Jiosy iro apostoly ndreky antipan̈ahy ta Jerosalema aby io. Kanefa, iro tsy nan̈araka lovantsofin̈y jiosy, na nan̈araka hevitrinolo hafa nanohan̈a mare resaka famosiran̈a io. Ino raha nataondro? Nidinihindro tsarabe raha volan̈iny Volan̈a Zan̈ahary, baka io iro nangataka fan̈ahy masin̈y tamy Jehovah. (Asa. 15:1, 2, 5-20, 28) Ino vokany? Nitahiany Jehovah fanapahankevitrindro, ke nanjary niray hina ndreky nihavan̈a tsarabe iro fiangonan̈a aby io. Tsy zen̈y fo fa, nandroso mare koa asa fitorian̈a.​—Asa. 15:30, 31; 16:4, 5.

12. Ino ivolan̈ana fa ten̈a milamin̈y ndreky miray hina vahoakany Jehovah amy zioty?

¹² Aminandrantsika iziô. Mbala man̈ampy vahoakany Jehovah hilamin̈y ndreky hihavan̈a koa fandaminan̈a amy zioty. Mikoran̈a momba zen̈y lahatsoratra tamy Tilikambo Fiambesan̈any Ziona Sady Pan̈ambara Fan̈atrehany Kristy, 15 Novambra 1895. Izio niorin̈y tamy 1 Korintianina 14:40. Titranany io “Amy Fomba Mendriky Ndreky Milamin̈y.” Koran̈iny lahatsoratra io: “Iro apostoly aby io koa fa nanoratra tamy fiangonan̈a, maro raha nikoran̈indro momba filaminan̈a io. Tokony han̈araka raha voasoratra taloha aby io koa atsika, fotony antony nanoratan̈a iro io, hangalantsika fianaran̈a.” (Rom. 15:4) Mifen̈y angovo jiaby koa fandaminan̈a amy zioty man̈ano raha hampisy fihavanan̈a ndreky filaminan̈a an̈ivony fiangonan̈a, karaha tamy taonjato voanalohany in̈y. Miniminia hely baka! Anao iziô ndray mandeha amy fiangonan̈a hafa an̈y na antany hafa foeky, ke man̈aton̈o fianaran̈a Tilikambo Fiambesan̈a, anao tsy mahatsiaro saovasaova. Fotony nan̈ino? Hainao karakory fandehany fianaran̈a io, baka io ino lahatsoratra ianaran̈a. Izikoa tsy tio fan̈ampiany fan̈ahy masin̈iny Jehovah, tsy miray hina karaha zen̈y foeky panomponany.​—Zef. 3:9.

13. An̈atiny atsika mamaky Jakoba 3:17, ino aby fan̈ontanian̈a mila dinihintsika?

 ¹³ Ino raha mety hataonao? Mifen̈a hahazo fan̈ahy masin̈y, fotony baka amizio mahavy atsika miray sain̈y. Tokony hifen̈y fo koa anao han̈ano raha hisiany fihavanan̈a. (Efes. 4:1-3) Sady zen̈y lastio raha tiany Jehovah ataony panomponany! Ke man̈ontania ten̈a karaha ty: ‘Zaho ma mba man̈ano raha hisiany filaminan̈a ndreky fihavanan̈a an̈ivony fiangonan̈a? Zaho ma mifen̈y man̈araka raha volan̈indro piandraikitry aby io? Olo mety tavandrain̈a ma zaho, intsaka eky zaho koa manan̈a andraikitry an̈ivony fiangonan̈a? Man̈aja lera ma zaho sady mazoto man̈ampy olo?’ (Vakia Jakoba 3:17.) Izikoa hitanao fa mbala tsy karaha zen̈y anao, mangataha fan̈ahy masin̈y amy Jehovah. Ambilà izio hankatsara toetrinao ndreky hibeko raha ataonao. Ho hitanao fa, hahaiho tiany piaramanompo fo anao sady hankasitrahandro mare koa raha ataonao.

14. Izikoa zahan̈a Kolosianina 1:9, 10, akory fomba nampianarany Jehovah iro olonany taloha tan̈y?

¹⁴ Tamy taonjato voanalohany. Farandraha tiany Jehovah eky mampianatra vahoakanany. (Sal. 32:8) Tiany hahay izy ndreky ho tia izy, baka io hiain̈y mandrakizay atsika fotony atsika io zanany. Kanefa tsy ho posibla foeky raha aby zen̈y izikoa atsika tsy ampianariny. (Jaona 17:3) Tamy taonjato voanalohany, nampiasa fiangonan̈a izy hampianaran̈a olonany. (Vakia Kolosianina 1:9, 10.) Nan̈ampy iro pianatra aby tamy zen̈y mare koa fan̈ahy masin̈y, fotony izio “pan̈ampy” nampan̈antin̈ainy Jesosy in̈y. (Jaona 14:16) Izio nan̈ampy iro hahay Volan̈a Zan̈ahary tsarabe, salakady nampatsiaro iro raha jiaby nivolan̈iny Jesosy ndreky raha nataony, fotony efa tafara tatỳ vo nisoratin̈y tan̈atiny Filazantsara tao raha momba Jesosy aby zen̈y. Ino vokany? Nahainatanjaka finoan̈andro,  nitombo mare fitiavandro Jehovah ndreky Jesosy, baka io nahainifankatia fo koa iro.

15. Akory nan̈atantirahany Jehovah fampan̈antinan̈anany aminy Isaia 2:2, 3 ao?

¹⁵ Aminandrantsika iziô. Mivolan̈a Isaia 2:2, 3 (Vakia.) fa “aminandra farany”, hisy olo marobe baka amy firenena jiaby “hanonga amy bongony Jehovah.” Iro io handeha hampianariny fitsipikinany. Tanteraka aminandrantsika zioty faminanian̈a io, fotony fivavahan̈a diso tsy mahaoesa fivavahan̈a marin̈y foeky. Tsy zen̈y fo, fa treka koa hanin̈y arapan̈ahy amezany Jehovah panomponany. An̈isanizen̈y lahatsoratra, kabaro, ndreky video isankarazany. (Isaia 25:6) “Panompo atokisan̈a ndreky mahadiniky raha” ampiasainy han̈ano zen̈y. (Mat. 24:45) Mitovy amy raha tsapany Eliho, kamaradiny Joba raha tsapantsika. Izy nivolan̈a fa izikoa mbala papianatra fo, tsisy mandilatra Jehovah.​—Joba 36:22.

16. Ino aby raha mila ataonao baka anao hahazo hatsaran̈a baka amy fampianaran̈any Jehovah?

¹⁶ Ino raha mety hataonao? Iangavia Jehovah han̈ampy anao, ke mangataha fan̈ahy masin̈y aminany. Izio afaka man̈ampy anao han̈araka raha nivakinao ndreky nianaranao tamy Volan̈a Zan̈ahary tao, amy fiain̈ananao. Niangavy Jehovah karaha zen̈y panoratra Salamo ty. Ho izy: ‘Jehovah, ampianara lalan̈anao zaho, misy handihanako amy fahamarin̈ananao. Ataova raha hatahorako an̈aranao, amy fonaka jiaby.’ (Sal. 86:11) Fan̈ampinizen̈y, mazotoa mamaky Baiboly ndreky mianatra izio. Ianara tsarabe iro raha naboakany fandaminan̈a aby io. Aza adin̈a fa tsy raha hampitombo fahaizan̈a fo tanjon̈onao. Mila resy lahatra koa anao fa marin̈y raha ianaranao. Han̈ampy anao hahavita zen̈y fan̈ahy masin̈iny Jehovah. Tokony hitady fomba hampahirezan̈a piaramanompo koa anao, fotony iro io havanao. (Heb. 10:24, 25) Akory mety han̈anovanao zen̈y? Lera fivorian̈a, man̈ameza valinteny baka amy fô. Izikoa anao mahazo anjara, omàn̈a tsarabe, baka io mangataha fan̈ahy masin̈y amy Jehovah baka ho vitanao tsara izio. Zen̈y koa fomba han̈aboahanao amy Jehovah ndreky Jesosy fa tianao iro ‘ondrikondrikinany’ aby io. Iro io farandraha valera amindro eky!​—Jaona 21:15-17.

17. Karakory aby mety han̈aboahanao fa anao tsy mivadiky amy fandaminan̈any Jehovah?

¹⁷ Teteky iô, tsy ho hisy fandaminan̈a hafa eky ambony tany eto ankoatrany fandaminan̈any Jehovah. Ke aboaha fa anao miaraka miasa amy fandaminan̈a io. Aleva tahaka Jehovah, ke aza man̈avakavaka olo fa itoria vaovao tsara aby olo jiaby. Mifen̈a ho tia fihavanan̈a ndreky filaminan̈a karaha izy, ke ataova fo raha hampiray sain̈y olo amy fiangonan̈a. Araraota koa hanin̈y arapan̈ahy amezany Jehovah, fotony zen̈y fomba hikarakarany anao. Amy zen̈y anao tsy havozo foeky lera Jehovah handravan̈a doniany Satana ty fa ho hisy korazy fo, fotony anao an̈isany olo tsy mivadiky amy fandaminan̈any Jehovah.