LAHATSORATRA FIANARAN̈A 26
“Anaro Mimpodiana Aminaka”
“Anaro mimpodiana aminaka, fa zaho himpody aminaro edy.”—MAL. 3:7.
HIRA 102 ‘Ampio Ireo Mila Ampiana’
HO HITA ATO *
1. Man̈ano akory Jehovah izikoa fa misy ondrikondrikinany araiky mimpody aminany?
HITANTSIKA tamy lahatsoratra taloha in̈y, fa Jehovah nampiran̈a ain̈inany tamy piambin̈y ondrikondriky. Karakarainy tsarabe ondrikondrinany tsiaraikiaraiky. Tadiaviny koa lan̈iany very amindro io. Israelita sasany koa fa niala Jehovah, karaha ty ho izy tamindro: “Anaro mimpodiana aminaka, fa zaho himpody aminaro edy.” Haintsika tsarabe fa mbala karaha zen̈y fo raha tsapany Jehovah firaka iziô, fotony izy efa nivolan̈a: “Zaho tsy miova.” (Mal. 3:6, 7) Ino raha tsapany Jehovah izikoa fa misy panomponany mimpody aminany? Jesosy nivolan̈a fa ndray araiky amindro fo man̈ano zen̈y, efa ravoravo mare Jehovah ndreky iro anjely aby io.—Lioka 15:10, 32.
2. Ino aby raha hidinihintsika amy lahatsoratra ty ato?
2 Alô atsika handiniky fan̈oharan̈a telo nataony Jesosy, misy hahaizantsika akory fomba han̈ampiany Jehovah iro olo niala taminany aby io. Hizahavantsika koa ino aby toetry ilain̈a izikoa fa han̈ampy ondrikondriky very himpody amy Jehovah, baka io nan̈ino tsy ho very boriny ezaka hataontsika han̈ampian̈a iro.
TADIAVA VOLA MADINIKY VERY IN̈Y
3-4. Nan̈ino viavy amy Lioka 15:8-10 ao nifen̈y mare nitsakaraka volanany very?
3 Mila mifen̈y mare atsika mitsakaraka olo tihimpody amy Jehovah. Amy Filazantsarany Lioka ao, Jesosy nikoran̈a momba viavy araiky tsy voly nitady vola drakma very. Madiniky hely vola io fa ten̈a valera. Niezaka mare viavy io nitsakaraka vola io. Ezaka nataony zen̈y raha ten̈a namafisiny Jesosy tamy fan̈oharan̈a io.—Vakia Lioka 15:8-10.
4 Tamy Jesosy tambony tany teto, izikoa fa nisy man̈angy israelita nandeha nanambady, amezany reniny vola drakma folo izy. Ke mety araiky tamy drakma aby io izy very in̈y. ‘Mety latsaka donko zin̈y e’ ho dinikiny viavy in̈y, ke nirihetiny jiro avio nizahavany tsarabe tamy rapaka nan̈odidin̈y tio. Kanefa tsisy raha hitany foeky, fotony mety tsy nazava tsarabe jiro nampiasainy. Vola very in̈y lastio hely mare. Ino raha nataony? Nifafàny tsarabe tran̈onany jiaby. Ela ny ela, hitany volanany in̈y, efa feno laposiera. Nangilatra raha io koa fa nitarafiny hazavan̈any jiro. Nan̈ano akory viavy in̈y koa fa hitany volanany? Ravoravo mare izy ho Jesosy ke nikahiany kamaradiny jiaby ndreky jirany antanàny, avio nitantarainy tamindro raha nandalo.
5. Nan̈ino tsy mora mitsakaraka olo efa tsy mitory eky?
5 Hitantsika baka amy fan̈orahan̈any Jesosy io fa tsy mora mitsakaraka raha very, ke mila mifen̈y mare zay vo mahita izio. Karaha zen̈y raha mila ataontsika aminolo efa tsy mitory eky aby io. Mety efa antaon̈ony maro iro tsy niaraka tamintsika na mety efa nifindra tran̈o iro, ke tsy haindro piaramanompo aby an̈y. Hay be fa misy amindro io iziô efa tihimpody amy Jehovah mare. Efa tihanompo Jehovah miaraka amintsika ndraiky iro, fa raha zen̈y tsy vitandro manokan̈a. Mila ampiantsika iro.
6. Azovy aby afaka mitsakaraka olo efa tsy mitory eky, baka io akory mety han̈ampiantsika iro?
6 Azovy aby ma mety mitsakaraka iro rahalahy ndreky ranabavy tsy mitory eky aby io? Pitory jiaby, an̈isanizen̈y antipan̈ahy, pisava lalan̈a, ndreky havandro. Misy havanao na kamaradinao ma efa tsy mitory eky? Sa nahita olo efa tsy mitory eky anao tamy fanompoan̈a? Anao koa fanojy olo karaha zen̈y, aleva adiresinany na nimerony telefaoninany izikoa amezany, baka io ameza antipan̈ahy aby aminaro ao.
7. Ino raha ianaranao baka tamy raha nataony Thomas?
7 Antipan̈ahy ny ten̈a manan̈a andraikitry hitsakaraka lan̈iany olo tihimpody amy Jehovah. Diniha baka raha nataony Thomas, * antipan̈ahy araiky baka an Espagne. Efa mandilatra 40 rahalahy ndreky ranabavy nampiany himpody amy Jehovah! Ho izy: “Man̈ontany piaramanompo maromaro antsendriky zaho, tsao fo iro mahay rahalahy na ranabavy efa tsy mitory eky. Na an̈ontaniako koa iro tsao mahazo onon̈o olo efa tsy mivory eky. Ny raha misy, ankamarozandro piaramanompo aby io mazoto mare man̈ampy zahay. Zaho baka io amy zay koa fa mitsidiky iro olo efa tsy mitory eky aby io, han̈ontaniako iro karakory naniny zanakandro ndreky havandro. Mety efa navy nindesindro nivory baka zanakandro na efa navy pitory lastio, ke iro io koa mba mila ampiantsika himpody amy Jehovah.”
AMPIA IRO HIMPODY AMY JEHOVAH
8. Karakory nataony lelahy koran̈iny Lioka 15:17-24 ao, zanany koa fa nibebaka?
8 Maro olo tihimpody amy Jehovah. Ino aby toetry mila anan̈antsika izikoa atsika tihan̈ampy iro? Mamaly fan̈ontanian̈a zen̈y fan̈oharan̈any Jesosy momba manafolahy naditry ke niala tantran̈olobeny in̈y. (Vakia Lioka 15:17-24.) Tantarainy Jesosy fa tontohitry fo manafolahy in̈y tamy farany, ke nody izy. Nasaky nilomoay aby babany nitsena izy avio nitolon̈iny mare izy, amy zen̈y hainy tsarabe fa mbala tia izy mare babany io. Tsy nilamin̈y foeky eritreritrinany tamy ditry aby nataony in̈y, ke hitany tsy vain̈y izy foeky kahian̈a zanakany babany. Kanefa izikoa fa nikoran̈iny tamy babany raha jiaby tan̈aty fonany tao, nitepô izy babany. Nataony babany raha hahitany fa ravoravo mare izy naviany zanany io. Naboakany tamy zen̈y fa mbala zanany fo manafolahy io sady tiany mare. Tsy miran̈a piasa fomba nan̈andesany babany izy fa zanany ten̈a tiany. Nan̈ano fety lastio izy, sady namezany lamba tsara mare zanany io.
9. Ino aby toetry mila anan̈antsika izikoa atsika tihan̈ampy olo himpody amy Jehovah? (Zahava “ Fomba Han̈ampian̈a Olo Tihimpody amy Jehovah.”)
9 Karaha baba koran̈iny fan̈oharan̈a in̈y koa Jehovah. Mbala tiany mare iro rahalahy ndreky ranabavy aby io ndray efa tsy mitory eky, ke tiany himpody aminany iro io. Hahavita han̈ampy iro koa atsika izikoa maharidraha ndreky mitepô iro, baka io manan̈a fitiavan̈a karaha nataony Jehovah. Nan̈ino ma toetry aby io ilain̈a? Akory fomba han̈aboahantsika toetry aby io?
10. Nan̈ino ma atsika mila maharidraha izikoa fa man̈ampy olo himpody amy Jehovah?
10 Mila maharidraha atsika fotony mety ho elaela olo araiky vo ho tafianko tsarabe amy lafiny arapan̈ahy. Maro amindro efa navy tsy nitory eky aby io nitantara fa, efa natetitetiky iro antipan̈ahy aby io ndreky olo hafa tamy fiangonan̈a namangy iro, zay iro vo nimpody. Karaha ty raha nisoratiny Nancy, ranabavy baka an Asie: “Nisy namako zay tamy fiangonan̈anay tao nan̈ampy zaho mare. Kamarady mare zahay roe vavy, ary farandraha tiany eky zaho! Efa miran̈a zokiko in̈y izy. Nampatsiaroviny zaho fotoan̈a maro tsara niarahanay taloha aby in̈y. Nitandren̈y tsarabe izy koa fa nikoran̈ako raha tan̈aty fonaka. Naharidraha izy kanefa tsy nisalasala foeky koa izy nan̈amia torohevitry zaho. Ten̈a naman̈a izy, fotony von̈ono fo izy han̈ampy zaho.”
11. Nan̈ino hampahivan̈a fonolo mahatsiaroten̈a navoa raha tsy rariny atsika izikoa mahay mitepô olo?
11 Sasany amindro io koa meloko baka tamy raha nataonolo an̈ivony fiangonan̈a. Mbala marary fo fondro ndray efa taon̈o maro nandalo, ke iro tsy tihimpody amy Jehovah foeky. Sasany baka mahatsiaroten̈a navoa raha tsy rariny foeky. Kanefa atsika koa mitepô iro, mira man̈osotro aody malaky mampahivan̈a bay amy fondro, ke ho azoazondro ain̈indro. Olo von̈ono hitandren̈y iro ndreky mahatakatra raha mahazo iro ny ten̈a tadiavindro. (Jak. 1:19) Karaha zen̈y raha tsapany María taminizy tsy nitory eky. Ho izy: “Zaho tamy zen̈y nila olo hitandren̈y zaho tsarabe, olo mba mahay mitepô zaho, olo von̈ono han̈ampy zaho ndreky han̈amia torohevitry zaho.”
12. Nan̈ino ma fitiavan̈any Jehovah io mety ampiran̈iny amy tady?
12 Ampiran̈iny Baiboly amy tady fitiavany Jehovah olonany. Asa nan̈ino? Ohatra iziô anao latsaka an̈aty lavaka lalin̈y mare tsy afaka han̈anian̈a. Tsy ho tafiboaka baka ao foeky anao, izikoa tsisy olo man̈antsory anao. Karaha zen̈y raha ataony Jehovah. Karaha ty raha nivolan̈iny mikasiky iro Israelita niala izy aby in̈y: ‘Tadimpitiavan̈a raha nan̈antsoritako iro.’ (Hosea 11:4) Mbala karaha zen̈y fo raha ataony Jehovah avahizo izikoa fa misy olo tsy mitory eky, na revony problemo ndreky asaloha mare loatra. Tiany ho haindro fa mbala tiany mare iro, ke tiany himpody aminany. Ndraindray mety ho anao aby ampiasainy Jehovah han̈ampy iro zanany aby io hahatsapa fitiavany iro zen̈y!
13. Nan̈ino tantarany Pablo io ahitan̈a tsarabe fa mahery ankitin̈y fitiavan̈a?
13 Mila haindro olo efa tsy mitory eky aby io fa mbala tiany Jehovah mare iro sady tiantsika mare koa. Efa tsy nitory tan̈atiny 30 taon̈o mandilatra i Pablo, rahalahy nikoran̈intsika tamy lahatsoratra taloha in̈y. Ho izy: “Tandraraiky zay zaho koa fa handeha hiboaka tran̈o maraindrain̈y in̈y, fanojy ranabavy araiky efa mahazoazo taon̈o zay. Tsara fan̈ahy ranabavy zen̈y! Sady be fitiavan̈a mare koa izy nikoran̈a taminaka. Tsy avoatanako eky ranomasonaka, ke zaho nitomoan̈y mira tsaiky. Ho zaho taminany: ‘Anao kony ranabavy miran̈a raha nirahiny Jehovah e!’ Ke tamy zen̈y zaho tapakevitry himpody amy Jehovah.”
MANÀN̈A FITIAVAN̈A IZIKOA FA MAN̈AMPY IRO
14. Ino raha nataony piambin̈y ondrikondriky koran̈iny Lioka 15:4, 5 ao izikoa fa hitany araiky very in̈y?
14 Mila ampiantsika fo iro olo efa tsy mitory eky aby io. Mety ho elaela fondro vo ten̈a ho janga tanteraka, tsisy ny hafa amy manafolahy tamy fan̈oharan̈any Jesosy in̈y. Mbala tsy ampilasiny tsarabe koa fifandraisan̈andro amy Jehovah, baka tamy raha jiaby niain̈andro tamy doniany Satana tan̈y. Mila ampiantsika mare iro baka ho fatatra finoan̈a. Nikoran̈iny Jesosy tamy fan̈oharan̈a momba ondrikondriky very in̈y fa ninjoniny piambin̈y in̈y tamy tratranany ondrikondriky io, avio nindesiny taminy andiany ondrikondriky tan̈y. Ndray izy efa nandany fotoan̈a ndreky angovo nitsakaraka ondrikondriky very io, mbala ninjoniny fo izio fa tsy nasesiny, fotony hainy fa lonja loatra izio ke tsy ho tody manokan̈a an̈y.—Vakia Lioka 15:4, 5.
15. Akory fomba mety han̈ampiantsika lan̈iany olo tihimpody amy Jehovah? (Zahava “ Fitaovan̈a Araiky Ten̈a Mahomby.”)
15 Mila mahafoe fotoan̈a ndreky angovo atsika han̈ampian̈a iro himpody amy Jehovah, fotony maro raha mety hanakan̈a iro tsy han̈ano zen̈y. Ndray zen̈y, ho vitantsika fo han̈ampy iro hihavan̈a ndraiky amy Zan̈ahary, fotony han̈ampy atsika fan̈ahy masin̈iny Jehovah, ndreky Baiboly, avio raha isankarazany aboakany fandaminan̈a. (Rom. 15:1) Akory han̈anovantsika zen̈y? Karaha ty koran̈iny antipan̈ahy araiky efa ela zay: “Ankamarozanolo efa tsy mitory eky koa fa tapakevitry himpody amy Jehovah, iro mila ampianarin̈y Baiboly ndraiky.” * Akory izikoa anao hirahin̈y hampianatra araiky amindro io? Misaora ho ravoravo anao han̈eky tombontsoa be karaha zen̈y! Karaha ty koa nambarany: “Tokony hikamarady mare aminolo vo nimpody io lan̈iany pitory irahin̈y mampianatra izy. Tokony ho olo mety atokisany ndreky mety hikoran̈any raha an̈aty fonany koa izio.”
HARAVOAN̈A TSISY AMBAKA IZY ANDAN̈ITRY AN̈Y NDREKY AMBONY TANY
16. Akory ahaizantsika fa iro anjely aby io han̈ampy atsika?
16 Farandraha maro eky tantara mankamarin̈y fa miaraka miasa amintsika iro anjely aby io, lera atsika mitsakaraka olo efa tsy mitory eky himpody amy Jehovah. (Apok. 14:6) Araiky amy zen̈y iziô Silvio, rahalahy baka an Ekoatera an̈y. Nivavaka mare izy tandraraiky fotony izy tihimpody amy Jehovah. Mbala tsy vita aby vavakanany, efa nisy antipan̈ahy aroe nikonkon̈o tambaravaran̈a. Ravoravo mare iro nan̈ampy izy.
17. Ino raha ho tsapanao izikoa fa man̈ampy olo himpody amy Jehovah?
17 Ho ravoravo mare atsika izikoa mitahitahy olo himpody amy Jehovah. Nifen̈y mare Salvador, rahalahy pisava lalan̈a araiky zay, nan̈ampy olo efa tsy mitory eky himpody amy Jehovah. Volan̈iny: “Zaho koa fa mieritreritry iro olo marobe efa tsy mitory eky kanefa nimpody amy Jehovah, mirabaraba ranomasonaka. Ravoravo loatra zaho fotony nampiasainy Jehovah nan̈ampy iro himpody aminany ndreky hiala amy doniany Satana. Tiany angovo jiaby iro ondrikondrikinany aby io!”—Asa. 20:35.
18. Ino raha mety atokisanao izikoa anao iziô efa tsy mitory eky?
18 Izikoa anao iziô efa tsy mivory na tsy mitory eky, matokisa fa anao mbala tiany Jehovah mare. Mbala tiany himpody aminany anao. Mila mifen̈y mare anao himpody aminany, kanefa anao aza mavozo fotony Jehovah io miran̈a baba tamy fan̈oharan̈a nataony Jesosy in̈y. Efa tsy din̈iny aby andra himpodiananao aminazy. Ho ravoravo mare izy handray anao.
HIRA 103 Lehilahy ho Fanomezana Ireo Mpiandry
^ feh. 5 Tiany Jehovah himpody aminany iro olo efa tsy mivory ndreky tsy mitory eky aby io, ke zen̈y mahavy izy miangavy iro karaha ty: “Anaro mimpodiana aminaka.” Maro fomba mety han̈ampiantsika iro han̈eky fiangavian̈any Jehovah io. Handiniky fomba aby zen̈y atsika ato.
^ feh. 7 Nivoan̈a an̈aran̈a sasany.
^ feh. 15 Mety hahazo fan̈ampian̈a mare olo araiky efa tsy mitory eky izikoa mianatra amy boky Aza Miala amy Fitiavany Zan̈ahary. Nahazo hatsaran̈a koa sasany tamindro izikoa fa nandiniky toko sasany tamy boky Manatòna An’i Jehovah. Andraikitriny Komitiny Fanompoan̈any Fiangonan̈a mizaha azovy pitory ten̈a mety mampianatra izy.
^ feh. 68 FAN̈AZAVAN̈A SARY: Rahalahy telo samby isany mifen̈y man̈ampy olo araiky tihimpody amy Jehovah. Tsy voly iro mifandray aminolo io, ndreky man̈amia toky izy fa mbala tian̈a mare izy. Tandrin̈esandro tsarabe izy sady mifen̈y iro hahazo raha mavoa izy.
