1. Ino ma dikany matahotro Zan̈ahary zen̈y? Nan̈ino ma atsika tokony hatahotro Jehovah, izikoa tia izy?

OLO ten̈a Kristianin̈y zen̈y tia sady mavozo Zan̈ahary. Akory koa zen̈y? Tia sady mavozo? Karaha hafahafa hely anten̈a maharen̈y zen̈y. Dikany matahotro Zan̈ahary zen̈y mavozo tsao han̈ano raha mampalahelo Zan̈ahary, Baba andan̈itry an̈y io. Tsy tiantsika ho robaka fihavanan̈antsika aminany, ke zen̈y mahavy atsika mifen̈y mare han̈aja izy.—Sal. 111:10; Ohab. 8:13.

2. Izikoa volan̈any Davida amy Salamo 86:11 zahan̈a, ino aby raha hikoran̈intsika ato?

² Vakia Salamo 86:11. Hitantsika baka amy raha nivolan̈iny Panjaka Davida io fa ten̈a ilain̈a ankitin̈y mavozo Zan̈ahary, ary raha zen̈y hainy Davida. Hikoran̈intsika ato akory fomba mety han̈arehantsika raha nivolan̈iny aby io. Fa alohanizen̈y, hizahavantsika antsendriky nan̈ino atsika mila man̈aja an̈arany Jehovah, amy fô jiaby. Afaranizen̈y amy zay, hidinihintsika fomba han̈aboahan̈a raha zen̈y amy fiain̈anantsika andavanandra.

3. Mosesy farandraha nan̈aja an̈aran̈a Zan̈ahary eky. Ino nahavy izy tsy voly nan̈ano zen̈y?

³ Mba miniminia hely baka raha tsapany Mosesy taminizy tamy Bongo Horeba. Nahita voninahitriny Jehovah nandalo tankilanany izy. Koran̈iny boky Fandalinana ny Soratra Masina fa mety “mbala tsiary nisy olo niain̈y raha karaha zen̈y talohany naviany Jesosy Kristy tambony tany teto.” Mosesy naharen̈y  feo nivolan̈a karaha ty: “Jehovah, Jehovah, Zan̈ahary mamindra fô ndreky mahinakinaka olo, tsy mora meloko, sady be fitiavan̈a tsy miovaova ndreky fahamarinan̈a, man̈aboaka hatsarampan̈ahy feno fitiavan̈a amy taranaka andrivony, man̈ambela hadisovan̈a ndreky fahotan̈a.” (Eks. 33:17-23; 34:5-7) Anjely fo nivolan̈a izio taminany. Tsy mety nadin̈any Mosesy raha nandalo io, intsaka eky izy koa fa nanon̈ono an̈aran̈a Jehovah io. Tsy mahagaga izikoa fa nandeha fotoan̈a, izy nandrisiky iro Israelita aby io ‘hatahotro an̈aran̈a be voninahitry ndreky vain̈y hatahoran̈a io.’—Deot. 28:58.

4. Ino raha mila ataontsika baka hitombo fan̈ajantsika Jehovah?

⁴ Atsika koa fa mandiniky momba an̈arany Jehovah, tsara iritriretintsika koa karakory ny maha izy izy. Karaha ataony izy mahery, hendry, man̈ano ny rariny, ndreky be fitiavan̈a. Atsika koa fa mangala onon̈o toetrinany aby zen̈y ndreky toetrinany maro hafa, hahaihitombo fo fan̈ajantsika izy.—Sal. 77:11-15.

5-6. a) Ino dikany an̈aran̈a Jehovah? b) Izikoa zahan̈a Eksodosy 3:13, 14 ndreky Isaia 64:8, karakory ataony Jehovah man̈atanteraka fikasan̈anany?

⁵ Haintsika fa Jehovah an̈aran̈a Zan̈ahary. Asa ino dikany an̈aran̈a io? Maro manampahaizan̈a mivolan̈a fa mety ho “Izy Man̈ano Raha Hahavy” dikanizio. Mampatsiaro atsika raha zen̈y fa tsisy olo na raha mahasakan̈a izy tsy han̈atanteraka fikasan̈anany! Tsy maintsy vitany fo zay raha tiany hatao. Nan̈ino ma?

⁶ Tsisy raha tsy vitany Jehovah, fotony izy afaka miovaova arakaraka raha ilain̈a baka ho tanteraka fikasan̈anany. (Vakia Eksodosy 3:13, 14.) Mandrisiky atsika hisaintsain̈y momba zen̈y iro raha naboakany fandaminan̈a aby io. Fa tsy zen̈y fo raha vitany Jehovah. Mety ivoany mifan̈araka amy raha jiaby ilàny izy koa panomponany tsy lavorary, baka fikasan̈anany ho tanteraka. (Vakia Isaia 64:8.) Tsy maintsy vitany fo zay raha tiany hatao, ary tsisy mahasakan̈a izy amy zen̈y foeky!—Isaia 46:10, 11.

7. Ino koa raha mila ataontsika baka hitombo fo fan̈ajantsika Babantsika andan̈itry an̈y io?

 ⁷ Hahaihan̈aja Babantsika andan̈itry an̈y io fo atsika, izikoa mangala onon̈o raha efa nataony ndreky raha ambelany ataontsika. Atsika koa fa mandiniky raha niasainy, man̈eky atsika fa ten̈a maharikian̈a raha nisainy Jehovah. (Sal. 8:3, 4) Mahaitihan̈aja izy fo atsika koa fa mandiniky fomba nan̈ampiany atsika baka hahavita sitraponany. Sady an̈aranany io vain̈y hajaintsika mare! Tafiditry aminy an̈aran̈a Jehovah io raha mombamomba izy, ndreky raha efa nataony avio raha mbala ho hataony.—Sal. 89:7, 8.

8. Izikoa Deoteronomia 32:2, 3 zahan̈a, tiany Jehovah hatao karakory an̈aranany?

⁸ Taloha heliny iro Israelita aby io niditry tamy Tany Nampan̈antinain̈y, nisy tononkira nampianariny Jehovah i Mosesy. (Deot. 31:19) Hira io amy zay nampianariny Mosesy vahoaka jiaby. (Vakia Deoteronomia 32:2, 3.) Izikoa fa dinihin̈y andininy faha-2 ndreky faha-3 amizio ao, hita fa tsy tiany Jehovah hasitriky foeky an̈aranany io fa tiany ho hainolo jiaby. Tsy tiany foeky olo hieritreritry an̈aran̈a io masin̈y loatra ke tsy mety ton̈onin̈y. Sambatra kony iro Israelita aby io naharen̈y Mosesy nampianatra iro raha momba Jehovah ndreky an̈aranany be voninahitry io! Karaha ataony ripiripiny mahalen̈y mahavy raha maniry ho velombelon̈o in̈y, misaora nahazo angovo ndreky velombelon̈o koa iro naharen̈y raha nampianariny Mosesy! Karakory tokony hataontsika baka hamelombelon̈o karaha zen̈y koa fomba fampianarantsika?

9. Akory han̈aboahantsika fa mankamasin̈y an̈arany Jehovah atsika?

⁹ Atsika koa fa mitory isaka tran̈o na amy tany maro olo, aboakantsika aminolo baka an̈atiny Baiboly ao fa Jehovah an̈aran̈a Zan̈ahary. Mety amezantsika boky na gazety na raha baka amy tranonkalantsika ao koa iro, na han̈aboahantsika video. Na aia na aia tany misy atsika, na a lekoly zen̈y na ampiasan̈a na lera man̈ano voyage, mitady fomba fo atsika hikoran̈ana raha momba Jehovah Zan̈ahary tiantsika be io aminolo. Koran̈intsika aminolo koa toetrinany ndreky raha tsara hampan̈antin̈ainy momba olombelon̈o ndreky tany. Mety ho vaovao amindro raha aby zen̈y! Mety ho sambany aminio foeky vo haindro fa Jehovah io ten̈a tia atsika. Mankamasin̈y an̈arany Jehovah koa atsika lera atsika mikoran̈a ny marin̈y momba izy. Fan̈anovantsika zen̈y han̈ampy iro olo aby io hahay fa kaiky diso aby ankamarozany raha nampianarin̈y iro momba Zan̈ahary. Iro tsy mety hahita raha mankahery ndreky mamelombelon̈o ambaka zen̈y!—Isaia 65:13, 14.

10. Ino ivolan̈ana fa tsy lalàn̈any Zan̈ahary fo raha mila ampianarintsika olo?

¹⁰ Ampiantsika koa olo ampianarintsika Baiboly hahay an̈arany Jehovah ndreky hampiasa izio, hahay toetrinany ndreky raha jiaby mombamomba izy. Ino koa raha mila ataontsika? Marin̈y fa atsika mety hampianatra iro fitsipiky ndreky toro lalan̈any Jehovah, fa ny ten̈a raha maventy, mila ataontsika koa raha hahavy olo ampianarintsika io ho tia Jehovah. Ny raha mety ho hisy baka, mety hainolo ampianarintsika io lalàn̈any Jehovah, fa zen̈y tsy mivolan̈a fa izy tia Jehovah, araiky Pan̈amia Lalàn̈a io. Aleva onon̈o baka Adama ndreky Eva. Haindro tsarabe lalàn̈any Jehovah, fa zen̈y tsy nahavy iro roe fivadiany ho tia Jehovah. (Gen. 3:1-6) Hitantsika baka amy zen̈y fa tsy ampy mampianatra olo momba lalàn̈any Zan̈ahary.

11. Akory han̈ampiantsika pianatrantsika ho tia Jehovah, araiky Pan̈amia Lalàn̈a io?

¹¹ Mahatsara atsika fo fitsipikiny Jehovah  ndreky lalàn̈anany aby io. (Sal. 119:97, 111, 112) Ke izikoa misy lalàn̈any Jehovah tiantsika hazava tsarabe aminolo ampianarintsika, tsara atsika mba mampisaintsain̈y izy karaha ty: “Fahitanao izy, nan̈ino Jehovah tsy man̈aomba atsika han̈ano raha io? Nan̈ino izy man̈iraka atsika han̈ano zen̈y? Ino toetriny Jehovah hitanao baka amy zen̈y?” Izikoa atsika mifen̈y han̈ampy izy hahay ndreky ho tia an̈arany Jehovah, ho tafiditry lalin̈y an̈aty fonany raha zen̈y. Ke tsy lalàn̈any Jehovah fo raha ho hainy fa Jehovah, araiky Pan̈amia Lalàn̈a io koa. (Sal. 119:68) Hahaifatatra fo finoan̈anany izikoa izy man̈ano zen̈y, sady hahavita hiatriky fitsapan̈a farany mare koa izy.—1 Kor. 3:12-15.

12. Karakory nahitan̈a fa nirasarasa fony Davida, tandraraiky? Ino vokatranizen̈y?

¹² Matomboko mare volan̈any Panjaka Davida amy Salamo 86:11 ty: “Ataova raha hatahorako an̈aranao, amy fonaka jiaby.” Hitany Davida tamy raha niain̈any fa fô io mora mirasarasa. Tandraraiky, izy tamy zen̈y nandehandeha tamy tampontran̈onany, izy nahita Batseba vadiny Oria niseky. Akory nahavy fony Davida nirasarasa ke nanjary tsy natahotro Jehovah tamy fonany jiaby izy? Hainy Davida tsarabe lalàn̈any Zan̈ahary ty: “Aza man̈iry vadinolo.” (Eks. 20:17) Fa izy mbala nizaha Batseba fo, ke nanjary nirasarasa fonany. Nan̈ino atsika mivolan̈a zen̈y? Nisy fan̈irian̈a aroe tan̈aty fonany tao. Tihan̈ano raha mamparavoravo Jehovah izy, kanefa izy koa tihan̈ano firaisan̈a tamy Batseba. Efa ela Davida tia Jehovah sady natahotro izy. Kanefa tamy leranio, resiny fan̈irian̈a han̈ano raha ratsy izy ke nangala baraka an̈arany Jehovah. Ino vokany? Maro olo tsy manantsin̈y nanjary nijaly, an̈isanizen̈y fianakavian̈anany.—2 Sam. 11:1-5, 14-17; 12:7-12.

13. Akory ahitantsika fa tsy avoarasarasa karaha taloha eky fony Davida?

¹³ Davida koa fa nan̈eky nahitsiny Jehovah, nanjary tsara fihavanan̈a taminany ndraiky izy. (2 Sam. 12:13; Sal. 51:2-4, 17) Tsisy andra nan̈adin̈asany Davida fa baka tamy fonany nirasarasa nahavy izy nijaly ndreky tojy problemo. Ty koa fomba hafa mety nandikan̈a Salamo 86:11 io: “Amia fô tsy avoarasarasa zaho.” Ke Jehovah ma ten̈a nan̈ampy izy hanan̈a fô tsy avoarasarasa zen̈y? Ia, fotony izikoa fa nandeha fotoan̈a, Baiboly nivolan̈a fa “nifikitry mare tamy Jehovah Zan̈aharinany fony” Davida.—1 Mpanj. 11:4; 15:3.

14. Ino raha mila iritriretintsika? Nan̈ino?

¹⁴ Tantarany Davida in̈y ten̈a mankahery atsika salakady mampandiniky koa. Nan̈ano fahotan̈a maventy izy fotony fonany  nirasarasa. Tsy tihan̈ano karaha nataony in̈y atsika. Ke ndray efa ela nanompoantsika Jehovah na vo tsy ela, atsika mila mieritreritry karaha ty: ‘Tsao efa ambelako hampirasarasa fonaka Satana e!’

15. Amy karakory ma fatahoran̈a Zan̈ahary io hiaro atsika, izikoa atsika fa mahita sary manaitaitry fan̈irian̈a han̈ano firaisan̈a?

¹⁵ Miniminia hely baka ty: Mizaha tele na koa mizaha raha aminy Internet anao, iô fo misy sary na video mety hanaitaitry fan̈irian̈anao han̈ano firaisan̈a miboaka, akory hataonao? Mety ankamorainao fo raha zen̈y, ke anao mety hieritreritry karaha ty: ‘Izio ane tsy sary vetaveta! Io tsy man̈ino.’ Fa karaha ty, tsao izio tetiky ampiasainy Satana hampirasarasa fonao e? (2 Kor. 2:11) Sary karaha zen̈y mety hampitovisin̈y amy famaky marangitry, famakian̈a hazomaty maventy be in̈y. Tsy miaraka lelany famaky io mirapaka aminy hazomaty io efa hitresaka edy izio, fa mila matetitetiky. Karaha zen̈y koa sary manaitaitry fan̈irian̈a han̈ano firaisan̈a. Tsy miaraka olo araiky mahita izio efa hanota amy Jehovah edy, fa fonany fo mety efa manomboko mirasarasa. Arakarakany hizahavany izio matetiky amy zay hahavy izy han̈ano fahotan̈a maventy ndreky hivadiky amy Jehovah. Ke aza ambela ho tafiditry an̈aty fonao raha tsy manjary karaha zen̈y! Mifen̈a fo hatahotro an̈arany Jehovah, amy fonao jiaby!

16. Ino aby fan̈ontanian̈a mila iritriretintsika izikoa fa misy raha mitsapa jery atsika?

¹⁶ Ankoatrany sary manaitaitry fan̈irian̈a han̈ano firaisan̈a, mbala maro koa karazandraha ampiasainy Satana hitsapan̈a jery atsika. Karakory ataonao izikoa tojy raha zen̈y? Ndraikindraiky, mora oe mitady fialantsin̈y ke mieritreritry fa raha aby io tsisy maharatsy izy. Mety hivolan̈a foeky anao: ‘Zaho tsy raha ho voaroaka aby ndray man̈ano izio. Ke zen̈y tsy problemo!’ Diso hevitry anao izikoa mieritreritry  karaha zen̈y. Ty raha tokony hidinihinao: ‘Tsao mba fa tetiky hampiasainy Satana hahavy fonaka hirasarasa izio e! Tsy ndraiky hangala baraka an̈arany Jehovah zaho koa man̈ano izio? Han̈ampy zaho hanjary kamaradiny Jehovah ma izio, sa hahavy zaho ho fahavalonany?’ Tsara mieritreritry karaha zen̈y. Mivavaha baka Jehovah han̈amia anao fahendrena. Tsy ho voafitaka anao koa man̈ano zen̈y. (Jak. 1:5) Hiaro anao raha zen̈y sady han̈ampy anao handresy fakampan̈ahy, karaha nataony Jesosy in̈y. Karaha ty ho izy: “Mandihana an̈y anao Satana!”—Mat. 4:10.

17. Ino ma maharatsy fô avoarasarasa? Hazavà aminy ohatra.

¹⁷ Izio ma ratsy ankitin̈y manan̈a fô avoarasarasa zen̈y? Hangala ohatra atsika. Akory iziô koa tsy fan̈araka olo aminy ekipy araiky pan̈ano spaoro? Ohatra, sasany mitady voninahitrinany tompiny fo. Misy ndraiky tsy man̈araka fitsipiky mifehy saoma io. Sasany koa tsy man̈isy fotiny antrenerandro foeky. Hay be fa ho resy ekipy karaha zen̈y, fotony olo amizio ao tsy jery araiky. Karaha zen̈y raha mety ho hisy izikoa fonao io avorasarasa ke tsy mifan̈araka amy sitrapony Jehovah raha iritriretinao, fihetsehamponao na fan̈irian̈anao. Aleva onon̈o fa zen̈y raha kindreny Satana. Ataony raha hahavy eritriretinao ndreky fan̈irian̈anao, baka io fihetsehamponao tsy hifan̈araka amy Jehovah. Fa izikoa atsika tihanompo Jehovah amy fô jiaby, tokony hifen̈y fo atsika han̈ano raha tsy hampirasarasa fontsika. (Mat. 22:36-38) Aza ambela handresy foeky Satana!

18. Mifan̈araka amy raha koran̈iny Mika 4:5, tapakevitry han̈ino ma anao?

¹⁸ Mivavaha amy Jehovah, karaha nataony Davida. Ho izy: “Ataova raha hatahorako an̈aranao, amy fonaka jiaby.” Ke na ino na ino fanapahankevitrinao, na hely zen̈y na be, irarian̈a anao ho tapakevitry han̈aja mare an̈aran̈a masin̈iny Jehovah io isanandra. Aza adin̈a fa anao Vavolombelon̈o Jehovah, ke amia voninahitry an̈arany Jehovah. (Ohab. 27:11) Izikoa atsika samy mifen̈y han̈ano zen̈y, hahavita ‘handeha aminy an̈arany Jehovah, Zan̈aharintsika’ fo atsika, karaha nataony paminan̈y Mika.—Mika 4:5.