ATSIKA jiaby io samby man̈eky fa Jehovah ankitin̈y mitariky panomponany “aminandra farany” iziô, ndreky man̈ampy iro hihavan̈a tsara aminany. (2 Tim. 3:1) Fa ndray zen̈y, anjarantsika tsiaraikiaraiky han̈araka na tsy han̈araka volan̈anany. Tamindro Israelita aby io tamy tany paiky tan̈y, iro koa fa naharen̈y trompety man̈ena, iro nila nan̈ano raha nifan̈araka tamy zen̈y.

Jehovah nan̈iraka Mosesy niasa trompety aroe vita tamy volafotsy, nitifehin̈y tamy martô. Trompety aby io natao ‘hamorian̈a vahoaka ndreky hivolan̈ana amindro fa iro tokony efa hiala tobindro.’ (Nom. 10:2) Ke arakaraka fomba fisofandro pisoron̈o aby io trompety io nahaizandro Israelita aby io raha tokony hataondro. (Nom. 10:3-8) Hafa ndraiky fomba an̈amezany Jehovah taridalan̈a vahoakanany amy zioty. Fa mila man̈araka taridalan̈a aby zen̈y fo atsika. Maro fomba mety han̈anovantsika zen̈y, fa telo amizio hidinihintsika. Voanalohany, lera atsika kahian̈a han̈aton̈o fivoriambe. Faharoe, lera rahalahy voatendry aby io kahian̈a han̈aton̈o fiofan̈ana. Fahatelo, lera atsika hampirisihin̈y han̈araka toromariky momba fan̈ovoan̈a na fankatsaran̈a fomba fiasany fiangonan̈a.

Jehovah koa fa hamory “vahoaka jiaby” amy fidiran̈a antin̈ianany tran̈olay masin̈y, nirahiny nisofiny pisoron̈o trompety aroe. (Nom. 10:3) Samby naharen̈y feony trompety aby io fokony Israely jiaby, fotony iro nipetraka man̈odidin̈y tran̈olay masin̈y io, mandeha efatrefatra andiany. Ke lan̈iany nipetraka marikitry fidiran̈a io, betibetiky iro efa navy marikitry tio. Fa zay lavitry ndraiky, tsy maintsy elaela iro vo navy tan̈y; iro tsy maintsy niezaka mare vo navy tamy fidiran̈a io tan̈y. Fa ndray marikitry tany nisy iro ndray lavitry, iro samby tiany Jehovah ho avy tamy fivorian̈a io aby, fotony mahatsara iro raha zen̈y.

Mbala mikaiky atsika hivory fo Jehovah amy zioty, fa izy fo tsy amy tran̈olay masin̈y eky. Kahian̈a atsika han̈aton̈o fivoriambeny vondroparitry ndreky fivoriambe manokan̈a hafa. An̈y atsika maharen̈y fan̈azavan̈a ndreky toromariky ten̈a ilaintsika. Ke na aia na aia misy atsika ambony tany ty, mitovy fo raha ianarantsika. Ke lan̈iany olo man̈eky kaikiny Jehovah io manjary ravoravo, baka io miray sain̈y. Marin̈y ndraiky fa misy amintsika io baka lavitry, kanefa tsy manen̈iny foeky atsika koa fa mamaly kaiky io.

Akory fo basy iro antokopitory mipetraka lavitry aby io? Nahainaro raha vitanolombelon̈o, ke afaka man̈araka programony fivoriambe na fivorian̈a manokan̈a koa iro an̈y. Mahatsapa ten̈a ho an̈isany fianakaviambeny pirahalahy iro ndray lavitry. Karaha zen̈y iziô raha nisy ta Bénin. Izikoa fa nandeha nitsidiky tany io solonten̈any foibe, nisy fivorian̈a manokan̈a natao, ke programo jiaby nifandray tamy fivorian̈a io nampitainy sampan̈any Bénin tamy tanàna hely araiky ta Niger tan̈y.  Arlit an̈arany tanàna io, amy Tany Paikiny Sahara an̈y misy izio. Nisy 21 olo nan̈aton̈o izio, ke dimy tamindro io rahalahy ndreky ranabavy, fa lambiny olo lian̈a. Iro ndray lavitry, tsapandro karaha tankilandro fo iro pan̈atriky 44 161 nan̈aton̈o fivorian̈a io. Ty raha nisoratiny rahalahy araiky: “Man̈ano mersy anaro amy fô jiaby zahay tamy nikarakaranaro fandifasan̈a programo video in̈y! Hitanay baka tamizin̈y fitiavanaro zahay.”

Tamy faha Israelita taloha tan̈y, izikoa trompety araiky fo nisofiny pisoron̈o, dikanizen̈y “piadidy, na iro pifehy arivo” fo tokony nandeha tamy tran̈olay fihaonan̈a tan̈y. (Nom. 10:4) Tan̈y iro nahazo fan̈azavan̈a ndeky fampiofanan̈a baka tamy Mosesy, ke raha zen̈y nan̈ampy iro hahavita andraikitrindro tsarabe lera iro nody tamy foko nisy iro. Izikoa anao mba an̈isany piadidy aby tamy zen̈y, misaora tsisy raha nataonao tamban̈a tsy havian̈a tan̈y donko! Hainao baka fa hahatsara anaro fampiofanan̈a io!

Amy zioty, tsy “piadidy” iro antipan̈ahy amy fiangonan̈a misy atsika aby io; iro koa tsy manjikiziky aminy andianondrikondrikiny Zan̈ahary. (1 Pet. 5:1-3) Man̈ano erakany farany tsara vitandro iro koa fa miambin̈y andianondrikondriky aby io. Zen̈y mahavy iro koa fa mahazo ainvitasion han̈aton̈o fampiofanan̈a, von̈ono fo iro. Ohatra amy zen̈y iziô Sekolin’ny Fanompoana Ilay Fanjakana. Iro koa fa mahazo fampiofanan̈a karaha zen̈y, manjary haindro tsarabe karakory fomba farany tsara hikarakaran̈a fiangonan̈a. Ke manjary tsara fihavanan̈a amy Jehovah fo amy zay olo jiaby, firaka aminolo tsy nan̈aton̈o sekoly io. Ampiasaindro antipan̈ahy aby io hahatsara fiangonan̈a raha nianarandro.

Baiboly mivolan̈a fa rondro tamy tran̈olay masin̈y koa fa niteky, dikanizen̈y tiany Jehovah hifindra lasy iro Israelita aby io. Ke direkty nisofindro pisoron̈o aby io trompety; nataondro niovaova feonizio. (Nom. 10:5, 6) Mahalany fan̈ahy fa iro ndray maro, nilamin̈y tsara raha jiaby. Tsy zanazanaka raha fifindran̈a io tamy zen̈y! Ke mety ho kamo hifindra sasany tamindro.

Mety nieritreritry baka sasany fa efa matetiky loatra fifindran̈a io na mety tampoko be tamindro kaikiny trompety io. ‘Ndraikindraiky rondro io tsy niala tio foeky rango hariva firaka kiakandra.’ Sôfy ndraiky, raha io nahadin̈y ‘andra aroe na andra maromaro, misy fanjava araiky foeky.’ (Nom. 9:21, 22) Impiry iro nifindra lasy? Matetiky, fotony mikoran̈a tany 40 nitobiandro Israelita aby io bokiny Nomery toko faha 33.

‘Tany paiky be salakady nampavozo’ nandalovandro. (Deot. 1:19) Ke sasany koa fa nahita tany misy alokaloko, iro mety tamana tamy tany io. Nisy ndraiky niasaloha tsao ratsiratsiny araiky nisy iro tany handeha hifindrandro an̈y.

Nifandimbidimby koa foko aby io izikoa fa nifindra. Ke izikoa fa nisy foko araiky nifindra, mety loso diniky ny sasany: ‘Asa mba ombian̈a zahay mandeha?’ Iro baka samby naharen̈y feony trompety in̈y, kanefa iro tsy niaraka nandeha. Izikoa fa nan̈ena trompety io, iro foko taminy ilany antin̈iana fo tokony handeha. Tsy azovy zen̈y fa fokony Joda, Isakara baka io Zebolona. (Nom. 2:3-7; 10:5, 6) Iro koa fa loso, nisofiny pisoron̈o fan̈indroeny ndraiky trompety, ke iro foko telo taminy ilany atsimo nandeha. Karaha zen̈y fo nataony pisoron̈o firaka iro jiaby loso.

Mety sarotro taminao nan̈eky fan̈ovoan̈a sasany nataony fandaminan̈a. Anao mety nieritreritry fa maro loatra fan̈ovoan̈a aby zen̈y tatoato, ary tsy nampozinao sasany tamizio. Na mety hitanao karaha fa nety taminao taridalan̈a araiky taloha ke tsy tianao hiova eky izio. Mety tsy dia naharidraha donko anao, ke elaela anao vo zatra fan̈ovoan̈a sasany. Ndray sarotro aminao raha zen̈y, anao koa man̈ano zay raha tokony hataonao, matokisa fa Jehovah ten̈a hitahy anao.

Taminandrany Mosesy in̈y, nisy antapitrisany lelahy, viavy baka io tsaiky nitaritiny Jehovah hamakivaky tany paiky in̈y. Vitandro fo raha zen̈y ndray sarotro, fotony Jehovah nikarakara ndreky nitariky iro. Misy taridalan̈a koa amiany Jehovah atsika aminandra farany mahairatsy iziô. Ataony raha hahavy atsika harikitry izy ndreky ho fatatra finoan̈a fo. Ke irarian̈a atsika han̈araka taridalan̈a aby zen̈y fo, karaha nataondro Israelita aby io nitandren̈y kaiky nalefany trompety aby in̈y.