LAHATSORATRA FIANARAN̈A 25
“Zaho Lastio Hitsakaraka Ondrikondrikinaka”
“Zaho lastio hitsakaraka ondrikondrikinaka, ke hikarakaraiko tsarabe iro.”—EZEK. 34:11.
HIRA 105 “Andriamanitra dia Fitiavana”
HO HITA ATO *
1. Amy karakory Jehovah mitovy amy reny mampinono?
“MAN̈ANGY ma mety han̈adin̈a zanany mbala minono?” Io fan̈ontanian̈a napetrakany Jehovah taminandrany paminan̈y Isaia. Karaha ty ho izy baka tio: “Nata iro man̈angy aby io han̈adin̈a zanakanandro, zaho ndraiky tsy han̈adin̈a anao foeky.” (Isaia 49:15) Mahalan̈a Jehovah mampiran̈a ain̈inany amy reny karaha zen̈y, fa taminino zen̈y raha nataony. Nikoran̈a momba fitiavan̈a misy amy reny ndreky zanany minono Jehovah fotony tiany haboaka fa tiany mare panomponany. Mety ho miramira amy raha nivolan̈iny ranabavy Jasmine ty raha tsapany reny maro: “Anten̈a koa fa mampinono zanakanten̈a, karaha misy fifandraisan̈a manokan̈a zay aminten̈a ndreky zanakanten̈a. Miavaka mare fifandraisan̈a io, ary izio aminten̈a ao fo.”
2. Ino raha tsapany Jehovah izikoa fa misy araiky amy zanany tsy manompo izy eky?
2 Amy Jehovah, zanany aby zay olo manompo izy. Miaraka misy araiky amy zanany aby io tsy mivory ndreky tsy mitory eky, * efa hitany edy. Malahelo mare Jehovah mahita olo andrivony isaka taon̈o manjary tsy mivory ndreky tsy mitory eky!
3. Tiany Jehovah han̈ano akory ma olo efa tsy mitory eky?
3 Maro amindro rahalahy ndreky ranabavy tsy foentsika aby io mimpody ndraiky amy fiangonan̈a, ke ravoravo mare atsika mandray iro! Tiany Jehovah himpody aminany iro io, ary karaha zen̈y koa atsika. (1 Pet. 2:25) Akory mety han̈ampiantsika iro? Alohany hamaliantsika fan̈ontanian̈a zen̈y, hizahavantsika antsendriky nan̈ino iro io tsy mivory ndreky tsy mitory eky.
NAN̈INO IRO TSY MANOMPO JEHOVAH EKY?
4. Ino ma raha mahazo Kristianin̈y sasany?
4 Kristianin̈y sasany nanjary rikian̈a loatra amy velonten̈a. Ho Hung, * rahalahy araiky an Asie an̈y: “Presky leranaka ndreky angovonaka jiaby laniko taminy asanaka. Zaho baka nieritreritry fa hahavita hampitombo fanompoan̈a izikoa bebe vola miditry, ke nampitombosiko lera niasako. Kanefa nahainahalan̈a fo zaho tafivory, ndraiky farany zaho tsy nitory foeky! Satana kony mampiasa donia ty hampan̈alavitry anten̈a tsihelihely amy Jehovah!”
5. Ino aby problemo nandalovany ranabavy Anne, baka io ino vokatranizen̈y taminany?
5 Misesisesy problemo mahazo iro rahalahy ndreky ranabavy sasany. Karaha ty nambarany Anne baka a Grande-Bretagne. Dimy zanakanany, man̈angy telo baka io lelahy aroe. Ho izy: “Vo teraka zanako faralahy efa misy antsa edy. Koa fa nandeha fotoan̈a, voaroaka araiky tamy zanako man̈angy, avio zanako lelahy talan̈olo nanjary narary mare ke mila fikarakaran̈a. Kivy loatra zaho ke tsy nandeha nivory ndreky tsy nitory eky.” Ten̈a mampalahelo raha mahazo ranabavy Anne ndreky fianakavian̈anany ndreky olo hafa miaritry raha mitovy amy zen̈y!
6. Ino ivolan̈ana fa antony araiky mampiala olo amy vahoakany Jehovah tsy fan̈arahan̈a raha koran̈iny Kolosianina 3:13?
6 Vakia Kolosianina 3:13. Misy ndraiky panompony Jehovah meloko tamy raha nataony piaramanompo. Apostoly Paoly nivolan̈a fa ndraikindraiky mety ‘hampitretre atsika raha ataony’ rahalahy na ranabavy araiky. Ndraikindraiky mety tsy rariny foeky raha navoa atsika. Ke mila mitandrin̈y atsika tsao mitàna heloko ampô, fotony mety hampiala atsika tsihelihely amy vahoakany Jehovah raha zen̈y. Diniha baka raha nahazo Pablo, rahalahy araiky baka an Ameriky Atsimo ty. Nisy olo nan̈odihody izy nan̈ano raha tsy manjary, ke nadoso taminany andraikitrinany tamy fiangonan̈a. Karaha ty raha tsapany Pablo: “Neloko mare zaho, ke nitapahako tsihelihely fifandraisan̈anaka tamy fiangonan̈a.”
7. Ino vokany izikoa olo araiky mbala injehiny eritreritry fo?
7 Misy ndraiky olo nandika fitsipikiny Zan̈ahary taloha, fa mbala injehiny eritreritry fo iro ndray efa taon̈o maro afara atỳ. Ndray iro efa nibebaka ndreky nambelany Jehovah hadisovan̈a, iro mbala mahatsapaten̈a tsy vain̈y tiaviny Zan̈ahary ndreky tsy mendriky ho an̈isany vahoakanany fo. Zen̈y raha tsapany Francisco. Ho izy: “Nijangajanga zaho ke nahazo fan̈anaran̈a. Tamy voanalohany, zaho mbala nivory, fa zaho fo nahatsapa ten̈a tsy mendriky an̈isany vahoakany Jehovah. Ninjehiny eritreritry fo zaho, ke farany zaho resy lahatra fa Jehovah tsy han̈ambela hadisovan̈anaka foeky. Koa fa nandeha fotoan̈a, zaho voly nivory, baka io zaho tsy nitory eky.” Asa akory fahitanao iro rahalahy ndreky ranabavy misy problemo karaha zen̈y? Asa anao mba mahinakinaka iro? Jehovah ke? Akory fahitany iro io?
TIANY JEHOVAH MARE ONDRIKONDRIKINANY
Israelita piambin̈y ondrikondriky mikarakara tsarabe ondrikondrikinany efa navy very (Zahava fehintsoratra 8-9) *
8. Jehovah ma man̈adin̈a olo nanompo izy taloha? Hazavà.
8 Jehovah tsy mety han̈adin̈a olo navy nanompo izy ndreky raha jiaby nataondro tamy fanompoan̈a izy. (Heb. 6:10) Jehovah ten̈a mikarakara olonany. Karaha ty nambarany paminan̈y Isaia momba zen̈y: “Izy hikarakara ondrikondrikinany karaha ataony piambin̈y ondrikondriky in̈y. Amy baontan̈ananany hamoriany iro zanaka ondrikondriky aby io, ary iro io hinjoniny ke hataony amy tratranany.” (Isaia 40:11) Jehovah Piambin̈y Ten̈a Tsara, ke ino raha tsapany izikoa fa misy ondrikondriky araiky very? Karaha ty nambarany Jesosy tamy pianatranany: “Akory ho anaro? Izikoa olo araiky manan̈a ondrikondriky 100 kanefa very araiky, tsy ndraiky hambelany amy bongo an̈y iro 99 aby io, baka io loso izy hitsakaraka araiky very in̈y? Zaho man̈ambara anaro fa izikoa hitany ondrikondriky io, in̈y ny ten̈a hamparavoravo izy mandilatra iro 99 tsy very in̈y.”—Mat. 18:12, 13.
9. Akory ma ataony piambin̈y ten̈a tsara izikoa fa mikarakara ondrikondrikinany? (Zahava sary amy fon̈ony gazety ty.)
9 Nan̈ino ma Jehovah mety hampitovisin̈y amy piambin̈y ondrikondriky? Fotony piambin̈y tsara zen̈y ten̈a mikarakara ondrikondrikinany. Karaha zen̈y nataony Davida. Izikoa fa nisy lion ndreky orsy nitady hihinan̈a ondrikondrikinany, izy niaro iro. (1 Sam. 17:34, 35) Piambin̈y ondrikondriky ten̈a tsara zen̈y man̈aramaso tsarabe ondrikondrikinany aby io, avio hainy fo izikoa misy araiky amindro io tsy ao. (Jaona 10:3, 14) Karakory amy zay hataony piambin̈y karaha zen̈y izikoa fa misy araiky amindro io very? Ambelany an̈aty vario iro 99 aby io na izy han̈iraka piambin̈y ondrikondriky hafa hikarakara iro io, baka io loso izy mitady araiky very in̈y. Ino ma raha maventy tiany Jesosy hampianarin̈y atsika amy fan̈oharan̈a io? Ho izy: “Karaha zen̈y koa, tsy tiany Babako andan̈itry an̈y hisy ho very foeky na araiky amindro madiniky aby io.”—Mat. 18:14.
Israelita piambin̈y ondrikondriky mikarakara ondrikondriky efa navy very (Zahava fehintsoratra 9)
JEHOVAH MITSAKARAKA ONDRIKONDRIKINANY
10. Ino ma raha nampan̈antin̈ainy Jehovah, koa zahan̈a Ezekiela 34:11-16?
10 Tiany Jehovah aby atsika tsiaraikiaraiky, an̈isanizen̈y iro ondrikondriky “madiniky” niala taminy andiany aby io. Nampan̈anten̈a izy fa hitsakarehany iro ondrikondriky very aby io, baka io hampiany ho tsara fihavanan̈a aminany ndraiky. Nirahiny Jehovah nisoratiny paminan̈y Ezekiela raha handeha hataony han̈avotan̈a ondrikondrikinany aby io. (Vakia Ezekiela 34:11-16.) Karaha nataondro Israelita piambin̈y ondrikondriky aby io raha hataony amy leranizen̈y. Voanalohany, izy hitsakaraka lan̈iany ondrikondriky very. Mitaky fotoan̈a ndreky angovo mare raha zen̈y. Faharoe, izikoa fa hitany ondrikondrinany in̈y, hindesiny mimpody amy vario ao ndraiky. Koa misy maratra na mosary, hikarakarainy baka io tambitambeziny. Hasiany aody koa baindro, baka io hinjoniny amy tratranany iro. Hamiany hanin̈y koa iro. Karaha zen̈y koa tokony hataondro piambin̈y “andianondrikondrikiny Zan̈ahary”, izikoa fa man̈ampy olo tsy niaraka amy fiangonan̈a eky. (1 Pet. 5:2, 3) Tsakaraindro antipan̈ahy aby io antsendriky ondrikondriky very io, baka io iro mitady fomba himpodianany aminy andiany ndraiky. Mifen̈y fo iro ho tsara fan̈ahy ndreky be fitiavan̈a izikoa fa man̈ampy iro hinaman̈a amy Jehovah ndraiky. *
11. Ino raha efa ampoiziny piambin̈y ten̈a tsara?
11 Piambin̈y ten̈a tsara zen̈y efa man̈ampoy fa ondrikondriky mety ho very. Ondrikondriky araiky koa sendra niala taminy andiany, piambin̈y io tsy mety hampijaly na hamopòko izy. Aleva onon̈o baka raha nataony Jehovah izikoa fa nisy panomponany niala izy.
12. Karakory fomba nitondrasany Jehovah i Jona?
12 Nisy raha nan̈irahany Jehovah paminan̈y Jona, fa Jona nilefa. Ndray zen̈y, Jehovah tsy direkty nan̈atsoaka hevitry fa tsisy raha ilan̈a Jona. Piambin̈y ten̈a tsara koa Jehovah, ke nitady fomba fo izy nan̈ampian̈a Jona. Nataony koa raha hazahoany Jona angovo ndraiky, baka ho vitany asa nan̈irahany izy. (Jona 2:7; 3:1, 2) Tafara tatỳ, Jehovah nampiasa mataviloha hampatontohitry Jona fa raha ten̈a valera aminany fahin̈ananolo. (Jona 4:10, 11) Ino raha ianarantsika baka amy zen̈y? Antipan̈ahy tsy tokony hieritreritry fa efa tsy avotro eky olo araiky koa fa tsy mitory eky. Tokony hifen̈y fo iro hahay ino antony nahavy ondrikondriky io niala andiany. Izikoa fa tafimpody ondrikondriky io, mbala mifen̈y fo koa antipan̈ahy aby io mikarakara izy ampitiavan̈a.
13. Karakory nataony Jehovah, izikoa fa naharen̈y raha tsapany panoratra Salamo 73? Ino raha ianarantsika baka zen̈y?
13 Nalemy trôko mare panoratra Salamo 73 koa fa nahita olo ratsy fan̈ahy aby io karaha sambatra mare. Tafivolan̈a foeky izy fa tsisy varany izy nitandrin̈y lalàn̈any Zan̈ahary. (Sal. 73:12, 13, 16) Fa Jehovah tsy nan̈amia tsin̈y izy foeky. Ndray izy aby nirahiny Jehovah nisoratin̈y amy Baiboly ao lastio raha nivolan̈iny aby zen̈y! Izikoa fa nandeha fotoan̈a, tontohitry izy fa efa fikamaradianan̈a amy Jehovah edy raha ten̈a mampisy dikany fiain̈ana, ndreky ten̈a mampasambatra. (Sal. 73:23, 24, 26, 28) Ino raha ianarantsika baka amy zen̈y? Misy olo misalasala izikoa ten̈a mahatsara iro manompo Jehovah, ke raha zen̈y hita amy raha volan̈indro ndreky raha ataondro. Amy leranizen̈y, antipan̈ahy tsy tokony halaky hitsara na han̈amia tsin̈y. Tokony hazava tsarabe amindro antipan̈ahy aby io nan̈ino olo io karaha zen̈y, iô iro vo hahita andininy mety tsarabe hankahirezan̈a izy.
14. Nan̈ino ma Elia nila fan̈ampian̈a? Akory nan̈ampiany Jehovah izy?
14 Panjakavavy Jezebela tihamono paminan̈y Elia, ke Elia nilefa. (1 Mpanj. 19:1-3) Sambarany Elia efa izy zaraiky fo paminan̈iny Jehovah tavela. Ren̈iny karaha tsisy varany foeky fanompoan̈anany. Rivan̈a mare izy, ke tihofoaty foeky. (1 Mpanj. 19:4, 10) Jehovah tsy nan̈ady izy. Namezany toky Elia fa tsy izy zaraiky fo tavela, avio hamezany angovo izy, sady mbala hitavandrainy han̈ano raha maro koa. Nitandrin̈esany Jehovah tsarabe Elia koa fa nikoran̈a raha tan̈aty fonany, avio izy nirahiny han̈ano asa vaovao. (1 Mpanj. 19:11-16, 18) Ino raha ianarantsika baka amy zen̈y? Atsika jiaby tokony ho tsara fan̈ahy aminy ondrikondrikiny Jehovah, intsaka eky antipan̈ahy. Antipan̈ahy mila von̈ono hitandren̈y tsarabe, intsaka eky olo io koa mivolan̈a fa izy meloko na mahatsiaro tsisy dikany na tsy mendriky famindrampony Jehovah. Amia toky izy fa ten̈a mbala tia izy Jehovah.
TOKONY HO KARAKORY MA FIHEVERANAO ONDRIKONDRIKY VERY ABY IO?
15. Akory fahitany Jesosy ondrikondrikiny Babany, koa zahan̈a Jaona 6:39?
15 Tiany Jehovah hataontsika karakory ma iro ondrikondriky very aby io? Jesosy modely tsara arehantsika mikasiky zen̈y. Hainy baka fa tiany Jehovah mare ondrikondrikinany jiaby. Ke nifen̈y fo izy nan̈ampy iro “ondrikondriky very tamy taranakany Israely”, baka iro himpody amy Jehovah ndraiky. (Mat. 15:24; Lioka 19:9, 10) Piambin̈y ten̈a tsara koa Jesosy, ke nifen̈y angovo jiaby izy baka tsy hisy ho very ondrikondrikiny Jehovah.—Vakia Jaona 6:39.
16-17. Nan̈ino ma antipan̈ahy tokony han̈ampy olo himpody amy Jehovah? (Zahava “ Raha Mety ho Tsapany Ondrikondriky Very”)
16 Apostoly Paoly nan̈iraka iro Kristianin̈y tamy fiangonan̈any Efesosy hangala tahaka Jesosy. Ho izy: ‘Anaro tsy maintsy man̈ampy iro mila ampian̈a, ndreky mahatsiaro volan̈any Jesosy Tompo ty: “Man̈amia raha olo ten̈a mampasambatra tozay mahazo raha baka aminolo.” ’ (Asa. 20:17, 35) Hita baka amy zen̈y fa andraikitry maventy nankin̈iny Jehovah amindro antipan̈ahy aby io fikarakaran̈a ondrikondrikinany. Karaha ty nambarany Salvador, antipan̈ahy baka an Espagne: “Jehovah tsy voly mitady fomba han̈ampian̈a ondrikondriky very aby io. Zaho koa fa mandiniky zen̈y, manjary tihiezaka mare koa zaho. Ten̈a resy lahatra zaho fa tiany Jehovah hikarakaraiko tsarabe ondrikondrikinany aby io.”
17 Olo jiaby voakoran̈a tan̈atiny lahatsoratra ty ato nahazo fan̈ampian̈a nilaindro aby, ke iro nimpody tamy Jehovah. Fa mbala maro olo tihan̈ano zen̈y amy zioty. Akory mety han̈ampiantsika iro? Hidinihintsika amy lahatsoratra man̈araka fomba mety han̈anovan̈a zen̈y.
HIRA 139 Saintsaino ny Fiainanao ao Amin’ny Tontolo Vaovao
^ feh. 5 Nan̈ino ma sasany aminolo nanompo Jehovah efa taon̈o taon̈o, voly manompo izy? Asa akory ho izy mahita zen̈y? Akory nataony Jehovah nan̈ampy panomponany taloha tan̈y, iro koa fa tsy nan̈araka volan̈anany? Ino raha ianarantsika baka amy zen̈y? Zen̈y raha hidinihintsika ato.
^ feh. 2 FAN̈AZAVAN̈A: Pitory araiky koa fa tsy nan̈ampody tatitry momba fitorian̈a ndreky fampianaran̈a, tan̈atiny tsiota fanjava na mandilatra, tsy mitory eky fivolan̈ana izy. Mbala rahalahintsika ndreky ranabavintsika fo iro io ndray zen̈y, sady tiantsika angovo jiaby!
^ feh. 4 Nivoan̈a an̈aran̈a sasany.
^ feh. 10 Ho hitantsika amy lahatsoratra man̈araka akory han̈arehany antipan̈ahy hevitry voakoran̈a tio aby in̈y.
^ feh. 60 FAN̈AZAVAN̈A SARY: Miasaloha mare piambin̈y ondrikondriky araiky fotony very ondrikondrinany. Loso izy mitsakaraka tany misy ondrikondriky very in̈y sady man̈ampy izy himpody ndraiky amindry namany. Tsisy ny hafa amy zen̈y koa raha ataondro antipan̈ahy aby io avahizo.
^ feh. 64 FAN̈AZAVAN̈A SARY: Misy ranabavy efa tsy mitory eky; an̈aty bisy izy, miambin̈y izio mandeha. Rikian̈a izy mandiniky Vavolombelon̈o aroe ravoravo mare mitory amy tany maro olo.
