1. Izikoa 3 Jaona 3, 4 zahan̈a, ino raha mamparavoravo atsika?

RAVORAVO mare apostoly Jaona koa fa naharen̈y iro olo nampianariny fahamarin̈ana aby io mbala nanompo Jehovah fo. Maro raha nanahiran̈a iro Kristianin̈y tsy nivadiky aby io. Nifen̈y mare Jaona nankafatatra finoan̈andro, fotony mira zanany in̈y fahitany iro. Ravoravo karaha zen̈y koa atsika lera zanakantsika na olo ampianarintsika Baiboly manokanten̈a amy Jehovah ndreky manompo izy fo.—Vakia 3 Jaona 3, 4.

2. Ino antony nanoratany Jaona taratasy telo amy Baiboly ao?

² Mety ta Efesosy na farifary tan̈y, tany nipitrahany Jaona taminy taon̈o 98. Mety izy nafaka gadra baka tamy nosy Patmo in̈y izy nifindra tan̈y. Evandraha tamy zen̈y donko fan̈ahy masin̈iny Jehovah nandrisiky izy hanoratra taratasy telo io. Nanoratra taratasy aby io izy han̈ampian̈a Kristianin̈y hino Jesosy ndreky handeha amy fahamarin̈ana fo.

3. Ino aby fan̈ontanian̈a hivaliantsika?

³ Tamy zen̈y, efa Jaona zaraiky fo apostoly tavela. Niasaloha mare izy fotony nisy papianatra sandoko * nitsofotro tan̈ivony fiangonan̈a. (1 Jaona 2:18, 19, 26) Niaboko ho nahay Zan̈ahary baka iro io, kanefa iro tsy nan̈ahoa didinany foeky. Alô baka zahavantsika torohevitry nirahiny Jehovah namezany Jaona iro Kristianin̈y aby tamy zen̈y, avio hivaliantsika koa fan̈ontanian̈a telo ty: Ino ma dikany mandeha amy fahamarin̈ana zen̈y? Ino aby raha mety hisakan̈a atsika tsy han̈ano zen̈y? Baka io akory fomba hifan̈ampiantsika baka atsika samby handeha amy fahamarin̈ana fo?

4. Koa 1 Jaona 2:3-6 ndreky 2 Jaona 4, 6 zahan̈a, ino aby raha mila ataontsika izikoa atsika tihandeha amy fahamarin̈ana?

⁴ Tsy hahavita handeha amy fahamarin̈ana foeky atsika izikoa tsy mahay ny marin̈y amy Volan̈a Zan̈ahary ao. Tsy maintsy ‘mitandrin̈y didinany’ na man̈araka volan̈anany koa atsika. (Vakia 1 Jaona 2:3-6; 2 Jaona 4, 6.) Nahavita zen̈y tsarabe Jesosy, ke mila mifen̈y angovo jiaby atsika han̈aradia izy erakany mety ho vitantsika. (Jaona 8:29; 1 Pet. 2:21) Zen̈y an̈isany fomba maventy han̈arehantsika volan̈any Jehovah.

5. Mila resy lahatra aminino aby ma atsika?

⁵ Izikoa atsika tihandeha amy fahamarin̈ana fo, mila resy lahatra atsika fa Jehovah Zan̈ahariny fahamarin̈ana. Marin̈y aby raha jiaby koran̈iny amy Baiboly ao. Tsy maintsy resy lahatra koa atsika fa Jesosy ankitin̈y Mesia nampan̈antinain̈y. Fotony maro olo iziô tsy mino fa Jesosy io voahosotro ho Panjakany Fanjakan̈any Zan̈ahary. Jaona efa nampitandrin̈y fa ho marobe olo “pamitaka”, ke mety ho voafitakandro lan̈iany olo tsy ten̈a mino ny marin̈y momba Jehovah ndreky Jesosy. (2 Jaona 7-11) Karaha ty koa ho Jaona: “Azovy koa ma ny pavandy izikoa tsy araiky mivolan̈a fa Jesosy tsy Kristy?” (1 Jaona 2:22) Tsy ho voafitaka foeky atsika izikoa mazoto mianatra Volan̈a Zan̈ahary, sady zen̈y zaraiky fo fomba hahaizantsika Jehovah ndreky Jesosy tsarabe. (Jaona 17:3) Mbala zen̈y zaraiky fo koa hamparesy lahatra atsika fa marin̈y raha inoantsika.

6. Ino mety hahavy tanora tsy handeha amy fahamarin̈ana?

⁶ Kristianin̈y jiaby mila mitandrin̈y tsao voafitaka han̈araka hevitrinolombelon̈o. (1 Jaona 2:26) Tanora ny ten̈a mila mitandrin̈y amy zen̈y. Karaha ty ho Alexia, * ranabavy 25 taon̈o, baka a France: “Komansy nisalasala momba finoan̈anaka zaho koa fa nianatra momba filozofỳ ndreky evolision, ta lekoly. Hitako karaha marin̈y aby raha nampianarindro ndraikindraiky. Fa zaho amy zay loso diniky, karaha hitako tsy rariny oe izikoa zaho hitandren̈y iro fo fa tsy han̈ambela Jehovah han̈azava ninany.” Ke tapakevitry Alexia fa hianatra boky Akory Nisiany Fiain̈ana? Baka Aminy Evolision sa Famoron̈ana? (fransay). Herin̈iandra vitsivitsy tafaranizen̈y, efa tsy nisalasala eky izy. Ho izy: “Iziô zaho vo resy lahatra fa marin̈y ankitin̈y raha koran̈iny Baiboly. Tontohitry zaho fa fan̈arehan̈a raha  koran̈inizio fo ten̈a hamparavoravo ndreky hampilamin̈y jerinaka.”

7. Ino raha tsy maintsy tandremantsika? Nan̈ino?

⁷ Mety ho voataon̈o han̈araka hevitrinolombelon̈o olo araiky, izikoa man̈ano sary manompo Jehovah kanefa mbala man̈ano raha ratsy fo. Ke mila mitandrin̈y atsika Kristianin̈y, na tanora na olobe, tsao man̈ano zen̈y. Jaona nivolan̈a fa tsy ho vitantsika mandeha amy fahamarin̈ana sady man̈ano raha ratsy zen̈y. (1 Jaona 1:6) Izikoa atsika tihahazo rady amy Jehovah rango izioty firaka aminy hoavy, mila alentsika onon̈o fo fa tsisy raha misitriky aminany. Ndray fahotan̈a ataontsika ambadimbadiky an̈y, hitany fo.—Heb. 4:13.

8. Ino raha tsy tokony hataontsika?

⁸ Atsika tsy tokony hangala tahaka fomba fiheveranolo amy donia ty fahotan̈a. Jaona nivolan̈a fa ‘mandrora mantsilan̈y lan̈iany olo mivolan̈a fa tsisy fahotan̈a.’ (1 Jaona 1:8) Nivolan̈a iro pivadipinoan̈a aby taminandrany Jaona, fa mbala mety mifandray amy Zan̈ahary fo olo araiky ndray efa kinia manota. Maro koa olo avahizo mihevitry karaha zen̈y. Iro man̈ano sary mino Zan̈ahary kanefa tsy ikendro foeky raha volan̈iny Jehovah momba fahotan̈a, intsaka eky fahotan̈a momba firaisan̈a. Ohatra iziô misy raha volan̈iny Jehovah tsy mety atao fotony fahotan̈a. Iro ndraiky mivolan̈a fa ‘izio mety atao fo’, na ‘izio asakasaka anten̈a fo!’

9. Nan̈ino ma mahatsara tanora man̈araka raha koran̈iny Baiboly?

⁹ Mety misy tanora kristianin̈y iziô forsenolo lekoly araiky aminany na fiasan̈a araiky aminany han̈araka hevitrindro momba firaisan̈a. Tsy mora miatriky zen̈y! Karaha ty iziô ho Alexandre: “Iro tsaiky viavy ta lekolinay tan̈y niforse zaho han̈ano firaisan̈a tamindro, fa zaho tsy nan̈eky. Pede zen̈y zaho ho iro matoa tsisy tsaiky man̈angy iarahan̈a.” Asa anao mba efa tojy raha karaha zen̈y? Aza adin̈a fa mahatsara anao man̈araka raha koran̈iny Baiboly.  Ho hajainolo anao fotony man̈aja ten̈a, ho salama koa vatan̈anao, hilamin̈y jerinao, avio ho kamaradiny Jehovah fo anao. Isaka anao mahavita mandresy fakampan̈ahy, manjary mahaimora aminao fo man̈ano raha tsara. Aza adin̈a fa tsy marin̈y fomba fihevitrinolo amy donia ty momba firaisan̈a, fotony baka amy Satana. Matokisa fa ho vitanao ‘handresy araiky ratsy io’, izikoa anao tsy man̈eky hankadalainolo amy donia ty.—1 Jaona 2:14.

10. Nan̈ino 1 Jaona 1:9 io man̈ampy atsika tsy hinjehiny eritreritry izikoa fa manompo Jehovah?

¹⁰ Ikentsika fa Jehovah manan̈a zò hamaritry ino fahotan̈a zen̈y. Ke mifen̈y mare atsika tsy hanota. Fa izikoa atsika tafanota, atsika mivavaka amy Jehovah, ke ambarantsika izy raha ratsy nataontsika. (Vakia 1 Jaona 1:9.) Izikoa ndraiky fahotan̈a maventy izy nataontsika io, atsika mila man̈aton̈o antipan̈ahy fotony iro nitindreny Jehovah han̈ampy atsika. (Jak. 5:14-16) Ndray zen̈y, atsika tsy tokony han̈ameloten̈a be amy fahotan̈a vitantsika taloha. Fotony Babantsika be fitiavan̈a io efa nan̈amia Zanany atao vidipan̈avotan̈a, amy zen̈y atsika mahazo familankeloko. Sady izy efa nivolan̈a fa hambelany hadisovan̈anolo mibebaka. Jehovah tsy mavandy. Ke tsy tokony hinjehiny eritreritry eky atsika, koa fa manompo Jehovah.—1 Jaona 2:1, 2, 12; 3:19, 20.

11. Akory hiarovantsika finoan̈antsika?

¹¹ Atsika tsy tokony han̈eky fampianaran̈any pivadipinoan̈a. Tamy fiangonan̈a kristianin̈y vo niforon̈o, Satana efa nampiasa olo maro hamitaka panompony Jehovah. Tiany Satana hihen̈y baka finoan̈andro. Ke mila haintsika man̈avaka raha marin̈y ndreky raha vandy. * Iro fahavalontsika aby io mety hampiasa Internet na tranonkala fifaneraseran̈a, baka hihen̈y fatokisantsika Jehovah ndreky fitiavantsika piaramanompo  amintsika. Aleva onon̈o fa baka amy Satana aby vandy jiaby aparitakany fahavalontsika, ke aza man̈eky hiribiribendro foeky!—1 Jaona 4:1, 6; Apok. 12:9.

12. Nan̈ino atsika tokony hifen̈y mare hampitombo fatokisantsika ny marin̈y efa haintsika?

¹² Izikoa atsika tsy tiho resiny Satana, mila mifen̈y atsika hampitombo fatokisantsika Jesosy ke han̈eky fa izy ampiasainy Jehovah han̈atanteraka sitraponany. Mila matoky panompo atokisan̈a ndreky mahadiniky raha koa atsika, fotony efa iro io zaraiky fo ny ampiasainy Jehovah hitariky fandaminan̈anany. (Mat. 24:45-47) Ino raha han̈ampy atsika hatoky Jesosy ndreky panompo io mare? Fianaran̈a tsy tapaka Volan̈a Zan̈ahary. Karaha ataony kakazo mamahatra tsarabe in̈y hataony finoan̈antsika, izikoa atsika man̈ano zen̈y. Nikoran̈a raha miramira amy zen̈y Paoly, taminizy nanoratra tamy fiangonan̈a ta Kolosia. Ho izy: “Karaha nataonaro nan̈eky Kristy Jesosy Tompo in̈y koa tokony hanohizanaro hiaraka handeha aminany fo, sady hamahatra ndreky hiorin̈y tsarabe aminany, baka io tsy ho voahozongozon̈o amy finoan̈a.” (Kol. 2:6, 7) Izikoa atsika mifen̈y mare hampatanjaka finoan̈antsika, tsisy andra havitany Satana ndreky olonany aby io hampiala atsika amy fahamarin̈ana!—2 Jaona 8, 9.

13. Ino ma raha efa haintsika? Nan̈ino?

¹³ Efa haintsika fa halany donia ty atsika. (1 Jaona 3:13) Nampatsiaroviny Jaona atsika fa ‘donia ty ambany fahifan̈any araiky ratsy in̈y.’ (1 Jaona 5:19) Arakarakany han̈aton̈any farany donia ty, mahairombotro fo Satana. (Apok. 12:12) Mety hamitaka atsika ankolaka Satana ke ataony raha hahavy atsika haloto fitondranten̈a na hino vandiny pivadipinoan̈a. Ndraikindraiky mety manafika atsika mivantan̈a izy ke mampiasa olonany hampijaly atsika. Hainy baka fa hely fotoan̈a anan̈any hisakanan̈a asa fitorian̈a ataontsika ndreky hitahoman̈a atsika hivadiky. Zen̈y aviany manampahifan̈a amy tany sasany tsy man̈omba atsika han̈ano asa fitorian̈a io. Fa na ino na ino raha ataony Satana amy vahoakany Jehovah, iro rahalahintsika ndreky ranabavintsika aby io tsy mivadiky foeky. Hahavita han̈ano zen̈y koa atsika.

14. Karakory mety han̈ampiantsika piaramanompo amintsika aby io tsy hiala amy fahamarin̈ana?

¹⁴ Han̈ampy iro rahalahy ndreky ranabavy aby io tsy hiala amy fahamarin̈ana atsika, izikoa mitepô iro. (1 Jaona 3:10, 11, 16-18) Atsika mila mifankatia fo ndray misy problemo ndray tsisy. Asa anao mahay olo vo naty havan̈a? Nan̈ino izikoa mba mankahery izy na man̈ano raha an̈ampian̈a izy? Sa misy piaramanompo ren̈inao tatrany tondradrano, ke robaka fanan̈ananany? Sa mila amboarin̈y tran̈onany na Tran̈o Fivorian̈a ampiasaindro? Aleva onon̈o fa miankiny amy raha ataontsika ahitan̈a fa ten̈a tia iro piaramanompo amintsika aby io atsika sady mitepô iro, fa tsy amy raha volan̈intsika fo.

15. Izikoa 1 Jaona 4:7, 8 zahan̈a, ino ma raha tokony hataontsika?

¹⁵ Mangala tahaka Babantsika be fitiavan̈a atsika izikoa tia piaramanompo. (Vakia 1 Jaona 4:7, 8.) Fomba araiky maventy mety han̈anovantsika zen̈y lera atsika man̈ambela hadisovan̈a. Akory hataonao izikoa nisy olo nan̈ano raha nampaneloko anao baka io izy nifono taminao? Han̈ambela hadisovan̈anany anao izikoa tia izy sady hiezaka han̈adin̈a izin̈y. (Kol. 3:13) Zen̈y raha nandalo taminy Aldo. Nisy rahalahy araiky najainy be nan̈aratsy  olo karazan̈a araiky aminany, ke nalahelo mare izy. Ho izy: “Namango zaho nivavaka tamy Jehovah baka tsy hieritreritry raha ratsy momba rahalahy io.” Fa nisy raha hafa koa nataony Aldo. Nitahôminy handeha hanompo niaraka taminany rahalahy io. Ke iro koa fa tamy fanompoan̈a tan̈y, nazavainy Aldo taminany fa ten̈a nampalahelo izy volan̈anany. Ho izy koa: “Izikoa fa hainy rahalahy io fa nampalahelo zaho raha nivolan̈iny, izy niala tsin̈y taminaka. Hitako tamy fomba fivolan̈any fa ten̈a nanen̈iny izy, ke zahay iziô fankahazo mare.”

16-17. Tokony ho tapakevitry han̈ino ma anao?

¹⁶ Farandraha tiany apostoly Jaona eky piaramanompo taminany sady tiany hanan̈a finoan̈a matanjaka koa. Hita amy torohevitry namiany amy taratasy telo nisoratany in̈y raha zen̈y. Ravoravo koa atsika mahay fa be fitiavan̈a karaha Jaona koa iro lelahy ndreky man̈angy voahosotro hiaraka hanjaka amy Kristy.—1 Jaona 2:27.

¹⁷ Irarian̈a atsika han̈araka torohevitry hitantsika tato, amy fô jiaby! Mifen̈a fo ho tapakevitry handeha amy fahamarin̈ana. Areha fo volan̈any Jehovah, amy raha jiaby ataonao. Ianara Volan̈anany, baka io ampitombosa fatokisanao izio. Ataova fatatra tsarabe fatokisanao Jesosy. Fadiana mino hevitrinolombelon̈o ndreky iro fampianaran̈any pivadipinoan̈a aby io. Aza man̈eky tahôminolo han̈ano sary manompo Zan̈ahary kanefa baka io maditry fo ambadibadiky an̈y. Aza man̈eky tahôminolo hanota zen̈y foeky, fa areha fo fitsipikiny Jehovah momba fitondranten̈a. Mifen̈a koa han̈ambela hadisovan̈anolo namparary fonao, baka io ampia lan̈iany olo mila ampian̈a. Hankahery iro raha zen̈y. Izikoa anao man̈ano zen̈y, na ino na ino raha sarotro mandalo, hahavita handeha amy fahamarin̈ana fo anao!