Taminy 1954 zaho teraka, ta Saint Paul, a Minnesota. Katoliky aby ry havako, ary zahay tsy dia olo nanandraha fa zahay koa tsy dia sahiran̈a loatra. Dimy mianadahy zahay vaotraka araiky, ke zaho faharoe. Tamy zaho mbala hely, zaho nianatra tamy lekoly katoliky. Piservỳ lamesy zaho tamy zen̈y. An̈arany fo zaho nahay Baiboly. Zaho ndraiky nino fa Zan̈ahary misy, ary izy niasa raha jiaby. Fa ndray zen̈y, tan̈atiny jeriko tan̈y, tsy honohono Eglizy Katoliky foeky han̈ampy zaho hanompo Zan̈ahary.

Tamy taon̈o voanalohany nianarako droit, nisy Vavolombelon̈o Jehovah namangy zaho. Mbala sofy nanasa lamba mare zaho tamy zen̈y. Zaho nivolan̈a tamindro: ‘Sitrany amy man̈araka anaro avy e.’ Ke iro koa fa nimpody, nisy fan̈ontanian̈a aroe napetrako tamindro. Araiky: “Nan̈ino ma fiain̈ananolo ratsy fan̈ahy karaha milamin̈y oe kanefa olo tsara fan̈ahy mijaly?” Faharoe: “Ino tokony hatao izikoa anten̈a tiho sambatra?” Ke zaho namiandro boky Ny Fahamarinana Izay Mitarika  ho Amin’ny Fiainana Mandrakizay, baka io Baiboly Ny Soratra Masina—Fandikan-tenin’ny Tontolo Vaovao. Mahitsohitso tsara hely zay Baiboly io! Zaho koa fa nianatra Baiboly, nahainaro raha haiko ke ten̈a ravoravo zaho. Nanjary haiko fa Fanjakan̈any Zan̈ahary io hitondra tany ty aminy amaray an̈y. Zaho baka efa resy lahatra fa fitondrasan̈anolombelon̈o tsy mafoaka foeky, fotony baka amizio fo mahavy jaly ndreky tsy rariny.

Tamy voanivoanalohany taon̈o 1982 zaho nanokanten̈a tamy Jehovah. Tafara helinizen̈y zaho natao batisa, tamy Fivoriambeny Vondroparitry “Ny Fahamarinan’ilay Fanjakana.” Tamy tran̈ompokonolo ta Saint Paul nan̈anovan̈a izio. Herin̈iandra tafara, zaho nimpody tamy tran̈ompokonolo io ndraiky, fotony tao nan̈anovan̈a konkòronolo tihanjary avokà. Tamy voanivoanalohany Oktobra, ren̈iko fa nafaka zaho ke nanjary avokà.

Fanojy Mike Richardson, Betelita ta Brooklyn, zaho tamy fivoriambe io. Nivolan̈a taminaka izy fa efa misy sampandraharaha momba lalàn̈a amy foibe an̈y iziô. Azoko onon̈o raha nivolan̈iny manampahifan̈a etiopiain voakoran̈a aminy Asan’ny Apostoly 8:36 in̈y. Ke ho zaho: ‘Ino ma tamban̈a tsy hiasako amy sampandraharaha zen̈y?’ Zaho baka tio nangataka hanompo amy Betela.

Zaho koa fa nanjary Vavolombelon̈o Jehovah, ry olobeko ten̈a tsy ravoravo. Ke Papa nan̈ontany zaho, asa mba ino tombontsoanaka hiasa amy Betela zen̈y. Nikoran̈iko taminany fa asa antsitrapo izy handeha hataoko io, fa zaho ndraiky hahazo vola fan̈ampian̈a hely isaka fanjava.

Nisy asa efa nikeko hatao, ke tsy maintsy nankefa izio antsendriky zaho vo afaka nanompo tamy Betelany Brooklyn, a New York, taminy 1984. Voatendry hiasa tamy Birô Momba Lalàn̈a zaho. Nety be taminaka raha io fotony zaho tamy zen̈y vo boaka niasa tamy tribinaly.

Tamy Novambra 1983 fandaminan̈a nivanga Stanley Theater. Tamy Tanànany Jersey, a New Jersey misy izio. Maromaro raha tsy maintsy navaozin̈y tan̈atiny tran̈o io, an̈atinizen̈y elektrisite ndreky tiôny rano. Ke nangataka lalan̈a han̈ano izio iro rahalahy aby io. Nazavaindro tamy manampahifan̈a fa tran̈o io hampiasain̈y han̈anovan̈a fivoriambeny Vavolombelon̈o Jehovah, fa raha zen̈y tsy nikendro. Eraka lalàn̈a mifehy tanàna io zen̈y, amy faritry misy tran̈onolo fo zen̈y tokony hisy tran̈o fivavahan̈a. Kanefa Stanley Theater io, amy tany be fivarotan̈a ndreky tany fiasan̈a. Nimpody nangataka lalan̈a ndraiky iro rahalahy aby io fa mbala tsy nahazo fo.

 Nampakariny fandaminan̈a tamy fitsaran̈a afaira io. Tamy zen̈y mbala herin̈iandra voanalohany niasako tamy Betela. Tsy vaovao taminaka foeky raha mifototro fitsaran̈a zen̈y, fotony zaho efa niasa tamy tribinaly, kadiriny taon̈o aroe tio, tamy zaho ta Saint Paul. Nisy avokàny fandaminan̈a araiky zay nivolan̈a: “Efa nampiasain̈y nan̈anovan̈a galà, nizahavan̈a filma ndreky nan̈anovan̈a raha hafa kony izio e! Ke ino tsy an̈omboandro izio ampiasain̈a amy fivavahan̈a?” Iro tamy tribinaly koa fa nandiniky problemo io, iro nivolan̈a fa tsy nan̈isy fotiny safidintsika han̈araka fivavahan̈antsika iro tamy Tanànany Jersey. Ke nan̈aboaka didy fitsaran̈a io fa tsy maintsy amiandro lalan̈a han̈ano fan̈avaozan̈a atsika. Tamy zen̈y, nanomboko hitako fa ten̈a tahiany Jehovah fandaminan̈a, koa fa mampiasa lalàn̈a hampandihanan̈a asanany. Ravoravo mare zaho fotony nahavita nan̈ano zay vitako taminy asa io.

Natao tran̈o fan̈anovan̈a fivoriambe tran̈o io, ke marobe fan̈avaozan̈a mila natao. Kadiriny ho taon̈o araiky tafara, izio nampiasain̈y handrasan̈a diplaomy. Ke tao nan̈amezan̈a diplaomy iro tamy klasy faha-79 amy Sekoliny Gileada, tamy 8 Septambra 1985. Ravoravo mare zaho fotony afaka nampandroso asany Fanjakan̈a io, tamy raha momba lalàn̈a. Ten̈a afapo zaho nan̈ano asa io, mandilatra asako taloha. Tsy nampoiziko foeky fa kaiky ho maro tombontsoa handeha hamiany Jehovah zaho.

Nisy problemo nandalo tan̈elan̈elan̈any 1980 ndreky 1990. Vavolombelon̈o araiky ampy taon̈o koa fa nangataka tsy hampidiran̈a lio, matetiky iro dokotera ndreky lopitaly tsy nijery hevitrinany. Man̈angy mavesatra ten̈a sahiran̈a, fotony matetiky iro amy fitsaran̈a nieritreritry fa tsy manan̈a zò tsy hampiditry lio iro. Mety hofoaty zen̈y ho iro man̈angy io izikoa tsy ampidiran̈a lio, ke hanjary kamboty zanany.

Nandeha lio be Ranabavy Nicoleau koa fa niteraka zanany lelahy, tamy 29 Desambra 1988. Nijotso ambaniny 5 eran̈any hemoglobiny taminy ain̈inany, ke natahoran̈a hofoaty izy. Dokotera nan̈ontany izikoa izy mety ampidiran̈a lio, kanefa tsy nan̈eky ranabavy io. Amarainizin̈y, iro tamy lopitaly io nangataka lalan̈a tamy pitsara baka hahavita hampiditry lio tamy ranabavy io. Direkty nan̈eky iro, kanefa iro tsy nikoran̈a tamy Ranabavy Nicoleau na tamy vadiny. Iro lastio tsy nambela han̈azava hevitrindro foeky.

Nampidirandro lio fo Ranabavy Nicoleau tamy joma 30 Desambra, ndray tsy zen̈y safidiny vadiny ndreky ry havany niaraka taminany tio. Harivanizin̈y, nisy havany ranabavy io maromaro ndreky sasany tamindro antipan̈ahy aby io nisamboriny polisy, fotony nisy olo nan̈odihody iro nikodidin̈y kobàny nandriany ranabavy io, nisakana  iro dokotera aby io zen̈y tsy hampiditry lio io taminany. Niboaka tamy vaovao ta New York ndreky Long Island foeky raha zen̈y kiakandrany sabotsy 31 Desambra.

Tinainy maraindrain̈y, zaho nandeha tamy Milton Mollen, pitsara tamy fitsaran̈a ambony. Nazavaiko taminany fandehany afaira io, ke nikoran̈iko taminany tsarabe fa tsy nety raha nataony fitsaran̈a fotony iro tsy nitandren̈y hevitriny Ranabavy Nicoleau ndreky vadiny, fa direkty nan̈amia lalan̈a nampidiran̈a lio izy. Nikahiany Mr. Mollen tamy birônany tan̈y zaho folakandranizin̈y, hiaraka midiniky afaira io ndreky lalàn̈a mifandray amizio. Niaraka nengo tan̈y zahay roeny Philip Brumley, piandraikitrinay. Nirahiny Mr. Mollen ho avy tan̈y koa avokàny lopitaly io. Zahay kony kalikaly nimalo! Nisy fotoan̈a, Rahalahy Brumley nanoratra tamy taratasy fangalany naoty: “Moramora fo e!” Raha io baka tio naboakany zaho. Nakiry izy nan̈ano zen̈y! Nafana fô loatra baka zaho ke nifen̈y nan̈aporofo tamindro angovo jiaby fa diso avokàny lopitaly io.

Kadiriny lera araiky tio, Mr. Mollen nivolan̈a fa afaira io raha voanalohany hidinihin̈y amaray maraindrain̈y. Zahay koa fa niboaka birônany, izy nivolan̈a fa mbala “hahevoko tsara” avokàny lopitaly io amaray. Hainay fa tsy ho mora aminany hiaro lopitaly io. Namandraha namezany Jehovah toky zaho fa tsy ho sarotro aminay handresy. Ten̈a mahalany fan̈ahy zaho nahita fomba nampiasany Jehovah zahay han̈atanteraka sitraponany.

Niasa firaka alin̈y be zahay fotony tianay ho voaoman̈a tsarabe raha handeha hivolan̈inay. Fitsaran̈a io baka tsy lavitry Betelany Brooklyn, ke nandeha vity fo ankamarozanolo ekipy araiky taminay. Iro pitsara efatra aby io koa fa baka nitandren̈y zahay, nanapakevitry iro fa tsy tokony nampidiran̈a lio Ranabavy Nicoleau. Nan̈amia rariny ranabavintsika io iro tamy fitsaran̈a. Nivolan̈a iro fa tsy man̈isy fotiny zò fototro arovany lalàmpan̈oren̈ana lan̈iany olo man̈aboaka didy momba olo araiky kanefa tsy mitandren̈y hevitrinany antsendriky.

Tsy ela tafaranizen̈y, namafisiny fitsaran̈a tampony ta New York fa zony Ranabavy Nicoleau hahazo fitahan̈a tsisy fampidiran̈a lio. Io fahefatrany afaira tamy fitsaran̈a nikarakaraiko mifandray amy fampidiran̈a lio. Nindesin̈y tamy fitsaran̈a tampony aby afaira aby io. (Zahava  “ Fandresen̈a Tamy Fitsaran̈a Tampony.”) Nan̈ampy iro avokà tamy Betela koa zaho izikoa nisy raha nikarakaraindro mifandray amy tany, tran̈o, divaorsy, ndreky zò hikarakara zanaka.

Tamy zahay roeny Denise nifanojy voanalohany, izy efa nisarabadian̈a. Nananjanaka telo koa izy. Izy salakady niasa, nan̈ano asany pisava lalan̈a. Ten̈a tsy mora fiain̈ananany. Fa ny raha ten̈a nampiafatra zaho, izy ten̈a tapakevitry hanompo Jehovah. Nisy Fivoriambeny Vondroparitry natao ta New York, taminy 1992. Fotokevitrinany io “Ireo Mpitondra Fahazavana.” Nan̈aton̈o izio zahay, ke taminio zaho nivolan̈a tamy Denise fa tihiaraka aminany. Nanjary fivadiany zahay taon̈o araiky tafaranizen̈y. Ten̈a kadô baka amy Jehovah vadiko io! Jehovah fo nataony voalohantoeran̈a, baka io izy tia songetaka. Rango zahay fivadiany zay, maro raha tsara vitany taminaka!—Ohab. 31:12.

Tamy zahay roe nanjary fivadiany, 11 ndreky 13 avio 16 taon̈o iro tsaiky aby io. Tiako hikarakara iro amy fomba tsara, ke nivakiko tsarabe lahatsoratra amy bokintsika mikoran̈a momba babahely, baka io narehako. Tsy nandeha ho azy ndraiky raha zen̈y! Fa ravoravo zaho fotony mira babandro be fitiavan̈a in̈y nitondrasandro zaho, ary zaho nataondro namandro atokisandro. Zanakanay aby io koa nambelanay niainvite namandro tantran̈o, ke loso feno tanora mavilavila oe tantran̈onay. Ten̈a tianay raha zen̈y!

Nifindra ta Wisconsin zahay taminy 2013, fotony nila fikarakaran̈a raimandreninay. Efa natoe baka iro! Fa ny raha nahalany fan̈ahy zaho, mbala afaka niasa tamy Betela fo zaho. Piasa antsitrapo tsy maharitry zaho tamy zen̈y, ke nahavita nan̈ampy fandaminan̈a handamin̈y raha sasany momba fitsaran̈a.

Tamy Septambra 2018, nanomboko nikohakohaka matetiky zaho. Zahay koa fa nandeha tamy dokoteranay tan̈y, tsy hainy foeky ino raha nahazo zaho. Nizaha dokotera hafa ndraiky koa zaho tafara tatỳ, ke iro nan̈iraka zaho hizaha spesialisty. Ke roso zaho nizaha spesialisty, tamy Zanvie 2019. Nivolan̈a spesialisty io fa aretin̈y tsy dia fohita loatra izy mahazo zaho io. Ke raha io, ho izy, hampalemy zaho.

Telo andra tafaranizen̈y, zaho nan̈ano spaoro. Tiako mare nan̈ano izio, ary raha io efa fataoko fo letrizay. Kanefa tio fo zaho lavo, ke folaka vozontan̈ananaka. Tio zaho vo tontohitry fa nanomboko tsy voafehiko fihetsiky sasany ataony vatan̈anaka. Nahainiaho fo aretin̈inaka io, ke loso sahiran̈a mare zaho. Ndray nivolan̈a, nihetsiky avio nanelin̈y hanin̈y nanjary sarotro taminaka.

Marin̈y fa tsy be raha vitako, kanefa ravoravo fo zaho fotony nahavita nampiasa fahaizako lalàn̈a hampandihanan̈a asany Jehovah. Ravoravo koa zaho nanoratra lahatsoratra marobe naboaka gazety, fotony iro lahatsoratra aby io ten̈a nan̈ampy dokotera ndreky avokà. Nitety tany koa zaho nan̈azava fomba hiarovan̈a zony Vavolombelon̈o Jehovah, baka iro tsy hampidiran̈a lio koa sendra didian̈a na miditry lopitaly. Ndray zen̈y, hitako marin̈y fo raha koran̈iny Lioka 17:10 mivolan̈a karaha ty: ‘Panompo tsy mahasoa fo zaho, ke zay tokony ho nataoko fo nataoko.’