1. Karakory ataony pitory maro mampitombo fanompoan̈andro?

 MAHAIMARO fo asa mila ataontsika arakarakany mamparikitry farany. (Mat. 24:14; Lioka 10:2; 1 Pet. 5:2) Atsika jiaby io samby tihan̈ano erakany vitantsika amy fanompoan̈a. Maro pitory mampitombo fanompoan̈a. Sasany iziô man̈ano pisava lalan̈a, manompo amy Betela na amy fan̈oren̈ana. Misy rahalahy marobe koa man̈ano tanjon̈o hanjary pan̈ampy amy fanompoan̈a na antipan̈ahy. (1 Tim. 3:1, 8) Ravoravo mare Jehovah mahita panomponany mazoto manompo izy.​—Sal. 110:3; Isaia 6:8.

2. Mety han̈ano akory atsika izikoa misy tanjon̈o tsy takatrantsika foeky?

² Mety ho dekorazy atsika izikoa efa miezaka manakatra tanjon̈o amy fanompoan̈a, kanefa raha io tsy mety takatrantsika. Mety ho diso fan̈atinan̈a koa atsika, fotony misy tombontsoa sasany tsy ho azontsika foeky nohony taon̈ontsika na nohony antony hafa. (Ohab. 13:12) Karaha zen̈y i Melissa. * Mba tihanompo amy Betela na han̈ano Sekolin’ny Mpitory Ilay Fanjakana izy, kanefa ho izy karaha ty: “Efa nôfinôfy fo raha aby zen̈y zioty, fotony efa nihoatra taon̈onaka. Misy lerany zaho dekorazy mare.”

3. Ino aby raha mila ataonolo tihahazo andraikitry fan̈ampiny?

³ Piaramanompo sasany ndraiky mbala tanora sady matanjaka tsara. Kanefa iro mety mbala mila miezaka ho matotro  ndreky hanan̈a toetry tsara sasany, zay iro vo mety hahazo andraikitry fan̈ampiny. Ohatra iziô, iro io mety mahay raha, tsy mirekireky manapakevitry, sady tsy kamo. Fa iro fo mila mianatra haharidraha, hikaly asa, avio han̈aja olo. Izikoa iro mifen̈y mare hanan̈a toetry ilain̈a aby zen̈y, mety hahazo andraikitry fan̈ampiny edy iro, amy fotoan̈a tsy ampoizindro. Karaha zen̈y i Nick. Dekorazy mare izy koa fa tsy navoatendry pan̈ampy amy fanompoan̈a, taminizy 20 taon̈o. Volan̈iny: “Mety zaho foeky donko problemo ay!” Fa izy tsy rivan̈a. Niezaka fo izy nan̈ano tsara fanompoan̈anany. Izy iziô an̈isany Komitiny Sampan̈a.

4. Ino aby raha hidinihintsika amy lahatsoratra ty ato?

⁴ Rivan̈a ma anao fotony misy tanjon̈o mbala tsy takatranao? Izikoa zen̈y raha misy, koràn̈a amy Jehovah raha an̈atiny fônao. (Sal. 37:5-7) Baka io mangataha sosokevitry amy rahalahy matotro, misy ahaizanao hankatsara fanompoan̈anao. Areha tsarabe torohevitry amezandro. Ho moramora aminao hahatakatra tanjon̈o tianao takarin̈y io, izikoa anao man̈ano zen̈y. Fa karaha nataony Melissa in̈y, ndraikindraiky tombontsoa tianao takarin̈y io tsy posibla ho takatranao. Izikoa zen̈y, akory hahavy anao ho ravoravo fo? Hamalian̈a zen̈y, hidinihintsika amy lahatsoratra ty ato: 1) Akory mety hahitanao haravoan̈a? 2) Akory mety hampitombosanao haravoan̈anao? Baka io, 3) tanjon̈o karakory aby mety hampitombo haravoan̈anao?

5. Tokony hifantoko aminino ma atsika izikoa tiho ravoravo? (Mpitoriteny 6:9)

⁵ Ino raha han̈ampy atsika ho ravoravo? Man̈azava zen̈y Mpitoriteny 6:9. (Vakia.) Olo araiky koa mifantoko amy ‘raha hitany maso’, dikanizen̈y izy mankasitraka raha efa anan̈any amiziô. Fa izy ndraiky koa aveziveziny fan̈irian̈anany na tsy vôly man̈iry raha tsy mety ho azony, izy tsy mety ho afapô. Hitantsika baka amy zen̈y fa izikoa atsika tiho ravoravo, atsika mila mifantoko amy tanjon̈o posibla ho takatrantsika.

6. Ino fan̈oharan̈a hidinihintsika iziô, baka io ino raha hianarantsika baka amy zen̈y?

⁶ Maro olo mieritreritry fa tsy posibla foeky atsika ho afapô amy raha ana n̈antsika zen̈y, fotony olombelon̈o tia mianatra man̈ano raha vaovao. Kanefa ny marin̈y aminany, posibla ho ravoravo fo atsika, na ino na ino raha anan̈antsika amy zioty. Man̈azava zen̈y fan̈oharan̈a nataony Jesosy momba talenta, amy Matio 25:14-30 ao. Atsika koa fa mandiniky izio, hanjary ho haintsika raha tokony hatao baka atsika ho ravoravo amy raha efa anan̈antsika. Hianarantsika koa akory atao baka hitombo fo haravoan̈antsika.

7. Fintìn̈a fan̈oharan̈a nataony Jesosy momba talenta.

⁷ Tamy fan̈oharan̈a momba talenta in̈y, nisy lelahy nandeha antany lavitry. Fa talohanizy handeha, izy nikaiky panomponany telo, iro baka tio nan̈ankin̈any talenta. * Tiany hampiasaindro vola aby io amy zen̈y izio hitombo. Efa hainy lelahy io fa samby amy raha vitandro iro telo io, ke araiky namezany talenta dimy, araiky faharoe namiany talenta aroe, avio araiky fahatelo nahazo talenta araiky. Panompo aroe voanalohany niezaka nampitombo volany tômpondro. Fa araiky fahatelo ndraiky tsy nan̈ano raha foeky. Nandandan̈a fo izy, ke nitoravany tômponany izy.

8. Ino ma raha mety ho namparavoravo panompo araiky voanalohany in̈y?

 ⁸ Misaora ravoravo panompo nan̈ankin̈ana talenta dimy in̈y! Volabe baka raha zen̈y. Hita baka amy zen̈y fa izy ten̈a natokisany tômponany. Akory ndraiky panompo faharoe in̈y? Kivy ma izy fotony talenta aroe fo nazony? Akory nataony?

9. Ino ma raha tsy nivolan̈iny Jesosy momba panompo faharoe? (Matio 25:22, 23)

⁹ Vakia Matio 25:22, 23. Jesosy tsy nivolan̈a fa neloko panompo faharoe io fotony aroe fo talenta nazony. Tsy nitretre karaha ty koa izy: ‘Ty fo talenta nazoko zalahy! Zahay karaha samby miasa fo, ke nan̈ino izy nahazo talenta dimy? Izikoa tômponaka tsy afapô aminy asanaka, sitrany aleviko an̈y talenta aroe ty, baka io zaho han̈ano jalinaka.’

10. Nataony panompo faharoe io karakory ma talenta aroe azony in̈y?

¹⁰ Karaha panompo voanalohany in̈y, ten̈a raha maventy tamy panompo faharoe in̈y koa asa nan̈irahany tômponany izy. Niasa angovo jiaby izy nampitombo talenta aroe nazony in̈y, ke nanjary efatra aby izio. Ino vokany? Ravoravo tômponany, ke nan̈ankin̈any andraikitry fan̈ampiny panompo io!

11. Ino raha mila ataonao izikoa tianao hitombo haravoan̈anao?

¹¹ Hitombo koa haravoan̈antsika izikoa ataontsika amy fô jiaby zay raha ankin̈iny amintsika amy fanompoan̈a Jehovah. ‘Mifantoha tsarabe’ aminy asa fitorian̈a, ke ataova zay vitanao aminy asany fiangonan̈a. (Asa. 18:5; Heb. 10:24, 25) Omàn̈a tsarabe raha hianaran̈a amy fivorian̈a, amy zen̈y anao afaka  man̈amia valinteny mampahery. Ataova tsara koa anjaranao amy fivorian̈a andavanandra. Izikoa misy asany fiangonan̈a nankin̈iny aminao, ataova tsara izio avio aza mangataka andra. Aza mieritreritry foeky fa, asa nan̈irahan̈a anao io tsy dia ilain̈a ke tsy mila andanian̈a lera. Ampitombosa fahaizan̈anao. (Ohab. 22:29) Izikoa anao rikian̈a amy fanompoan̈a baka io ataonao tsara zay raha an̈irahan̈a anao, hanjary ho kamarady mare anaro roeny Jehovah. Hitombo koa haravoan̈anao. (Gal. 6:4) Ary ndray azonolo hafa andraikitry nirinao io, hahavita ho ravoravo miaraka aminany fo anao izikoa man̈ano raha jiaby zen̈y.​—Rom. 12:15; Gal. 5:26.

12. Ino nan̈ampy Melissa ndreky Nick ho ravoravo fo?

¹² Asa azonao onon̈o i Melissa, araiky nikoran̈intsika tamy fehintsoratra faha-2 in̈y? Tsy afaka manompo amy Betela na man̈ano Sekolin’ny Mpitory Ilay Fanjakana izy. Kanefa karaha ty ho izy: “Zaho pisava lalan̈a, ke miezaka zaho man̈ano ny farany tsara vitako amy fanompoan̈a. Nan̈andran̈a fomba fitorian̈a isankarazany koa zaho, ke nanjary ravoravo zaho.” Ary akory fo nataony Nick, rahalahy araiky kivy fotony izy tsy navoatendry pan̈ampy amy fanompoan̈a in̈y? Karaha ty ho izy: “Nifantoko tamy raha azoko natao fo zaho, ke nifen̈y zaho nitory ndreky nan̈amia valinteny voaoman̈a tsarabe izikoa fa mivory. Nameno fangatahan̈a hanompo amy Betela koa zaho. Tsy nampoiziko foeky fa taon̈o araiky tafara, nivaly demandinaka.”

13. Ino vokany izikoa anao miezaka man̈ano raha ampan̈anôvin̈y anao amy zioty? (Mpitoriteny 2:24)

¹³ Izikoa anao miezaka man̈ano zay raha ampan̈anôvin̈y anao amy zioty, mety hahazo andraikitry fan̈ampiny anao aminy amaray an̈y, karaha i Nick in̈y. Fa ndray tsy zen̈y raha misy, ho ravoravo ndreky ho afapô karaha Melissa in̈y fo anao izikoa manompo Jehovah amy fô jiaby. (Vakia Mpitoriteny 2:24.) Fa ny raha ten̈a maventy, ho ravoravo mare anao fotony hainao fa Jesosy Kristy Tômpontsika io mankasitraka ezakanao.

14. Ino raha mila alaintsika onon̈o izikoa misy tanjon̈o tiantsika takarin̈y?

¹⁴ Mety efa miezaka anao man̈ano ny farany tsara vitanao amy fanompoan̈a. Kanefa, zen̈y ma mivolan̈a fa efa tsy mila mampitombo fanompoan̈a eky anao? Tsy zen̈y. Mila mifen̈y fo atsika hanan̈a tanjon̈o han̈ampy atsika hahay hitory ndreky hampianatra, baka io han̈ampy piaramanompo. Ho takatrantsika tanjon̈o aby zen̈y izikoa atsika mitady raha mahatsara olo, alohany ain̈intsika.—Ohab. 11:2; Asa. 20:35.

15. Ino aby tanjon̈o han̈ampy anao ho ravoravo fo?

¹⁵ Asa ino aby tanjon̈o mety takarinao? Iangavia Jehovah han̈ampy anao hahay tsarabe raha mety ho vitanao. (Ohab. 16:3; Jak. 1:5) Misy tanjon̈o maromaro nikoran̈iny  fehintsoratra voanalohany. Nan̈ino izikoa mba ataonao tanjon̈o araiky amindro io? Ohatra, anao mety man̈ano pisava lalan̈a pan̈ampy na maharitry, na manompo amy Betela na miasa amy fan̈oren̈ana. Azonao atao koa mianatra volan̈a hafa, na man̈itatra faritany. Ke izikoa tianao ho hay mombamomba iro tanjon̈o aby io, vakia toko faha-10 amy boky Voalamina mba Hanao ny Sitrapon’i Jehovah. Anao koa mety mikoran̈a aminy antipan̈ahy amy fiangonan̈a misy anao. * Izikoa anao miezaka mare manakatra tanjon̈o aby zen̈y, ho hitanolo fandrosoan̈anao, avio hitombo koa haravoan̈anao.

16. Ino raha mety ataonao izikoa misy tanjon̈o tianao takarin̈y, kanefa mbala tsendriky takatranao amy zioty?

 ¹⁶ Akory ndraiky basy izikoa mbala tsendriky takatranao amy zioty araikiaraiky amy tanjon̈o aby io? Lan̈iany tanjon̈o hainao fa ho takatranao fo antsendriky takara. Alô baka atsika handiniky sasany amy zen̈y.

17. Izikoa 1 Timoty 4:13, 15 zahan̈a, ino raha mety ataony rahalahy araiky izikoa izy tihankatsara fahaizany mampianatra?

¹⁷ Vakia 1 Timoty 4:13, 15. Izikoa anao rahalahy vita batisa, ankatsarà fahaizanao mamaky teny ndreky man̈ano kabaro avio mampianatra. Izikoa anao mifen̈y man̈ano zen̈y, ho vitanao han̈ampy olo mitandren̈y anao. Mety han̈ampy anao koa fandinihan̈a leson tsiaraikiaraiky amy bokikely Mifen̈a Mare amy Vakiteny Avio Fampianaran̈a. Isaka anao baka mianatra leson araiky amizio ao, man̈anaova fan̈azaranten̈a. Areha zay raha nianaranao lera anao man̈ano anjara. Mety mangataka sosokevitry amy rahalahy pan̈amia torohevitry pan̈ampy koa anao, * na aminy antipan̈ahy hafa ‘mifen̈y mare amy fivolan̈ana ndreky fampianaran̈a.’ (1 Tim. 5:17) Marin̈y ndraiky fa ilain̈a mahafehy tekniky avoakoran̈a amy bokikely io, kanefa tsy ampy zen̈y. Ataova raha hampatanjaka finoan̈anolo mitandren̈y anao, avio ampia iro hampihatra raha ianarandro. Fan̈anaovanao zen̈y hampitombo haravoan̈anao ndreky ninolo mitandren̈y anao.

18. Ino raha han̈ampy anao hankatsara fahaizanao mitory ndreky mampianatra?

¹⁸ Atsika jiaby samby nirahin̈y hitory ndreky hampianatra. (Mat. 28:19, 20; Rom. 10:14) Tianao hankatsarain̈a ma fahaizanao iro asa matomboko aby io? Ianara bokikely Mifen̈a, baka io diniha tanjon̈o han̈ampy anao hampihatra  raha nianaranao. Hahita sosokevitry tsara koa anao amy Boky Fianaran̈a amy Fivorian̈a Momba Fiain̈anantsika Ndreky Fanompoan̈a ndreky amy video momba raha mety koran̈iny, alefa amy fivorian̈a andavanandra. Ampiasà iro sosokevitry isankarazany amizio ao misy ahitanao aia amindro io ten̈a mahômby. Izikoa anao man̈ano zen̈y, hitombo fahaizanao mitory ndreky mampianatra, avio ho ravoravo fo anao.​—2 Tim. 4:5.

19. Akory mety hanan̈anao toetry tiany Zan̈ahary?

¹⁹ Maro tanjon̈o maventy mety takarinao, fa araiky amy zen̈y: Mifen̈y hanan̈a toetry tiany Zan̈ahary. (Gal. 5:22, 23; Kol. 3:12; 2 Pet. 1:5-8) Akory iziô ataonao izikoa anao tihanan̈a finoan̈a matanjaka? Anao mety mamaky lahatsoratra man̈azava momba zen̈y. Mety mizaha video misy tantarany piaramanompo nahavita niaritry raha sarotro koa anao, fotony efa niboaka tamy Tele JW tantarandro io. Ke anao koa fa mizaha tantara aby zen̈y, iritrireta fomba mety hangalanao tahaka finoan̈andro.

20. Ino raha mila ataontsika baka atsika tsy ho kivy fa ho ravoravo fo?

²⁰ Hay be fa samby man̈iry han̈ano zay vitantsika amy fanompoan̈a aby atsika jiaby. Fa amy donia vaovao atsika vo ten̈a hahavita han̈ano zen̈y amy fomba feno. Parpavianizen̈y, izikoa atsika man̈ano erakany mety ho vitantsika, atsika tsy ho rivan̈a fa ho ravoravo fo. Fa ny raha ten̈a maventy, han̈amia voninahitry Jehovah “Zan̈ahary ravoravo” io atsika. (1 Tim. 1:11) Irarian̈a atsika ho ravoravo fo amy zay raha mety ho vitantsika amy fanompoan̈a Jehovah!