1-2. Ino aby raha hidinihintsika ato?

INO raha tsapanao izikoa misy entan̈a ambesanao kanefa raha io tsy navy amy fotoan̈a niritriretinao? Diso fan̈antinan̈a ma anao? Mitovitovy amy zen̈y raha koran̈iny Ohabolana 13:12. Ho izy ao: ‘Raha antinain̈y koa tsy mety tanteraka, mamparary fô.’ Izikoa ndraiky hainao fa misy antony tsara nahavy entan̈anao io tsy navy tamy fotoan̈any, anao von̈ono hiambin̈y izio fo ndray somary elaela faviany.

² Atsika iziô hizaha toro lalan̈a sasany amy Baiboly man̈ampy atsika ho ‘von̈ono hiambin̈y’ Jehovah. (Mika 7:7) Baka io hidinihintsika lera karakory aby atsika mila maharidraha ke miambin̈y Jehovah han̈ano raha. Farany, hizahavantsika hatsaran̈a ho azonolo von̈ono han̈ano zen̈y.

3. Ino ma raha ianarantsika baka aminy Ohabolana 13:11?

³ Nan̈ino ma atsika ten̈a mila maharidraha? Mamaly zen̈y Ohabolana 13:11. Ho izy ao: “Fanan̈ana koa nazonazo karaha io fo, farandraha mora ravan̈a eky; fa fanan̈ana navory tsihelihely ndraiky tsy vôly mitombo.” Ino ma raha ianarantsika baka amy zen̈y? Misy jery olo araiky izikoa tsy mekimeky man̈ano raha fa maharidraha sady mitandrin̈y tsara.

4. Ino ma toro lalan̈a hitantsika aminy Ohabolana 4:18?

⁴ Ohabolana 4:18 mivolan̈a fa ‘lalan̈anolo marin̈y miran̈a hazavan̈any andra maraindrain̈y, ke mahaimazava fo izio firaka andra mantsan̈a be in̈y.’ Hitantsika baka aminy andininy io fa ataony Jehovah mazava tsihelihely amy panomponany raha handeha hataony. Andininy io koa man̈ampy atsika hahay  fa mandeha tsihelihely fandrosoan̈a ataony Kristianin̈y araiky, fa tsy indraiky mipàka. Mila fotoan̈a izy vo hahavita hiova ndreky ho tsara fihavanan̈a amy Jehovah. Izikoa atsika mazoto mianatra Baiboly, baka io man̈araka torohevitriny Jehovah azontsika baka amy Volan̈anany ndreky fandaminan̈anany, hanjary hitovy tsihelihely amy toetriny Kristy toetrintsika. Hitombo koa raha ho haintsika momba Zan̈ahary. Atsika iziô handiniky fan̈oharan̈a nampiasainy Jesosy han̈azavan̈a zen̈y.

5. Ino fan̈oharan̈a nampiasainy Jesosy han̈aboahan̈a fa mandeha tsihelihely fan̈ovoan̈a hataonolo araiky?

⁵ Nampiasa fan̈oharan̈a momba famafazan̈a voandraha i Jesosy, han̈azavan̈a fa mitombo tsihelihely an̈atiny fônolo manan̈a fô tsara hafatra momba Fanjakan̈any Zan̈ahary. Ho izy: “Mandry izy koa fa alin̈y. Maraindrain̈y, izy mifoha. Voa nafafiny aby in̈y maniry avio mitombo, kanefa tsy hainy foeky tamy fomba akory. Iô fo tany mamokatra ho azy tsihelihely. Voanalohany, miboaka antsendriky tahony, avio maniry fahiny; farany amy zay, feno voany amy fahiny io.” (Marka 4:27, 28) Ino ma raha tiany Jesosy havian̈a? Tihivolan̈a izy tio fa karaha ataony kakazo maniry tsihelihely in̈y, miova tsihelihely koa olo araiky, izy koa fa man̈eky hafatra momba Fanjakan̈a io. Ohatra iziô, olo ampianarintsika Baiboly koa fa manomboko mihavan̈a amy Jehovah, maro tsara fan̈ovoan̈a ho hitantsika hataondro. (Efes. 4:22-24) Kanefa tsy tokony hadin̈antsika, fa Jehovah zaraiky fo mampitombo voandraha io.​—1 Kor. 3:7.

6-7. Ino raha ianarantsika baka amy fomba niasany Jehovah tany ty?

⁶ Jehovah koa fa man̈ano raha, izy tsy man̈ano raha zara fa vita, fa manokan̈a fotoan̈a ampy tsara izy hankifan̈a izio. Nan̈ino? Fotony tiany hamian̈a voninahitry an̈aranany, avio izy tihan̈ampy olo. Jehovah koa fa niasa tany ty, nataony tsihelihely raha jiaby momba izity, amy zay tany ty mety ipitrihanolo.

⁷ Koran̈iny Baiboly ao fomba nan̈amboarany Jehovah tany ty. Izy ho izy nan̈ano ‘meziranany’, avio nandatsaka ndreky nan̈apetraka  ‘fototrony tany ty.’ (Joba 38:5, 6) Nangala fotoan̈a koa izy nandiniky raha namboariny. (Gen. 1:10, 12) Miniminia hely baka raha tsapandro anjely aby io, iro koa fa nahita raha vaovao namboariny Jehovah. Ravoravo mare iro, ke nandrômbo lastio iro sady nan̈ano hira hideran̈a Jehovah. (Joba 38:7) Ino ma raha ianarantsika baka amy zen̈y? Mandeha andrivony taon̈o maro Jehovah niasa tany, lakintan̈a, ndreky raha jiaby manampahin̈ana. Fa nangala fotoan̈a fo izy nandinihan̈a raha jiaby nataony, ke hitany fa “ten̈a tsara” iro io.​—Gen. 1:31.

8. Ino ma raha handeha hidinihintsika iziô?

⁸ Hitantsika tio fa misy toro lalan̈a maro be amy Baiboly ao mampianatra fa ten̈a ilain̈a maharidraha. Atsika iziô handiniky lera karakory atsika tsy maintsy miambin̈y Jehovah.

9. Lera karakory ma atsika mila miambin̈y Jehovah?

⁹ Lera atsika miambin̈y valimbavaka. Misy lera atsika mangataka angovo hieratan̈a fitsapan̈a na hialan̈a amy raha ratsy nahazatra atsika. Kanefa, atsika mety mahatsapa fa karaha tsy mety valiany Jehovah vavakantsika. Ino marin̈y ma mahavy Jehovah tsy direkty mamaly vavaka jiaby ataontsika?

10. Nan̈ino ma atsika mila maharidraha izikoa fa miambin̈y valimbavaka baka amy Jehovah?

¹⁰ Jehovah ten̈a mitandren̈y vavakantsika. (Sal. 65:2) Amy Jehovah, mino izy ndreky matoky izy atsika matoa mivavaka aminany baka amy fô. (Heb. 11:6) Tiany Jehovah ho hita koa fa ten̈a von̈ono han̈ano raha mifan̈araka amy vavaka ataontsika atsika sady tihan̈ano sitraponany. (1 Jaona 3:22) Ary akory fo basy atsika koa mivavaka baka Jehovah han̈ampy atsika hiala amy raha ratsy mahazatra atsika? Amy leranizen̈y, atsika mila maharidraha sady mifen̈y mare hiova. Jesosy lastio efa nivolan̈a fa tsy voatery hivaliany Jehovah iô ny iô vavakantsika. Ho izy: “Anaro koa tsy vôly mangataka, hahazo. Anaro koa tsy vôly mitady, hahita. Anaro koa tsy vôly mikonkon̈o, hibiafin̈y. Fotony lan̈iany olo mangataka, hahazo; lan̈iany olo mitady, hahita; avio lan̈iany olo mikonkon̈o, hibiafin̈y.” (Mat. 7:7, 8) Izikoa atsika man̈araka torohevitry io, ke ‘maharitry mivavaka’, atsika manjary matoky fa Babantsika andan̈itry an̈y mitandren̈y atsika sady hamaly vavakantsika.​—Kol. 4:2.

11. Nan̈ino Hebreo 4:16 io ten̈a man̈ampy atsika izikoa atsika mihevitry fa karaha tsy mety valiany Jehovah vavakantsika?

¹¹ Ndray karaha ela fahitantsika valimbavaka baka amy Jehovah, izy efa nampan̈anten̈a fa hivaliany ‘amy fotoan̈a mety’ vavakantsika. (Vakia Hebreo 4:16.) Ke izikoa tsy malaky mivaly erakany itiavantsika izy vavakantsika, atsika tsy tokony han̈ady izy foeky. Maro iziô olo efa nivavaka tan̈atiny taon̈otaon̈o, fotony iro tihahita fotoan̈a haviany Fanjakan̈any Zan̈ahary ndreky hamaran̈ana donia ratsy ty. Ndray Jesosy koa mba nan̈iraka atsika hivavaka momba zen̈y. (Mat. 6:10) Akory eky izikoa tsy navy tamy fotoan̈a niritriretanao izy farany donia ty? Hanjary tsy hino Zan̈ahary eky ma anao? Halifàn̈a zen̈y! (Hab. 2:3; Mat. 24:44) Hendry ndraiky atsika izikoa tsy vôly miambin̈y Jehovah ndreky matoky fa izy hamaly vavakantsika. Ho avy amy fotoan̈any tsarabe farany donia ty, fotony Jehovah efa nifidy ‘andra ndreky lera’ havianizio, sady amy fotoan̈a ten̈a mety aminolo jiaby.​—Mat. 24:36; 2 Pet. 3:15.

12. Amy lera karakory ma mety ho sarotro amintsika miambin̈y Jehovah?

¹² Lera atsika miaritry raha tsy rariny. Olo amy donia ty tia mampijaly olo, intsaka eky olo tsy firenena araiky aminany na tsy miran̈a  foko, na tsy miran̈a kolerany hoditry, na tsy miran̈a tany favian̈a aminany. Sasany ndraiky ampijalianolo fotony iro misy antsa na marary sain̈y. Maro panompony Jehovah niaritry raha tsy rariny, fotony iro mino raha koran̈iny Baiboly. Ke atsika koa fa avoa raha karaha zen̈y, mila alaintsika onon̈o raha nivolan̈iny Jesosy ty: “Lan̈iany miaritry firaka amy farany fo ho voavonjy.” (Mat. 24:13) Akory ndraiky izikoa hainao fa misy piaramanompo araiky nan̈ano fahotan̈a maventy? Izikoa fa hainao fa efa ren̈indro antipan̈ahy aby io raha zen̈y, anao aza midikiditry amizio eky. Miareta hely, baka io ambilà iro handamin̈y izio amy fomba itiavany Jehovah izy. Ino marin̈y ma raha mila ataondro antipan̈ahy aby io izikoa fa misy olo nan̈ano fahotan̈a maventy?

13. Ino ma raha tiany Jehovah hataony antipan̈ahy, izikoa fa misy olo nan̈ano fahotan̈a maventy?

¹³ Izikoa fa hainy antipan̈ahy fa nan̈ano fahotan̈a maventy marin̈y Kristianin̈y araiky, iro mivavaka sady mangataka “fahendrena” amy Jehovah, amy zay ho haindro fomba fihevitriny Jehovah momba izio. (Jak. 3:17) Tanjon̈ondro han̈ampy olo nan̈ano fahotan̈a io ‘hiala amy lalan̈a diso narehany’ izikoa mbala azo atao. (Jak. 5:19, 20) Tiandro harovan̈a mare koa fiangonan̈a, avio tiandro hampahirezin̈y koa olo tafintohin̈y baka tamy raha nataonolo io. (2 Kor. 1:3, 4) Antipan̈ahy koa fa mandamin̈y raha momba fahotan̈a maventy, ataondro antsendriky raha hahaizandro tsarabe raha jiaby mifôtotro izio. Ke raha zen̈y mety hahadin̈y ela. Iro mivavaka, baka io iro mitandrin̈y tsara koa fa man̈amia torohevitry baka amy Soratra Masin̈y. Miezaka iro man̈itsy olo nan̈ano fahotan̈a io, ‘erakany anton̈ony.’ (Jer. 30:11) Iro antipan̈ahy aby io koa tsy hiambin̈y ela loatra vo handamin̈y problemo io, fa ndray izy man̈ano zen̈y, iro koa tsy hangala fanapahankevitry mekimeky. Hahazo hatsaran̈a maro olo an̈ivony fiangonan̈a, izikoa iro antipan̈ahy aby io man̈araka taridalan̈any Jehovah. Ndray iro efa niezaka nandamin̈y problemo io tamy fomba tsara, ny raha misy, mety mbala misy olo tsy manantsin̈y fo ho tafintohin̈y. Izikoa zen̈y raha mahazo anao, ino raha mety ataonao baka ho kirikiry alahelonao?

14. Tantaranjovy amy Baiboly ao mety han̈ampy anao, izikoa nisy piaramanompo nan̈ano raha nampalahelo anao?

¹⁴ Efa navy nisy olo na piaramanompo ma nan̈ano raha nampalahelo fônao? Misy tantaranolo amy Baiboly ao mety han̈ampy  anao hiambin̈y Jehovah, parpandaminany raha tsy rariny zen̈y. An̈isanizen̈y iziô i Josefa. Nampijaly izy mare iro zokiny aby io. Kanefa, izy tsy nifantoko taminy hadisovan̈andro zen̈y foeky, avio izy tsy nanan̈a jery ratsy tamindro. Izy niezaka nanompo Jehovah fo, ke Jehovah nan̈amia hatsaran̈a izy, fotony izy naharidraha ndreky niaritry fo. (Gen. 39:21) Vitany Josefa nan̈ambela hadisovan̈anolo nampijaly izy aby in̈y. Hitany koa fomba nitahiany Jehovah izy. (Gen. 45:5) Karaha Josefa, hahazo angovo koa atsika izikoa miambin̈y Jehovah ndreky man̈ambela izy handamin̈y raha tsy rariny.​—Sal. 7:17; 73:28.

15. Ino raha nan̈ampy ranabavy araiky niaritry raha tsy rariny?

¹⁵ Marin̈y fa mety tsy hitovy be amy raha niaretany Josefa raha tsy rariny mahazo atsika. Fa ndray zen̈y, malahelo fo atsika izikoa fa miaritry raha tsy rariny, na ino zen̈y na ino. Ke izikoa misy raha tsy mampifan̈araka atsika aminolo, na aminolo tsy panompony Jehovah zen̈y, mahatsara atsika fo man̈araka toro lalan̈any Baiboly. (Fil. 2:3, 4) Ohatra iziô, nalahelo mare ranabavy araiky izikoa fa nan̈aratsy izy tamy piaramiasa hafa olo fiasan̈a araiky taminany. Ranabavy io tsy direkty nan̈ampatra helokonany, fa nangala fotoan̈a izy nandiniky modely nambelany Jesosy. Jesosy koa fa nitihitihinolo, izy tsy namaly foeky. (1 Pet. 2:21, 23) Nidinihiny ranabavy io raha zen̈y, ke tapakevitry tsy hamaly faty foeky izy. Tafara, hainy ranabavy io fa kaiky man̈angy fiasan̈a araiky aminany io marary mare sady tan̈atiny asaloha. Ke tontohitry ranabavy io fa mety tsy kiniany aby raha nivolan̈iny jiaby in̈y. Ravoravo ranabavy io izikoa fa nahavita niaritry raha tsy rariny io, sady nilamin̈y jerinany.

16. Ino raha hampahery anao izikoa anao miaritry raha tsy rariny? (1 Petera 3:12)

¹⁶ Izikoa anao miaritry raha tsy rariny na misy raha hafa mampalahelo anao, tsaraova fa Jehovah marikitry ‘olo tôrotôro fô.’ (Sal. 34:18) Tiany anao, fotony anao tsy vitany miaritry fo fa ankin̈inao aminany koa raha man̈avesatra anao. (Sal. 55:22) Izy Pitsara tany jiaby. Hitany raha jiaby mandalo. (Vakia 1 Petera 3:12.) Akory fo basy izikoa tsy hitanao foeky fomba hamahan̈a problemonao? Von̈ono hiambin̈y Jehovah ma anao?

17. Ino ma raha nampan̈antin̈ainy Jehovah aminy Isaia 30:18?

¹⁷ Tsy ho ela, Babantsika andan̈itry an̈y han̈amia atsika hatsaran̈a marobe. Hampiasa Fanjakan̈anany izy han̈anaovan̈a zen̈y. Karaha ty volan̈iny Isaia 30:18: ‘Jehovah tsy vôly miambin̈y fotoan̈a han̈aboahan̈a famindrampô aminaro, ke hitsangana izy hamindra fô aminaro. Fotony Jehovah Zan̈ahary man̈ano ny rariny. Sambatra lan̈iany olo tsy vôly miambin̈y izy.’ Ke ho maro hatsaran̈a ho azonolo tsy vôly miambin̈y Jehovah, rango iziô firaka amy donia vaovao.

18. Ino aby raha tsara miambin̈y atsika?

¹⁸ Vahoakany Jehovah koa fa tody amy donia vaovao, iro tsy hiaritry raha jiaby mampiôry iro amy zioty io eky. Efa tsy ho hisy eky raha tsy rariny ndreky alahelo. (Apok. 21:4) Amy leranizen̈y, atsika tsy hiasaloha eky tsao tsy hahazo raha ilain̈a amy fiain̈ana, fotony hanan̈a ny ampy aby olo jiaby. (Sal. 72:16; Isaia 54:13) Ten̈a ho tsara ankitin̈y fiain̈ana amy zen̈y!

19. Man̈oman̈a atsika aminino ma Jehovah amy zioty?

¹⁹ Parpavianizen̈y, Jehovah efa man̈oman̈a atsika ho von̈ono hiain̈y amy donia vaovao hindesiny fanjakan̈anany. Ampiany atsika hiala amy raha ratsy mahazatra atsika. Ampiany koa atsika hanan̈a toetry tiany. Ke anao aza rivan̈a, avio aza vôly manompo Jehovah. Ho maro hatsaran̈a miambin̈y atsika. Ke irarian̈a atsika haharidraha fo ke hiambin̈y Jehovah han̈atanteraka raha efa nivolan̈iny aby zen̈y.